E ‵Fuli Ne Te Tusi Tapu A Olaga O Tino

SE A te mea ne maua ne se tagata i Scotland telā e sili atu i te ‵lei i lō se pisinisi manuia? Se a te mea ne fesoasoani atu ki se tagata i Brazil ke fakagata tena olaga fai valevale kae ‵kati tena ‵pusi cocaine? Ne mafai pefea o fakagata ne se tagata i Slovenia tena inu kava? Faitau ki pati ne fai mai ne tino konei.

“Ne Foliga ‵Lei Eiloa Toku Olaga.”—JOHN RICKETTS

TAUSAGA NE FANAU I EI: 1958

TENA FENUA: SCOTLAND

TENA TALA FAKASOLOPITO: SE TINO FAIPISINISI MANUIA

TOKU OLAGA MUA: Ne tupu aka au i se olaga gali. A toku tamana se ofisa maluga i te kautau a Peletania, tela la ne faima‵laga matou ki koga e uke. I tafa o Scotland, ne ‵nofo matou i Egelani, Siamani, Kenya, Malaysia, Aialani, mo Kupelu. I te taimi ko valu oku tausaga, ne fanatu au ki akoga kolā e ‵nofo i ei a tama‵liki a‵koga i Scotland. Fakamuli ifo, ne iku aku akoakoga kae puke toku pepa maluga i te Iunivesiti o Cambridge.

I te taimi ko 20 ei au, ne kamata o galue au i se pisinisi oela mō tausaga e valu. Muamua la, ne galue au i Amelika ki Saute, fakamuli ifo i Afelika, kae fakaoti loa ki Ausetalia ki Togala. Mai tua o taku okoga ki Ausetalia, ne fakatu taku pisinisi ‵teu tupe, telā ne toe ‵togi atu ne au ki tua.

Aku tupe ne maua mai i ei ne fai ei ke mafai o litaea au kae ko 40 oku tausaga. Ne fakaaoga ne au oku taimi konā ke faimalaga. Ne launi fakalua ne au a Ausetalia i taku pasikaiti, kae ne faimalaga fakatasi atu au i te lalolagi kātoa. Ne foliga ‵lei eiloa toku olaga.

TE AUALA NE ‵FULI EI TOKU OLAGA NE TE TUSI TAPU: A koi tuai au o litaea, ne manako au ki se auala ke fakafetai atu ki te Atua mō te olaga gali ne maua ne au. Ne kamata o fano au ki te Lotu Anglican telā ne tupu aka ei au. Kae e se uke a akoakoga ne tuku mai ne te lotu mai te Tusi Tapu. Oti aka, ne fai taku akoga mo tino Mamona, kae ne faka‵tuka mai ki a au me ne seki tau‵tali faka‵lei atu latou ki te Tusi Tapu.

I te aso e tasi ne tukituki mai a Molimau a Ieova i toku mataloa. Ne lavea vave ne au me fakavae katoatoa olotou akoakoga ki te Tusi Tapu. E tasi te tusi faitau ne fakaasi mai ne latou ko te 1 Timoteo 2:3, 4. E fai mai i ei me ko te loto eiloa o te Atua ke “faka‵sao a vaegā tino katoa kae ke iloa tonu ne latou a te munatonu.” Ne ofo au me ne seki faka‵mafa mai fua ne te kau Molimau a te iloaga kae ko te iloaga tonu telā e fakavae ki te Tusi Tapu.

A te suke‵suke fakatasi mo Molimau a Ieova ki te Tusi Tapu ne fesoasoani mai ke maua ne au a te iloaga tonu tenā. E pelā mo aku mea ne tauloto, a te Atua mo Iesu e se ne vaega o te Tolutasi; kae ne tino kese‵kese eiloa e tokolua. (Ioane 14:28; 1 Kolinito 11:3) Ne fiafia malosi au ke iloa atu te munatonu faigofie tenā. Kae ne kaitaua foki au i te uke o oku taimi ne māumāu i aso mua i te taumafaiga ke malamalama i se akoakoga telā e se tonu kae faigata ke malamalama i ei!

E seki leva kae kamata o kau atu au ki fakatasiga a Molimau a Ieova. Ne ofo au i te mata fia‵fia o tino katoa mo te ma‵luga o olotou tulaga i mea tau amioga—ko pelā eiloa latou me ne tino tapu. A te a‵lofa tonu o latou ne fakatalitonu mai ki a au me tenei eiloa te lotu tonu.—Ioane 13:35.

