Mukurakurane Omu by’Omwoyo​—“Ekiro Kikuru Ekya [Yahwe] Kiri Haihi”

“Tuhingurane okuhika ebyobukuru.”​—BAHEB. 6:1.

1, 2. Mugisa ki ‘ogw’okwirukira omu nsozi’ ogwahairwe Abakristaayo ab’omu kyasa eky’okubanza ab’omu Yerusalemu na Buyudaaya?

 YESU obw’akaba ali omu nsi, abegeswabe bakamukaguza bati: “Tugambire binu nambere birihikirirra, nakokurorraho akokuija kwawe okukaliba, nakensi enu okuhwaho?” Okuhikirizibwa okw’okubanza okw’obunabbi Yesu yabagambiire obw’akaba n’agarukamu ekikaguzo kyabo, kukabaho omu kyasa eky’okubanza. Yesu akabazaaho ekintu ekitali kya buli kiro ekyakwolekere ngu empero eri haihi muno. Hanyuma y’okurora ekintu ekyakubaireho, ‘abo abali omu Buyudaaya [baali baine] kwirukira ha nsozi.’ (Mat. 24:1-3, 15-22) Abegeswa ba Yesu baakumanyiriire akokurorraho kanu kandi bahondere oburagirizi bwe?

² Hanyuma y’okurabaho emyaka nka 30, omu 61 C.E., omukwenda Paulo akahandiika obutumwa obw’amaani baitu oburukuhuumuza hali Abakristaayo Abaheburaniya abaikaraga omu Yerusalemu n’ebiikaro ebigyetoroire. Paulo n’Abakristaayo bagenzi be baali batakimanyire ngu hakaba nihaburayo emyaka nk’etaano yonka ak’okurorraho ak’okubanza ak’okutandika ‘kw’omuhito omwingi’ kahike. (Mat. 24:21) Omu 66 C.E., Cestius Gallus akebembera ihe lya Rooma omukutahirra Yerusamu kandi akaba ali haihi kugisingura. Baitu hanyuma, uwe n’ihe rye bakarugayo kandi baaha akagisa abaali bali omu kabi kuruga omu rubuga.

3. Kutererra ki Paulo okuyahaire Abakristaayo Abaheburaniya, kandi habwaki?

³ Abakristaayo baali baine kumanya ngu ebintu ebyali nibibaho byali nibihikiriza ebigambo bya Yesu kandi ngu baine kwiruka. Baitu, abamu baali bafookere “abafu bamatu.” Omu byomwoyo, baali nibasisana nk’abaana abakyayetaaga “amata” (Soma Abaheburaniya 5:11-13.) Kandi naabo abakaba bamazire emyaka nyingi omu mananu baali nibooleka obwokurorraho ‘obw’okuruga hali Ruhanga omwomeezi.’ (Baheb. 3:12) Abamu baali baine “engeso” ey’okwosa ensorrokano ez’Ekikristaayo omu kasumi ekiro kinu eky’akabi kyali “nikirra haihi.” (Baheb. 10:24, 25) Paulo akabaha okutererra okwali nikwetaagwa muno n’agamba ati: “Nukwo tuleke okugamba ebyokubandizaho ebya Kristo, tuhingurane okuhika ebyobukuru.”​—Baheb. 6:1.

4. Habwaki kikuru kwikara tuli bulindaara omu by’omwoyo, kandi kiki ekiratukonyera kwikara tuli bulindaara?

⁴ Tuli omu kasumi ak’okuhikirizibwa kw’obunabbi bwa Yesu obw’okumalirra. “Ekiro ekikuru ekya [Yahwe]”​—ekiro ekirimarraho kimu obusinge bunu obwa Sitaani​—“kiri haihi.” (Zef. 1:14) Tusemeriire kuba bantu eb’eby’omwoyo kandi twikale tuli bulindaara n’okukira kara. (1 Pet. 5:8) Eki mali tuliyo nitukikora? Kuba Bakristaayo abakuzire omu by’omwoyo nikiija kutukonyera kwikara tumanyire ninkaha nambere twahika omu kasumi kanu.

Nikimanyisa Ki Kukura omu by’Omwoyo

5, 6. (a) Kukura omu by’omwoyo nikitwarramu ki? (b) Kusobora kukura omu by’omwoyo, nikitwetaagisa kutamu amaani omu bintu ki bibiri?

