Nea W’asubɔ no Kyerɛ
Ti 12
Nea W’asubɔ no Kyerɛ
1, 2. (a) Dɛn nti na ɛsɛ sɛ yɛn mu biara susuw nsu mu asubɔ ho? (b) Wobɛma nsemmisa ahorow a ɛwɔ nkyekyem abien no mu no ho mmuae tiaa dɛn?
WƆ AFE 29 Y.B. mu no, wɔbɔɔ Yesu asu Asubɔnten Yordan mu. Ná Yehowa ankasa rehwɛ na ɔpenee so. (Mateo 3:16, 17) Ɛno akyi mfirihyia abiɛsa ne fã wɔ Yesu wusɔre no akyi no, ɔde ahyɛde maa n’asuafo sɛ: “Wɔde ɔsoro ne asase so tumi nyinaa ama me. Enti monkɔ nkɔyɛ amanaman nyinaa asuafo. Mommɔ wɔn asu.” (Mateo 28:19, 20) So wɔabɔ wo asu ma ɛne nea Yesu hyɛe wɔ hɔ no hyia? Anaasɛ so wuresiesie wo ho ayɛ saa?
2 Asɛm no biara mu no, asubɔ ho ntease a emu da hɔ ho hia. Nsemmisa a ɛfata sɛ wususuw ho no bi ni: So asu a Kristofo bɔ nnɛ no wɔ ntease koro no ara te sɛ Yesu de no? So biribiara a Bible no ka wɔ asubɔ ho no fa wo ho? Dɛn na ɛwɔ ase a wɔbɛtra ma ɛne nea Kristofo nsu mu asubɔ kyerɛ no ahyia no mu?
Yohane Asubɔ
3. Henanom na na Yohane asubɔ no yɛ wɔn de?
3 Bɛyɛ asram asia ansa na wɔrebɔ Yesu asu no, Osuboni Yohane kɔɔ Yudea sare so kɔkaa asɛm sɛ: “Monsakra mo adwene; na ɔsoro ahenni no abɛn.” (Mateo 3:1, 2) Nkurɔfo a wofi mpɔtam hɔ nyinaa tee nea Yohane kae no, wɔkaa wɔn bɔne kyerɛe na ɔbɔɔ wɔn asu Yordan mu. Ná saa asubɔ no yɛ Yudafo de.—Asomafo no Nnwuma 13:23, 24; Luka 1:13-16.
4. (a) Dɛn nti na na ɛho hia kɛse sɛ Yudafo no sakra wɔn adwene? (b) Sɛ na wobetumi akwati ‘ogya asubɔ’ no a, dɛn na na wɔhwehwɛ afi wɔn hɔ?
4 Na saa Yudafo no hia adwensakra kɛse. Na wɔn agyanom ne Yehowa Nyankopɔn ayɛ ɔman apam bi wɔ afe 1513 A.Y.B. mu wɔ Bepɔw Sinai so. Nanso wɔanni wɔn asɛyɛde wɔ saa apam no ase no ho dwuma ma enti ebuu wɔn fɔ sɛ wɔyɛ nnebɔneyɛfo. Na wɔn tebea no mu yɛ den. Na “Yehowa da kɛse a ɛyɛ hu” a Malaki ka siei no abɛn, na wɔ 70 Y.B. mu no ɛbaa Yerusalem so sɛ ɔsɛe a ɛba ɔhare so. Wɔsomaa Osuboni Yohane a na ɔwɔ nokware som ho mmɔdenbɔ te sɛ Elia no dii saa ɔsɛe no anim “na wasiesie ɔman a wɔbɛboaboa wɔn ho ano de ama [Yehowa].” Na ehia sɛ wonu wɔn ho wɔ wɔn bɔne a wɔayɛ atia Mmara apam no ho na wosiesie wɔn ho wɔ adwene ne koma mu na wɔde agye Onyankopɔn Ba a Yehowa resoma no aba wɔn nkyɛn no atom. (Malaki 4:4-6; Luka 1:17; Asomafo no Nnwuma 19:4) Sɛnea Yohane kyerɛkyerɛɛ mu no, Onyankopɔn Ba no de honhom kronkron (asubɔ a asuafo anokwafo no nyae nea edi kan wɔ Pentekoste 33 Y.B. mu) ne ogya (a ɛbaa wɔn a wɔansakra wɔn adwene no so sɛ ɔsɛe wɔ 70 Y.B. mu no) na ɛbɛbɔ wɔn asu. (Luka 3:16) Sɛnea ɛbɛyɛ na wɔn ankasa akwati saa ‘ogya asubɔ’ no, na ɛho hia sɛ wɔbɔ saa afeha a edi kan no mu Yudafo no asu nsu mu de yɛ wɔn adwensakra no ho sɛnkyerɛnne, na na ɛsɛ sɛ wɔbɛyɛ Yesu Kristo asuafo bere a wonya saa hokwan no.
