Winston, ka nea ɛyɛe a wuhuu Onyankopɔn kyerɛ yɛn.

Wɔtetee me wɔ akuraa bi ase wɔ Queensland, Australia. Ná yɛn abusua ani nnye nyamesom ho. Esiane sɛ na baabi a yɛte no atew ne ho nti, m’abusuafo da nkyɛn a, na nnipa foforo biara nni hɔ a me ne wɔn bɛbɔ. Bere a midii bɛyɛ mfe 12 na mifii ase hwehwɛɛ Onyankopɔn akyi kwan. Mebɔɔ Onyankopɔn mpae, na mesrɛɛ no sɛ ɔmma minhu no yiye. Akyiri yi, mifii akuraa no ase, na mikonyaa adwuma wɔ Adelaide, South Australia. Midii mfe 21 no, mihyiaa Pam bere a mikogyee m’ahome wɔ Sydney. Pam kaa nyamesom kuw bi a wɔtewee wɔ Britain a emufo kyerɛ sɛ wɔn ase fi Israel ho asɛm kyerɛɛ me. Saa nkurɔfo no kyerɛ sɛ Britainfo ase fi Israel mmusuakuw a wɔyerae no mu. Kuw no kyerɛ sɛ, saa mmusuakuw no yɛ mmusuakuw du ahemman a na ɛwɔ Israel atifi fam a wɔkɔɔ nkoasom mu wɔ afe 740 A.Y.B. no. Bere a mesan kɔɔ Adelaide no, me ne me yɔnko dwumayɛni bi a na wafi ase ne Yehowa Adansefo resua Bible bɔɔ saa ɔsom no ho nkɔmmɔ. Me ne no bɔɔ nkɔmmɔ nnɔnhwerew kakraa bi. Nea Yehowa Adansefo gye di titiriw na yɛbɔɔ ho nkɔmmɔ. Bere a yɛbɔɔ nkɔmmɔ no wiei no, mihui sɛ mpae a mebɔɔ no me mmofraase no na merenya ho mmuae no. Mihui sɛ meresua nokware a ɛfa me Bɔfo no ne n’Ahenni no ho ade! Mihuu ‘ahene a ne bo yɛ den’ saa bere no.​—Mat. 13:45, 46.

Pam, wo nso wo mmofraase pɛɛ na wufii ase hwehwɛɛ saa ahene, anaa ahweneɛ no. Ɛyɛɛ dɛn na wuhui?

Wɔtetee me wɔ Coffs Harbour, New South Wales; na m’abusua pɛ nyamesom. Ná m’awofo ne me nanabarima ne me nanabea gye kuw a wɔtew wɔ Britain a emufo kyerɛ sɛ wɔn ase fi Israel no nkyerɛkyerɛ tom. Wɔkyerɛkyerɛɛ  me ne me nuabarima kumaa, me nuabea panyin, ne me maame nuanom mma sɛ Onyankopɔn pɛ nkurɔfo a wɔn ase fi Britain asɛm kyɛn afoforo. Nanso, na me ne wɔn nyɛ adwene wɔ saa nkyerɛkyerɛ no ho, na na mente nka sɛ mebɛn Onyankopɔn. Bere a midii mfe 14 no, mekɔɔ asɔre ahorow a ɛwɔ yɛn mpɔtam hɔ. Ebi ne Anglikan, Baptist, ne Seventh-day Adventist. Nanso, wɔammoa me amma manhu Onyankopɔn.

Akyiri yi, m’abusua tu kɔɔ Sydney; ɛhɔ na mihyiaa Winston. Ná waba hɔ rebegye n’ahome. Sɛnea Winston kae no, ɔsom ho nkɔmmɔ a yɛbɔe no ma ofii ase ne Adansefo no suaa ade. Ɛno akyi no, krataa biara a ɔbɛkyerɛw me no, na ɔde kyerɛwnsɛm pii hyehyɛ mu! Mɛka nokware a, mfiase no na ɛhaw me, na ɛhyɛɛ me abufuw mpo. Nanso, nkakrankakra mihui sɛ Onyankopɔn ho nokwasɛm na ɔreka akyerɛ me.