TE AUALA NE MAUA EI NE AU A MEA AOGA: Mai tua o taku papatisoga, ne fetaui au mo se fafine gali e igoa ki a Diane. Ne tupu aka a ia e pelā me se Molimau a Ieova, kae uke ‵ki ana uiga ‵gali kolā ne fai ei ke matagali a ia ki a au. Fakamuli ifo, ne avaga māua. A te ‵lago mai o Diane ne fai eiloa pelā me se fakamanuiaga tonu mai i a Ieova.

Ne ati aka ne māua mo Diane se manakoga lasi ke olo atu o tavini i se koga e manakogina i ei a tino talai o te tala ‵lei mai te Tusi Tapu. I te 2010, ne olo atu māua ki Belize, i Amelika i te Kogaloto. Ne tavini māua i konei ki tino kolā e a‵lofa ki te Atua kae fia‵kai tonu ki te iloaga mai te Tusi Tapu.

Ko fatoa maua ne au te filemu o te mafaufau i te iloaga ne au te munatonu e uiga ki te Atua mo tena Muna, ko te Tusi Tapu. E pelā me se tino e galue i te taviniga tumau, ne maua ne au te fiafia lasi i te akoakoga o tino e tokouke ki te Tusi Tapu. E seai se mea e sili atu i te gali i tafa o te onoono atu ki te munatonu i te Tusi Tapu ko fai ne ia ke ‵lei atu te olaga o se tino—e pelā loa mo te mea ne tupu ki a au. Nei la, ko maua ne au te ‵toe auala ‵lei ke fakafetai atu ki te Atua mō te olaga gali ko maua ne au.

“Ne atafai malosi mai latou ki a au.”—MAURÍCIO ARAÚJO

TAUSAGA NE FANAU I EI: 1967

TENA FENUA: BRAZIL

TENA TALA FAKASOLOPITO: NE OLA I SE OLAGA FAI VALEVALE

TOKU OLAGA MUA: Ne tupu aka au i Avaré, se fakai foliki i São Paulo. A te lasiga o tino i ei e ga‵lue i galuega e se ‵lasi a ‵togi.

Ne mate toku tamana kae koi faitama toku mātua i a au. I te taimi koi foliki au, ne pei sāle au ki gatu o toku mātua māfai e galo a ia i te fale. Ne ‵kilo mai a tino ki a au pelā me se pina me ne ‵pau eiloa aku faifaiga mo mea e fai ne fāfine. Fakamuli ifo, ne kamata o fai ne au a amioga fakatauavaga mo nisi tāgata.

I te taimi ko tai kātoa toku luasefulu, ne ‵sala sāle au ki se tino ke ‵moe fakatauavaga māua (se tagata io me se fafine) i so se koga—i koga inu kava, fale tuisi, ke oko foki ki falesā. I taimi o aso fakamanatu, e teu au pela me se fafine kae saka i māti ‵saka a te akoga. Ne lauiloa ‵ki eiloa au.

E aofia i oku taugasoa a pina, fāfine talitagata, mo tino umiti ki vailakau tapu. Ne fakamalosi mai a nisi o latou ke tofotofo ne au te vailakau tapu ko te cocaine, kae seki leva ne fakavalevale au ki ei. I nisi taimi ne ‵pusi matou i te po kātoa. Kae i nisi taimi e nofo tokotasi au i a au eiloa o ‵pusi vailakau tapu i te aso kātoa. Ne pakā malosi au kae ne ‵pa se tala me ko maua au ne te SELAMETE.

TE AUALA NE ‵FULI EI NE TE TUSI TAPU TOKU OLAGA: Kāti ko te taimi tenei, ne fetaui ei au mo Molimau a Ieova. Ne atafai malosi mai latou ki a au. E tasi te tusi faitau mai te Tusi Tapu ne faitau mai ne latou ko te Loma 10:13, telā e fai mai: “Ko tino katoa kolā e ka‵laga ki te igoa o Ieova ka ‵sao.” Ne lavea ne au mai pati konā a te tāua ke fakaaoga te igoa o Ieova. I taimi e uke, kafai ko oti ne ‵pusi au ki vailakau tapu i te po kātoa, e ‵tala ne au toku famalama, kilo aka ki te lagi, kae ‵talo atu ki a Ieova mo loimata i oku mata o fakamolemole ki a ia ke fesoasoani mai.

