Ɛyɛ Mfomso Sɛ Yɛbɛbɔ Onyankopɔn Din?

ONYANKOPƆN din pue bɛyɛ mpɛn 7,000 wɔ Hebri Kyerɛwnsɛm, anaa nea wɔtaa frɛ no “Apam Dedaw” no mu. Sei na wɔakyerɛw no, יהוה (wɔkenkan fi nifa kɔ benkum so). Nea ɛkyerɛ ne sɛ, wɔde Hebri nkyerɛwde anan, Yohdh, He, Waw, ne He, a yɛtaa kyerɛw no YHWH no na akyerɛw Onyankopɔn din.

Efi teteete na Yudafo no nyaa nsusuwii hunu a ɛne sɛ ɛyɛ mfomso sɛ obi bɛbɔ Onyankopɔn din. Ne saa nti, na wɔmmɔ din no, na wofii ase de nsɛmfua foforo sii edin no ananmu wɔ wɔn nhoma mu. Nanso Bible asekyerɛfo pii akyerɛw din no “Yahwe,” anaa “Yehowa.” Bible nkyerɛase a edin no wom no bi ne Katolek Jerusalem Bible no. Sɛnea saa nkyerɛase yi kyerɛ no, bere a Mose bisaa Onyankopɔn nea sɛ Israelfo no bisa no onii a ɔsomaa no wɔn nkyɛn a ɔnka no, Onyankopɔn buae sɛ: “Ka kyerɛ Israel mma sɛ: ‘Yahwe, mo agyanom Nyankopɔn, Abraham Nyankopɔn, Isak Nyankopɔn ne Yakob Nyankopɔn na wasoma me mo nkyɛn yi.’ Eyi ne me din de kosi daa; na edin yi na wɔmfa mfrɛ me awo ntoatoaso nyinaa mu.”—Exodus 3:15.

Bere a Yesu rebɔ mpae no, ɔkaa sɛnea n’ankasa de din no di dwuma no ho asɛm sɛ: “Mayi wo din makyerɛ wɔn, na mɛkɔ so ayi akyerɛ.” Na wɔ nea wɔtaa frɛ no Yɛn Agya a Ɔwɔ Soro mpaebɔ mu no, Yesu kae sɛ: “Yɛn Agya a wowɔ soro, wo din ho ntew.”—Yohane 17:26; Mateo 6:9, JB.

Enti ebia ɛbɛyɛ wo nwonwa sɛ wobɛte asɛm a Pope Benedict XVI ka faa edin kronkron no a wɔbɛbɔ no ho wɔ ne nhoma, Jesus of Nazareth, a ɔkyerɛw no nnansa yi ara mu no. Ɔkae sɛ: “Ɛfata paa sɛ na Israelfo no . . . mpɛ sɛ wɔbɔ edin a Onyankopɔn ankasa de ama ne ho, a wɔakyerɛw no YHWH no, sɛnea ɛbɛyɛ a wongu din no ho fĩ sɛnea abosonsomfo ayɛ wɔn anyame din no. Ne saa nti, ɛyɛ mfomso sɛ nnansa yi Bible asekyerɛfo akyerɛw din yi—a bere biara na Israelfo bu no sɛ ɛnsɛ sɛ wɔbɔ—te sɛ nea ɛyɛ edin bi ara kwa.”

Wudwen ho dɛn? So ɛfata anaa ɛyɛ mfomso sɛ yɛbɛbɔ Onyankopɔn din? Sɛ Yehowa ankasa aka sɛ: “Eyi ne me din de kosi daa; na edin yi na wɔmfa mfrɛ me awo ntoatoaso nyinaa mu” a, so obi wɔ hokwan sɛ ɔka sɛ Onyankopɔn adi mfomso?

[Mfonini ho asɛm a ɛwɔ kratafa 30]

Yesu bɔɔ Onyankopɔn din wɔ mpae a ɔbɔe mu