Baibuli—Kitabu Ekirumu Amananu Agarukwesigwa
Ebyafaayo nibyoleka ngu abantu kuruga omu nganda ezirukwahukana baikaire nibatwara Baibuli kuba kitabu ekirumu amananu agarukwesigwa. Kasumi kanu, obukaikuru n’obukaikuru bw’abantu bahondera enyegesa zaayo. Baitu abandi batwara Baibuli kuba kitabu ekitarukukwatagana rundi eky’enganikyo ez’ebisuba. Iwe notekereza ki? Nosobora kwesiga amananu ag’omu Baibuli?
ENSONGA HABWAKI OSEMERIIRE KWESIGA BAIBULI
Kiki ekisobora kukukonyera kumanya obworaaba n’osobora kwesiga Baibuli? Tekerezaaho ekyokurorraho kinu: Kakuba munywani wawe aikara nakubaliza amananu kumara emyaka nyingi, omutwara kuba muntu omwesigwa. Baibuli, eri nk’omunywani omwesigwa ow’aikara nakubaliza amananu. Wetegereze ebimu ha byokurorraho binu.
Abahandiiki Ababazaaga Amananu
Abahandiiki ba Baibuli baali besigwa habwokuba bahandiikaga ha nsobi zaabo hamu n’ebintu ebyabalemaga kukora. Ekyokurorraho nabbi Yona akahandiika n’abazaaho obutahurra bwe. (Yona 1:1-3) Kandi akamaliirra kuhandiika ekitabu kye nayoleka omulingo Ruhanga yamuhaniremu, baitu Yona atasoborre omulingo yahindwiremu entekereza ye. (Yona 4:1, 4, 10, 11) Obwesigwa obw’abahandiiki ba Baibuli boona nibwoleka nk’oku bafaahoga muno amananu.
Amananu ag’Omugaso
Baibuli ekira kuha obuhabuzi oburukukwata ha nyikara zaitu eza buli kiro? Ego ekikora. Ekyokurorraho, wetegereze Baibuli eky’egamba obu kirukuhika ha nkoragana yaitu n’abantu abandi: “Nukwo, byona ebimwenda abantu okubagira inywe, mubagirege muti bo.” (Matayo 7:12) “Okugarukamu ebirukworoba kuhindura ekiniga: baitu ekigambo ekyokukayuka kitumbya ekiniga.” (Enfumo 15:1) Mali, amananu ag’omu Baibuli nigatugasira omu kasumi kanu nk’oku gakaba gali omu bwire bagahandiikiremu.
Ebyafaayo Nibigumya Amananu
Kumara emyaka nyingi ebintu biingi biizire nibizoorwa ebirukugumya nk’oku hakaba haroho abantu hamu n’ebiikaro eby’embaganiza ebirukwoleka ngu ebiri omu Baibuli mananu. Nk’ekyokurorraho, tekerezaaho obwakaiso bunu oburukuzooka nk’obutali obw’amaani. Baibuli n’egamba ngu omu kasumi ka Nehemiya, abantu ba Turo (Abafoiniki kuruga omu Turo) abaikaraga omu Yerusalemu ‘baletamuga encu nebintu ebyemiringo yona.’—Nehemiya 13:16.
Haroho obwakaiso bwona oburukusagika orukarra oru? Ego, buroho. Abantu abarukuseruliiriza ha bintu ebyakara, bakazoora ebintu eby’Abafoiniki omu Isaleri ebirukwoleka ngu hakaba haroho obusubuzi hagati y’amahanga abiri Turo hamu na Isaleri. Kwongera hali eki, amagufa g’encu ez’omu Nyanja ya Mediterranean gakazoorwa omu itaka omu Yerusalemu. Abantu banu abarukuseruliiriza ha bintu ebyakara nibakigumya ngu encu zaaletwaga abasubuzi kuruga ha Nyanja Mediterranean. Hanyuma y’okwetegereza kurungi obwakaiso obu, omu h’abarukuseruliiriza akagamba ati: “Ebigambo ebirukusangwa omu Nehemiya 13:16 ebirukwoleka ngu abantu ba Turo batundaga encu omu Yerusalemu bisobora kuba bihikire.”