Ona ko te manavase ki toku mātua loto mafatia, telā ne logo‵mae malosi i tena kilo mai ki te auala ko fakamasei ei ne au a au eiloa ki vailakau tapu, ne fakaiku aka ne au ke fakagata te faifaiga tenā. E seki leva, kae talia ne au ke fai taku akoga faka-te-Tusi Tapu ne te kau Molimau. Ne fakatalitonu mai latou me ka fakamalosi aka ne taku akoga a taku fakaikuga ke fakagata te fakaaogaga o vailakau tapu—kae ne tonu eiloa!

I te taimi ne tumau ei au i te faiga o taku akoga faka-te-Tusi Tapu, ne iloa aka ne au me e ‵tau o fai ne au a ‵fuliga ki toku olaga. Ne faigata malosi ki a au ke tiaki aku amioga fakasotoma me pelā mo te mea e masaua ne au ne tupu aka eiloa au mo faifaiga konei. E tasi te mea telā ne fesoasoani malosi mai ko te ‵kalo keatea mai i mea kolā e fakamalosi aka i ei a faifaiga penā. Ne fakagata ne au toku kau atu ki oku taugasoa mua e pelā foki mo te fano sāle ki koga inu kava mo fale tuisi.

E tiga loa e se faigofie ke fai a ‵fuliga konei, ne fakamafanafana mai aku mea ne tauloto me e atafai mai a Ieova ki a au kae malamalama foki a ia i toku tulaga. (1 Ioane 3:19, 20) I te 2002, ko se toe fai eiloa ne au a amioga fakasotoma katoa, kae ne papatiso au i te tausaga tenā e pelā me se Molimau a Ieova.

TE AUALA NE MAUA EI NE AU A MEA AOGA: Ne ofo malosi toku mātua i ‵fuliga ne fai ne au tenā ne kamata foki o fai tena akoga faka-te-Tusi Tapu. Fakamuli nei, se mea fakafanoanoa me ne ‵mate feitu tasi a ia. Kae ui ei, ne tumau eiloa tou fafine i te ati aka tena alofa mō Ieova mo muna‵tonu mai te Tusi Tapu.

I te valu tausaga ko ‵teka, ne kau atu au ki te taviniga tumau, kae fakamāumāu te ukega o oku taimi ki te akoakoga o nisi tino ki te Tusi Tapu. E fai ‵tonu atu au me ne faigata ‵ki ke ‵teke sāle ki manakoga sē ‵lei i nisi taimi. Kae e maua ne au te loto malosi i te iloa atu me kafai e filifili ne au ke se fai penā, ko fakafiafia eiloa ne au a Ieova.

A te fakapilipili atu ki a Ieova kae ola i te auala telā e fakafiafia ki a ia ne maua ei ne au a lagonaga āva ki a au eiloa. Nei la, ko fai au pelā me se tagata fiafia.

“Ne fai au pelā me se paelo e seai sena takele.”—LUKA ŠUC

TAUSAGA NE FANAU EI: 1975

TENA FENUA: SLOVENIA

TENA TALA FAKASOLOPITO: SE TINO INU KAVA

TOKU OLAGA MUA: Ne fanau au i Ljubljana, te laumua o Slovenia. Ne gali toku olaga i taku folikiga ke oko ki te taimi ko fa oku tausaga. I te taimi tenā ne fakamate toku tamana. Mai tua o te fakalavelave tenei, ne ‵tau o galue malosi toku mātua ke fagai ana tama‵liki tāgata e tokolua kolā koi fo‵liki, ko māua mo toku taina matua.

I te taimi ko 15 ei au, ne fano au o ‵nofo mo toku tupuna fafine. Ne fiafia au ki ei me tokouke oku taugasoa e ‵nofo i te koga tenā. Ne lasi foki toku saolotoga i konā i lō i taku nofoga i te fale. I te taimi ko 16 ei au, ne kamata o fai taugasoa au mo tino kolā e inu sāle i fakaotiga o vaiaso. Ne faka‵loa ne au oku laulu, kamata o pei ki gatu kolā e fakaasi atu ei a uiga ‵teke, kae fakamuli ne kamata au o ‵pusi.

E tiga loa ne tofotofo au ki vaegā vailakau tapu kese‵kese, ne tumau au i te inu kava me ne fiafia malosi au ki ei. E seki leva kae ko se inu fua au ki nai ipu uaina kae ko mafai o inu ne au se fagu kātoa i te taimi e tasi. Ne poto au i te ‵funa aka toku konā. Ne iloa sāle fua ne tino i a au ne inu me ‵sogi ne latou te manogi kava. Kae se iloa ne latou te uke o lita uaina io me ne pia—palu tasi mo meainu ma‵losi ko oti ne inu ne au!

