I muri iho i to Iesu horoaraa i ta ˈna Aˈoraa i nia i te mouˈa, haere atura oia i Kaperenaumi, e tapiri maira te tahi mau aratai ati Iuda ia ˈna. Ua tonohia mai ratou e te hoê taata ê tiaraa teitei, e raatira hanere o te nuu Roma.

E maˈi ino mau to te tavini here a taua raatira faehau ra, e fatata oia i te pohe. Noa ˈtu e ere te raatira faehau i te ati Iuda, te taparuparu ra oia ia Iesu i te tauturu. Ua faaite te mau ati Iuda ia Iesu e “te tarava noa ra” te tavini a taua raatira ra “i te fare e hapepa oia e te pohe roa ra oia i te mauiui.” (Mataio 8:6) Haapapu maira te mau aratai ati Iuda ia Iesu e mea tano ia tauturu i teie raatira faehau, a na ô mai ai: “Mea here hoi na ˈna to tatou nunaa e ua faatia oia iho i ta matou sunago.”—Luka 7:4, 5.

Faarue ihora Iesu i te mau aratai ati Iuda no te haere i ǒ te raatira faehau. A piri atu ai oia, tono maira te raatira faehau i te tahi mau hoa, tei na ô mai: “E te Fatu, eiaha e faaohipa rahi ia oe, eita hoi e tano ia ˈu ia farii ia oe i to ˈu fare. No reira vau i ore ai i haere atu ia oe ra.” (Luka 7:6, 7) Tera te haehaa mau no te hoê taata ua matau i te faaue i te faehau! Te ite-atoa-hia ra e mea taa ê roa oia i te tahi atu no Roma o te rave ino i ta ratou mau tîtî.—Mataio 8:9.

Papu ua ite taua raatira faehau ra e eita te mau ati Iuda e amuimui i te taata ěê. (Ohipa 10:28) Ua haamanaˈo paha oia i te reira i to ˈna aniraa i to ˈna mau hoa e taparuparu ia Iesu: “A parau noa . . . i te tahi parau, e ia ora te maˈi o ta ˈu tavini.”—Luka 7:7.

Maere ihora Iesu i ta ˈna i faaroo mai, e na ô atura: “E parau atu vau: Aita vau i ite aˈenei i te faaroo rahi mai teie i Iseraela.” (Luka 7:9) I to te mau hoa o te raatira faehau hoˈiraa i ǒ ˈna, ite aˈera ratou e ua ora roa te maˈi ino mau o ta ˈna tavini.

Ia Iesu i faaora i te maˈi o teie tavini, haapapu ihora oia e e fanaˈo te feia ěê e faaroo to ratou i te tahi mau haamaitairaa, a parau ai oia: “E rave rahi no hitia o te râ e no tooa o te râ o te haere mai, a tarava ˈtu ai i te amuraa maa e o Aberahama, Isaaka e Iakoba i roto i te Faatereraa arii o te raˈi.” E te mau ati Iuda ïa aita e faaroo to ratou? Ua parau Iesu e “e hurihia ïa i roto i te poiri i rapae. I reira ratou e taˈi ai e to ratou niho e maˈuˈu ai i te ahoaho.”—Mataio 8:11, 12.

No reira, e faaruehia e te Atua te nunaa ati Iuda tei ore i farii i te haamaitairaa i pûpûhia ia ratou na mua e apiti i te Mesia i roto i te Faatereraa arii. E fariihia râ te feia e ere i te ati Iuda ia tarava i ta ˈna amuraa maa, ei auraa parau, “i roto i te Faatereraa arii o te raˈi.”