Kasi sono mukulwaralwara ndipo vinthu vili makora yayi? Para ivi vyachitika, munthu wakusuzgika chomene maghanoghano kweniso wangamba kusoŵa ndalama. Kasi ntchivichi chingamovwirani kuti muzizipizge? Kasi mungamovwira wuli mubali panji mubwezi winu uyo wakulwaralwara? Nangauli Baibolo ni buku la vya chipatala yayi, kweni lili na fundo izo zingamovwirani kuti muchitenge vinthu mwamahara panyengo yakusuzga iyi.

•   Lutani ku chipatala

   Ivyo Baibolo likuyowoya: “Ŵanthu awo ŵali makora ŵakukhumbikwira dokotala chara, kweni ŵalwari ndiwo.”—Mateyu 9:12.

   Umo mungalondezgera fundo iyi: Para vingachitika, mukawonanenge na dokotala uyo wangamovwirani pa suzgo linu

   Yezgani kuchita ivi: Mulutenge ku chipatala icho chingamovwirani nadi. Nyengo zinyake pangakhumbikwira kuwonana na dokotala munyake. (Zintharika 14:15) Muyowoyeskanenge mwakufwatuka na madokotala, muŵapulikiskenge ndipo woneseskani kuti nawo ŵakupulikiska umo mukujipulikira. (Zintharika 15:22) Mulimanyenge makora suzgo linu kweniso wovwiri uwo muli kupokerapo. Para mukulimanya makora suzgo linu, mukuŵa ŵakunozgeka ndipo mukusuzgika chomene maghanoghano yayi kweniso mukusankha makora chakuchita.

•   Muchitenge maseŵero ghakukhozga thupi

   Ivyo Baibolo likuyowoya: “Maseŵero ghakukhozga thupi ghali na chandulo.”—1 Timote 4:8.

   Umo mungalondezgera fundo iyi: Mukuŵa na umoyo uwemiko para nyengo zose mukuchita maseŵero ghakukhozga thupi.

   Yezgani kuchita ivi: Nyengo zose muchitenge maseŵero ghakukhozga thupi, muryenge vyakurya ivyo vingamovwirani kuŵa na umoyo uwemi, kweniso mugonenge mwakukwana. Nangauli mukuŵa kuti muchali kusintha vinyake chifukwa cha ulwari, kweni para mukupatura nyengo kuti muchitenge maseŵero ghakukhozga thupi na kurya vyakurya vya magulu ghose, mungaŵa ŵakukondwa. Woneseskani kuti ivyo mukuchita vileke kupangiska kuti vinthu vihenipirethu, panji kupangiska kuti munkhwala uwo mukumwa uleke kugwira ntchito.

•   Pemphani Wovwiri

   Ivyo Baibolo likuyowoya: “Mubwezi wanadi wakutemwa nyengo zose ndipo ni mubali uyo wali kubabikira kovwira mu suzgo.”—Zintharika 17:17.

   Umo mungalondezgera fundo iyi: Ŵabwezi ŵinu ŵangamovwirani kuti muzizipizge.

   Yezgani kuchita ivi: Phaliraniko mubwezi winu wakugomezgeka umo mukujipulikira. Ivi vingamovwirani kuti muleke kusuzgika chomene maghanoghano chifukwa cha suzgo linu. Kanandi ŵabwezi na ŵabali ŵakukhumba kumovwirani, kweni nyengo zinyake ŵangamanya makora yayi ivyo ŵangachita. Ntheura ŵaphalirani mwakufwatuka ivyo mukuwona kuti ŵangachita kuti ŵamovwirani. Lekani kukhazga vinandi, ndipo muwongenge pa ivyo ŵamovwirani. Kweniso ntchakuzirwa chomene kuti muŵikenge malango, nga unandi wa mazuŵa agho ŵanthu ŵangiza kuzakamuwonani, na nyengo iyo ŵangizira. Ivi vingamovwirani kuti muleke kusuzgika maghanoghano.

•   Muwonenge vinthu mwakwenelera

   Ivyo Baibolo likuyowoya: “Mtima wachimwemwe ni munkhwala uwemi, kweni mzimu wakuphyoka ukukamuska nkhongono.”—Zintharika 17:22.

   Umo mungalondezgera fundo iyi: Para mukuwona vinthu mwakwenelera, vingamovwirani kuti muleke kwenjerwa mwakujumphizga.

   Yezgani kuchita ivi: Apo mukuyezgayezga kuti musinthe vinthu vinyake pa umoyo winu, chitani ivyo mukuwona kuti mungafiska, ndipo lekani kutangwanika na ivyo mungavisintha yayi. Lekani kujiyaniska na ŵanyinu panji na umo mukaŵira kale pambere mundambe kulwaralwara. (Ŵagalatiya 6:4) Muŵe na vilato ivyo mukumanya kuti mungavifiska. Ivi vimovwiraninge kuti mulutilire kuwona vinthu mwakwenelera. (Zintharika 24:10) Namwe movwirenge ŵanyinu para mungafiska. Pakuti munthu wakuŵa wakukondwa chomene para wakupeleka, vingamovwirani kuti muleke kughanaghanira waka vya suzgo linu.—Milimo 20:35.

 Baibolo likulongora kuti Yehova Chiuta a wangawovwira munthu kuti wazizipizge masuzgo. Tikukhazga kuti Chiuta watichizgenge mwamunthondwe yayi, kweni awo ŵakumusopa wangaŵawovwira munthowa izi:

 Mtende. Yehova wangatipa ‘mtende uwo ukuluska maghanoghano ghose.’ (Ŵafilipi 4:6, 7) Mtende wa mu mtima uwu, ungamovwirani kuti muleke kwenjerwa mwakujumphizga. Chiuta wakupeleka mtende wa mu mtima kwa awo ŵakumulomba na kumuthulira vyose ivyo ŵakwenjerwa navyo.—1 Petrosi 5:7.

 Vinjeru. Yehova wangatipa vinjeru kuti tisankhenge vinthu mwamahara. (Yakobe 1:5) Munthu wakusanga vinjeru ivi para wakusambira Baibolo na kulondezga fundo zake

 Chigomezgo chiwemi cha munthazi. Yehova wakutilayizga kuti munthazi “pazamuŵavya munthu wakukhala mu charu uyo wazamuti: ‘Nalwara.’” (Yesaya 33:24.) Chigomezgo ichi chawovwira ŵanthu ŵanandi kuti ŵalutilire kuŵa ŵakukondwa nanga ŵangaŵa kuti ŵakulwara chomene.—Yeremiya 29:11, 12.