5. (a) Bere a Yesu bae sɛ wɔmmɔ no asu no, dɛn nti na Yohane bisaa ɛho asɛm no? (b) Dɛn na Yesu nsu mu asubɔ no yɛɛ ho sɛnkyerɛnne? (d) Ná Yesu bu Onyankopɔn apɛde a ɔbɛyɛ no aniberesɛm dɛn?
5 Nea na ɔka wɔn a wɔbaa Yohane nkyɛn ma ɔbɔɔ wɔn asu no ho ne Yesu ankasa. Nanso dɛn ntia? Ná Yohane nim sɛ Yesu nni bɔne a ɔbɛka akyerɛ, na enti ɔkae sɛ: “Me mmom a ehia me sɛ wobɔ me asu no na woba me nkyɛn yi?” Nanso na Yesu asubɔ no bɛyɛ biribi soronko ho sɛnkyerɛnne. Enti obuae sɛ: “Mprempren de, ma hokwan, na saa na ɛsɛ yɛn sɛ yɛma trenee nyinaa wie pɛyɛ.” (Mateo 3:13-15) Na Yesu asubɔ no rentumi nyɛ bɔne ho adwensakra ho sɛnkyerɛnne; na na enhia nso sɛ ohyira ne ho so ma Onyankopɔn, efisɛ na ɔyɛ ɔman a wɔahyira so ama Yehowa dedaw bi muni. Mmom no, n’asubɔ wɔ bere a na wadu Yudafo mpanyin afe so a ɛyɛ mfe 30 no yɛɛ ne ho a ɔde ama ne soro Agya sɛ ɔbɛkɔ so ayɛ N’apɛde ho sɛnkyerɛnne. Nea ɛwɔ Onyankopɔn apɛde a na ɛwɔ hɔ ma “onipa Kristo Yesu” no mu ne Ahenni no ho dwumadi ne afei ne desani nkwa a ɛyɛ pɛ a ɔde bɛbɔ afɔre sɛ agyede ne nea apam foforo bi gyina so no. (Luka 8:1; 17:20, 21; Hebrifo 10:5-10; Mateo 20:28; 26:28; 1 Timoteo 2:5, 6) Yesu buu nea ne nsu mu asubɔ no yɛɛ ho sɛnkyerɛnne no aniberesɛm. Wamma kwan amma wɔannan no ankodi nneɛma afoforo akyi. Ɔde ne ho bataa Onyankopɔn apɛdeyɛ ho koduu n’asase so asetra awiei.—Yohane 4:34.
Asubɔ A Ɛdekɔ Owu Mu
6. Asu foforo bɛn na wɔbɔɔ Yesu na wɔ bere bɛn mu?
6 Nea ɛne nea Yesu nsu mu asubɔ no yɛɛ ho sɛnkyerɛnne no hyia no, wɔbɔɔ no asu foforo nso. Na onim sɛ adwuma a Onyankopɔn de asi n’anim no bɛkɔ akowie ne desani nkwa a ɔde bɛto hɔ sɛ afɔrebɔde no mu nanso wobenyan no honhom mu ne nnansa so. Ɔkaa eyi ho asɛm sɛ ɛyɛ asubɔ bi. “Asubɔ” yi fii ase 29 Y.B. mu nanso wɔanwie kosii sɛ owui ankasa na wonyan no. Enti ne nsu mu asubɔ no akyi bɛyɛ mfe abiɛsa no na obetumi aka ma afata sɛ: “Asubɔ bi wɔ hɔ a wɔde bɛbɔ me, na me ho hiahia me kosi sɛ wobewie bɔ!”—Luka 12:50.
7. (a) Henanom nso na wɔbɔ wɔn asu kɔ owu mu? (b) Hena na ɔbɔ saa asu no?
