Ieova Se Atua Telā e ‵Tau o Iloa ne Tatou

E MATA, ne fai penā me e isi se mea tāua e galo i tou olaga? Kafai e mu‵tana fua au mea e iloa e uiga ki te Atua, ko tena uiga, a te tali ki ei ko te ao. Kaia? Me e pelā mo te mea ko oti ne iloa aka ne te fia miliona o tino, a te iloa faka‵lei ne latou a te Atua o te Tusi Tapu, e maua ei ne latou a mea aoga e uke i te olaga. E maua fakavave ne latou a mea aoga konei kae ka tumau foki ke oko ki aso mai mua.

A Ieova te Atua, ko te Tino ne aumai ne ia te Tusi Tapu, e manako ke iloa ne tatou a ia. Ne tusi mai te faisalamo: “Ke iloa ne tino me i a koe, telā ko Ieova tou igoa, ko koe tokotasi fua te Atua Tafasili i te Maluga i te lalolagi kātoa.” Ne iloa ne ia me ka aoga eiloa ki a tatou māfai e iloa ne tatou a Ia. “Au, Ieova, ko tou Atua, ko te Atua telā e akoako ne ia koe ke ‵lei koe.” E maua pefea ne tatou a mea aoga mai te iloa ne tatou a Ieova, te Atua Tafasili i te Maluga?—Salamo 83:18; Isaia 48:17.

E tasi o mea aoga tonu ko fakatakitakiga kolā e maua ne tatou ke fakafesagai atu ki fakalavelave i aso katoa, se fakamoemoega mautinoa mō aso mai mua, mo te filemu o te mafaufau. E se gata i ei, kafai e masani ‵lei tatou mo Ieova, e fai ei ke ‵kese te ‵tou kilokiloga e uiga ki toe fesili tāua kolā e pokotia i ei a tino i te lalolagi kātoa i aso nei. Ne a fesili konā?

E Mata, e Isi se Aoga o Tou Olaga?

Faitalia te gasolo aka o poto ‵fou fakaofoofogia i mea tau fesokotakiga, koi fesili mai eiloa ne tino i aso nei a fesili tāua penei: ‘Kaia e nofo ei au i konei? Tefea te koga ka fano au ki ei? Se a te aoga o te olaga ni?’ Kafai e se maua ne se tino a tali fakama‵lie loto, ka seai eiloa se aoga o tena olaga. E mata, e maua ne tino e tokouke a te lagonaga tenei? E fakaasi mai i se savea telā ne fai i Siamani, i tausaga fakaotioti talu mai te 1990, me e nofo ki te āfa o te aofaki o tino ne fakasau‵tala aka, e masani sāle io me i nisi taimi e mafau‵fau me e seai se aoga o te olaga. Kāti e tai penā foki te tulaga i te koga e nofo koe i ei.

Kafai e seai se aoga o te olaga, e seai foki se fakavae e mafai o ati aka ne se tino ana fakamoemoega totino i ei. E taumafai a tino e tokouke ke faka‵galo aka a lagonaga penei, mai te kausaki atu ki se galuega ‵togi ‵lei io me mai te fakaputuakaga o koloa e uke. Kae koi maua eiloa ne latou a lagonaga sē tokagamalie. A te seai o se aoga o te olaga ne fakalavelave atu ki nisi tino, telā ne seki toe ma‵nako latou ke tumau i te ola. Tenā te mea ne tupu ki se tamāfine matagali telā ne puti aka “i se olaga maumea mo te saolotoga ke fai so se mea,” e ‵tusa mo te fakamatalaga i te International Herald Tribune. E tiga eiloa ne ola tou fafine i se olaga gali ‵ki, ne maua ne ia a lagonaga sē sologa o te nofo tokotasi kae mafaufau me e seai se aoga o tena olaga. Ne inu ne ia a fuaga faka‵moe kae ne maua atu tou fafine ko mate. Kāti e iloa foki ne koe a nisi tino kolā ne ‵mate atu i se vaegā auala matagā penā.

