Nkhondo Yachiŵiri ya pa Charu Chose yikati yamara waka mu 1945, charu cha Germany chikaŵa kuti chapasukirathu. Misumba yikabwanganduka, mu masukulu mukaŵavya waliyose, vipatala vikaŵa kuti vingagwiraso ntchito yayi, ndipo mabomba agho ŵakaghawundiranga pasi, ghakaŵa waka palipose. Chakurya nacho chikasangikanga bweka yayi, ivi vikapangiska kuti chidure chomene. Mwachiyelezgero, mu misika yakubisilizga, hafu kilogiramu ya bata, mtengo wake ukayananga waka na malipiro agho munthu wangapokera para wagwira ntchito kwa masabata 6!

 Ŵanyake awo ŵakakhwaskika chomene na nkhondo iyi, Mbakaboni ŵa Yehova ŵanandi. Iwo ŵakaŵakaka chifukwa ŵakakananga kunjira usilikari chifukwa cha ivyo ŵakagomezganga. Mu 1945, ŵakaŵafumiska mu jele kwambura kalikose, ŵakaŵa waka na vyakuvwara vya mu thupi pera. Ŵakaboni ŵanyake ŵakataya katundu na chuma chawo. Ŵanyake ŵakaŵavya chakurya mwakuti ŵakafentanga na njara para ŵali pa maungano

 Ŵakaboni ŵa Yehova ŵakaŵawovwira ŵabali ŵawo mwaluŵiro chomene pa nkhani ya chakurya na vyakuvwara. Ŵabali ku likuru lithu ku United States ŵakapempha ofesi ya munthavi ya Bern, Switzerland, kuti yiwovwire ŵabali ŵawo ŵa ku Germany. Mubali Nathan H. Knorr, uyo wakimiranga likuru lithu la pa charu chose, wakendera vyaru vya ku Europe kuti wawoneseske kuti ŵabali ŵithu ku Germany ŵakovwirika mwaluŵiro.

 Ŵakaboni ŵa ku Switzerland ŵakawovwirapo na chakurya, vyakuvwara, na ndalama. Vinthu ivi ŵakavitumanga dankha ku Bern, uko ŵakakavipakiranga makora pambere ŵandavitume ku Germany. Ŵakaboni ŵa mu vyaru vinyake nga ni Sweden, Canada, na United States, nawo ŵakaŵawovwira ŵabali ŵithu ŵa ku Germany pamoza na ŵabali ŵa mu vyaru vinyake vya ku Europe na Asia ivyo vikakhwaskika chomene na nkhondo.

 Pakati pajumpha myezi yichoko waka, ofesi ya munthavi ya ku Switzerland yikatuma khofi, mkaka, shuga, tirigu, vipaso vyakomira, mphangwe, nyama na somba za mu tuvithini. Ŵakaŵatumiraso ndalama.

 Kweniso, Ŵakaboni ŵa ku Switzerland ŵakatumaso matani ghanandi chomene gha vyakuvwara, nga ni marenikoti, vyakuvwara vya ŵanakazi, na vya ŵanalume. Magazini ya Gongwe la Mulinda la January 15, 1946, yikati: “Ŵabali ŵakapelekanga vinthu viheni panji vyakumara yayi, kweni ŵakapelekanga viwemi chomene. Ŵakajinora chomene kuti ŵawovwire ŵabali ŵawo ŵa ku Germany.”

 Ŵakaboni ŵa ku Switzerland ŵakawovwiraposo na skapato mapeyara pafupifupi 1,000, ndipo ŵakaziwonanga dankha usange zichali ziwemi pambere ŵandaŵatumire ŵabali ŵithu. Ŵabali na ŵadumbu ku Wiesbaden, Germany, awo ŵakapokeleranga katundu uyu ŵakazizwa kuwona kuti zikaŵa skapato ziwemi chomene. Kaboni munyake wakati: “Ntchakusuzga kusanga shopu iyo yingaŵa na skapato na vyakuvwara viwemi nthena.”

 Ŵabali ŵakalutilira kutuma vinthu vyakovwira ŵabali ŵa ku Germany mpaka mu August 1948. Ŵakaboni ŵa ku Switzerland ŵakatuma katundu wakupambanapambana ku Germany makireti ghakurughakuru 444, uzito wake matani 25. Nga umo tayowoyera kale, Mbakaboni ŵa ku Switzerland pera yayi awo ŵakawovwira ŵabali ŵawo ŵa ku Germany. Ŵabali aŵa ŵakaŵa waka kagulu kachoko ka ŵanthu awo ŵakawovwirapo. Panyengo iyo, charu cha Switzerland chikaŵa waka na Ŵakaboni ŵa Yehova 1,600!

 Yesu Khristu wakati: “Usange mukutemwana, wose ŵamanyenge kuti ndimwe ŵasambiri ŵane.” (Yohane 13:34, 35) Chitemwa ndicho chikatuma ŵanthu ŵa Yehova kuti ŵapeleke viwemi chomene ku ŵabali m’malo mwa kovwirapo waka. (2 Korinte 8:1-4) Kalata yakufuma ku Zurich yikati “ŵabali ŵanyake awo ŵakaŵavya katundu wakuti ŵangapeleka, ŵakapelekanga waka ndalama chifukwa ŵakakhumbanga kovwirapo.”

 Nakalinga vinthu vikambaso kwenda makora ku Ŵakaboni ŵa ku Germany awo ŵakatambuzgika kwanyengo yitali kweniso ŵakasangana na masuzgo chifukwa cha nkhondo. Chimoza icho chikawovwira kuti vinthu viyambeso kwenda makora, ntchakuti ŵabali ŵakachita vinthu mwandondomeko kweniso mwalusungu, ndipo ŵakaŵalongora chitemwa chakujipata ŵabali ŵawo.