• AKAZAARWA: 1941

• IHANGA: BENIN

• EBYAFAAYO: AKABA AINE ABAKAZI BAINGI KANDI NAHAKANIZA ABAKAISO BA YAHWE

OBWOMEEZI BWANGE OBWA KARA:

Ninduga Cotonou, orubuga orukooto omu ihanga lya Benin. Nkakuzibwa ndi Mukatuliki baitu tinakiraga kugenda ha kelezia. Nambere naikaraga, Abakatuliki baingi baali baine abakazi baingi, habwokuba kasumi ako eki kyali nikisagikwa baingi. Nkahika naswera abakazi bbana

Kuhakaniza gavumenti obukwatandikire omu 1970, nkatekereza ngu nikiija kugasira ihanga lyaitu. Nkakisagikira kimu kandi natandika kwejumbira omu by’obulemi. Abo abaali nibahakaniza gavumenti bakaba batarukugonza Abakaiso ba Yawhe habwokuba tibaagweraga orubaju omu by’obulemi. Nkaba ndi omu h’abaahiiganizaaga Abakaiso ba Yahwe. Abamiisani baabo obubaabingirwe omu ihanga omu 1976, nkaba ninkigumiza kimu ngu tibalyongera kugaruka.

OMULINGO BAIBULI YAHINDWIRE OBWOMEEZI BWANGE:

Kampeini ey’okuhindura gavumenti ekahwa omu 1990. Kikampuniriza muno, hanyuma y’akasumi kake obunarozere abamiisani bagarukire. Nkatandika kutekereza ngu Ruhanga n’asobora kuba nasagika abantu banu. Omu kasumi ako nkatandika kukorra omu kiikaro ekindi. Omu h’abakozi bataahi bange akaba ali omu h’Abakaiso ba Yahwe, kandi yaikaraga n’atebeza abandi. Akanyoleka ekankarra kuruga omu Baibuli ezirukwoleka ngu Yahwe ali Ruhanga ow’okugonza n’obwinganiza. (Ekyebiragiro 32:4; 1 Yohana 4:8) Emiringo ye egi ekandetera kugonza kwegaho Yahwe. Nahabweki nkaikiriza kwega Baibuli.

Hanyuma y’akasumi kake nkatandika kugenda omu nsorrokano z’Abakaiso ba Yahwe. Okugonza okunasangireyo kukampuniriza muno habwokuba hakaba hataliyo kusoroora abantu. Obunayeyongire kumara obwire n’abakaiso ba Yahwe nukwo nayeyongire kukirora ngu nubo bahondezi ba Yesu ab’amananu.​—Yohana 13:35.

Nkacwamu ngu obundaaba ningonza kuheereza Yahwe, nsemeriire kuruga omu diini y’Abakatuliki. Eki kitanyanguhire kukikora habwokuba nkaba nintiina abandi ekibaratekereza. Hanyuma y’akasumi, Yahwe akankonyera natunga obumanzi, naruga omu diini egi.

Haroho empindahinduka endi ey’amaani einkaba nyine kukora. Nkeega kuruga omu Baibuli ngu Ruhanga tarukwikiriza omusaija kuba n’abakazi baingi. (Okubanza 2:18-24; Matayo 19:4-6) Omu maiso ge, obuswere bwange obw’okubanza nubwo bwali buhikire. Nkabuhandikisa kandi abakazi abandi nababinga kandi nakora entekaniza y’okubahaga obukonyezi omu byetaago ebindi. Hanyuma y’akasumi, abakaba bali bakazi bange babiri nabo bakafooka Bakaiso ba Yahwe.

OMULINGO NGASIIRWE:

N’obukiraaba ngu mukazi wange akaikara omu Bakatuliki, atekamu ekitiinisa encwamu yange ey’okuheereza Yahwe. Itwena nitwehurra ngu nfookere nyineeka omurungi.

Natekerezaaga ngu ninsobora kukonyera abantu kurabira omu by’obulemi, baitu nkalengaho nalemwa. Hati ninkirora ngu Obukama bwa Ruhanga nubwo bwonka obusobora kumaraho ebizibu by’abantu. (Matayo 6:9, 10) Ninsiima muno Yahwe, habw’okunyoleka omulingo gw’okuba n’obwomeezi oburumu okusemererwa kwonyini.