⁵ Paulo atagarukire ha kwekambisa Abakristaayo Abaheburaniya ab’omu kyasa eky’okubanza kukura omu by’omwoyo, baitu ekindi akabagambira nikitwarramu ki kukura omu by’omwoyo. (Soma Abaheburaniya 5:14.) “Abantu abakuzire omu by’omwoyo” tibagarukira ha kunywa “amata” kwonka. Balya “ebyokulya ebigumire.” Nahabweki bamanyire byona “ebyokubanza” hamu “nebitarukumanywa” eby’amananu. (1 Kol. 2:10) N’ekindi, obusobozi bwabo butendekerwe kurabira omu kwemanyiiza​—n’okuteeka omu nkora ebibamanyire,​—ekibakonyera kumanya ekibi n’ekirungi. Obubaba nibakora encwamu, okutendekwa kunu kubasobozesa kumanya misingi ki kuruga omu Baibuli ey’erukukwata ha ncwamu yabo, n’omulingo basobora kugiteeka omu nkora.

⁶ Paulo akahandiika n’agamba ngu “kituhikiriire okukira muno okutekerereza kimu ebi ebyahuliirwe, [nukwo tutahuguka].” (Baheb. 2:1) Kuhuguka kuruga omu kwikiriza nikusobora kubaho tutakimanyire. Nitusobora kwetantara ekintu kinu kurabira omu “kutaho muno omutima” obuturukuba nitwesomesa Baibuli, katube tuli omu ka rundi omu nsorrokano. Nahabweki, buli omu hali itwe asemeriire kwekaguza ati: ‘Ninkyayesomesaaho ebintu eby’okubandizaaho byonka? Nikisobora kuba ngu ninyejumbira omu bintu eby’omwoyo kuhikiriza omukoro kwonka ntarukutaho omutima? Ninsobora nta kukura omu by’omwoyo omu mulingo oguhikire?’ Kusobora kukura omu by’omwoyo nikitwetaagisa kutamu amaani omu bintu nka bibiri. Tusemeriire kumanya kurungi Ekigambo kya Ruhanga. Kandi tusemeriire kwega kuba abahulizi.

Manya Kurungi Ekigambo kya Ruhanga

7. Tugasirwa tuta obutumanya kurungi Ekigambo kya Ruhanga?

⁷ Paulo akahandiika ati: “Wena anyakunywa amata, tamanyire kurungi ekigambo kyokuhikirra; baitu ali mwana muto.” (Baheb. 5:13) Kusobora kukura omu by’omwoyo, tusemeriire kumanya kurungi Ekigambo kya Ruhanga habwokuba nuho hali obutumwa bwe hali itwe. Nk’oku obutumwa bunu buli omu Kigambo kye Baibuli, tusemeriire kuba basomi b’Ebyahandiikirwe abarungi hamu n’ebitabu ‘eby’omwiru omwesigwa kandi ow’amagezi.’ (Mat. 24:45-47) Kwesomesa omu mulingo gunu nikisobora kutukonyera kuba n’entekereza nk’eya Ruhanga n’okutendeka obusobozi bwaitu obw’okwetegereza. Tekerezaaho ekyokurorraho kya munyaanya itwe arukwetwa Orchid. * Nagamba ati: “Okwijukibwa okukyakizireyo kunkwataho omu bwomeezi bwange nukwo okw’okusoma Baibuli buli kiro. Kikantwarra emyaka nk’ebiri kusoma Baibuli yoona, baitu kikasisana oti rundi nkaba nintandika kumanya Omuhangi wange habw’omurundi ogw’okubanza. Nkamanya emihanda ye, eby’agonza n’eby’atagonza, omulingo ali w’amaani na nk’oku aine amagezi. Kusoma Baibuli buli kiro kinkonyire omu nyikara ezimu ezigumangaine omu bwomeezi bwange.”

8. Amaani agali omu Kigambo kya Ruhanga nigasobora kutuleetera kukora ki?

⁸ Obutusoma Ekigambo kya Ruhanga buli kiro tuba nitwikiriza ‘amaani’ g’obutumwa oburumu kutukwataho. (Soma Abaheburaniya 4:12.) Ensoma nk’egi n’esobora kuhinduramu omuntu waitu ow’omunda kandi etuleetere kweyongera kuba bantu abarukusemeza Yahwe. Nikikwetaagisa kweyongera kutunga obwire oburukumara obw’okusoma Baibuli n’okwecumiitirizaaho eky’egamba?

