ADWENE dodow sɛn na wowɔ? Sɛ woka sɛ “baako” a, woatwa. Nanso ɛnyɛ ɛno nko ara ne nkwaadɔm a ɛwɔ wo nipadua mu. Ehon ntini bi wɔ yɛn nipadua mu. Ɛdɔɔso araa ma enti nyansahufo frɛ no “adwene a ɛto so mmienu.” Ɛyɛ ehon nkwaadɔm a ɛwɔ wo nsono mu (ɛno na wɔatwa no tiaa wɔ borɔfo mu sɛ ENS). Ɛno deɛ, enni wo tirim, na mmom dodow no ara wɔ wo yafunu mu.

Yɛn nipadua yɛ aduan a yedi no ho adwuma pii ansa na yɛanya ahoɔden afi mu. Ne saa nti, ɛfata paa sɛ wɔyɛɛ adwene no wɔ kwan bi so a etumi gyae ENS no ma ɛno ara yɛ aduan a wudi no ho adwuma dodow no ara.

Ɛwom sɛ adwuma a ENS yɛ no nto adwene no deɛ no, nanso ENS no mu nneɛma dɔɔso paa. Wobu akontaa sɛ, ehon ntini bɛyɛ ɔpepem 200 kosi 600 na ɛwɔ nipa nsono mu. Saa ehon ntini bebrebe yi yɛ adwuma wɔ adidi ne ɔnom nkwaadɔm no mu. Nyansahufo gye di sɛ, sɛ adwuma a ENS yɛ no nyinaa kɔ so wɔ w’adwene no mu a, anka ebehia sɛ ehon ntini a ɛwɔ w’adwene mu no yɛ akɛse paa. Nhoma bi kyerɛ sɛ, “eye paa sɛ wɔmaa [adidi ne ɔnom nkwaadɔm] no ara yɛɛ n’adwuma.”​—The Second Brain.

Ɛsɛ sɛ ahoɔdennuru ahorow pɔtee bi frafra aduan a yedi no wɔ bere pɔtee bi mu ansa na atumi akɔ baabi a ɛsɛ sɛ ɛkɔ wɔ nipadua no mu. Sɛ ɔbenfo Gary Mawe frɛɛ adidi nkwaadɔm “adufradan bi” a, odi ka. Sɛnea ahoɔdennuru ahorow bi keka bom yɛ aduan a yedi ho adwuma wɔ yɛn yafunu mu no, ɛboro adwene ne ntease so. Ɛho nhwɛso ne sɛ, nkwammoaa soronko bi wɔ wo nsono mu a etumi hu nnuru a ɛwɔ nnuan a wudi mu. Wei boa ENS no ma epuw ahoɔdennuru a ɛfata gu aduan a wudi no so ma etumi yam. Wei ma nipadua no tumi twetwe aduannuru a ɛwɔ aduan a wudi mu no. Afei nso, ENS no di dwuma titiriw bi wɔ yɛn yafunu mu. Ɛno na ɛhwɛ puw ahoɔdennuru gu nsu ne nnuannuru dodow a ɛwɔ aduan a yedi mu a ebetumi apira yɛn no so. Sɛ aduannuru dɔɔso wɔ aduan a yedi mu a, epuw pii gu so, na sɛ esua nso a, kakraa bi na epuw gu so.

Wo deɛ, hwɛ sɛnea ENS no piapia aduan fa adidi ne ɔnom nkwaadɔm no mu. Ɛyɛ adwuma te sɛ afiri bi. ‘W’adwene a ɛto so mmienu,’ anaa ENS no na epiapia aduan a wudi no fa wo nsono mu. Ɔkwan a ɛfa so tumi piapia aduan no ne sɛ, ɛma ntini a ɛwɔ adidi ne ɔnom nkwaadɔm mu no ka twom. ENS no na ɛma nsono no mu bue na ɛka twom ntɛmntɛm anaa ɛyɛ saa brɛoo. Ɛyɛ saa a, ɛde nkakrankakra piapia aduan a woadi no kosi sɛ ebefi adi.