• AKAZAARWA: 1977

• IHANGA: BRAZIL

• EBYAFAAYO BYE: PASITA W’ABAPENTEKOSTO

OBWOMEEZI BWANGE OBWAKARA:

Nkakurra omu rubuga rwa Itu, omu São Paulo. Ekicweka kinu nikimanywa nk’ekibamu obucwi bw’ebiragiro bwingi.

Nagonzaaga muno kurwana n’okwejumbira omu busiihani. Ekindi natundaga ebitokooza bwongo. Hanyuma y’akasumi nkakyetegereza ngu kakuba ngumizaamu ninkora ebintu ebi ninsobora kumalirra ngire omu nkomo, rundi omu kituuro. Nahabweki nkabireka. Hanyuma nketeranizaaho ekanisa ya Pentekosto, kandi nkahika nafooka pasita.

Nkehurra ngu ninsobora kukonyera abantu kurabira omu kuheereza omu kanisa. Nakoraga ha puroguramu y’ediini ha rediyo ey’omu kiikaro kyaitu, nahabweki abantu baingi bakaamanya. Baitu mporampora nkatandika kukyetegereza ngu, ekanisa yoona terukufaaho abantu baayo, kandi ekirukukirayo, ekaba etarukufaayo kuhaisa Ruhanga ekitiinisa. Nkehurra ngu ekigendererwa ky’ekanisa ekikuru nukwo kusorooza sente. Nkacwamu kuleka emirimo yange ey’omu kanisa.

OMULINGO BAIBULI YAHINDWIRE OBWOMEEZI BWANGE:

Obunatandikire kwega Baibuli n’Abakaiso ba Yahwe, nakirorraga kimu ngu b’embaganiza ha madiini agandi. Haroho ebintu bibiri ebyakizireyo kunkwataho. Eky’okubanza, Abakaiso ba Yahwe tibagarukira ha kwegesaho okugonza Ruhanga n’abataahi, baitu bakwoleka. Ekyakabiri, tibejumbira omu by’obulemi rundi omu obulemu. (Isaya 2:4) Ebintu ebi bibiri bikangumya ngu nkaba nzoire ediini ey’amananu ogu nugwo omuhanda ogufunzire ogurukuhikya omu bwomeezi obutahwaho.​—Matayo 7:13, 14.

Nkakyetegereza ngu obundaaba ningonza kusemeza Ruhanga, nkaba nsemeriire kukora empindahinduka z’amaani. Nkaba nsemeriire kweyongera kufaaho eka yange. Nkaba nyine kweyongera kuba mwebundaazi. Kitanyanguhire kukora empindahinduka ezirukwetaagisa baitu habw’obukonyezi bwa Yahwe, nkasingura. Mukazi wange akakwatwaho muno obuyarozere empindahinduka ezinakozere. Akaba ambandize kutandika kwega Baibuli, baitu hati akakurakurana bwangu. Tukatandika kukyetegereza ngu nitugonza kufooka bamu h’Abakaiso ba Yahwe. Tukabatizibwa ha kiro kimu.

OMULINGO NGASIIRWE:

Nyowe na mukazi wange twine okusemererwa habw’okukonyera abaana baitu basatu kutunga enkoragana enungi na Yahwe. Twine okusemererwa omu ka yaitu. Ninsiima Yahwe habw’okuncunda akandeeta omu mananu agarukusangwa omu Kigambo kye Baibuli. Ekyokurorraho kyange, nikigumiza kimu ngu Baibuli ehindura obwomeezi.

• AKAZAARWA: 1957

• IHANGA: AUSTRALIA

• EBYAFAAYO: NKAKUZIBWA KUBI

OBWOMEEZI BWANGE OBWA KARA:

Nkakurra omu Newcastle, New South Wales. Ninyowe mukuru omu baana musanju. Isiitwe yagonzaaga kurwana n’okutamiira kandi nyina itwe nauwe yagonzaaga kurwana. Nyina nyowe yanjumaga kandi nanteera muno. Yaikaraga nangambira ngu nyine engeso mbi kandi ngu ninyija kubonabonesebwa omu murro ogutaraara. Ebigambo nkebi byantinisaaga muno.