7 Ɛsɛ sɛ wɔbɔ wɔn a wɔne Kristo bedi ahene wɔ ne soro Ahenni no mu no nso asu kɔ owu mu saa ara. (Marko 10:37-40; Kolosefo 2:12) Wɔ wɔn wu mu no, wɔde wɔn desani nkwa to nkyɛn daapem, sɛnea Yesu yɛe no. Na wɔ wɔn wusɔre mu no wɔkɔka ne ho wɔ ɔsoro tumidi mu. Eyi yɛ asubɔ a ɛnyɛ ɔdesani na ɔbɔ, na mmom Onyankopɔn na ɔnam ne Ba a ɔwɔ soro no so bɔ.
8. ‘Wɔbɔ wɔn asu kɔ Kristo mu’ no kyerɛ dɛn?
8 Wɔka wɔn a wɔbɔ wɔn asu kɔ Yesu wu mu no ho asɛm nso sɛ “wɔbɔɔ [wɔn] asu kɔɔ Yesu Kristo mu.” Ɛdenam honhom kronkron a wɔnam Kristo so de ma no so no, wɔbɛka wɔne ɔno a ɔne wɔn ti no abom sɛ n’asafo a wɔde honhom asra no, ne “nipadua” no mufo. Esiane sɛ saa honhom no ma wotumi da Kristo nipasu a ɛkorɔn no adi nti, wobetumi aka afa wɔn ho sɛ wɔn nyinaa abɛyɛ onipa “biako Kristo Yesu mu.”—Romafo 6:3-5; 1 Korintofo 12:13; Galatifo 3:27, 28; Asomafo no Nnwuma 2:32, 33.
Kristofo Asuafo Nsu Mu Asubɔ
9. (a) Bere bɛn na wodii kan bɔɔ asu sɛnea wɔakyerɛ wɔ Mateo 28:19 no? (b) Bere a wode nsemmisa ne kyerɛw nsɛm a wɔde aka nkyekyem yi ho no redi dwuma no, pɛɛpɛe nea na Yesu kyerɛ sɛ ɛsɛ sɛ wɔn a wɔpɛ sɛ wɔbɔ wɔn asu no gye tom no mu.
9 Yohane bɔɔ Yesu asuafo a wodi kan no asu nsu mu na afei ɔkyerɛɛ wɔn kwan kɔɔ Yesu nkyɛn sɛ wɔn a daakye wɔbɛyɛ ne honhom mu ayeforo no mufo. (Yohane 3:25-30) Wɔ Yesu akwankyerɛ ase no, wɔn nso wɔbɔɔ ebinom asu a na ɛkyerɛ ade koro no ara te sɛ Yohane asubɔ no. (Yohane 4:1-3) Nanso, efi Pentekoste 33 Y.B. mu no, wofii ase yɛɛ ahyɛde a ɛne sɛ wɔmmɔ asu “Agya ne Ɔba ne honhom kronkron din mu” no ho adwuma. (Mateo 28:19) Sɛ wugyina Kyerɛwnsɛm a wɔabobɔ din no ne nsemmisa a edidi so yi so de hwehwɛ nea ɛno kyerɛ no mu a, wubenya mfaso kɛse:
Wɔ asu a wɔbɛbɔ wɔ “Agya no din mu” no mu no, dɛn na ɛsɛ sɛ obi hu wɔ Agya no ho? (2 Ahene 19:15; Dwom 3:8; 73:28; Yesaia 6:3; Romafo 15:6; Hebrifo 12:9; Yakobo 1:7)
Asu a wɔbɔ wɔ “Ɔba no” din mu no hwehwɛ sɛ wohu dɛn? (Mateo 16:16, 24; Filipifo 2:9-11; Hebrifo 5:9, 10)
Dɛn na ɛsɛ sɛ obi gye di sɛnea ɛbɛyɛ a wɔbɛbɔ no asu wɔ “honhom kronkron” no din mu? (Luka 11:13; Yohane 14:16, 17; Asomafo no Nnwuma 1:8; 10:38; Galatifo 5:22, 23; 2 Petro 1:21)
10. (a) Kristofo nsu mu asubɔ a ɛwɔ hɔ nnɛ no yɛ dɛn ho sɛnkyerɛnne? (b) Ɔkwan bɛn so na ɛda nsow fi Yesu ankasa asubɔ no ho? (d) Sɛ wɔbɔ wɔn a wɔfata wɔ Kyerɛwnsɛm mu no asu a, wɔba bɛyɛ dɛn?