9, 10. Kumanya kurungi Ekigambo kya Ruhanga nikitwarramu ki? Bazaaho ekyokurorraho.

⁹ Kumanya kurungi Baibuli tikirukugarukira ha kumanya kiki eky’egamba. Abato omu by’omwoyo ab’omu kasumi ka Paulo baali bamanyire ebintu ebiri omu Kigambo kya Ruhanga. Baitu ubo nk’abantu, batakikozese kumanya omugaso gwakyo kurabira omu kuteeka omu nkora ebibaasomaga. Batamanye kurungi obutumwa oburumu kurabira omu kubwikiriza kubahabura n’okubakonyera kukora encwamu enungi omu bwomeezi bwabo.

¹⁰ Kumanya kurungi Ekigambo kya Ruhanga nikimanyisa kumanya ekikirukugamba n’okuteka omu nkora amagezi agarumu. Ekyokurorraho kya munyaanya itwe arukwetwa Kyle nikitwoleka omulingo tusobora kukoramu ekintu kinu. Kyle akatunga obutetegerezangana n’omukozi mutaahi we. Kiki ekiyakozere kumaraho ekizibu kinu? N’agamba ati: “Ekyahandiikirwe ekinaijukire nikyo eky’omu Abarumi 12:18, aharukugamba: ‘Kiraba nikisoboka, omu bigambo byanyu, muterane nobusinge nabantu bona.’ Nahabweki nkasaba kubaza n’omukozi ogu mutaahi wange hanyuma y’okukora.” Hakarugamu ebirungi, kandi omukozi mutaahi wa Kyle akasemererwa habw’omulingo yakwasiremu ensonga. Kyle n’agamba ati: “Nkakyetegereza ngu kuteeka omu nkora emisingi ya Baibuli kiri kintu ekirungi ekitusemeriire kwikara nitukora.

Yega Kuba Muntu Omuhulizi

11. Kiki ekirukwoleka ngu nikisobora kuguma kuba bahulizi obuturukuba tuli omu nyikara ezigumangaine?

¹¹ Kuteeka omu nkora ebitwegere kuruga omu Byahandiikirwe kisobora kutanguha, kukira muno enyikara obuzirukuba zigumangaine. Ekyokurorraho, hanyuma y’akacu kake Yahwe amazire kujuna abaana ba Isaleri kuruga omu bwiru bwa misiri, ‘bakatandika kukungana na Musa’ kandi bakaikara ‘nibalenga Yahwe.’ Habwaki? Habwokuba baali bataine maizi g’okunywa. (Kurug. 17:1-4) Obuhakaba hatakarabireho emyezi ebiri bamazire kukora endagaano na Ruhanga kandi baikiriza kukora ‘byona Yahwe eby’akaba agambire,’ bakacwa ekiragiro kye ekirukukwata ha kuramya ebisisani. (Kurug. 24:3, 12-18; 32:1, 2, 7-9) Kinu bakakikora ngu habwokuba bakatiina Musa obuyagenzere kutunga oburagirizi ha rusozi Horebu yaburrayo? Rundi tugambe ngu bakatekereza ngu Abamaleki bakubataahiriire omurundi ogundi bataine bukonyezi bwa Musa enyumaho ow’akaba abajunire kurabira omu kuhanika emikono ye? (Kurug. 17:8-16) Eki nikisoboka, baitu kyona ekyabaireho, Abaisaleri ‘bakanga kuba bahulizi.’ (Eng. 7:39-41) Paulo akatererra Abakristaayo ‘kukora kyona ekirukusoboka’ kwetantara ‘kugwa omu kutahurra okw’omulingo ogu’ Abaisaleri okubaayolekere obubaali nibatiina kutaaha omu Nsi ey’Ekaba Eraganiziibwe.​—Baheb. 4:3, 11.

12. Yesu akeega ata obuhulizi, kandi birungi ki ebyarugiremu?

¹² Kusobora kukura omu by’omwoyo nikitwetaagisa kukora kyona ekirukusoboka kworobera Yahwe. Nk’oku Yesu Kristo yatuteriireho ekyokurorraho, tukira kwega obuhulizi kuraba omu kubonabona okutuba niturabamu. (Soma Abaheburaniya 5:8, 9.) Yesu obw’akaba atakaizire omu nsi, akaba n’ayorobera Ise. Baitu, kukora Ise eby’agonza omu nsi kikatwarramu kubonabonesebwa omu mubiri n’omu bitekerezo. Yesu obuyabaire muhulizi obw’akaba n’abonabonesebwa muno, “akafoorwa ahikiriire” habw’ekiikaro ekihyaka Ruhanga eky’akaba amutekaniriize, eky’okuba Omukama kandi Nyakatagara Omukuru.