Ebihuta nyina nyowe ebiyatahoga byandeteraga kwosa isomero. Ha myaka 11, nkaihibwa hali abazaire bange natwarwa kurolererwa gavumenti kandi hanyuma natwarwa omu kigo. Obunahikize emyaka 14, nkarugayo. Nkaba ntarukugonza kugaruka omu ka, nahabweki nkatandika kwikara ha nguudo za Kings Cross, omu rubuga rwa Sydney.

Obunkaba ninyikara ha nguudo, nkatandika kukozesa ebitokooza bwongo, kunywa amaarwa, kurora ebisisani eby’orwanju n’okwetunda. Haroho ekintu ekyabaireho kyantiinisa muno. Naikaraga omu kisiika kimu ekikaba kiri haiguru y’ebbaara ey’okuziniramu. Rwebagyo rumu, abasaija babiri bakaija nibaserra mukama w’ekiikaro eki. Akangambira kugenda omu kisiika eky’okuraaramu, baitu nkaba ninsobora kuhurra ebibarukubaza. Mukama w’ebbaara akaba nagonza kunguza abasaija banu. Bakaba nibagonza kunsereka omu migugu y’emeeri nukwo bantwale Japan kukora omu bbaara. Nkatiina muno, naguruka naraba omu idirisa nairuka kuserra obukonyezi.

Nkarora omusaija ow’akaba aizire Sydney, kandi natandika kumusoborra ebizibu byange ninihira ngu naija kumpa sente. Oihireho akansaba kugenda nauwe nambere akaba naraara nukwo nyoge kandi ntunge n’akokulya. Nkamalirra ntarugireyo. Hanyuma y’omwaka gumu tukataaha obuswere.

OMULINGO BAIBULI YAHINDWIREMU OBWOMEEZI BWANGE:

Obunatandikire kwega Baibuli n’Abakaiso ba Yahwe, nkatunga enyehurra ezirukwahukana. Nkahurra ekiniga obunakimanyire ngu Sitaani nuwe arukuletaho ebintu ebibi; nkaba nyegesiibwe ngu Ruhanga nuwe atuletera kubonabona. Nkahurra nahuumura obunayegere ngu Ruhanga tabonabonesa abantu omu murro ogutaraara, habwokuba enyegesa enu yantiinisaaga muno kumara obwire bwingi.

Nkakwatwaho muno kurora omulingo Abakaiso ba Yahwe bakora encwamu nibasigikirra ha misingi ya Baibuli. Okwikiriza kwabo bakwoleka omu bikorwa. Nkaba ndi muntu ow’agumangaine, baitu n’obunabazaaga ki rundi nkakora ki, bantwazaaga omu mulingo ogw’okugonza kandi nibantekamu ekitiinisa.

Ekikyakizire kuntalibaniza nukwo kwikara ninyehurra nkataine mugaso. Nahurraga nyetamirwe, kandi nkaikara ninyehurra nti na hanyuma y’okubatizibwa nk’omu h’Abakaiso ba Yahwe. Nkaba nkimanyire ngu ningonza Yahwe, baitu nkaba ninkigumya ngu tasobora kugonza omuntu nka nyowe.

Enyehurra yange ekatandika kuhinduka emyaka nka 15 hanyuma y’okubatizibwa. Ow’oruganda ow’akaba naaha orubazo ha Kyombeko ky’Obukama, akabazaaho Yakobo 1:23, 24. Enkarra ezi nizirengesaniza Ekigambo kya Ruhanga n’endolerwamu nambere tusobora kwerora nk’oku Yahwe aturora. Nkatandika kwekaguza omulingo nyeroramu obuguraaba nigwahukana nk’oku Yahwe andoramu. Ha kubanza, eki nkabanza nayanga kukiikiriza. Nkaikara ninyehurra ngu Yahwe tasobora kungonza.