Kae kai lagona aka eiloa ne koe a tino e fai mai me e mafai o tuku mai ne poto fakasaienisi a fakamatalaga katoa e uiga ki te olaga? E fai mai penei a te nusipepa a te kau Siamani ko te Die Woche: “E tiga eiloa e mafai o ‵tonu a fakamatalaga fakasaienisi, e seai lele eiloa ne mea faka-te-agaga e  tuku mai i ei. E foliga faigofie mai a te evolusione kae ke oko foki eiloa ki fakamatalaga kese‵kese e uiga ki mea kese‵kese kolā e mafuli‵fuli faeloa, e seai lele eiloa ne fakamafanafanaga mo se olaga tokagamalie e tuku mai ne latou.” Ko uke ‵ki a mea ne iloilo aka ne saienitisi ke fakamatala mai i ei a mea o te olaga i vaega kese‵kese, e pelā mo te tamilosaga masani o mea mo mea kolā e aoga ke fakatumau aka ei te ola. Kae ne seki mafai ne poto fakasaienisi o fai mai a te pogai ko ‵nofo ei tatou i konei, mo te koga ka olo tatou ki ei. Kafai e fakalago‵lago katoatoa fua tatou ki poto fakasaienisi, ka se mafai o maua ne tatou a tali ki ‵tou fesili e uiga ki te aoga o te olaga. A te ikuga, e pela mo te lipoti i te nusipepa Süddeutsche Zeitung, “ko manakogina a fakatakitakiga ‵tonu i te lalolagi kātoa.”

Ko oi aka foki i tafa o te Mafuaga, e maua ne ia te tulaga ‵lei ke tuku mai ne ia a vaegā fakatakitakiga penā? Ona ko te mea ne tuku ne ia ke ‵nofo a tino i te lalolagi i te taimi muamua, e ‵tau o iloa ne ia te pogai ko ‵nofo ei tatou i konei. E fakamatala mai i te Tusi Tapu me ne faite ne Ieova a tino ko te mea ke mafai o faka‵fonu ne latou te lalolagi kae tausi atu ki ei kae fai mo situati i ei. Ne ‵tau o fakaasi atu ne tino, i olotou faifaiga katoa, ana uiga pelā mo te fakamaoni, poto, mo te alofa. Kafai ko malamalama tatou i te pogai ne faite ei ne Ieova tatou, ko iloa foki ei ne tatou a te pogai ko ‵nofo ei tatou i konei.—Kenese 1:26-28.

Ne a Au Mea e Mafai o Fai?

Kae e a māfai ne seki maua ne koe a tali fakama‵lie loto ki au fesili i aso mua: ‘Kaia e nofo ei au i konei? Tefea te koga ka fano au ki ei. Se a te aoga o te olaga?’ E fakamalosi mai te Tusi Tapu ke taumafai ke iloa faka‵lei ne koe a Ieova. A te ‵tonuga loa, ne fai mai Iesu: “Tenei te uiga o te ola se-gata-mai, ke iloa tonu ne latou a koe, ko te Atua tonu e tokotasi, e penā foki loa mo te tino telā ne uga mai ne koe, ko Iesu Keliso.” E fakamalosi atu foki ke ati aka ne koe a uiga fakaatua, kae maise ko te alofa, kae ke taumafai malosi koe ke ola mai lalo i te Malo faka-Mesia a te Atua telā ko pili mai. Ka mafai ei o aoga tou olaga kae ka maua foki ne koe se fakamoemoega tokagamalie mō aso mai mua. Kāti ka tali aka ei a fesili tāua kolā ne mafaufau faeloa koe ki ei.—Ioane 17:3; Failauga 12:13.

Ka pefea te aoga o tali konā ki a koe? A Hans se tokotasi telā ne pokotia malosi i ei. * I tausaga ko ‵teka, ne seki lasi tena talitonu ki te Atua, kae ne seai lele se aoga o te fakatuanaki o Hans ki tena olaga. Ne fakaaoga ne ia a vailakau tapu, ‵moe mo fāfine ‵taka, aofia i tamā amioga solitulafono, mo te fakateletele pasikaiti. “Kae ne maua ne au a lagonaga sē aoga i te olaga, se olaga sē fakamalie loto,” ko ana fakamatalaga. I te taimi ko 20 tupu ei ana tausaga, ne fakaiku aka ne Hans ke taumafai a ia ke iloa ‵lei ne ia te Atua, mai te faitau faka‵lei ki te Tusi Tapu. I te taimi ne gasolo aka o iloa ‵lei ne ia a Ieova kae malamalama i te aoga o te olaga, ne ‵fuli ne Hans tena vaegā olaga kae ne papatiso e pelā me se tokotasi o Molimau a Ieova. Ko oti ne aofia a ia i te taviniga tumau mō se sefulu tausaga. Ne fai ‵tonu mai a ia: “A te tavini atu ki a Ieova ko te ‵toe olaga ‵lei eiloa. E seai aka foki se mea e mafai o fakatusa ki ei. Ko iloa ne au te aoga o te olaga i te taimi ne iloa ‵lei ne au a Ieova.”

E tonu, a te aoga o te olaga e se ko te fesili fua e tasi telā e manava‵se ki ei a tino e tokouke. Ona ko te gasolo aka o ma‵sei a tulaga i te lalolagi, e momea aka foki te tokouke o tino e manava‵se i te suā fesili tāua.