Ebya Sayansi Nibigumya Amananu
Baibuli kitabu eky’ediini hamu n’ebyafaayo. Baitu obukirukuhika ha bintu ebya sayansi, Baibuli ehikiire kimu. Wetegereze ekyokurorraho kinu.
Emyaka nka 3,500 enyuma, Baibuli ekagamba ngu ensi ehanikirwe nambere ‘hatali kintu.’ (Yobu 26:7) Kinu kikahukanaho muno n’enganikyo ez’ebisuba ezagambaga ngu ensi nesereera ha maizi kandi ezindi zagambaga ngu ekwasirwe enyamankogoto enkooto muno. Hanyuma y’emyaka nka 1,100 ekitabu kya Yobu kimazire okuhandiikwa, abantu bakaikara nibaikiriza ngu ensi tesobora kubaho etaine kintu ekigikwasire. Omu mwaka 1687, (emyaka nka 300 yonka enyuma), nubwo omusaija arukwetwa Isaac Newton yayolekere omu kuseruliiriza kwe ngu amaani agarukwetwa gravity kandi agatarukurorwa nugo gakwatiire ensi omu mwanya. Okuseruliiriza okwakozerwe omusaija onu omunyasayansi kukagumya ebya Baibuli ekaba ebalizeeho emyaka erukuhingura omu 3,000 enyuma!
Obunabbi Oburukugumya Amananu
Kiki ekirukwoleka ngu obunabbi obuli omu Baibuli buhikire? Wetegereze ekyokurorraho kinu: Obunabbi obwa Isaya oburukukwata ha kuhwerekerra okwa Baburoni.
Obunabbi: Omu kyasa ekya munaana B.C.E., omuhandiiki owa Baibuli nabbi Isaya akaranga ngu Baburoni—orubuga orukaba nirugenda kuba rukuru orw’obukama obw’amaani—rwakusingwirwe kandi rwakufookere kifurukwa. (Isaya 13:17-20) Nabbi Isaya akabazaaho n’omusaija ayakusingwire orubuga runu, arukwetwa—Kuro. Kandi akabazaaho n’omulingo Kuro akaba nagenda kwomyamu amaizi g’ebisaaru eby’orubuga. Akongera yayoleka ngu enyigi ez’orubuga zakulekerwe zikingwirwe.—Isaya 44:27–45:1.
Okuhikirra kw’Obunabbi: Hanyuma y’emyaka 200 nabbi Isaya amazire kuranga obunabbi, omukama owa Buperesi akaramagira Baburoni. Ibara ly’omukama ogu akaba nuwe Kuro. Habwokuba orubuga rwa Baburoni rukaba rwine obulinzi obw’amaani, Kuro akacwamu kuteeka amaani ha Kyambu Furati ekyarabaga omu rubuga hagati. Abasaija be bakalima omukura bahugura amaizi gatwarwa omu kitoogo. Kinu kikaletera amaizi ag’omu kyambu Furati kukeeha kandi kyasobozesa Kuro n’ihe lye kwambuka ekyambu kuhika ha bisiika by’orubuga. Ekirukuhuniriza kiri ngu, kiro eki Abababuroni bakaba balekere enyigi z’orubuga eziroleriire ekyambu zikingwirwe! Kuro n’ihe lye bakataaha omu rubuga kandi barusingura.
Baitu ekicweka ekindi eky’obunabbi obu kitahikirre kiro eki: Mananukwo, Baburoni ekafooka kifurukwa? N’obukiraaba ngu abantu bakagumizaamu nibaikara omu rubuga oru kumara emyaka nyingi, Baburoni ekahika yafooka kifurukwa. Kandi kasumi kanu, ebisigarra eby’orubuga oru nibisangwa haihi—n’orubuga Baghdad, omu Iraq. Kinu nikigumiza kimu ngu obunabbi bukahikirra. Ego, Baibuli n’eyesigwa n’obukirukuhika ha kubazaaho ebirabaho omu busumi obw’omu maiso.