10 Ná wɔn a wodi kan a wɔbɔɔ wɔn asu ma ɛne ahyɛde a Yesu de mae no hyiae no yɛ Yudafo (ne wɔn a wɔasakra abɛyɛ Yudafo) a sɛ́ ɔman no na wɔahyira wɔn ho so ama Onyankopɔn dedaw na ɔdom wɔn titiriw de besii 36 Y.B. mu no. Nanso bere a wɔde Kristo asuafo a wɔbɛyɛ ho kwan maa Samariafo ne Amanaman mufo, ne ansa na wɔbɛbɔ wɔn asu no, na ɛsɛ sɛ wɔn ankasa yɛ ahosohyira ma Yehowa a ɛnka hwee sɛ wɔbɛsom no sɛ ne Ba no asuafo. Eyi da so ara yɛ nea Kristofo nsu mu asubɔ no kyerɛ ma obiara a Yudafo nso ka ho de bedu yɛn nnɛ da yi so. Saa “asubɔ biako” yi fa wɔn a wɔbɛyɛ nokware Kristofo nyinaa ho. Wɔnam saayɛ so bɛyɛ Yehowa Adansefo Kristofo, Onyankopɔn asomfo a wahyɛ wɔn.—Efesofo 4:5; 2 Korintofo 6:3, 4.
11. (a) Dɛn na Kristofo nsu mu asubɔ no yɛ ne nsɛso, na ɔkwan bɛn so? (b) Wɔnam so gye Kristoni fi dɛn mu?
11 Asubɔ a ɛte saa som bo kɛse wɔ Onyankopɔn anim. Bere a ɔsomafo Petro aka adaka a Noa pamee a ɛno mu na wɔkoraa ɔne n’abusua so faa Nsuyiri no mu no ho asɛm akyi no, ɔtwee adwene kɔɔ eyi so. Ɔkyerɛwee sɛ: “Ɛno na afei ne nsɛso gye mo nso nkwa; ɛne asubɔ a ɛnyɛ ɔhonam ho fi yi, na mmom ɛyɛ ahonim pa ho adebisa a Yesu Kristo wusɔre nti yɛnam so yɛ Onyankopɔn de.” (1 Petro 3:21) Na adaka no yɛ adanse ankasa a ani tuae sɛ na Noa ahyira ne ho so sɛ ɔbɛyɛ Onyankopɔn apɛde na na wayɛ adwuma a Onyankopɔn de hyɛɛ ne nsa no wɔ nokwaredi mu. Eyi ma wɔkoraa no so. Wɔ ne nsɛso kwan so no, wogye wɔn a wɔnam Kristo a wɔanyan no afi awufo mu no mu gyidi so hyira wɔn ho so ma Yehowa ma wɔbɔ wɔn asu de yɛ ho sɛnkyerɛnne na afei wɔkɔ so yɛ Onyankopɔn apɛde a ɛwɔ hɔ ma ne nkoa wɔ yɛn bere yi so no nkwa fi mprempren wiase bɔne yi mu. (Galatifo 1:3, 4) Wɔne wiase a aka no nkɔ so nnantew nkɔ ɔsɛe mu bio. Wɔagye wɔn afi eyi mu na Onyankopɔn ama wɔanya ahonim pa.
Ase A Yɛbɛtra Ma Ɛne Yɛn Asɛyɛde Ahorow Ahyia
12. Dɛn nti na asu a obi bɔ no nkutoo nyɛ adanse a ɛkyerɛ sɛ wobegye no nkwa?
12 Ɛbɛyɛ mfomso sɛ wobɛka sɛ asu a wɔbɛbɔ wo no nkutoo yɛ nkwagye ho adanse. Sɛ obi nam Yesu Kristo so ahyira ne ho so ama Yehowa nokwarem na ɛno akyi ɔyɛ Onyankopɔn apɛde, di nokware kosi ase a, ɛno nkutoo ansa na ɛbɛyɛ nea ɛsom bo.—Mateo 24:13.
13. (a) Onyankopɔn apɛde ne dɛn wɔ sɛnea Kristofo a wɔagye asubɔ de wɔn asetra di dwuma no ho? (b) Ɛsɛ sɛ Kristo osuaniyɛ no ho hia yɛn dɛn wɔ yɛn asetra mu?