Hanyuma y’ebiro, nkasoma ekyandiikirwe ekyahindwire obwomeezi bwange. Nikisangwa omu Isaya 1:18, nambere Yahwe arukagamba ati: “Muije tuhanuule hamu. . . . Ebibi byanyu nobubiba nkorugoye orurukutukura, biryera nkebirika.” Kikansisanira ngu Yahwe akaba nabaza nanyowe, nangambira ati: “Ija, Vicky, tuhanuule. Nkumanyire, mmanyire ebibi byawe, mmanyire omutima gwawe kandi ninkugonza.”

Kiro eki nkalemwa kugwijagira. Nkaba ninkyagurukyagurukya ngu Yahwe n’asobora kungonza, baitu nkatandika kutekerezaaho ekicunguro kya Yesu. Nkakyetegereza ngu Yahwe akaba aikaire nangumiisiriza kumara akasumi karaihire, kandi nanyoleka ngu nangonza kuraba omu miringo nyingi. Baitu nyowe nkasisana arukumugambira nti: “Okugonza kwawe tikusobora kumpikaho. Ekihongwa ky’Omwana wawe tikirukumara kuswekerra ebibi byange.” Kikasisana ngu nimunagira ekicunguro. Baitu hati, obunayecumiitirizeeho ekicunguro, nkatandika kwehurra ngu Yahwe nangonza.

OMULINGO NGASIIRWE:

Nimpurra ndi mwecumi, nyine obwomeezi oburungi kandi ninyegonza. Obuswere bwange bweyongiire kusemera kandi nikinsemeza ngu ninsobora kukozesa ebinarabiremu kukonyera abandi. Hati ninyeyongera kwirra haihi na Yahwe.

• OMWAKA: 1974

• IHANGA: RUSSIA

• EBYAFAAYO: YAGONZAAGA EBIZINA EBIRUKUKURAKURANIZA OBUJEEMU

OBWOMEEZI BWANGE OBWA KARA:

Nkazaalirwa omu Votkinsk, nambere omuhandiiki ruranganwa arukwetwa Pyotr Ilich Tchaikovsky yazaliirwe. Omu ka yaitu tukaba tuli banaku. Ise nyowe akaba aine emiringo enungi nyingi, baitu akaba ali mutamiizi. Nahabweki yaikaraga natutalibaniza.

Nkaba ndi mwegi murungi baitu emyaka obuyagenzere n’erabaho, nkatandika kwehurra nkataine omugaso. Nkatandika kwesoroora kandi naleka kwesiga abantu abandi. Kugenda ha isomero kikatandika kungumira. Ekyokurorraho, obubankaguzaaga ebikaguzo, kyangumiraga kusoborra n’ebintu ebyanguhire ebinkaba manyire kurungi. Obunamazire gurredi ya munaana, ha ripooti yange hakaba hahandiikirweho ngu: “Tamanyire kuhandiika kandi tasobora kusoborra kurungi ekyarukutekereza.” Ebigambo ebi bikamarramu kimu amaani kandi bikandetera kweyongera kwehurra nk’owataine omugaso. Nkatandika kwekaguza obwomeezi obuburaaba bwine ekigendererwa.

Omu myaka yange ey’obusigazi, nkatandika kunywa amaarwa. Ha kubanza, kuganywa kyandeteraga kwehurra kurungi. Baitu obunanywaga maingi muno, omuntu wange ow’omunda yandumirizaaga. Obwomeezi bwange bukazooka nk’obutaine omugaso. Nkeyongera kwenuuba, obundi nnimara ebiro ntakarugire omu nju yange. Nkatandika kutekerezaaho kweyita.

Obunahikize emyaka 20, nkatunga ekintu ekihyaka ekyandeteraga okuhuumura baitu habw’akacu kake. Nkatandika kuhuliiriza ebizina ebiine ekidongo ky’amaani kandi ebirukukurakuraniza obujeemu. Kubihuliiriza kyandeteraga kuhurra nyine amaani kandi namaraga obwire n’abandi abaabigonzaaga. Nkakuza isoke lyange lyaraiha, nadubura amatu kandi najwaraga nk’omuzini ounkaba ninyegomba. Mporampora nkatandika kuleka kufaayo, nafooka w’ekiniga kandi nakiraga kukungana n’ab’omu ka.

