KUHANYA TANIHI VAKRESTE

Xiyenge Ximpsha ka Nhlanganu wa Xikarhi ka Vhiki

CHAYA

Kusukela ka Janeiro wa 2018 nhlanganu wa xikarhi ka vhiki wutapatsa minhlamuselo yodjondza ha yona, swifaniso ni mavhidiyu leswinga ka Bibele lodjondza hi lona livitaniwaka online study edition of the New World Translation of the Holy Scriptures (nwtsty), hambiloko lingasekumeka hi lirimi la wena. Handle kokanakana rungula leli litayampsisa ndlela yolunghisela minhlanganu. Swa lisima ngopfu hi leswaku switayengetela wuxaka la wena ni Tatana wa hina Yehovha, lweyi anga ni lirhandzu!

MINHLAMUSELO YODJONDZA HA YONA

Minhlamuselo yodjondza ha yona yihipfuna kutwisisa tindzimana totala ta Bibele hikuva yihlamusela ta ntumbuluku, ndhawu ni ta mavulavulelo.

Matewu 12:20

Ngoti ya motse: A motse lowu awutolovelekile wa le makaya aali xibza xa vumba lexi axicheliwa mafurha ya olivha. Akupetiwa ngoti ya kuhambiwa hi linyu leswaku yipsonga mafurha akuva yipfurha yikota kuvoninga. A xiga xa xigrika lexinge “ngoti ya motse” xingahava xikombeta ngoti ya motse leyihumesaka ximusi hikuva yahatlhavikile kambe ayahapfurhi. Xiprofeto xa Esaya 42:3 axiprofeta hi timpsalo ta Yesu; yena aangatahelisa ntshembo lowu vanhu lavatshikeleliweke avahali na wona.

Matewu 26:13

Nitiyisile: A rito la Xigrika, a men’, lelihumaka ka la xiheberu ʼa men’ lihlamusela swaku “aswive tano”, kumbe “i ntiyiso”. Ha kanyingi Yesu aatirhisa xiga lexi loko alava kuyendla xitshembiso xokarhi kumbe kuvula xiprofeto, akuva atiyisa leswi aswivulaka. Kuvuliwa leswaku aka matsalwa yokwetsima hi Yesu ntsena atirhiseke xiga lexinge “nitiyisile”, kumbe amem, hi ndlela leyi. Loko xiga lexi xiphindiwa hi kulandzelelana (a men’ a men’), kufana ni le ka Evhangeli ya Yohane, marito ya Yesu mahundzuluxeriwa hi ndlela leyi: ‘hakunene nitiyisile nili’.—Yh 1:51.

SWIFANISO NI MAVHIDIYU

Swifaniso, madezenyu, ni mavhidiyu yokala mpfumawulo swikombisa wuxokoxoko lohambanahambana lelinga aBibeleni.

Betefage, Ntshava ya Maolivhera na Yerusalema

Avhidiyu leli lokoma likombisa ndlela ya kusukela wuxeni, adoropeni la et-Tur, kuya aYerusalema — kuyehleketiwa swaku hi lomu Bibele linge hi Betefage — yin’we ya tindhawu totlakuka ngopfu ta Ntshava ya Maolivhera. Betaniya kukumeka atlhelo la le wuxeni ka Betefage, wuxeni ka Ntshava ya Maolivhera. Loko Yesu ni vadjondzisiwa vakwe vali Yerusalema avatolovela kuya Betaniya awusikwini. Namuntlha kutiviwa hi vito la el-Azariyeh (El Eizariya), inga vito la Xiarabika lelihlamuselaka swaku “Ndhawu ya Lazaru”. Handle kokanakana Yesu aatshama kaya ka Marta, Mariya na Lazaru. (Mt 21:17; Mr 11:11; Lk 21:37; Yh 11:1) Loko Yesu asuka kaya kwavu aya Yerusalema angahava afambe hi ndlela yoleyi yikombisiwaka ka vhidiyu. Hi 9 ka Nisan wa lembe la 33 C.E., a nkama lowu Yesu angakhwela ximbongolwana Antshaveni ya Maolivhera aya Yerusalema, angahava afambe hi ndlela yoleyo ya kusukela Betefage yiya Yerusalema.

Xitaratu xa kusukela Betaniya xiya Betefage
Betefage
Ntshava ya Maolivhera
Nkova wa Kedroni
Ntshava ya Tempele

Xipikirhi ka Rhambu la Xirhendze

Leli i foto la rhambu la xirhendze xa munhu litlhaviweke hi xipikirhi xa nsimbi, lexinga ni mpimu wa 11,5 cm (4,5 polegada) hi kuleha ka xona. Xifaniso xa orixjinali xikumiwe hi 1968 ka vuyembuli a n’walungu ka Yerusalema, naswona i xa minkameni ya Roma. Leswi swinyika wumboni la leswaku nkameni lowo akutirhisiwa swipikirhi kugongondzela munhu amhandzeni tanihi xikhatiso. Xipikirhi lexi xingahafana ni lexinga tirhisiwa hi masocha ya le Roma kugongondzela Yesu amhandzeni. Xifaniso lexi xikumiwe ka bokisi la ribze, lelivitaniwaka ndhawu yohlayisa marhambu, laha akuvekiwa marhambu ya vanhu lavafeke, loko se mawomile ni nyama ya kona yibolile. Leswi swikomba leswaku munhu lweyi adlayiweke hi kugongondzeliwa mhandzeni aswahakoteka kuva alahliwa.—Mt 27:35.

MAHANYELO NI NTIRHO WA HINA WA WUKRESTE