13. Kiki ekirayoleka ngu twegere kuba bahulizi?

¹³ Kandi itwe? Tucwiremu kworobera Yahwe n’obuturaaba nituraba omu bizibu? (Soma 1 Petero 1:6, 7.) Obuhabuzi bwa Ruhanga oburukukwata ha ngeso, obwesigwa, kubaza kurungi, kusoma Baibuli n’okugyesomesa, kugenda omu nsorrokano hamu n’okwejumbira omu mulimo ogw’okutebeza nibwetegerezebwa kurungi. (Yos. 1:8; Mat. 28:19, 20; Bef. 4:25, 28, 29; 5:3-5; Baheb. 10:24, 25) Nitworobera Yahwe omu bintu binu n’obukiraaba ngu nituraba omu nyikara ey’egumangaine? Obuhulizi bwaitu nibuba nibwoleka ngu tuliyo nitweyongera kukura omu by’omwoyo.

Habwaki ky’Omugaso Kukura omu by’Omwoyo?

14. Bazaaho ekyokurorraho ekirukwoleka nk’oku kukura omu by’omwoyo nikisobora kutulinda.

¹⁴ Mali buli bulinzi bw’amaani hali Omukristaayo kuba n’obusobozi obw’okwetegereza obutendekerwe kurungi kumanya ekirungi n’ekibi omu nsi ‘ey’etaine ngeso.’ (Bef. 4:19) Ekyokurorraho, ow’oruganda arukwetwa James, ayasomaga ebitabu eby’omwiru omwesigwa kandi ayabitwaraga kuba by’omugaso, akatunga omulimo nambere abakozi bataahi be boona baali bakazi. James n’agamba ati: “N’obukiraaba ngu baingi hali bo baali bataine ngeso, omu hali bo akazooka kuba muntu omurungi kandi n’agonza amananu agali omu Baibuli. Obutwali tuli itwenka omu kimu ha bisiika nambere tukorra, akatandika kunsoonasoona nterane nauwe. Nkatekereza ngu n’asandaara kandi kikangumira kumutanga. Baitu aho naaho nkaijuka eky’okurorraho ekyaiziire omu Watchtower ekyali nikikwataho ow’oruganda ayarabire omu nyikara niyo emu ha mulimo. Omu kicweka bakabazaaho ekyokurorraho kya Yusufu na mukazi wa Potifa. * Aho naaho nkasindika omwisiki ogu kandi yairuka yagenda aheeru.” (Kub. 39:7-12) James akasemererwa ngu busaho kintu kyona ekyabaireho kandi ngu n’omuntu we ow’omunda akaikara ali mwecumi.​—1 Tim. 1:5.

15. Kukura omu by’omwoyo nikisobora kita kugumya omutima gwaitu ogw’akokurorraho?

¹⁵ Ekindi, kukura omu by’omwoyo ky’omugaso omu mulingo ngu kigumya omutima gwaitu ogw’akokurorraho kandi kitukonyera kwetantara ‘kuhabisibwa eby’okwegesa eby’emiringo nyingi ebihyaka.’ (Soma Abaheburaniya 13:9.) Obutwekamba kukurakurana omu by’omwoyo, ebitekerezo byaitu biikara nibyebembeza “ebintu ebirukukirayo obukuru.” (Baf. 1:9, 10, NWT.) Nahabweki tweyongera kusiima Ruhanga habw’ebintu byona eby’ataireho kutugasira. (Bar. 3:24) Omukristaayo ‘omukuru omu magezi’ akurakuraniza enyehurra nk’egi kandi ayegondeza omu kuba n’enkoragana enungi na Yahwe.​—1 Kol. 14:20.

