Mahungu yotsakisa ya leswaku mindjangu yitsaka mata hi ka Yehovha, Xikwembu lexitsakeke tlhelo musunguli wa wukati. (1 Timotiya 1:11) Kutsalisa muchadu switayendla leswaku vapsali ni vana vatsaka ni kutlhela varhandzana. Vakreste vafanele vahlonipha minawu ya le tikweni ka vona loko swita mhakeni yotsalisa muchadu. — Lerha Luka 2:1, 4, 5.

Xana Yehovha arindzela yini ka lavachadeke? Alava leswaku vatshama xikan’we wutomi la vona hinkwalu. Nakambe alava leswaku awukatini nuna atshembeka ka nsati wakwe, ni nsati ayendla tanu ka nuna wakwe. (Vaheveru 13:4) Yehovha waswinyenya kudlaya wukati. (Malakiya 2:16) Kambe apfumelela lavachadeke leswaku vadlaya wukati hi xivangelo xin’we ntsena, kunga loko mun’we wa vona ayetlela ni munhu lweyi anga chadangiki na yena. — Lerha Matewu 19:3-6, 9.

Yehovha avumbe wanuna ni wansati leswaku vapfunana andjangwini. (Genesa 2:18) Tani hi mulumuzana, wanuna afanele atirha hi matimba leswaku ahlayisa ndjangu ni kuwudjondzisa hi Xikwembu. Afanele amurhandza hi mbilu hinkwayu nsati wakwe. Nuna na nsati vafanele varhandzana ni kuhloniphana. Tani hileswi hinkwavu ka vona vanga hetisekangiki, i swa lisima kudjondza kurivalelana hikuva hi swona swingava pfunaka leswaku vatsaka awukatini la vona. — Lerha Vaefesa 4:31, 32; 5:22-25, 33; 1 Petro 3:7.

Loko lavachadeke vakumana ni swikarhatu awukatini la vona, hawumbirhi ka vona vafanele vatikarhatela kukhomana hi ndlela ya lirhandzu. (1 Vakorinto 13:4, 5) Bibele likombisa leswaku kutshikana ahi yona ndlela yolulamisa swikarhatu awukatini. — Lerha 1 Vakorinto 7:10-13.

Yehovha alava leswaku mitsaka. Aminyika minawu ya lisima leyingatami pfunaka leswaku mitsaka loko mili karhi mikula. Alava leswaku mivuyeliwa ka wutlharhi ni ntokoto wa vapsali va n’wina. (Vakolosa 3:20) Nakambe Yehovha alava leswaku mitikhorisa hi kuyendla kurhandza kakwe ni ka n’wana wakwe. — Lerha Eklesiasta 11:9–12:1; Matewu 19:13-15; 21:15, 16.

Tani hi vapsali, mifanele mitirha hi matimba leswaku mixavela vana va n’wina mpahla, swakudla ni kuvalavela ndhawu yoyetlela. (1 Timotiya 5:8) Kambe leswaku vana va n’wina vakuma ntsaku, mifanele mivadjondzisa kurhandza Xikwembu ni kuyingisa minawu ya xona. (Vaefesa 6:4) Ndlela leyi mirhandzaka Xikwembu ha yona yingahava ni nkucetelo lowunene ka vana. Loko mivadjondzisa hi kutirhisa Ritu la Xikwembu, djondzo ya n’wina yitavapfuna leswaku vakula andleleni leyinene. — Lerha Deteronoma 6:4-7; Swivuriso 22:6.

Vana vavuyeliwa loko mivakhensa hi leswi vaswimahaka. Hambiswilitanu, mifanele mivalaya. Hi kuyendla leswo, mitavapfuna kupapalata mikhuva leyingava tekelaka ntsaku. (Swivuriso 22:15) Kambe mifanele mikhumbuka leswaku amifanelanga mivalaya hi nhonga ya nsimbi. — Lerha Vakolosa 3:21.

Timboni ta Yehovha tiyendla mabuku yo hambanahambana leswaku mapfuna vapsali ni vana. Mabuku wolawo maseketeliwe Bibeleni. — Lerha Tipisalema 19:7, 11.