Afe 1962 no, mitu kɔɔ Adelaide sɛnea ɛbɛyɛ a mɛbɛn Winston. Ɔyɛɛ nhyehyɛe ma mekɔtenaa Adansefo awarefo bi nkyɛn. Wɔn din de Thomas ne Janice Sloman. Ná wɔakɔyɛ asɛmpatrɛw adwuma wɔ Papua New Guinea. Wɔdaa ayamye soronko adi kyerɛɛ me; na madi mfe 18 pɛ. Wɔboaa me ma misuaa Yehowa ho ade pii. Enti, me nso mifii ase suaa Onyankopɔn Asɛm, na ankyɛ na mihui sɛ mahu nokware no. Me ne Winston waree akyi no, ntɛm ara na yɛyeree yɛn ho yɛɛ Yehowa som adwuma, na yɛanya nhyira pii. Ɛwom, yɛahyia ɔhaw ahorow de, nanso ama yɛanya anisɔ kɛse ama ahene a ne bo yɛ den a yɛahu no.

Winston, ka bere a wufii ase som Yehowa no ho asɛm kakra kyerɛ yɛn.

Bere a mewaree Pam no, ankyɛ koraa na Yehowa fii ase maa yɛn dwumadi atitiriw wɔ ne som mu. (1 Kor. 16:9) Dwumadi titiriw a edi kan a yɛyɛe no, Onua Jack Porter na ɔkaa ho asɛm kyerɛɛ yɛn; na ɔyɛ ɔmansin sohwɛfo a ɔbɛsomee yɛn asafo ketewa no. (Seesei me ne no nyinaa som sɛ Australasia Baa Boayikuw no mufo.) Jack ne ne yere Roslyn na wɔhyɛɛ yɛn nkuran ma yɛyɛɛ daa akwampae adwuma; yɛyɛɛ no mfe nnum. Bere a midii mfe 29 no, wɔmaa me ne Pam kɔyɛɛ ɔmansin adwuma wɔ South Pacific Islands. Saa bere no, Fiji Betel na na ɛhwɛ ɔsom adwuma a wɔyɛ wɔ hɔ no so. Saa nsupɔw no ne American Samoa, Samoa, Kiribati, Nauru, Niue, Tokelau, Tonga, Tuvalu, ne Vanuatu.

Saa bere no, na nkurɔfo a wɔwɔ nsupɔw a atew ne ho no bi so hwɛ wɔn ho yiye wɔ Yehowa Adansefo ho, enti na ɛsɛ sɛ yɛma yɛn ani da hɔ na yɛyɛ anifere. (Mat. 10:16) Ná asafo ahorow a ɛwɔ hɔ no yɛ nketewa, na na asafo no bi nnya baabi mma yɛnna. Enti, na yebisa nkuraa no asefo sɛ wobenya baabi ama yɛatena wɔ wɔn fie anaa. Woyii wɔn yam boaa yɛn bere nyinaa.

Winston, w’ani gye kasa nkyerɛase ho, na ɛho hia wo pa ara. Dɛn na ɛmaa w’ani begyee ho?

Tonga yɛ ɔman a ɛyɛ supɔw. Saa bere no, na anuanom a wɔwɔ hɔ no nni nkratawa ne nhomawa pii a wɔakyerɛ ase akɔ Tonga kasa mu; Tonga yɛ kasa a wɔka wɔ Polynesia. Ná wɔde Nokware a Ɛde Kɔ Daa Nkwa Mu Borɔfo de no na ɛkɔ asɛnka. Bere bi yɛde nnawɔtwe nnan yɛɛ asafo mu mpanyimfo sukuu. Yɛreyɛ sukuu no, mpanyimfo mmiɛnsa a wofi hɔ a wɔnte Borɔfo papa gye toom sɛ wɔbɛkyerɛ Nokware nhoma no ase akɔ Tonga kasa mu. Pam de typewriter bɔɔ ne nyinaa, na yɛde kɔɔ United States Betel ma wotintimii. Wɔde bɛyɛ nnawɔtwe nwɔtwe na ɛkyerɛɛ nhoma no ase wiei. Ɛwom sɛ na nkyerɛase no mu nna hɔ papa de, nanso ɛboaa nnipa pii a wɔka Tonga kasa ma wohuu nokware no. Me ne Pam nkyerɛ kasa ase, nanso nea ɛkɔɔ so no maa yɛn ani begyee adwuma no ho.

