KASI ukumanya cinthu cakwamba ico Nowa wakacita pamoza na mbumba yake ŵati ŵafuma mu cingalaŵa? Wakapeleka sembe panji cawanangwa kwa Ciuta. Ungamuwona wakucita ici pa cithuzithuzi ico cili pasi apa. Nowa wakapeleka cawanangwa ca nyama, kuwonga Ciuta cifukwa ca kuponoska mbumba yake ku cigumula.

Kasi ukughanaghana kuti Yehova wakakondwa na cawanangwa ici? Enya, wakakondwa naco. Ndico cifukwa cake wakalayizga Nowa kuti waparanyengeso caru cara na cigumula.

Mwambura kucedwa caru cikawomira, ndipo Nowa na mbumba yake ŵakayamba umoyo wuphya kuwaro kwa cingalaŵa. Ciuta wakaŵatumbika ndipo wakaŵaphalira kuti: ‘Mubabe ŵana ŵanandi. Mwandane mupaka muzuzge caru cose.’

Kweni pamanyuma pake, para ŵanthu ŵakatenge ŵazakapulikenge za cigumula, ŵakatenge ŵazakacitenge wofi kuti cigumula cinyake cingacitikaso. Mwantheura Ciuta wakapeleka cinthu cinyake kuti cikumbuskenge ŵanthu za layizgano lake lakuti waparanyengeso caru na cigumula cara. Kasi ukumanya ico wakapeleka kuti ciŵakumbuskenge? Cikaŵa ciŵingavura.

Ciŵingavura nyengo zinandi cikuwoneka mu mlengalenga para dazi laŵala pamanyuma pakuti vura yaleka kuwa. Viŵingavura vingaŵa na mitundu yinandi yakutowa. Kasi uli kuciwonapo ciŵingavura? Kasi waciwona ico cili pa cithuzithuzi apa?

Ciuta wakati: ‘Nkhulayizga kuti ŵanthu na nyama viparanyikengeso cara na cigumula. Ndipo para ciŵingavura cawoneka, niciwonenge ndipo nikumbukenge layizgano lane.’

Mwantheura para ukuwona ciŵingavura, kasi cikwenera kukukumbuska vici? Layizgano la Ciuta lakuti waparanyengeso caru yayi na cigumula.