Kaia ne Tupu ei te Mea Tenei?

Kafai ko oko mai a puapuaga, a te mea telā e mafaufau sāle ki ei a te tino logo‵mae, ko te fesili tenei: Kaia ne tupu ei te mea tenei? A te malosi ke fa‵ki i te puapuagatia, ne faka‵na malosi ki te mauaga o se tali ‵lei ki te fesili tenā. Kafai e seai se tali fakamalie loto, e masani sāle o tumau a te logo‵mae tenā kae kamata o maua ne te tino logo‵mae a te loto ita. Mafaufau la ki te tala o Bruni.

“I nai tausaga ko ‵teka, ne mate taku pepe  fafine,” ko fakamatalaga a Bruni, se mātua, telā kāti ko 30 ki te 40 ana tausaga. “Ne talitonu au ki te Atua, kae ne ‵sala atu ki se fakamafanafanaga mai te motou faifeau. Ne fai mai a ia me ko oti ne puke ne te Atua a Susanne ki te lagi, telā ko fai nei a ia mo fai se agelu. E se gata fua i te galo atu o toku fiafia ki mea katoa i toku olaga ona ko tena mate kae ne takalialia foki au ki te Atua me ne ave ne ia tou fafine.” Ne tumau eiloa a lagonaga logo‵mae o Bruni mō nai tausaga. “Kae ne fakaasi mai ne se Molimau a Ieova mai te Tusi Tapu me e se ‵tau o takalialia au ki te Atua. Ne seki ave ne Ieova a Susanne ki te lagi kae e seki fai foki mo fai se agelu. A tena masaki ko te ikuga o te tulaga sē ‵lei katoatoa o tino. Ko moe nei a Susanne i te mate kae faka‵tali ki a Ieova ke toe fakatu aka a ia. Ne tauloto foki ne au me ne faite a tino ke ola ki te se-gata-mai i se lalolagi palataiso kae ko pili o fakataunu te mea tenei. I te taimi ne kamata o malamalama au me ko Ieova se vaegā tino pefea, ne momea aka toku pili ki a ia kae ne kamata foki o feoloolo toku logo‵mae.”—Salamo 37:29; Galuega 24:15; Loma 5:12.

E pokotia te fia miliona o tino i puapuaga kese‵kese, matugā fakalavelave totino, taua, oge meakai, io me ko fakalavelave o te natula. Ne maua ne Bruni se fakatapūga i te taimi ne lavea ne ia mai te Tusi Tapu me e se ‵tau o ‵losi atu ki a Ieova me ko te pogai o ‵tou puapuaga, kae ne seki mafaufau lele foki a ia ke logo‵mae a tino, kae ko pili o aumai ne ia te gataga ki mea ma‵sei konā. A te manatu tonu me ko gasolo aka o uke a amioga ma‵sei se fakailoga me ko ‵nofo tonu tatou “i aso fakaoti” o te olaga masei tenei. A te ‵fuliga ‵lasi tenei mō te ‵lei telā ko leva ne ma‵nako tatou ki ei ko pili mai.—2 Timoteo 3:1-5; Mataio 24:7, 8.

Ke Iloa te Atua

Ne seki manino ‵lei te malamalama o Hans mo Bruni e uiga ki te Atua. Ne tali‵tonu lāua ki a ia kae e se lasi te lā iloa e uiga ki a ia. Ne aoga eiloa lā taumafaiga ke iloa ‵lei ne lāua a Ieova. Ne maua ne lāua a tali kolā e fetaui ‵lei ki toe fesili tāua i ‵tou aso nei. Ne fai ei ke filemu lā mafaufau kae maua foki se fakamoemoega tokagamalie mō aso mai mua. E tai penā foki loa a mea ne ‵tupu ki te fia miliona o tavini a Ieova.

E ‵tau o sukesuke faka‵lei muamua koe ki te Tusi Tapu ko te mea ke iloa ne koe a Ieova me e fakaasi mai i ei a mea e uiga ki a ia mo mea e manako a ia ke fai ne tatou. Tenā loa te mea ne fai ne nisi tino i te senitenali muamua. A Luka, se tino tusitala kae se tokita foki, ne lipoti mai ne ia me i tino i te fakapotopotoga Iutaia i Pelea, i Eleni, “ne talia ne latou a te muna mo te loto fia‵fia [mai i a Paulo mo Sila], kae suke‵suke malosi ki Tusitusiga Tapu i aso katoa o fakatalitonu aka me e mata, e ‵tonu a mea konei.”—Galuega 17:10, 11.

