Te faahanahanaraa i te reva. Te tiaturi ra te mau Ite no Iehova e te piˈoraa i raro i mua i te hoê reva aore ra te faahanahanaraa i te reira, o te rave-pinepine-hia ma te hoê himene aiˈa, e ohipa faaroo ïa o te na ô ra e no ǒ mai te ora eiaha i te Atua, i te Hau râ aore ra to ˈna feia faatere. (Isaia 43:11; Korinetia 1, 10:14; Ioane 1, 5:21) O Nebukanesa, arii o Babulonia i tahito ra, te hoê o taua feia faatere ra. Ia maere te nunaa i to ˈna tiaraa arii e to ˈna itoito rahi i te pae faaroo, ua faatia teie arii puai i te hoê tii rahi e ua faahepo i to ˈna mau taata ia tipapa i raro ia hautihia te upaupa, mai te hoê himene aiˈa. Aita râ e toru Hebera, Sadaraka, Meseka e Abede-nego, i tipapa i raro i mua i te hohoˈa, noa ˈtu e o te pohe te utua.—Daniela, pene 3.

I to tatou nei tau, “o te reva te taipe matamua roa o te faaroo e te taoˈa tumu o te haamoriraa no te here aiˈa,” ta te taata tuatapapa ra o Carlton Hayes ïa i papai. “E tatara te mau tane i to ratou taupoo ia faahaerehia te reva na mua ia ratou. E no te arue i te reira, e papai te mau rohipehe i te mau pehepehe e e  himene te mau tamarii i te mau himene aiˈa.” Ua papai atoa oia e e “mahana moˈa” atoa to te here aiˈa, mai te 4 no Tiurai i te Hau Amui no Marite, e “peata e e aito” to ˈna e e “hiero,” aore ra vahi haamoriraa. I roto i te hoê oroa huiraatira i Beresilia, ua faˈi te faatere hau rahi o te mau nuu: “Te faahanahanahia ra e te haamorihia ra te reva . . . mai te aiˈa atoa e haamorihia ra.” “Mea moˈa te reva, mai te satauro,” ta te hoê ïa buka ite rahi i parau mea maoro aˈenei.—The Encyclopedia Americana.

Aita i maoro roa aˈenei, ua tapao taua noa buka ite rahi ra e “e faaiteraa” te himene aiˈa “i te huru aau aiˈa o te faaô pinepine mai i te tiaororaa i te Atua ia aratai e ia paruru i te nunaa aore ra to ratou feia faatere.” Ua tano iho â ïa te mau tavini a Iehova i te hiˈo i te mau oroa here aiˈa, mai te faahanahanaraa i te reva e te mau himene aiˈa, ei oroa faaroo. Inaha, i te tatararaahia te parau o te oreraa te mau tamarii a te mau Ite no Iehova e faahanahana i te reva aore ra e horeo i te taiva ore e te auraro i roto i te mau fare haapiiraa i te Hau Amui no Marite, ua parau te buka Te huru taata no Marite (Beretane): “I roto i te tahi mau tupuraa, ua haapapu atura te Tiripuna Teitei e e oroa faaroo tera mau oroa e faatupuhia i te mau mahana atoa.”

Noa ˈtu e eita ratou e apiti i te mau oroa ta ratou e hiˈo ra ei oroa aita i roto i te Bibilia, te faatura ra iho â te nunaa o Iehova i te tiaraa o vetahi ê e na reira. Te faatura atoa ra ratou i te mau reva aiˈa ei taipe e te farii ra i te feia faatere tei haamauhia ma te tia ei “feia mana” e haa ra ei “tavini . . . na te Atua.” (Roma 13:1-4) No reira te mau Ite no Iehova e pee ai i te aˈoraa e pure “no te mau arii e no te feia tiaraa teitei atoa.” Te tumu râ e na reira ˈi tatou, “ia nehenehe tatou ia ora hau noa e te haafifi-ore-hia i te haamoriraa i te Atua anaˈe ma te tura.”—Timoteo 1, 2:2.

