HAMBILESWI ku nga yingisi ka vatswari va hina vo sungula Adamu na Evha ku endleke leswaku hi va ni xidyoho ni rifu kambe a ku xi cincanga xikongomelo xa Xikwembu hi vanhu. Rito ra Xikwembu ku nga Bibele ri vule hi ku phindhaphindha leswaku xikongomelo xa xona a xi nge cinci.

• “Lavo lulama va ta dya ndzhaka ya misava,va ta tshama eka yona hi masiku.”—Pisalema 37:29.

• “Entiyisweni u ta mita rifu hi masiku, kunene Yehovha, Hosi leyi Lawulaka yi ta sula mihloti eswikandzeni hinkwaswo.”—Esaya 25:8.

• “Rifu i nala wo hetelela la nga ta herisiwa.”—1 Vakorinto 15:26.

• “Rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—Nhlavutelo 21:4.

Xikwembu xi ta ri ‘mita njhani rifu’ kumbe ku ri herisa? Bibele yi swi veka erivaleni leswaku “lavo lulama . . . va ta tshama eka yona hi masiku.” Yi tlhela yi vula leswaku “a nga kona munhu la lulameke emisaveni la hambetaka a endla leswinene.” (Eklesiasta 7: 20) Xana Xikwembu a xi nge vi na mhaka loko hi tlula milawu ya xona hikwalaho ka leswi xi lavaka ku herisa rifu? Nikatsongo! A xi nge swi endli sweswo hikuva ‘Xikwembu, a xi hembi.’ (Tito 1:2) I yini leswi Xikwembu xi nga ta swi endla leswaku xi hetisisa xikongomelo xa xona hi vanhu?

Yehovha Xikwembu u tirhise ndlela ya rirhandzu leswaku a ntshunxa vanhu eka rifu hi ku tirhisa nkutsulo. Nkutsulo i ku humesa nchumu lowu nga ni ntikelo lowu fanaka leswaku ku hakeriwa nandzu. Ku sukela loko vanhu va ve vadyohi naswona va gweviwe rifu Bibele yi vula leswaku “A nga kona ni wun’we eka vona la nga kutsulaka makwavo, Hambi ku ri ku nyika Xikwembu nkutsulo wakwe, (nkutsulo wa vona a wu na ntikelo a wu nge swi koti ku va ponisa).”—Pisalema 49:7, 8.

Loko munhu loyi a nga hetisekangiki a fa u fela swidyoho swa yena, a nge swi koti ku tiponisa kumbe ku kutsula un’wana. (Varhoma 6:7) A ku laveka munhu la hetisekeke loyi a ta nyikela hi vutomi byakwe hikwalaho ka swidyoho swa hina tanihi leswi yena a nga riki na xidyoho.—Vaheveru 10:1-4.

Sweswo hi leswi Xikwembu a xi tiyimisele ku swi endla. Xi rhumele N’wana wa xona Yesu a suka etilweni leswaku a tswariwa tanihi munhu la hetisekeke la nga riki na xidyoho. (1 Petro 2:22) Yesu u vule leswaku a tele ku ta “nyikela moya-xiviri wakwe wu va nkutsulo wa lavo tala.” (Marka 10:45) Rifu rakwe ri hi kutsula eka xidyoho ni rifu leswaku hi ta kuma vutomi lebyi nga heriki.—Yohane 3:16.

Namuntlha hi vona ku hetiseka ka vuprofeta bya Bibele, hi hanya ‘eminkarhini ya mangava leyi swi nonon’hwaka ku langutana na yona,’ leswi swi kombisa leswaku hi hanya “emasikwini yo hetelela.” (2 Timotiya 3:1) Ku nga ri khale ku ta fika “siku ra vuavanyisi ni ra ndzoviso wa vanhu lava va nga xi xiximiki Xikwembu.” (2 Petro 3:3, 7) Kambe vanhu lava rhandzaka Xikwembu va ta pona ndzoviso wolowo kutani va kuma ‘vutomi lebyi nga heriki.’—Matewu 25:46.

Vanhu va timiliyoni va ta va ni nkateko wo kuma vutomi lebyi nga heriki loko va pfuxiwa. Yesu u kombise  leswaku swa koteka ku va vanhu va pfuxiwa eku feni loko a ri exidorobanini xa Nayili. Noni yi n’wana yi feriwe hi n’wana loyi a nga yexe, hi ku susumetiwa hi “ntwelavusiwana” Yesu u n’wi pfuxile. (Luka 7:11-15) Muapostola Pawulo u te: “Ndzi ni ntshembo eka Xikwembu . . . leswaku ku ta va ni ku pfuxiwa ka lava lulameke ni ka lava nga lulamangiki.” Xitshembiso lexi xi kombisa leswaku Xikwembu xa hi rhandza.—Mitirho 24:15.

Vanhu va tibiliyoni va swi langutele hi mahlongati ku hanya hi laha ku nga heriki. Bibele yi ri: “Lavo lulama va ta dya ndzhaka ya misava, Va ta tshama eka yona hi masiku.” (Pisalema 37:29) Hi nkarhi wolowo va ta tsaka ni ku khutazeka loko va vona ku hetiseka ka marito ya muapostola Pawulo lama tsariweke emalembeni ya 2 000 lama hundzeke lama nge: “Rifu, ku hlula ka wena ku kwihi ke? Rifu, ndzhombo wa wena wu kwihi ke?” (1 Vakorinto 15:55) Rifu leri endlaka leswaku vanhu vo tala va nga dyi byi rhelela ri ta herisiwa!