Ne maopoopo foki a Kelisiano i te senitenali muamua i fakapotopotoga. (Galuega 2:41, 42, 46; 1 Kolinito 1:1, 2; Kalatia 1:1, 2; 2 Tesalonia 1:1) E penā foki i aso nei. E ‵kau fakatasi a fakapotopotoga a Molimau a Ieova i fakatasiga kolā ne fakatoka fakapito ke fesoasoani ki tino katoa ke fakapili‵pili atu ki a Ieova kae ke fia‵fia foki i te lotou tavini atu ki a ia. E isi foki se mea aoga e maua mai te ‵kau fakatasi mo te kau Molimau i tou fenua. Ona ko te mea e fakaakoako malielie sāle a tino ki te Atua e tapuaki latou ki ei, e fakaasi atu ne Molimau a Ieova—i se tamā auala foliki—a uiga foki kolā e fakaasi atu ne Ieova. Tela la, a te ‵kau fakatasi mo te kau Molimau, ka fesoasoani atu ke momea aka foki te iloa ‵lei ne koe a Ieova.—Epelu 10:24, 25.

E mata, e foliga mai me e ‵tau o uke a taumafaiga e fai ke iloa ne koe se Tino e tokotasi? E mautinoa eiloa me e manakogina a taumafaiga. Kae e mata, e se penā foki a mea e uke kolā e ma‵nako tatou o fai i te olaga? Mafaufau ki taumafaiga e fai ne se tino apo i tafaoga. E pelā mo te tino mai Falani, telā ne maua ne ia te fāiloga aulo i se tafaoga i te Olympics, ko te faka‵seke i te kiona, ko Jean-Claude Killy, ne fai mai ne ia a mea e uiga ki mea e ‵tau o fai ko te mea ke manumalo koe i tafaoga fakatau‵fai i te lalolagi kātoa: “E ‵tau o fakatokatoka koe i se 10 tausaga mai mua o te taimi tenā, kae palani faka‵lei ki ei mō se fia o tausaga kae mafaufau ki ei i aso katoa . . . Se galuega telā e  ‵tau o fai kae mafaufau ki ei i aso e 365 i te tausaga.” Ko oko loa te uke o taimi mo taumafaiga e manakogina ke aofia i se fakatau‵telega telā kāti e mafai fua o sefulu minute te leva! Kae sili fakafia atu la te uke o mea aoga tumau e maua māfai e taumafai malosi ke iloa ne tatou a Ieova.

Se Fesokotakiga Telā e Gasolo Aka Faeloa o Pili Atu

Ko oi ka se fia maua ne ia se mea tāua i tena olaga? E seai. Tela la, kafai e mafaufau koe me e seai se aoga o tou olaga io me e manako koe ki se fakamatalaga e uiga ki te pogai o puapuaga, ke na fakaiku aka mo te mautinoa ke taumafai ke iloa ne koe a Ieova, te Atua o te Tusi Tapu. A te tauloto e uiga ki a ia e mafai ei o ‵fuli tou olaga i se auala tumau ke tai ‵lei atu.

E mata, ka mafai o gata te ‵tou tauloto e uiga ki a Ieova? A latou kolā ko oti ne tavini atu ki a ia mō se fia sefulu tausaga, koi ofo eiloa i mea ne tauloto ne latou i aso mua mo mea ‵fou ne fatoa tauloto ne latou e uiga ki a ia. A te tauloto ki vaegā mea penā, e fai ei ke fia‵fia tatou kae fai foki ke pili atu tatou ki a ia. Fai ke ‵pau ‵tou mafaufauga mo te apositolo ko Paulo, tela ne tusi mai: “Ko tafaga la te ‵poko o te maumea mo te poto mo te iloa o te Atua! Ko oko eiloa te faigata ke malamalama i ana fakamasinoga kae e se mafai o iloa ana auala! Me ‘ko oi e iloa ne ia a te mafaufau o Ieova, io me e fai mo fai tena tino fakatonutonu?’”—Loma 11:33, 34.

[Fakamatalaga mai lalo]

[Ko manatu tāua e 5]

Koi fesili mai eiloa ne tino a fesili tāua penei: ‘Kaia e nofo ei au i konei? Tefea te koga ka fano au ki ei? Se a te aoga o te olaga?’

[Ko manatu tāua e 6]

“I te taimi ne kamata o malamalama au me ko Ieova se vaegā tino pefea, ne momea aka toku pili ki a ia”

[Ko manatu tāua e 7]

“A te tavini atu ki a Ieova ko te ‵toe olaga ‵lei eiloa. E seai aka foki se mea e mafai o fakatusa ki ei. Ko iloa ne au te aoga o te olaga i te taimi ne iloa ‵lei ei ne au a Ieova”