AKOAKOGA FAKAVAE I TE TUSI TAPU: “Ke fakatau . . . fakamagalo faeloa te suā tino ki te suā tino māfai e isi se pogai e fameo ei se tino ki te suā tino. E pelā eiloa mo te fakamagaloga o koutou ne Ieova, e ‵tau foki mo koutou o fai penā.”—Kolose 3:13.

Se a te mea e fakauiga ki ei? I te Tusi Tapu, e faka‵pau eiloa te agasala ki se kaitalafu kae ko te fakamagalo e fakatusa ki te ‵sologa o se kaitalafu. (Luka 11:4) E fai mai se tusi e tasi me i loto i te Tusi Tapu, a te uiga o te pati Eleni telā ne ‵fuli ki te “fakamagalo” e fakauiga ki te “fakaseaogaga o te kaitalafu, mai te sē fai atu ke ‵tina mai.” Tela la, kafai e filifili aka ne tatou ke fakamagalo se tino telā ne ‵se mai ki a tatou, e se ma‵nako tatou ki so se mea mai i te tino ‵se. A te ‵tou loto fia‵fia ke fakamagalo atu e se fakauiga i ei me e talia ne tatou a amioga ma‵sei io me e fakamāmā aka ne tatou a te logo‵mae o tatou i ei. I lō te fai penā, e fakaiku aka fua ne tatou ke se toe nofo mo te loto ita, faitalia me e isi eiloa “se pogai e fameo” ei tatou.

E mata, e aoga eiloa te mea tenā i aso nei? E pelā me ne tino sē ‵lei katoatoa, e agasala katoa tatou. (Loma 3:23) Tela la, se mea poto ke fakamagalo atu ki nisi tino, me ka ma‵nako eiloa tatou ke fakamagalo tatou ne nisi tino i se taimi pili mai mua nei io me fakamuli loa. E sili atu i ei, kafai e filifili aka ne tatou ke fakamagalo atu, e maua foki ne tatou a mea aoga mai i ei. E pefea la?

Kafai e ita fakamoe‵moe tatou—kae e se fakamagalo atu—e logo‵mae fua tatou i ei. E mafai o ave keatea ne lagonaga sē ‵lei penā a te fiafia, fakafaigata ‵tou olaga, kae fai ei ke fanoa‵noa tatou. E mafai foki o fai ke maua ne tatou se masaki lasi. Ne fakaiku aka ne se lipoti i te Journal of the American College of Cardiology, mai i te Tokita ko Yoichi Chida mo te Polofesa o te Mafaufau ko Andrew Steptoe, penei: “E fakaasi mai i sukesukega fakamuli nei me e isi se sokoga fakamataku i te va o te kaitaua mo te saua mo masaki o te fatu [coronary heart disease].”

Kae ko feitu ‵lei, mafaufau ki te aoga o te loto fakamagalo. Kafai e fakamagalo faeloa ne tatou a nisi tino, e tausi ne tatou te tokagamalie mo te filemu, telā e puipui ei ne tatou a fesokotakiga. E sili atu i ei, e fakamaoni atu ne tatou me e fakaakoako tatou ki te Atua, telā e fakamagalo faeloa ne ia a tino agasala kae sala‵mo tonu kae e fakamoemoe foki a ia ke fai tatou penā.—Maleko 11:25; Efeso 4:32; 5:1.