Te maitiraa i roto i te mau maitiraa poritita. Te faatura ra te mau Kerisetiano mau i te tiaraa o vetahi ê e maiti. Aita ratou e patoi ra i te mau maitiraa, e te haa amui ra ratou e te feia faatere i maitihia. Teie râ, eita roa ˈtu ratou e faaô i roto i te mau ohipa poritita a te mau nunaa. (Mataio 22:21; Petero 1, 3:16) E nafea ïa te hoê Kerisetiano i te mau fenua e mea faahepo te maitiraa aore ra e hiˈo-ino-hia te feia o te ore e haere e maiti? Ma te haamanaˈo e ua haere Sadaraka, Meseka e Abede-nego i te vahi  papu o Dura, e faaoti paha ïa te hoê Kerisetiano i roto i te hoê â tupuraa e haere i te vahi maitiraa mai te peu e e faatia to ˈna manaˈo haava. E ara râ oia i te ore e ofati i to ˈna tiaraa amui ore. E mea maitai ia haapao oia i teie na aratairaa Bibilia e ono:

1. “E ere” te mau pǐpǐ a Iesu “no teie nei ao.”—Ioane 15:19.

2. Te tia ra te mau Kerisetiano no te Mesia e no ta ˈna Faatereraa arii.—Ioane 18:36; Korinetia 2, 5:20.

3. Mea tahoê te amuiraa Kerisetiano, hoê â hoi tiaturiraa, e te faaite nei to ˈna mau mero te tahi i te tahi i te here mai to te Mesia.—Korinetia 1, 1:10; Kolosa 3:14.

4. E turu atoa te feia o te maiti i te hoê tia mana i ta ˈna mau ohipa e rave.—A tapao i te mau aratairaa Bibilia e matara ra i roto i te Samuela 1, 8:5, 10-18 e te Timoteo 1, 5:22.

5. Ua hiˈo Iehova i te hinaaroraa o Iseraela i te hoê faatere taata ei tapao faaite e ua faarue ratou ia ˈna.—Samuela 1, 8:7.

6. E titauhia ia faaitoito te mau Kerisetiano i te paraparau no nia i te Faatereraa arii a te Atua i te mau taata atoa noa ˈtu eaha ta ratou tiaturiraa poritita.—Mataio 24:14; 28:19, 20; Hebera 10:35.

Te ohipa tivira. I te tahi mau fenua, e titau te Hau ia rave te feia o te patoi i te tau faehau i te tahi ohipa tivira no te hoê area tau. Mai te peu e e faaotiraa ta tatou e rave i roto i taua tuhaa ra, e mea maitai ia pure tatou no nia i te reira, peneiaˈe e aparau atu e te hoê Kerisetiano feruriraa paari, a rave atu ai i ta tatou faaotiraa ma te hoê manaˈo haava tei haamaramaramahia.—Maseli 2:1-5; Philipi 4:5.

Te ani mai ra te Parau a te Atua ia “faaroo i te mau faatereraa e te feia mana, ia ineine no te mau ohipa maitatai atoa,” e “ei haerea au noa” to tatou. (Tito 3:1, 2) Ma te haamanaˈo i te reira, e nehenehe tatou e ui ia tatou iho: ‘Ia farii au i te ohipa tivira e pûpûhia mai, e ofati anei au i to ˈu tiaraa Kerisetiano amui ore? E riro anei au i te apiti i te haapaoraa hape?’ (Mika 4:3, 5; Korinetia 2, 6:16, 17) ‘Ia rave au i tera ohipa, e fifi anei au i te haapao i ta ˈu mau hopoia Kerisetiano aore ra e haapae roa anei au i te reira?’ (Mataio 28:19, 20; Ephesia 6:4; Hebera 10:24, 25) ‘E ia rave au i taua ohipa ra, e nehenehe anei au ia au i ta ˈu porotarama,  e haapao atu â i ta ˈu mau ohipa pae varua, e apiti atoa paha i te taviniraa taime taatoa?’—Hebera 6:11, 12.

Ia faaoti te hoê Kerisetiano ia au i to ˈna manaˈo haava e e nehenehe o ˈna e rave i te hoê ohipa tivira, a ore atu ai oia e tuuhia i roto i te fare tapearaa, e mea tia ia faatura te tahi atu mau Kerisetiano i ta ˈna faaotiraa. (Roma 14:10) Ia manaˈo râ oia e eita o ˈna e nehenehe e rave i tera ohipa, ia faatura atoa vetahi ê i ta ˈna faaotiraa e tia ˈi.—Korinetia 1, 10:29; Korinetia 2, 1:24.