NO TEIE vivi no Marite Apatoa, aita te roa o to ˈna nau tariˈa i tia aˈe hoê milimetera. Tera râ, ua tuea te faanahoraa o to ˈna tariˈa i to te taata. Ua rau te taˈi ta ˈna e faaroo noa ˈtu te atea. Ei hiˈoraa, e ite oia i te taa-ê-raa o te taˈi o te tahi atu vivi e te taˈi puai roa ˈtu â ta te taata e ore e faaroo o te iore pererau o tei imi ra i te maa.

A hiˈo na: Tei nia te tariˈa o te vivi i to ˈna na avae i mua. Mai te tariˈa o te taata, e haru e e faataa te tariˈa o teie vivi i ta ˈna e faaroo. Ua itea i te mau aivanaa i te tahi pute taa ê e au i te hoê popo roroa tei î i te pape i roto i te tariˈa o tera vivi. Ia faaauhia te reira i te mero i roto i te tariˈa o te tahi atu mau animara, mea haihai roa ïa, ua tuea râ te faanahoraa. No tera pute e riro ai te tariˈa o teie vivi i te mea faahiahia.

E taata haapii Daniel Robert i te hoê fare haapiiraa tua toru no te ihi ora i Beretane. Ua parau oia e maoti tera mau maimiraa e hamani ai te feia îite i te matini haihai aˈe o te tauturu i te taata ia faaroo maitai atu â. Te tiaturi atoa nei vetahi e hamani i te matini apî o te haru i te taˈi ta te taata e ore e nehenehe e faaroo e o te hiˈopoa i roto i te tino taata. E faufaa-atoa-hia ïa te mau fare maˈi i tera itearaa.

Eaha to oe manaˈo? Mea tupu noa anei te faanahoraa faahiahia o te tariˈa o teie vivi? Aore ra mea poietehia anei?