ENS no nso bɔ wo nipadua ho ban. Nnuan a wudi no, ɛyɛ a mmoawa a ebetumi ama woayare wom. Enti ɛnyɛ nwonwa sɛ wɔka sɛ, mogya mu nkwammoaa a ɛwɔ wo nipadua mu no mu ɔha biara mu 70 kosi 80 wɔ wo yafunu mu! Saa nkwammoaa yi nso boa paa ma nipadua no ko tia nyarewa. Sɛ wudi aduan bi a mmoawa a ebetumi ama woayare pii wom a, ENS no ka twom ntɛmntɛm, na epuw bɔre a akɔ wo yafunu mu no ma wofe anaa wo yam tu.

ENS no, ɛte sɛ nea ɛne adwene no nyɛ adwuma mmom. Nanso nkitahodi pa kɔ so wɔ wɔn ntam bere nyinaa. Ebi ne sɛ, ENS no boa nkwammoaa mu nnuru ma ɛkyerɛ adwene no bere a ɛsɛ sɛ wudidi ne aduan dodow a ɛsɛ sɛ wudi. Sɛ wudidi mee a, ENS no ma adwene no hu sɛ woamee. Enti wudidi boro so a, ebetumi ama wo bo afono wo.

Ansa na worekenkan asɛm yi mpo, ebia na ɛyɛ wo sɛ nkitahodi bi rekɔ so wɔ adidi ne ɔnom nkwaadɔm no ne w’adwene ntam. Sɛ nhwɛso no, woahyɛ no nsow sɛ, sɛ wudi sradeduan bi a, etumi ma w’ani gye? Nhwehwɛmufo kyerɛ sɛ, etumi ba saa bere a ENS no aka ‘anigyesɛm bi’ akyerɛ w’adwene no. Ɛtoa so saa a, ɛma w’ani gye. Ɛbɛyɛ sɛ wei nti na sɛ adwinnwen hyɛ nkurɔfo so a, wodi nnɔkɔnnɔkɔwade ne sradeduan no. Nyansahufo rehwehwɛ ɔkwan bi a wobetumi afa so akanyan ENS no, na ama wɔn a adwinnwen ahyɛ wɔn so no ho atɔ wɔn.

Nhwɛso foforo ne sɛ, sɛ nkitahodi kɔ so wɔ adwene ne adidi ne ɔnom nkwaadɔm no mu a, etumi ma wo yam hyehye wo. Nea ɛma ɛba saa ne sɛ, mogya a ɛba wo yafunu mu no, ENS no dan ani ma ɛkɔfa baabi. Wei si bere a nneɛma ahyɛ adwene no so no. Sɛ nneɛma hyɛ obi so a, ne bo nso tumi fono no. Nea enti a ɛte saa ne sɛ, adwinnwen ma sɛnea ENS no yɛ adwuma daa no sesa. Abenfo kyerɛ sɛ, nkitahodi a ɛkɔ so wɔ adwene ne nneɛma a ɛwɔ yɛn yafunu mu no nso ka ho bi na ɛma yafunu mu nkwaadɔm no ankasa tumi yɛ n’adwuma no.

Ɛwom sɛ ENS no betumi ama wo yam ahyehye wo deɛ, nanso ɛrentumi nnwen mma wo anaa ɛnkyerɛ wo nea ɛsɛ sɛ woyɛ. Sɛ yɛbɛka a, ENS no nyɛ adwene ankasa. Ɛrentumi mmoa wo mma wonhyehyɛ nnwom anaa wummu wo sika a ɛda sikakorabea ho akontaa. Saa ara nso na ɛrentumi mmoa wo mma wonyɛ wo homework. Ne nyinaa nka mfua, sɛnea saa nkwaadɔm yi yɛ nnwuma pii anwonwakwan so no, ɛda so ara yɛ nyansahufo nwonwa. Emu pii wɔ hɔ koraa a nyansahufo nnya nhuu mu nwiei. Enti bere foforo a wobɛtena aduan ho sɛ wubedi no, wo deɛ tɔ wo bo ase susuw nea edidi so yi ho hwɛ. Nkitahodi, akontaabu, ne nneɛma foforo pii na ɛbɛkɔ so wɔ aduan a worebedi no ho wɔ adidi ne ɔnom nkwaadɔm no mu!