Nkatekereza ngu kuhuliiriza ebizina binu kikaba nikiija kundetera okusemererwa, baitu tunukwo kyabaire. Bikaba nibindetera kweyongera kusiisikara ! Kandi obunamanyire bimu ha bintu ebibi ebirukukwata ha muzini ruranganwa ounayegombaga, nkahurra ngobeziibwe.

Nkongera natandika kutekerezaaho kweyita, baitu ha murundi gunu nkaba ncweriiremu kimu. Ekintu kyonka ekyantangire nukwo kutekerezaaho omulingo nyina nyowe arakwatwaho. Akaba nangonza muno kandi akaba ankoliire ebintu bingi muno. Nkahurra nyetamirwe obwomeezi. Nkaba ntarukugonza kwikara ndi mwomeezi baitu nabwo nkaba ntansobora kweyita.

Kusobora kuleka kutekerezaaho ebizibu byange, nkatandika kusoma ebitabu ebikaba biri omu rulimi Orurassia. Kiro kimu nkasomaho omusaija emanzi ayaheerezaaga omu kanisa. Aho naaho nkahurra natunga ekihika ky’amaani eky’okuheereza Ruhanga n’okukonyera abantu abandi. Nkasaba Ruhanga kuruga ha mutima, ekintu ekinkaba ntakakoraga. Nkasaba Yahwe anyoleke omulingo nsobora kwomeera obwomeezi obw’ekigendererwa. Obunkaba ninsaba nkahurra natunga okuhuumura kwingi. Baitu ekirukukirayo kuhuniriza nikyo ekyahondireho. Hanyuma y’esaaha ibiri, omu h’Abakaiso ba Yahwe akateera kodi ha rwigi rwange kandi yansaba anyegese Baibuli. Ninkigumya ngu esaara yange ekaba negarukwamu. Eki kikaba kiro ky’okubanza eky’obwomeezi bwange oburumu okusemererwa.

OMULINGO BAIBULI YAHINDWIRE OBWOMEEZI BWANGE:

N’obukiraaba ngu kikaba kitanguhire, kanaga ebintu byona ebiine akakwate n’ebizina ebinahuliirizaaga. Baitu ebizina binu bikanyikara omu bitekerezo kumara akasumi akaraihire. Obunarabaga nambere barukubiteera, ahonaaho naijukaga obwomeezi bwange obwa kara. Nkaba ntarukugonza kutabura ebitekerezo ebi ebibi n’ebintu ebirungi ebinkaba ninyega. Nahabweki nayetantaraga ebiikaro nk’ebi. Kandi obunayohebwaga kwikaza ebitekerezo byange ha bintu ebinarabiremu kara, nasabaga muno. Kukora eki kyankonyeraga kutunga “obusinge bwa Ruhanga oburukukira okumanywa kwona.”​—Abafiripi 4:7.

Obunayeyongire kwega Baibuli nkega ngu Abakristaayo baine obujunanizibwa obwokugambiraho abandi okwikiriza kwabo. (Matayo 28:19, 20) Nkaba ninkigumiza kimu ngu eki tinsobora kukikora. Ha murundi nugwo gumu ebintu ebihyaka ebinkaba ninyega byandeteraga okusemererwa kwingi n’obusinge obw’omu bitekerezo. Nkaba nkimanyire ngu abandi nabo basemeriire kumanya ebintu binu. N’obukiraaba ngu nkaba nintiina, nkatandika kugambiraho abandi ebinkaba ninyega. Kikampuniiriza ngu kugambiraho abandi ebirukukwata ha Baibuli, kyandeteraga kweyongera kuba mumanzi. Ekindi, kikankonyera kweyongera kukigumya ngu ebinkaba ninyega mananu.

OMULINGO NGASIIRWE:

Hati nyine obuswere oburumu okusemererwa kandi kikansemeza habw’okukonyera abantu abamu kwega ebirukukwata ha Baibuli otwaliiremu munyaanya nyowe na nyina nyowe. Kuheereza Ruhanga n’okukonyera abandi kumwegaho kinkonyire kutunga obwomeezi obwine ekigendererwa.