MU CHARU cha Nicaragua muli nyanja zinandi ndipo kanandi charu ichi chikuphulika (vokano). Mu charu ichi muli nyanja ya Nicaragua, iyo njikuru chomene ku Central America. Ŵanthu ŵa ku malo agha ŵakuchema nyanja iyi kuti Cocibolca, kung’anamura “Nyanja Yiwemi.” Mu nyanja iyi muli virwa vinandi chomene. Mu nyanja iyi muli somba izo zikutemwa kusangika mu nyanja zikuruzikuru pera nga ni shaki, swordfish, na tarpon.

Ku Nicaragua kuli chigaŵa chakuchemeka Mosquito Coast. Chigaŵa ichi ntchisani makilomita 65 ndipo chili mumphepete mwa nyanja kumafumiro gha dazi, ndipo chikumalira ku charu cha Honduras. Ŵanthu ŵakuchemeka Miskito (panji kuti Mosquito) mbamoza mwa ŵenekaya ŵa ku Nicaragua. Ŵanthu aŵa ŵakamba kukhala mu charu ichi kale chomene pambere ŵanthu ŵa ku Europe ŵandize m’ma 1500 C.E.

Ŵamiskito ŵakutemwa kuchezga ndipo ŵali na mitheto yawo na yawo. Pakuchemana ŵakuchindikana chomene. Ŵana ŵachoko ŵakuchema munthu mulara kuti “sibweni” panji “nkhazi” nanga wangaŵa kuti ni mubali wawo yayi. Mwakuyana na kaluso kakale, para  ŵanakazi ŵalara ŵakutawuzgana na ŵabwezi panji ŵabali ŵawo ŵakukhwaskana matama. Kufuma apo, mwanakazi uyo wangwamba kutawuzga munyake wakupungizga mphepo.