Pam, sɛ wode nsupɔw no so asetena toto Australia de ho a, ɛte sɛn?

Ná ɛyɛ soronko koraa! Mmeae bi wɔ hɔ a, na ntontom ahyɛ hɔ mã, owia bɔ wɔ hɔ pa ara nti wim yɛ hyew, nkura wɔ hɔ, na na yɛtaa yare. Ɛtɔ da nso a, na aduan ho yɛ den. Nanso da biara, edu anwummere a na yɛtena yɛn fale (apata mu) dwudwo yɛn ho hwɛ po. Fale yɛ din  a Samoafo de frɛ adan a wosisi wɔ Polynesia a wɔde sare kuru so a enni afasu. Ɛda a ɔsram bɛpae anadwo no, ewim yɛ hann araa ma wutumi hu kube a esisi abɔnten, na ɔsram no tɔ po no so ma po no so hyerɛn. Ná nneɛma a ɛyɛ anika saa no ka yɛn koma ma yedwinnwen ho na yɛbɔ mpae. Ná wei boa yɛn ma yedwinnwen nneɛma a ɛhyɛ nkuran ho, na yɛamfa yɛn adwene ansi nneɛma a ebu abam so.

Mmofra a wɔwɔ hɔ no hu aborɔfo a, na wɔn ani gye pa ara, na na wobisa yɛn nsɛm; wei ma yɛbɛpɛɛ wɔn asɛm pa ara. Bere bi a yɛkɔɔ Niue no, abarimaa bi de ne nsa faa Winston nsa ho nwi so, na ɔkaa sɛ: “Wo ntakra yɛ me fɛ.” Yetumi hu sɛ na onhuu obi a ne nsa ho wɔ nwi saa da, na na onhu sɛnea ɔmfrɛ no!

Sɛ yehu sɛnea na nkurɔfo a wɔwɔ hɔ pii di hia no a, na ɛyɛ yɛn yaw pa ara. Ná nneɛma a ɛyɛ fɛ atwa wɔn ho ahyia, nanso na wonni ayaresabea pii, na na nsu a wɔnom nso ho yɛ den. Nanso, na yenhu sɛ ɛhaw anuanom. Wɔn de, na ɛnyɛ wɔn ade foforo biara. Ná wɔne wɔn abusua na ɛte, na wɔwɔ baabi a wohyiam som, na na wotumi yi Yehowa ayɛ, enti na wɔn ani gye. Nea yehui wɔ wɔn ho no boaa yɛn ma yetumi de nneɛma a ɛho hia pa ara dii kan wɔ yɛn asetenam, na yɛanhwehwɛ nneɛma pii.

Pam, ɛtɔ da a na ɛsɛ sɛ wokɔ nsu, na ɔkwan a na wofa so noa w’aduan nso yɛ soronko koraa. Ɛyɛɛ dɛn na wutumi yɛɛ weinom nyinaa?