I te ukega o taimi, ko au e fesoasoani ki oku taugasoa ke ‵tu faka‵lei ma oti te tuisi, faitalia loa me sili fakalua atu aku mea ne inu i lō latou. E tasi te aso, ne lagona ne au a pati a toku taugasoa me ne fai au pelā me se paelo e seai sena takele—se tugapati matagā i te ‵gana Slovenia telā e fakasino atu ki se tino telā e uke atu ana mea ne inu i lō nisi tino. Ne logo‵mae malosi au i pati konā.

Ne kamata ei o mafaufau au ki toku vaegā olaga. Ne ma‵losi ‵ki oku lagonaga sē aoga. E foliga mai me e seai eiloa se mea aoga ne fai ne au i te olaga.

TE AUALA NE ‵FULI EI NE TE TUSI TAPU TOKU OLAGA: I te taimi tenei, ne lavea ne au a ‵fuliga ne fai ne se tamaliki e tokotasi i te akoga; ko gasolo aka o uiga filemu a ia. Ona ko te fia iloa ne au a te pogai ne ‵fuli ei a ia, ne ‵kami ne au a ia ke olo māua ki se koga inu kōfe. Ne fakamatala mai ne ia me ko kamata o fai tena akoga faka-te-Tusi Tapu mo Molimau a Ieova. Ne fakaasi mai ne ia a nisi mea ne tauloto ne ia, kolā ne mea ‵fou ‵ki ki a au, me seki ai eiloa ne mea fakalotu ne iloa ne au mai taku folikiga. Ne kamata o kau atu au ki fakatasiga a Molimau kae sukesuke mo latou ki te Tusi Tapu.

A te sukesuke ki te Tusi Tapu ne fai ei ke ‵pula oku mata kae lavea atu a muna‵tonu fakamalosi loto. E pelā mo se mea e tasi, ne iloa ne au me ko ola tatou i te vaitaimi telā e taku ne te Tusi Tapu ki “aso fakaoti.” (2 Timoteo 3:1-5) Ne iloa foki ne au me ko pili o tapale keatea ne te Atua a tino ma‵sei mai te lalolagi kae tuku atu ki tino ‵lei te avanoaga ke ola ki te se-gata-mai i te Palataiso. (Salamo 37:29) Ne manako malosi au ke faka‵ma toku olaga ko te mea ke aofia au i tino konā.

Ne kamata o fai atu ne au ki oku taugasoa a muna‵tonu mai te Tusi Tapu kolā ko iloa ne au. A te tokoukega ne fakatauemu ne latou a mea ne fai atu ne au, kae ne fai te mea tenei pelā me se fakamanuiaga i auala seki fakamoemoegina. A olotou faifaiga konā ne fesoasoani mai ke iloa ne au me i a latou e se ne taugasoa ‵tonu. Ne iloa ne au me ne māfua mai toku inu malosi ona ko taugasoa ne filifili ne au. E olioli latou i te vaiaso kātoa ke toe inu malosi latou ke ko‵nā i te fakaotiga o te vaiaso.

Ne fakagata ne au te fai taugasoa mo latou kae sui ki taugasoa fakamalosi loto mai Molimau a Ieova. A te ‵kau fakatasi mo latou se fakamalosiga lasi eiloa—konei a tino kolā e a‵lofa tonu ki te Atua kae taumafai malosi ke ola e ‵tusa mo ana tulaga. Fakamuli loa, ne mafai o tiaki katoatoa ne au a toku inu kava malosi sāle.

TE AUALA NE MAUA EI NE AU A MEA AOGA: E loto fakafetai au ki a Ieova me ko se toe manakogina a meainu ma‵losi ke fakafiafia aka ei au. Moi ne tumau au i toku olaga mua e se iloa ne au me se a te mea ne mafai o tupu ki a au. Kae e talitonu au me ko sili atu nei te ‵lei o toku olaga.

I tausaga e fitu ko ‵teka, ne taulia au ke galue i te ofisa lagolago o Molimau a Ieova i Slovenia. A te iloa ‵lei ne au a Ieova mo te tavini atu ki a ia ne maua i ei ne au se olaga aoga tonu.