Teramu akasisani taata n’abaza na mutabani we ow’emyaka musanju. Taata agamba ati: “Omu busumi obwa kara, Ruhanga akahanga ensi n’ebintu ebigirumu, kandi akahanga izooba, okwezi hamu n’enyunyuuzi.” Hanyuma omwojo onu abanza kukitekerezaaho kandi hanyuma akaguza, “Taata, nooha yahangire Ruhanga?”

“Ise agarukamu ati; “Busaho ayahangire Ruhanga. Uwe akasangwaho.” Ha myaka ye ekyokugarukamu eki kimumara. Baitu obw’ayeyongera kukura, agumizaamu n’ayekaguza ekikaguzo eki. Kimugumira kwikiriza ngu omuntu n’asobora kubaho ataine ndugirro. Hanyuma ayongera ayekaguza; ‘Baitu habwaki, ensi n’iguru nabyo biine endugirro. Ruhanga akaruga nkaha?’

Baibuli egarukamu eta? Kusisanaho n’ekyokurorraho kya taata n’omwana we, Musa akahandiika ati: “[Yahwe], . . . ensozi obuzikaba zitakazairwe, naiwe otakahangire ensi nebintu. Okuruga obusinge bwona, okuhikya obusinge bwona niwe Ruhanga.” (Zabuli 90:1, 2) ) Kusisanaho n’eki, nabbi Isaya nauwe akagamba ati; “Toramanyire, torahuliire? Yahwe, omuhangi w’ensi yoona nuwe Ruhanga ebiro n’ebiro,” (NWT) (Isaya 40:28) Ebbaruha ya Yuda n’eyoleka ngu Ruhanga akabaho kuruga “ira naira.”​—Yuda 25.

Ebyahandiikirwe ebi nibitwoleka ngu Ruhanga nuwe “Omukama owobusinge bwona,” nk’oku omukwenda Paulo yamubalizeeho. (1 Timoseo 1:17) Kinu nikimanyisa ngu Ruhanga aikaireho kandi n’emyaka ey’amazire titusobora kugitebereza. Kandi naija kwikaraho ebiro n’ebiro. (Okusuku’rwa 1:8) Nahabweki, okubaho kwe okw’ebiro n’ebiro nikwoleka ngu mali ali Ruhanga ow’Obusobozi bwona.

Habwaki ekintu kinu kitugumira kwetegereza? Habwokuba twomeera emyaka nke, omulingo tubaramu obwire nigwahukanira kimu n’omulingo Yahwe abubaramu. Habwokuba Ruhanga aikaraho ebiro n’ebiro, hali uwe emyaka rukumi n’esisana ekiro kimu. (2 Petero 3:8) Ekyokurorraho: Nikisoboka orusenene orukuzire orwomeera ebiro 50 byonka kwetegereza emyaka 70 rundi 80 abantu eibomeera? Tikirukusoboka! Baitu Baibuli egamba ngu tuli nk’ensenene rundi enzige obw’eba n’etulengesaniza n’Omuhangi waitu. N’okwetegereza kwaitu kuke muno kakuba tukulengesaniza n’okwe. (Isaya 40:22; 55:8, 9) Nahabweki tikirukuhuniiriza ngu haroho emiringo eya Yahwe ey’omuntu atasobora kwetegereza.

N’obukiraaba ngu nikisobora kutugumira kwetegereza ngu Ruhanga aikaireho habw’ebiro n’ebiro, nitururora ngu mali nikikora amakuru. Kakuba habaireho omuntu ondi ayahangire Ruhanga, ogu nuwe yakubaire Omuhangi. Baitu Baibuli esoborra ngu Yahwe nuwe ‘yahangire byona.’ (Okusuku’rwa 4:11) Kwongerraho, nitumanya ngu haroho akasumi ensi n’iguru obubikaba bitaroho. (Okubanza 1:1, 2) Hati, bikaruga nkaha? Omuhangi wabyo akaba asemeriire kuba aroho. Kandi, akaba aroho n’ebihangwa ebindi ebiine amagezi nk’Omwana we omu wenka hamu n’abamalaika bitakabaireho. (Yobu 38:4, 7; Abakolosai 1:15) Nahabweki nikyeyolekera kimu ngu uwe akabanza yabaho wenka. Titusobora kugamba ngu akahangwa habwokuba busaho kintu kyona ekikaba kiroho ekyakumuhangire.

Okubaho kwaitu n’okw’ensi n’iguru nibyolekera kimu ngu haroho Ruhanga owaikaireho habw’ebiro n’ebiro. Ogu ayataireho ensi n’iguru kandi yateekaho ebiragiro ebirabyebembera aine kuba yasangirweho. Nuwe wenka ayahaire buli kintu orwoya orw’obwomeezi.​—Yobu 33:4.