E pelā mo mea kolā ko oti ne tauloto ne koe i te polosiua tenei, e maua eiloa a akoakoga fakavae e uke i te Tusi Tapu kolā ka fesoasoani atu ki a koe mo tou kāiga. E manako a Ieova ke fiafia koe. E folafola mai a ia me kafai e fakamuamua ne koe tena tapuakiga, “kae ka fakaopoopo atu a mea katoa konei ki a koutou.” (Mataio 6:33) E manako eiloa a ia ke fai koe mo fai sena taugasoa. Fakaaoga so se avanoaga ke fakamalosi aka tou va fakataugasoa mo te Atua. Tenei eiloa te ‵toe tauliaga sili e mafai o maua ne se tino.—Mataio 22:37, 38.

FAKAMATALAGA MAI TE TUSI TAPU: “‘Kae ka fai au mo fai te otou Tamana, kae ko koutou ka fai mo aku tama ta‵gata mo aku tama fa‵fine,’ ko muna a Ieova.” (2 Kolinito 6:18) E manako te Atua ke fai koe mo fai sena taugasoa pili. A te ‵talo ko te auala e tasi ke fai ei te mea tenei. E ‵kami koe ne Ieova ke “‵talo faeloa.” (1 Tesalonia 5:17) E loto fiafia a Ia ke fakalogologo ki ou mafaufauga ‵loto mo mea e manavase koe ki ei. (Filipi 4:6) Kafai e ‵talo fakatasi atu mo tou kāiga, ka lavea ne latou a te fai o te Atua mo fai se tino tonu ki a koe.

I tafa o te faipati atu ki te Atua, e ‵tau foki o fakalogologo koe ki a Ia. E mafai ne koe o fai penei mai te sukesuke ki tena Muna mo tusi faka-te-Tusi Tapu. (Salamo 1:1, 2) Mafaufau ‵loto ki mea e tauloto ne koe. (Salamo 77:11, 12) A te fakalogologo ki te Atua e manakogina ke kau atu faeloa koe ki fakatasiga Kelisiano.—Salamo 122:1-4.

A te faipati atu ki nisi tino e uiga ki a Ieova ko te suā auala tāua ke fakamalosi aka ei tou fesokotakiga mo ia. Ko te uke o taimi e faipati atu ei koe, ko te momea aka foki o tou pili atu ki a ia.—Mataio 28:19, 20.

MEA E MAFAI NE KOE O FAI:

• Ke fakatoka faeloa se taimi i aso katoa ke faitau ki te Tusi Tapu kae ‵talo

• E pelā me se kāiga, ke fakamuamua faeloa a mea faka-te-agaga i lō fakafiafiaga mo tafaoga

FAKAMATALAGA MAI TE TUSI TAPU: “Fakapilipili atu ki te Atua, kae ka fakapilipili mai a ia ki a koutou.” (Iakopo 4:8) Ke fakatoka kae tautali atu ki se polokalame masani o te faiga o te tapuakiga a kāiga. (Kenese 18:19) Kae e uke atu a mea e manakogina. E ‵tau eiloa o fai te Atua mo fai se vaega o tou olaga i aso katoa. Fakamalosi aka te fesokotakiga o tou kāiga mo te Atua mai te faipati atu e uiga ki a ia i te taimi “e ‵nofo koutou i otou fale, sa puli o fakamasausau faeloa a tulafono konā, pelā foki manafai e olo koutou ki se koga, io me ma‵nava koutou, pelā foki i taimi e ga‵lue ei koutou.” (Teutelonome 6:6, 7) Ke fai sau fakaikuga, e pelā mo Iosua, telā ne fai mai: “Ka ko au mo toku kāiga, e tavini eiloa matou ki te Aliki [ko Ieova].”—Iosua 24:15.

MEA E MAFAI NE KOE O FAI:

• Ke fai sau polokalame o akoakoga tumau telā e fetaui tonu mo manakoga o tino takitasi o tou kāiga