Meda me papa ase sɛ ɔtetee me yiye. Ɔkyerɛɛ me nneɛma pa pii. Ebi ne sɛ, ɔkyerɛɛ me sɛnea yɛsɔ gya noa aduan wɔ so ne sɛnea mɛma m’ani asɔ nneɛma kakra a mewɔ. Da bi a yɛkɔɔ Kiribati no, yɛtenaa fie ketewa bi a wɔde sare akuru so mu. Abona na na wɔde afra anwea ayɛ fam hɔ, na na ɔdan no afasu yɛ mpampuro. Sɛ mepɛ sɛ meyɛ aduan kakra mpo a, na gye sɛ mitutu fam sɔ gya, na na mede kube hono na ɛsɔ gya no. Merekɔsaw nsu a, na me ne mmea a wɔwɔ hɔ to santen wɔ abura ho. Sɛ wɔresaw nsu a, na wɔde hama teaa bi sã abaa a ne tenten bɛyɛ anammɔn nsia so ma ɛyɛ te sɛ abaa a wɔde to darewa. Nanso, ɛnyɛ darewa na na wɔde hyɛ hama no ano, na mmom tonturowa na wɔde sa hama no so. Edu ɔbea biara so a, na ɔto nsu no, na na onim sɛnea ɔbɛdan ne nsa ama tonturowa no asaw nsu no. Ɔdan ne nsa saa a, na tonturowa no adan asaw nsu no. Ná ɛyɛ me sɛ ne yɛ nyɛ den, nanso eduu me so na mihui sɛ, sɛɛ ɛnna fam. Metoo nsu no mpɛn pii, nanso tonturowa no bɔ nsu no ani a, na abɛtɛn ani! Bere a obiara serew wiei no, mmea no baako boaa me. Ɛhɔfo no yii wɔn yam boaa me bere nyinaa.

Mo mmienu nyinaa ani gyee dwumadi a wɔde maa mo wɔ nsupɔw no so ho. Mubetumi aka nneɛma bi a muhui wɔ hɔ a mokae pa ara akyerɛ yɛn?

Winston: Egyee bere kakra ansa na yɛrete hɔ amammerɛ bi ase. Ebi ni. Anuanom ma yɛn aduan a, nea wɔwɔ nyinaa na na wɔde ma yɛn. Mfiase no, na yennim sɛ yedi a, ɛsɛ sɛ yegyaw wɔn bi. Enti, na yedi nea wɔde si yɛn anim no nyinaa! Nanso, bere a yebehuu sɛnea asɛm no te ankasa no, na yedidi a yegyaw wɔn bi. Mfomso a yedii nyinaa akyi no, na anuanom te yɛn ase. Bere a yɛreyɛ ɔmansin adwuma no, bɛyɛ abosome nsia biara a yɛbɛkɔ akɔsom wɔn no, na wɔn ani gye. Anuanom a wɔwɔ hɔ no da nkyɛn a, saa bere no, na wonnim Adansefo foforo biara ka yɛn ho.

Yɛkɔsra anuanom saa a, na edi mpɔtam hɔfo nso adanse kama. Ná nkuraa no asefo pii susuw sɛ anuanom a wɔwɔ hɔ no ara na wɔafi ɔsom bi ase wɔ hɔ. Enti, sɛ na ɔsɛmpatrɛwfo a ofi amannɔne ne ne yere bɛsra anuanom a, na ɛma ɛhɔfo no hu sɛ sɛɛ Adansefo no dɔɔso, na na ɛyɛ wɔn nwonwa.

Pam: Ade baako a mekae pa ara sii wɔ Kiribati. Asafo a ɛwɔ hɔ no, na anuanom a wɔwom nnɔɔso koraa. Asafo mu panyin baako pɛ a ɔwɔ hɔ no yɛɛ nea obetumi biara hwɛɛ yɛn. Ná ne din de Itinikai Matera. Da koro, yɛwɔ hɔ ara na ɔde kɛntɛn a kesua baako da mu bae. Ɔkaa sɛ, “Mede wei brɛɛ mo.” Saa bere no, obi ma wo akokɔ kesua a, na wadom wo pa ara. Akyɛde  ketewa yi a oyii ne yam de maa yɛn no kaa yɛn koma pa ara.

Pam, mfe bi akyi no, wunyinsɛnee ma yafunu no sɛee. Sɔhwɛ a ɛte saa no, dɛn na ɛboaa wo ma wutumi gyinaa ano?

