Nangwa, Abakaiso ba Yahwe teri diini mpyaka kandi titwegesa enyegesa z’abantu. Oihireho tuli Bakristaayo abekamba kuhondera enyegesa za Yesu Kristo n’ekyokurorraho kye.

 Wetegereze ebintu ebitahikire abantu ebibakira kutubazaaho.

•   Abamu batekereza ngu Abakaiso ba Yahwe diini empyaka. Abakaiso ba Yahwe tibatandikireho ediini empyaka. Baitu turamya nk’oku Abakristaayo ab’omu kyasa eky’okubanza baaramyamuga, kandi ebintu ebibaayegeseze n’ebibaakozere bikahandiikwa omu Baibuli. (2 Timoseo 3:16, 17) Nitwikiriza ngu okuramya kwaitu kusemeriire kusigikirra ha Byahandiikirwe Ebirukwera.

•   Abamu batekereza ngu tuli diini ey’erukuhabisa abantu kandi ey’erukwebemberwa omuntu. Abakaiso ba Yahwe tibaikiriza ngu nibebemberwa omuntu. Oihireho, twikiriza ngu Yesu nuwe omwebembezi waitu habwokuba akagambira abahondezi be ati: “Omukama wanyu ali omu, nuwe Kristo.”—Matayo 23:10.

 Abakaiso ba Yahwe tibahabisa abantu, ebibeegesa bibagasira kandi bikonyera n’abantu abandi. Ekyokurorraho, omulimo gwaitu ogw’okutebeza gukonyiire abantu baingi kuleka kukozesa ebitokooza bwongo n’okunywa amaarwa ekihinguraine. Ekindi, omu nsi yoona, tusoboire kukonyera enkumi n’enkumi z’abantu kwega kusoma n’okuhandiika. Kandi tukonyera naabo abahikirweho ebigwererezi. Twekamba kuteraho abandi ekyokurorraho ekirungi nk’oku Yesu yaragiire abahondezi be kukora.—Matayo 5:13-16.