I te 26 no Atopa 2020, no te taime matamua a tahi roa te hau Korea apatoa e farii ai e tiamâraa to te taata ia rave i te ohipa tivira no te mono i te tau faehau. Tera râ, ua itehia e mea etaeta e mea roa atoa tera faanahoraa i Korea apatoa, e toru hoi matahiti e titauhia. Ia au râ i te mau faatureraa a te mau nunaa rau, e ere i te mea tano ia tataipiti i te tau o te ohipa tivira. Aita te tahi mau tane Ite no Iehova no Korea apatoa i farii i te rave i teie ohipa monoraa. Ua tuu vetahi o ratou i teie ohipa i mua i te tiripuna. I te 30 no Me 2024, aita te tiripuna o te pǎpǎ ture no Korea apatoa i farii i teie mau hororaa atoa. Tera râ, ua haapapu te tiripuna na roto i teie mau parau: ”Ua riro roa te ohipa tivira no te mono i te tau faehau ei faautuaraa e te ofati ra te reira i te tiamâraa o te taata o tei ore e farii i te rave i te tau faehau no to ratou manaˈo e te patoi ra te reira i te tahi o ta ratou tiaturiraa.”

O Woo-jin Byeon, hoê tane faaipoipo e 29 matahiti, te taata matamua o tei tapeahia i roto i te fare tapearaa i Korea apatoa no te mea aita o ˈna i farii i te rave i te ohipa tivira no te mono i te tau faehau. Ua faaoti oia i te faaite ma te faatura eita o ˈna e farii i tera ohipa tivira. Noa ˈtu ua faaite oia i to ˈna hinaaro e rave i te tahi atu ohipa tivira, i te 24 no Tiurai 2024, ua faautua te tiripuna ia ˈna hoê matahiti e te afa fare tapearaa.

I teie mahana, 12 tane Ite no Iehova tei ore i farii i te rave i teie ohipa tivira. O Woo-jin Byeon hoê o ratou e e 9 â tei ore i haavahia ˈtura. E nehenehe atoa te tiripuna e faaoti i te faautua e i te tapea ia ratou. Ua faaoti e rave rahi taeae i te rave i te ohipa tivira noa ˈtu mea etaeta roa.

Taio mahana faufaa

1. 24 no Tiurai 2024

   Ua faautuahia o Woo-jin Byeon hoê matahiti e te afa fare tapearaa no to ˈna oreraa e farii i te ohipa tivira no te mono i te tau faehau.

2. 10 no Novema 2022

   I muri aˈe i te taeraa mai te titauraa no te faaô i roto i te nuu, ua hapono o Woo-jin Byeon i te hoê rata i te hoê piha faatere a te nuu no te haapapu eita o ˈna e rave i te tau faehau e te tahi atu ohipa tivira o te patoi i te tahi o ta ˈna tiaturiraa.

3. 26 no Atopa 2020

   Ua faanaho te hau Korea apatoa i te tahi ohipa tivira no te feia o te ore e farii i te tau faehau.

4. 1 no Novema 2018

   Ua faaoti te tiripuna teitei no Korea apatoa eita e nehenehe e faautua i te taata o te ore e farii i te rave i te tau faehau.

5. 28 no Tiunu 2018

   Ua faaoti te tiripuna o te pǎpǎ ture no Korea apatoa, te ofati ra te tahi tuhaa o te tau faehau i ta ratou pǎpǎ ture no te mea aita e faanahoraa i ravehia no te mono i te tau faehau.

6. 18 no Atopa 2016

   Ua horoa te tiripuna hororaa no Gwangju i te faaotiraa matamua eiaha e faahapa i na taata e toru tei ore e farii i te rave i te tau faehau.

7. 30 no Atete 2011

   Ua haapapu faahou te tiripuna o te pǎpǎ ture i te ture e faautua ra i te feia o tei ore e farii i te rave i te tau faehau.

8. 26 no Atete 2004

   Ua haapapu te tiripuna o te pǎpǎ ture te tuatiraa o te ture e faautua ra i te feia o te ore e farii i te rave i te tau faehau i te pǎpǎ ture.

9. 1975

   Ua haamau te faatereraa i te hoê faaheporaa ia rave i te tau faehau.

10. 1973

    Ua hamani ino te faatereraa i te mau Ite no Iehova tei tapeahia tae noa ˈtu i muri aˈe i te matahiti 1990.

11. 1953

    Ua haamata te faatereraa i te tapea i te mau Ite no Iehova matamua tei ore i farii i te rave i te tau faehau.