E vaˈu taurearea Ite no Iehova tei tapeahia i Singapour no te mea aita ratou i farii i te rave i te tau faehau no to ratou manaˈo te patoi ra te reira i te tahi o ta ratou tiaturiraa. E toru i roto ia ratou, teie te piti o te faautuaraa no te mea aita ratou i taui i ta ratou faaotiraa i te hoperaa ta ratou tau tapearaa matamua. Aita e faanahoraa ta te ture i Singapour no te paruru i teie mau taurearea. Te faahepo ra hoi te faatereraa ia rave i te tau faehau e no tera faatereraa, aita e tiaraa to te taata ia patoi i te rave i te tau faehau.

Ia tia to te tahi tane apî 18 matahiti, e faahepohia oia ia faaô i roto i te nuu a te hau o Singapour. Mai te peu eita oia e farii no to ˈna manaˈo te patoi ra te reira i te tahi o ta ˈna tiaturiraa, e tapeahia oia hoê aˈe matahiti i roto i te aua faehau. Ia hope anaˈe tera tau, e tuuhia oia, e i tera iho â taime, e faauehia oia ia oomo i te ahu faehau e ia apiti i te faaineineraa a te mau faehau. Mai te peu e patoi â o ˈna, e haavahia o ˈna e te tahi atu tiripuna a te nuu e e faautuahia o ˈna hoê matahiti e te afa. Te auraa, ia ore te mau tane apî Ite no Iehova e farii i te rave i ta ratou tau faehau no to ratou manaˈo te patoi ra te reira i te tahi o ta ratou tiaturiraa, e piti ïa tau tapearaa ta ratou, hoê i muri mai i te tahi. Ia amui-anaˈe-hia, e tapeahia ïa ratou piti matahiti e te afa.

Eita te faatereraa o Singapour e hinaaro e pee i te mau faaueraa a te Hau amui

Mea maoro to te Hau amui aniraa i te mau fenua mero ia “faatura i te tiaraa o te taata ia ore e farii i te rave i te tau faehau, te tuati ra hoi te reira i te tiamâraa o te taata e manaˈo, e pee i to ˈna manaˈo haava e e maiti i ta ˈna haapaoraa mai tei haapapuhia i roto i te Faaotiraa a te Hau amui no nia i te tiaraa o te taata.” Noa ˈtu e fenua mero o Singapour mai te matahiti 1965, ua faaite oia i to ˈna manaˈo patoi i teie faaotiraa a te Hau amui no nia i teie ohipa. I roto i te hoê rata no te 24 no Eperera 2002 faataehia i te Tomite hiˈopoa a te Hau amui no nia i te tiaraa o te taata, ua papai te tahi tia o te faatereraa o Singapour: “Mai te peu eita te tahi tiaturiraa aore ra ohipa e tuati i te tiaraa e paruru i te fenua, o te tiaraa e paruru i te fenua te mea hau aˈe.” Ua papai â oia: “Eita matou e auraro i te faaueraa ia faatura i te tiaraa o te feia e ore e farii i te rave i te tau faehau no to ratou manaˈo te patoi ra te reira i te tahi o ta ratou tiaturiraa.”

Taio mahana faufaa

1. 16 no Fepuare 2025

   E vaˈu Ite no Iehova tei tapeahia no te mea aita ratou i farii i te rave i te tau faehau no to ratou manaˈo te patoi ra te reira i te tahi o ta ratou tiaturiraa.

2. 24 no Eperera 2002

   Ua haapapu te tia o te faatereraa o Singapour eita ratou e farii e tiamâraa to te taata ia patoi i te rave i te tau faehau no to ratou manaˈo aita te reira e tuati ra i te tahi o ta ratou tiaturiraa.

3. Fepuare 1995

   Ua rahi roa ˈtu â te taime e haavî e e tapeahia ˈi te mau Ite no Iehova e tino huiraatira ratou no te fenua Singapour.

4. 8 no Atete 1994

   Aita te tiripuna teitei o Singapour i farii i te hororaa a te mau Ite no Iehova.

5. 12 no Tenuare 1972

   Ua faaore te faatereraa o Singapour i te parau haamanaraa i horoahia i te mau Ite no Iehova.