ST. PETERSBURG, eRhaxiya—Hi August 7, 2013, Huvo ya Muganga ya Tsentralniy ya le dorobeni ra Tver, leyi nga endhawini leyi lavaka ku endla tikhilomitara ta 160 en’walungwini wa Moscow, yi teke xiboho xa leswaku website leyi dyondzisaka Bibele ya jw.org yi fanele yi yirisiwa etikweni hinkwaro ra Rhaxiya.

Hambileswi vanhu va madzana ya magidi emisaveni hinkwayo va nghenaka eka website ya jw.org leswaku va kuma switsundzuxo naswona yi xiximiwaka swinene hi valavisisi, huvo yi yime ni vatirhela-mfumo lava lavaka ku yirisa website leyi, leyi dumeke swinene. Huvo yi teke xiboho lexi handle ko tivisa vakandziyisi va website, ku nga Watchtower Bible and Tract Society of New York, kumbe ku va nyika nkarhi wo tihlamulela. Timbhoni ta Yehovha ti hundzisele xiboho lexi eka eka Huvo ya Xifundzha ya Tver. Nandzu lowu wu ta tengiwa hi January 22, 2014.

Loko xiboho lexi tekiweke xi nga cinciwi, website yoleyo a yi nge he kumeki ku va yi tirhisiwa hi Timbhoni ta Yehovha leti tlulaka 160 000, leti nkarhi ni nkarhi ti yi tirhiselaka timhaka ta vugandzeri swin’we ni dyondzo ya Bibele ya munhu hi yexe ni ya ndyangu. Kutani ku khutaza vanhu ku tirhisa website leyi ku ta va xiendlo xa vugevenga eRhaxiya. Ku engetela kwalaho, vanhu va kwalomu ka 142 wa timiliyoni lava tshamaka eRhaxiya va ta siveriwa ku nghena eka jw.org leswaku va kuma rungula ra mahala ra malunghana ni Bibele. Loko Yekaterina Elbakyan, Dokodela wa Filosofi ni mutivi wa timhaka ta vukhongeri loyi a nga profesa eAcademy of Labor and Social Relations le Moscow, a vulavula hi website leyi, u te jw.org i “nyiko ya un’wana ni un’wana loyi a endlaka ndzavisiso wa timhaka ta vukhongeri. Yi ni rungula leri dzikeke ni leri twisisekaka. Timhaka ta nkoka ta moya ni ta mahanyelo ti hlamuseriwa hi ndlela yo olova. Loko u tirhisa website leyi, u titwa onge u le ku hoyozeriweni emutini wa Timbhoni ta Yehovha.”

Loko Grigory Martynov, muvulavuleri wa Timbhoni ta Yehovha eRhaxiya, a vulavula hi mhaka leyi a ri eSt. Petersburg, u te: “Website ya jw.org i xitirhisiwa xo kahle swinene eka vaaki va laha tikweni ra hina lava lavisisaka rungula malunghana ni Bibele naswona and a yi hlangani ndhawu ni timhaka ta tipolitiki kumbe ta mabindzu. Hi tshemba leswaku Huvo ya Xifundzha ya le Tver yi ta endla leswaku webisite leyi, leyi dumeke swinene yo dyondzisa yi hambeta yi va kona leswaku yi tirhisiwa hi vanhu hinkwavo va le Rhaxiya.”

J. R. Brown, muvulavuleri wa Timbhoni ta Yehovha entsindza wa tona wa misava hinkwayo eNew York, u te: “Website ya jw.org website yi tekiwa tanihi xitirhisiwa xo endla ha xona ndzavisiso ni xihlovo lexi nga ni rungula ro tshembeka leri nga tirhisiwaka hi mindyangu emisaveni hinkwayo. Yi tekiwa yi ri ya nkoka swinene lerova hi xiringaniso vanhu va 900 000 va nghena eka yona hi siku leswaku va kuma rungula leri akaka leri kumekaka hi tindzimi ta kwalomu ka 600. Kutani ku hava xivangelo xo sivela vanhu ku va va kuma rungula leri.”

Media Contact(s):

International: J. R. Brown, Office of Public Information, tel. +1 718 560 5000

Russia: Grigory Martynov, tel. +7 812 702 2691

Afrika-Dzonga: Mzamo Goloda, +27 11-761-1000