13 Nea na ɛka Onyankopɔn apɛde a na ɛwɔ hɔ ma Yesu no ho ne sɛnea ɔde ne nkwa bedi dwuma sɛ ɔdesani no. Na ɔde bɛto hɔ wɔ owu mu sɛ afɔrebɔde. Wɔ yɛn fam no, yɛde yɛn nipadua bɛma Onyankopɔn, na yɛatra ase de yɛn ho abɔ afɔre. Yɛde bedi dwuma de ayɛ Onyankopɔn nkutoo apɛde. (Romafo 12:1, 2) Ɛda adi sɛ sɛ yɛboapa bɔ yɛn bra te sɛ wiase a atwa yɛn ho ahyia no nnakoro nnakoro bi mpo, anaasɛ yɛde yɛn asetra di pɛsɛmenkominya nneɛma akyi bere a yɛyɛ ɔsom mu ade bi ara kɛkɛ wɔ Onyankopɔn som mu a, na ɛnyɛ ɛno na yɛyɛ. (1 Petro 4:1-3; 1 Yohane 2:15-17) Bere a Yudani bi bisaa nea ɛsɛ sɛ ɔyɛ na wanya daa nkwa no, Yesu kaee no hia a abrabɔ a ɛho tew ho hia no, na afei ɔkyerɛɛ no hia a ɛho hia sɛ wɔde Kristoni osuani a wɔbɛyɛ sɛ Yesu kyidini no bɛyɛ asetra mu ade a edi kan. Ɛrentumi mmɛyɛ nea ɛto so abien bere a honam fam nneɛma akyidi di kan.—Mateo 19:16-21.
14. (a) Ahenni no ho asɛyɛde bɛn na Kristofo nyinaa wɔ? (b) Sɛnea wɔayɛ ho mfonini wɔ kratafa 101 no, akwan horow a etu mpɔn a wobetumi afa so ayɛ saa adwuma yi bi ne nea ɛwɔ he? (d) Sɛ yefi yɛn koma nyinaa mu nya dwumadi a ɛte saa mu kyɛfa a, dɛn ho adanse na ɛno di?
14 Ɛsɛ sɛ yɛkae nso sɛ na dwumadi a ehia a ɛfa Ahenni no ho no ka Onyankopɔn apɛde a ɛwɔ hɔ ma Yesu no ho. Na wɔasra Yesu ankasa sɛ ɔbɛyɛ Ɔhene. Nanso bere a ɔwɔ asase so no na ɔyɛ Ahenni no ho ɔdansefo mmɔdenbɔfo nso. Yɛwɔ adansedi adwuma a ɛte saa ara a ɛsɛ sɛ yɛyɛ na yɛwɔ ntease biara a enti ɛsɛ sɛ yefi koma nyinaa mu yɛ. Yɛnam saayɛ so da anisɔ a yɛwɔ ma Yehowa tumidi ne ɔdɔ a yɛwɔ ma yɛn mfɛfo adesamma no ho adanse adi. Afei nso yɛkyerɛ sɛ yɛne yɛn mfɛfo asomfo a wɔwɔ wiase a wɔn nyinaa yɛ Ahenni ho adansefo no ayɛ biako wɔ pere a yɛrepere kɔ daa nkwa botae no ho wɔ saa Ahenni no tumidi ase no mu.
Asɛm No Mu Nti̇̃mu
● Nsɛdi ne nsonsonoe bɛn na ɛwɔ Yesu asubɔ no ne nnɛyi nsu mu asubɔ no mu?
● Henanom na na Yohane asubɔ no yɛ wɔn de? Henanom na wɔbɔ wɔn asu kɔ owu mu? Na henanom na “wɔbɔɔ wɔn asu kɔɔ Kristo Yesu mu”?
● Dɛn na ɛwɔ Kristofo nsu mu asubɔ no ho asɛyɛde a yɛbɛtra ase ma ɛne no ahyia no mu?
[Adesua no ho Nsɛmmisa]
[Adaka/Mfonini ahorow wɔ kratafa 101]
Akwan Horow Bɛn So Na Wobɔ Ahenni No Ho Dawuru?
Wɔ apon ano
Denam anigyefo a wɔsan kɔsra wɔn so
Wɔ ofie Bible adesua mu
Wɔ mmorɔn so
Wɔne mfɛfo sukuufo
Wɔne mfɛfo adwumayɛfo