16. Kiki ekyakonyiire munyaanya itwe omu kukurakuraniza ‘obumanzi omu mutima’?

¹⁶ Munyaanya itwe arukwetwa Louise akagamba ngu hanyuma y’okubatizibwa, omutima yaguteekaga ha mulingo arasemezaamu abandi. N’agamba ati: “Nkaba ntarukukora kibi kyona, baitu omu mutima gwange nkaba ntaine kugonza kw’amaani okw’okuheereza Yahwe. Nkakyetegereza ngu nkaba nyine kukora empindahinduka ezimu kusobora kuhurra ngu nkaba nimpayo ekindukusobora hali Yahwe. Empindahinduka ey’amaani muno einkaba nyine kukora nukwo kumuramya n’omutima gwange gwona.” Kurabira omu kutamu amaani nk’ago, Louise akakurakuraniza ‘obumanzi omu mutima,’ kandi kikamukonyera obuyatungire ekizibu ky’oburwaire oburukweraliikiriza. (Yak. 5:8) Louise akagamba ati: “Nkabonabona muno, baitu mali nkairra haihi na Yahwe.”

‘Fooka Muntu Omuhulizi Kuruga ha Mutima’

17. Habwaki kuba bahulizi kyali kikuru muno kukira muno hali Abakristaayo ab’omu kyasa eky’okubanza?

¹⁷ Obuhabuzi bwa Paulo ‘obw’okukura omu by’omwoyo’ bukaba buli bw’okujuna Abakristaayo ab’omu kyasa ky’okubanza ab’omu Yerusalemu na Buyudaaya. Abo abaabuhondiire baali baine okumanya okw’eby’omwoyo okwali nikwetaagwa kumanyirra akokurorraho Yesu ak’akaba abahaire ‘ak’okwirukira omu nsozi.’ Obubaarozere “ekinugwa ekirukuhwerekereza . . . kyemeriire omu kiikaro ekirukwera,” kandi ago nugo amahe ga Rooma getoroire Yerusalemu, bakakimanya ngu ako kaali kasumi k’okwiruka. (Mat. 24:15, 16) Abakristaayo bakahondera okutererra kwa Yesu okw’obunabbi bairuka omu Yerusalemu etakahwerekereziibwe, kandi kusigikirra ha munyabyafaayo ebirukukwata ha diini ow’arukwetwa Eusebius, bakaikara omu rubuga rwa Pella omu kiikaro eky’ensozi ekya Gilead. Nahabweki baketantara okuhwerekerezebwa kwa Yerusalemu okubi okwatairwe omu byafaayo.

18, 19. (a) Habwaki obuhulizi kikuru muno kasumi kanu? (b) Kiki ekiturabazaaho omu kicweka ekirukuhonderaho?

¹⁸ Obuhulizi oburuga omu kukura omu by’omwoyo nibwija n’okujuna obwomeezi bwaitu obutulihikwaho okuhikirra okw’amaani okw’obunabbi bwa Yesu oburukugamba ngu “halibaho omuhito omwingi” ogurukukirayo amaani. (Mat. 24:21) Omu busumi obw’omu maiso, tulyoleka ngu tuli bahulizi hali oburagirizi bwona obw’aho naaho obulituheebwa “omwiru omwesigwa”? (Luk. 12:42) Mali ka kikuru muno kwega ‘kuba bahulizi kuruga ha mutima’!​—Bar. 6:17.

¹⁹ Nikitwetaagisa kutendeka obusobozi bwaitu obw’okwetegereza kusobora kukura omu by’omwoyo. Kinu tukikora obututamu amaani kumanya kurungi Ekigambo kya Ruhanga n’okwega kuba bahulizi. Kuba Bakristaayo abakuzire omu by’omwoyo kikira kugumira ensingaanto. Ekicweka ekirukuhonderaho nikibazaaho omulingo emitalibaine nk’egi esobora kusingurwa.

[Obugambo obuli hansi]

Oyegere Ki?

• Kukura omu by’omwoyo nikimanyisa ki, kandi nitusobora kukura tuta?

• Kumanya kurungi Ekigambo kya Ruhanga kitukonyera kita kukura omu by’omwoyo?

• Twega tuta obuhulizi?

• Kukura omu by’omwoyo kitugasira kita?

[Ebikaguzo]

[Ekisisani]

Kuteeka omu nkora obuhabuzi bwa Baibuli kitukonyera kugumira ebizibu omu mulingo ogurukwoleka ngu tukuzire omu by’omwoyo

[Ekisisani]

Kuhondera obuhabuzi bwa Yesu kikajuna obwomeezi bw’Abakristaayo aba kara