Ua paari au i te hoê tuhaa fenua no te oire no Montréal. E ono avaˈe to ˈu, ua pohe to ˈu papa, e ua vaiiho mai i to ˈu mama e te mau hopoia atoa. O vau te hopea i roto i te hoê utuafare e vaˈu tamarii.

A paari ai au, tei roto ïa to ˈu oraraa i te raau taero, te hauti pere moni, te ohipa ino, e te amuimuiraa i te feia taparahi taata. I te ahururaa o to ˈu matahiti ua haamata vau i te rave i te ohipa no te feia taiata e te feia horoa tarahu. Pinepine au i te haavare, e mea au roa na ˈu i te taviri i te taata ma te mau ravea e rave rau, mai te peu e nehenehe ta ˈu. No ˈu, e au te reira i te raau taero.

I te 14raa o to ˈu matahiti, ua aravihi roa vau i roto i te taviriraa i te taata. Ei hiˈoraa, e hoo mai au e rave rahi uati, fifi rima, e tapea rima e e ere râ i te auro ta ˈu e titiro i nia iho 14 carats auro. E hoo atu vau i te reira i te mau aroâ, te vairaa pereoo o te mau fare toa rarahi. Mea ohie ia noaa mai te moni. I te hoê taime ua noaa mai ia ˈu 10 000 moni no Kanada i te hoê noa mahana!

I te 15raa o to ˈu matahiti, ua tiavaruhia vau mai roto mai i te hoê pû, e tauturu ra i te mau tamarii ohipa ino. Aita ïa to ˈu e vahi nohoraa, e taoto vau i te mau aroâ, i te mau vahi faafaaearaa aore ra i ǒ te mau hoa.

No ta ˈu mau ohipa taviriraa, pinepine au i te uiuihia e te mutoi. I te mea aita vau e hoo atu i te mau taoˈa eiâhia, aita ïa vau i mau i te auri. Tera râ, ua aufau vau i te utua no te taviriraa, parau faatia haavare e te hooraa aita e parau faatia. Ma te matau ore ia vetahi, ua tamau noa vau i te rave i te ohipa mai ta ˈu i na reira i te ahururaa o to ˈu matahiti. E ohipa atâta teie e i te tahi mau taime e pupuhi ta ˈu. I te tahi atu mau taime, ua ohipa vau e te hoê faanahonahoraa e ohipa taparahi taata ta ratou.

I te 17raa o to ˈu matahiti, to ˈu faarooraa no te taime matamua no nia i te Bibilia. Te ora ra vau e to ˈu apiti a haamata ˈi o ˈna i te haapii i te Bibilia e te mau Ite no Iehova. Aita râ vau i farii i te mau ture aveia o te Bibilia. Ua faarue au ia ˈna no te faaea i te tahi atu vahine ta ˈu i matau aˈena.

Ua taui roa to ˈu oraraa i te taime a haapii ai to ˈu apiti e te mau Ite no Iehova! Ua taui oia i to ˈna oraraa, e ua maere roa vau i to ˈu iteraa ua riro mai oia ei vahine mǎrû e te faaoromai rahi. Ua farii au i te hoê titau-manihini-raa no te hoê putuputuraa i te piha a te Basileia a te mau Ite no Iehova. Ua farii-popo-hia vau e te mau taata maitai e te mǎrû. Mea taa ê roa i te ao ta ˈu i matau! Aita roa vau i ite aˈenei i te reira i roto i to ˈu utuafare. I to ˈu tamariiraa ua erehia vau i te here e te hamani maitai. Te mahanahana ta ˈu i ite i te mau Ite no Iehova, tera mau ta ˈu i hinaaro. I to te hoê Ite pûpûraa mai i te haapiiraa Bibilia, ua oaoa roa vau i te fariiraa. Na te mau mea ta ˈu i haapii i roto i te Bibilia i taui i to ˈu oraraa.