Afe 1973, bere a na me ne Winston wɔ South Pacific no, minyinsɛnee. Yesii gyinae sɛ yɛbɛsan akɔ Australia, na yɛkɔe. Abosome nnan akyi no, yafunu no sɛee. Me ne Winston nyinaa dii awerɛhow pa ara. Bere bi akyi no, ɛyaw a na midi wɔ me komam no ano brɛɛ ase, nanso amfi hɔ koraa kosii sɛ yɛn nsa kaa April 15, 2009, Ɔwɛn-Aban no. “Nsɛmmisa a Efi Akenkanfo Hɔ” no bisaa sɛ: “So anidaso bi wɔ hɔ sɛ akokoaa a owu wɔ ne maame yafunum no benya owusɔre?” Ɔwɛn-Aban no mu asɛm no ma yenyaa awerɛhyem sɛ asɛm no wɔ Yehowa nsam, na Yehowa nso de, ɔyɛ nea ɛteɛ bere nyinaa. Obeyi ɛyaw biara a wiase bɔne yi ama yɛafa mu no afi hɔ koraa efisɛ ɔbɛma ne Ba no ‘asɛe Ɔbonsam nnwuma.’ (1 Yoh. 3:8) Yehowa nkurɔfo wɔ “ahene” a ɛsom bo, na Ɔwɛn-Aban no mu asɛm no san boaa yɛn ma yenyaa ho anisɔ kɛse! Sɛ ɛnyɛ anidaso a Ahenni no ama yɛanya a, anka yɛwɔ he?

Yɛhweree yɛn ba no akyi no, yɛsan fii bere nyinaa som adwuma no ase bio. Yɛsomee wɔ Australia Betel abosome kakra, na yefii ɔmansin adwuma no ase bio. Yɛde mfe nnan somee wɔ New South Wales ne Sydney nkuraase, na ɛno akyi no, afe 1981 no, wɔtoo nsa frɛɛ yɛn kɔɔ Australia Betel. Saa bere no, saa na na wɔfrɛ hɔ, na ɛhɔ na yɛwɔ de besi nnɛ.

Winston, woka Australasia Baa Boayikuw no ho; osuahu a wunyae wɔ South Pacific Islands no aboa wo anaa?

Aane, aboa me wɔ akwan pii so. Nea edi kan, wɔmaa Australia hwɛɛ American Samoa ne Samoa adwuma so. Afei, wɔkaa New Zealand Betel ne Australia Betel boom. Seesei, Australia, American Samoa ne Samoa, Cook Islands, New Zealand, Niue, Timor-Leste, Tokelau, ne Tonga nyinaa ka nsupɔw a Australasia Betel hwɛ so no ho. Manya hokwan akɔ saa nsupɔw yi pii so sɛ Betel nanmusini. Seesei a meresom anuanom anokwafo a wɔwɔ nsupɔw no so wɔ Betel ha no, ɔsom adwuma a me ne wɔn boom yɛe wɔ hɔ no aboa me pa ara.

Nea mɛka de atwa to ne sɛ, mfe pii ni na me ne Pam ankasa ahu sɛ ɛnyɛ mpanyimfo nko ara na wɔhwehwɛ Onyankopɔn akyi kwan. Mmofra nso hwehwɛ saa ‘ahene a ne bo yɛ den’ no akyi kwan, bere mpo a wɔn abusuafo a wɔaka ani nnye ho. (2 Ahe. 5:2, 3; 2 Be. 34:1-3) Nokwasɛm ne sɛ, Yehowa yɛ Onyankopɔn a ɔwɔ ɔdɔ, na ɔpɛ sɛ mmofra ne mpanyin nyinaa nya nkwa!

Bere a me ne Pam fii ase hwehwɛɛ Onyankopɔn akyi kwan bɛboro mfe 50 ni no, na yennim baabi a ɛde yɛn bɛkɔ akowie. Akyinnye biara nni ho sɛ, Ahenni no ho nokwasɛm yɛ ahene a ɛsom bo ankasa! Yɛasi yɛn bo sɛ yɛde yɛn ahoɔden nyinaa beso saa ahene a ɛsom bo no mu denneennen!