CHIUTA wandasinthe khumbo lake ilo wakalengera ŵanthu nangauli Adamu na Eva ŵakamupulikira yayi ndipo ŵakiziska kwananga na nyifwa ku ŵanthu wose. Chiuta wakuyowoya mwakuwerezgawerezga mu Mazgu ghake Baibolo kuti khumbo lake lindasinthe.

• “Ŵarunji ŵazamuhara charu chapasi, ndipo ŵazamukhala mwenemumo muyirayira.”—Salimo 37:29.

• “Wazamumilimitizga nyifwa muyirayira, ndipo Fumu Yikuru Yehova yizamufyura masozi ghose ku visko vyawo.”—Yesaya 25:8.

• “Pakuŵa mulwani waumaliro, nyifwa yizamuparanyika.”—1 Ŵakorinte 15:26.

• “Nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya.”—Chivumbuzi 21:4.

Kasi Chiuta “wazamumilimitizga nyifwa” panji kuyiparanya munthowa wuli? Nga umo tawonera, Baibolo likuyowoya mwakupulikikwa makora kuti ‘ŵarunji ŵazamukhala muyirayira.’ Kweni Baibolo likuyowoyaso kuti “pa charu chapasi palije munthu murunji uyo nyengo zose wakuchita uwemi pera kwambura kunangapo.” (Mupharazgi 7:20) Kasi ndikuti Chiuta wazamuleka kwendera fundo zake zaurunji mwakuti na ŵanthu ŵakwananga wuwo ŵazamukhala kwamuyirayira? Yayi. Wazamuchita nthena yayi, chifukwa “Chiuta . . . wakuteta yayi.” (Tito 1:2) Ipo kasi Chiuta wazamuchita vichi kuti wafiske khumbo lake ilo wakalengera ŵanthu?

Yehova Chiuta wakalongora chitemwa pakupeleka sembe kuti wawombore ŵanthu ku nyifwa. Sembe panji kuti chiwombolero ni malipiro agho munthu wakupeleka kuti walipire vinthu ivyo vyanangika ndipo mtengo wake ukwenera kuyana ndendende na ivyo vyanangika. Pakuti taŵanthu tose tili ŵakwananga ndipo tikwenelera nyifwa, lekani Baibolo likutiphalira kwambura kubisa kuti: “Palije nanga njumoza wa iwo wangawombora mubali wake, panji kumupelekera chiwombolero kwa Chiuta, (mtengo wakuwombolera umoyo wawo ngwakuzirwa chomene ngwakuti ŵangawukwaniska yayi).”—Salimo 49:7, 8.

Usange munthu wakwananga wafwa wakulipira waka kwananga kwake. Iyo wangajiwombora yayi yekha nesi kulipira kwananga kwa munthu munyake. (Ŵaroma 6:7) Pakakhumbikwiranga munthu munyake murunji kweniso wambura kwananga kuti wapeleke umoyo wake chifukwa cha zakwananga zithu.—Ŵahebere 10:1-4.

Ivi ndivyo Chiuta wakachita. Wakatuma Mwana wake Yesu, kufuma kuchanya kuti wazakababike pa charu chapasi nga ni munthu wambura kwananga. (1 Petrosi 2:22) Yesu wakayowoya kuti wakiza kuti wapeleke “umoyo wake kuŵa chiwombolero cha ŵanandi.” (Mariko 10:45) Wakafwa kuti waparanye mulwani withu nyifwa mwakuti taŵanthu tizakasange umoyo wamuyirayira.—Yohane 3:16.

Pasono tili mu nyengo iyo uchimi wa mu Baibolo ukufiskika. Tikukhala mu “nyengo zinonono na zakusuzga,” ndipo uwu mbukaboni wakuti tili “mu mazuŵa ghaumaliro” gha vinthu viheni vya mu charu ichi. (2 Timote 3:1) Mazuŵa ghaumaliro ghazamumara pa “zuŵa la cheruzgo na la pharanyiko la ŵanthu ŵambura kopa Chiuta.” (2 Petrosi 3:3, 7) Kweni ŵanthu awo ŵakutemwa Chiuta ŵazamupona na kupokera “umoyo wamuyirayira.”—Mateyu 25:46.

Ŵanthu mamiliyoni ghanandi ŵazamuŵa na mwaŵi wakusanga umoyo wamuyirayira para ŵazakawuskika. Yesu wakawuska munthu wakufwa apo wakaŵa mu msumba wa Nayini. Mwana yumoza pera wa chokoro wakafwa. Yesu ‘wakachitira chitima’ chokoro ndipo wakamuwuska mwana. (Luka 7:11-15) Kweniso mpositole  Paulosi wakati: “Nili na chigomezgo mwa Chiuta, . . . chakuti kuzamuŵa chiwuka cha ŵarunji na ŵambura urunji.” Chigomezgo ichi ntchanadi ndipo chikulongora kuti Chiuta wakuŵatemwa chomene ŵanthu.—Milimo 24:15.

Ŵanthu mabiliyoni ghanandi ŵakulindilira kuzakakhala umoyo wamuyirayira. Baibolo likuti: “Ŵarunji ŵazamuhara charu chapasi, ndipo ŵazamukhala mwenemumo muyirayira.” (Salimo 37:29) Panyengo iyo, waliyose wazamukondwa chomene ndipo wazamuwona kufiskika kwa mazgu agho mpositole Paulosi wakalemba vyaka 2,000 kumanyuma, apo wakati: “Nyifwa, kasi nkhongono zako zili nkhu? Nyifwa, luwozga lwako luli nkhu?” (1 Ŵakorinte 15:55) Nyifwa iyo ni mulwani mukuru wa ŵanthu yizamuŵa kuti yaparanyika.