Ua opua vau e eiâ na muri e piti hoa to ˈu no te aufau i ta ˈu mau tarahu i hau atu i te 50 000 moni no Kanada. Auê au i te oaoa i te oreraa vau e na reira! Ua na reira râ na hoa e piti to ˈu, ua tapeahia hoê e ua pohe râ te tahi atu.

A tamau ai au i te haapii i te Bibilia, ua ite au e mea rahi â te mau tauiraa ta ˈu e rave. Ei hiˈoraa, ua haapii au eaha ta te Bibilia e parau ra i te Korinetia 1, 6:10: “Te eiâ, e te nounou, e te inu ava, e te parau ino, e te taviri taata, eita roa ˈtu ïa e fatu i te Faatereraa arii a te Atua.” I to ˈu taioraa i teie irava, ua taˈi roa vau i te ino rahi o to ˈu tupuraa. Ua taa ia ˈu, e titauhia ia ˈu ia taui roa i to ˈu oraraa. (Roma 12:2) E taata ino roa vau, e tera to ˈu huru oraraa.

Ua haapii atoa râ vau i roto i te Bibilia i te aroha hamani maitai e te faaoreraa i te hara o Iehova. (Isaia 1:18) Ua tamau noa vau i te pure, ma te taparuparu i ta Iehova tauturu no te tiamâ mai i to ˈu huru oraraa. Maoti ta ˈna tauturu, ua taui rii mǎrû noa mai au i to ˈu huru. Te taahiraa faufaa roa ta ˈu i rave, to mâua ïa faaipoiporaa.

E 24 matahiti to ˈu, ua faaipoipohia e e toru tamarii ta mâua. I teie nei, e titauhia ia ˈu ia imi i te ohipa maitai. Mea iti roa to ˈu ite e aita ta ˈu e parau tuite. Ua pure faahou vau ia Iehova, e haamata ˈtura vau i te imi i te ohipa. Ua parau vau i te tahi mau paoti ohipa e te hinaaro nei au e taui i to ˈu oraraa, e i te rave i te ohipa ma te haavare ore. I te tahi mau taime, e faataa vau e te haapii nei au i te Bibilia e te hinaaro nei au e riro ei taata maitai. E rave rahi mau paoti ohipa aita i horoa mai i te ohipa na ˈu. I to ˈu faaite-roa-raa i to ˈu tupuraa na mua ˈtu, ua parau mai te taata tihepu: “Aita vau i ite no te aha, e au ra ê, te parauhia mai ra ia ˈu ia tihepu ia oe.” Ua ite au, tera te pahonoraa a Iehova i ta ˈu mau pure. I muri iho, ua bapetizohia mâua ta ˈu vahine ei Ite no Iehova.

I teie mahana te ora nei au maoti te faaohiparaa i te mau faaueraa tumu Bibilia e te hoê oraraa Kerisetiano. E utuafare oaoa to ˈu. Ua tiaturi au e ua faaore mai Iehova i ta ˈu mau hara e te oaoa nei au e manaˈo haava mâ to ˈu.

Ua tavini au 14 matahiti i roto i te taviniraa taime taatoa, ma te tauturu ia vetahi ê ia ite eaha ta te Bibilia e haapii ra, e aita i maoro aˈe nei ua apiti mai ta ˈu vahine i roto i te taviniraa taime taatoa. I te roaraa o na 30 matahiti, ua tauturu vau e 22 hoa rave ohipa ia riro mai ei tavini na Iehova. Te tamau noa ra vau i te haere i te mau fare toa rarahi, eiaha râ no te taviri i te mau taata mai ta ˈu i rave na. I teie nei ia haere au i ǒ, no te faaite ïa i to ˈu tiaturiraa ia vetahi ê. Te hinaaro nei au e horoa i te tahi mea na ratou: Te tiaturiraa i roto i te hoê ao apî, aita e taata taviri.—Salamo 37:10, 11.