Okufa kuleeta obusaasi n’obujune bwingi. Egi niyo ensonga habwaki Baibuli eyeta okufa omunyanzigwa. (1 Abakolinso 15:26) Omu isomo 27, okeega ngu Yahwe naija kusingura omunyanzigwa ogu. Baitu kiki ekirihika hali abo abamazire kufa? Omu isomo linu, noija kumanya omurago gwa Yahwe ogundi ogurukusemeza​—naija kuhumbuura obuhumbi n’obuhumbi bw’abantu nukwo bomeere ebiro n’ebiro. Eki mali nikisobora kubaho? Nibaija kuhumbuuka kwikara omu nsi rundi omu iguru?

1. Yahwe n’agonza kukorra ki abantu baitu abaafiire?

Yahwe aine ekihika ky’okuhumbuura abantu abaafiire. Yobu, omusaija ow’okwikiriza akaba n’akigumya ngu Ruhanga tarukwija kumwebwa kakuba afa. Akagambira Ruhanga ati: “Wakunyesere, nanyowe nakukwetebukire [kuruga omu kituuro].”​—Soma Yobu 14:13-15.

2. Nitukimanya tuta ngu Abafu nibasobora kuhumbuuka?

Yesu obw’akaba ali omu nsi, Yahwe akamuha amaani ag’okuhumbuura abantu. Yesu akahumbuura omwisiki ow’emyaka 12 hamu na mutabani w’omufakati. (Marako 5:41, 42; Luka 7:12-15) Hanyuma Munywani wa Yesu Lazaro akafa. N’obukiraaba ngu Lazaro akaba amazire ebiro bbina afiire kandi azikirwe, Yesu akamuhumbuura. Yesu akasaba Ruhanga kandi hanyuma yagamba ati: “Lazaro, turuka oije.” Hanyuma omusaija ow’akaba “afire yaturuka”​—ali mwomeezi! (Yohana 11:43, 44) Tekerezaaho okusemererwa banywani be n’abanyabuzaale okubaatungire!

3. Kunihira ki okwoine hali abantu bawe abaafiire?

Baibuli n’eraganiza ngu: “Halibaho okuhumbuka.” (Engeso Ezabakwenda 24:15) Abo Yesu abayahumbwire obwakaba akyali omu nsi, baali batagenzere omu iguru. (Yohana 3:13) Akabahumbuura bayongera baba bomeezi hanu omu nsi kandi eki kikabasemeza. Omu mulingo nugwo gumu, omu kasumi akatali ka hara, Yesu naija kuhumbuura obukaikuru n’obukaikuru bw’abantu kandi begondeze omu bwomeezi ebiro n’ebiro omu rugonjo orurungi. Akagamba ngu “bona abali omu bituro”​—abarukwijukwa Ruhanga nibaija kuhumbuurwa, n’obukiraaba ngu busaho muntu wena akimanyire ngu bakabaho.​—Yohana 5:28, 29.

 YEGA EBIRUKUKIRAHO

4. Yesu akakyoleka ngu n’asobora kuhumbuura abafu

Manya ebirukukiraho ebirukukwata ha kintu Yesu yakoliire munywani we Lazaro. Musome Yohana 11:14, 38-44, hanyuma mubazeeho ebikaguzo binu:

• Nitukigumya tuta ngu Lazaro akaba afiire kwo?​—Rora orukarra 39.

• Kakuba Lazaro yali agiire omu iguru, notekereza Yesu yakumuhumbwire amugarra omu nsi?

Mutekeho VIDIYO.

5. Abantu baingi nibaija kuhumbuurwa!

Musome Zabuli 37:29, hanyuma mubazeeho ekikaguzo kinu:

• Obukaikuru n’obukaikuru bw’abantu abarahumbuurwa nibaija kwikara nkaha?

Yesu naija kuhumbuura abantu baingi otwaliremu naabo abaali batarukuramya Yahwe. Musome Engeso Ezabakwenda 24:15, hanyuma mubazeeho ekikaguzo kinu:

• Noha ouwakugondeze kurora nahumbuuka?

• Okunihira okw’okuhumbuuka kukahuumuza kandi kwagarramu kuta amaani abazaire ba Phelicity?

 OYEGERE KI?

Baibuli n’eyegesa ngu obuhuumbi n’obuhuumbi bw’abantu abafiire nibaija kukumbuurwa. Yahwe nagonza bongere bomeere, kandi ahaire Yesu amaani g’okubahumbuura.

Kweijukyamu

• Yahwe na Yesu nibehurra bata obukirukuhika ha kuhumbuura abaafiire?

• Obuhuumbi n’obuhuumbi bw’abantu abaliba bahumbuukire baliikara nkaha​—omu iguru rundi omu nsi? Habwaki n’ogamba oti?

• Kiki ekirukukugumya ngu abantu bawe abafiire balyongera babe bomeezi?