Kasi Yesu Wakawonekanga Wuli?

JULANI

Ivyo Baibolo likuyowoya

Palije uyo wangalongosora umo Yesu wakawonekeranga, chifukwa Baibolo lindalongosorepo. Ivi vikulongora kuti kawonekero ka Yesu kalije ntchito. Ndipouli, Baibolo likulongosora vinthu vinyake ivyo vingatovwira kumanya umo wakawonekeranga.

Umo wakawonekeranga: Yesu wakaŵa Muyuda ndipo wakwenera kuti wakakozganangako na amama ŵake a Mariya. (Ŵahebere 7:14) Ntheura iyo wakawonekanga mu nthowa yapadera yayi. Nyengo yinyake wakenda kufuma ku Galileya m’paka ku Yerusalemu kwambura ŵanthu kumumanya. (Yohane 7:10, 11) Iyo wakapambanangaso yayi na ŵasambiri ŵake. Lekani Yudasi Isikariyoti wakachita kupeleka chimanyikwiro ku mzinda uwo ukiza na malupanga na zinthonga kuti ukore Yesu.—Mateyu 26:47-49.
Sisi: Yesu wakasunganga sisi litali yayi, chifukwa Baibolo likuti “ntchakukhozga soni kuti [mwanalume] waŵe na sisi litali.”—1 Ŵakorinte 11:14.
Mwembe: Yesu wakasunganga mwembe. Iyo wakalondezganga dango la Ŵayuda ilo likakanizganga ŵanalume ‘kundenderezga mumphepete mwa mwembe wawo.’ (Levitiko 19:27; Ŵagalatiya 4:4) Kweniso, Baibolo likuyowoya za mwembe wa Yesu mu uchimi wakuyowoya za umo wakasuzgikira.—Yesaya 50:6.
Thupi: Maukaboni ghanandi ghakulongora kuti Yesu wakaŵa wa nkhongono chomene. Apo wakachitanga uteŵeti wake, wakendanga mitunda yitaliyitali. (Mateyu 9:35) Kaŵiri kose, Yesu wakatozga tempile la Ŵayuda mwakugadabura mathebulu gha ŵakusintha ndalama, kweniso wakapanga chikoti cha vingwe na kuchimbizgira kuwaro viŵeto. (Luka 19:45, 46; Yohane 2:14, 15) Buku linyake likuti: “Nkhani za mu Baibolo zikulongora kuti Yesu wakaŵa wankhongono kweniso na thupi liwemi.”—McClintock and Strong’s Cyclopedia, Volume IV, peji 884.
Chisko: Chisko cha Yesu chikalongoranga kuti wakaŵa wa lusungu kweniso wakuchezgeka. (Mateyu 11:28, 29) Ŵanthu ŵakupambanapambana ŵakizanga kwa iyo kuti waŵapembuzge na kuŵawovwira. (Luka 5:12, 13; 7:37, 38) Nanga ni ŵana ŵakafwatukanga nayo.—Mateyu 19:13-15; Mariko 9:35-37.

Utesi pa nkhani ya umo Yesu wakawonekeranga

Utesi: Ŵanthu ŵanyake ŵakuti Yesu wakaŵa wa ku Africa, chifukwa buku la Chivumbuzi likuyaniska sisi lake na weya, kweniso likuyaniska malundi ghake na “mkuŵa uwemi.”—Chivumbuzi 1:14, 15.

Unenesko: Buku la Chivumbuzi likugwiliskira ntchito “vimanyikwiro” pakulongosora vinthu. (Chivumbuzi 1:1) Ntheura sisi na malundi gha Yesu, vikwimira kawonekero yayi, kweni mikhaliro yiwemi iyo wakaŵa nayo wati wawuskika. Para lemba la Chivumbuzi 1:14 likuyowoya kuti “mutu wake na sisi vikaŵa vituŵa nga ni weya utuŵa,” likuyowoya za mtundu wa sisi, kulongora kuti wakaŵa na vinjeru chifukwa wakaŵa mulara msinkhu. (Chivumbuzi 3:14) Ntheura lemba ili likung’anamura kuti sisi la Yesu likaŵa nga ni weya panji chiwuvi chanadi yayi.

Pakuyowoya za malundi ghake, Baibolo likuti “ghakaŵa nga ni mkuŵa uwemi para ukung’azima mu ng’anjo.” (Chivumbuzi 1:15) Kweniso likuti “chisko chake chikaŵa nga ni dazi para likuŵala na nkhongono zake.” (Chivumbuzi 1:16) Palije munthu uyo wakuwoneka nthena. Iyi yikaŵa mboniwoni iyo yikayowoyanga za Yesu uyo “wakukhala mu ungweru wambura kufikirika.”—1 Timote 6:16.

Utesi: Yesu wakaŵa wawofi kweniso wambura nkhongono.

Unenesko: Yesu wakaŵa wachikanga chomene. Mwachiyelezgero, wakajivumbura mwachikanga ku mzinda uwo ukiza kuzakamukora. (Yohane 18:4-8) Kweniso Yesu wakaŵa kalipentara, kulongora kuti wakaŵa munthu wankhongono chifukwa ntchito iyi yikukhumba nkhongono.—Mariko 6:3.

So chifukwa wuli Yesu ŵakachita kumovwira kunyamura khuni lakusuzgikirapo? Chifukwa wuli ndiyo wakamba kufwa pambere ŵanyake awo wakakhomeka nawo pamoza ŵandafwe? (Luka 23:26; Yohane 19:31-33) Apo Yesu wakaŵa pafupi kufwa, thupi lake likaŵa kuti lalopwa chomene. Iyo wakatchezera usiku wose chifukwa cha kusuzgika maghanoghano. (Luka 22:42-44) Ŵayuda ŵakamutambuzga usiku wose, ndipo mulenji wake Ŵaroma ŵakamutimbaso chomene. (Mateyu 26:67, 68; Yohane 19:1-3) Lekani Yesu wakafwa luŵiro.

Utesi: Nyengo zose Yesu wakaŵanga wakukwiya.

Unenesko: Yesu wakalongoranga mikhaliro ya Adada ŵake ŵakuchanya, a Yehova, awo Baibolo likuti ni “Chiuta wakukondwa.” (1 Timote 1:11; Yohane 14:9) Nakuti, Yesu wakasambizga ŵanji umo ŵangaŵira ŵakukondwa. (Mateyu 5:3-9; Luka 11:28) Fundo izi zikulongora kuti chisko cha Yesu chikaŵanga chakukondwa.