Ntshikilelo wa tintangha exikolweni ni ku hohloka ka mahanyelo emisaveni swi ni nkucetelo lowukulu swinene emindyangwini. Leswaku vana va kota ku hlula nkucetelo lowu wo biha, va fanele va dyondzisiwa mahanyelo lamanene. Handle ka sweswo, a va nge swi koti ku va ni vutihlamuleri ni ku tikhoma kahle loko se va kurile.

Vatswari vo tala lava nga voxe, ku katsa ni lava va tshahiweke eswihlokweni leswi swa nxaxamelo, va lava nkongomiso eBibeleni hikuva va swi xiya leswaku yi ni vutlhari bya Xikembu lebyi tlakukeke swinene. Hi xikombiso, xiya leswi Bibele yi swi vulaka malunghana ni nawu wa nkoka swinene ku tlula hinkwayo, ku nga ku kombisa rirhandzu ra xiviri.

“Rirhandzu ri ni mbilu yo leha ni musa. Rirhandzu a ri na mavondzo, a ri tikurisi, a ri tikukumuxi, a ri tikhomi hi ndlela leyi nga tengangiki, a ri lavi leswi vuyerisaka rona ntsena, a ri hlundzuki. A ri hlayisi mhaka yo biha. A ri tsaki hi leswi nga lulamangiki, kambe ri tsaka ni ntiyiso. Ri byarha swilo hinkwaswo, . . . ri va ni ntshembo eka swilo hinkwaswo, ri tiyisela swilo hinkwaswo. Rirhandzu a ri heli.”—1 Vakorinto 13:4-8.

Loko vatswari va kombisa rirhandzu ro tano, vana va vona va ta kula kahle. Colette wa le Furwa, loyi a boxiweke exihlokweni xa vumune u tsale a ku: “A ndzi tshamela ku byela vana va mina leswaku ndza va rhandza. Nakambe a ndzi va byela leswaku i tinyiko leti humaka eka Xikwembu nileswaku va fanele va khathaleriwa kahle hikwalaho ka sweswo. Kutani na vona va fanele va ndzi xixima swin’we ni tata wa vona [loyi a nga nyikiwangiki mfanelo yo tshama na vona]. Leswi swi endle leswaku va ndzi tshemba va tlhela va ndzi xixima.”—Pisalema 127:3.

Anna wa le Poland u tsale a ku: “Loko vana va mina va holova, ndzi va tsundzuxa marito ya Yesu ya leswaku leswi hi lavaka van’wana va swi endla eka hina, na hina hi fanele hi swi endla eka vona.” (Matewu 7:12) Roberto, loyi a boxiweke exihlokweni xa vumune, u langutana ni xiphiqo lexi tolovelekeke eka vatswari vo tala lava nga voxe. U ri: “Vana va dyondzisiwa milawu ya mahanyelo leyi hambaneke hi vatswari va vona havambirhi. Ndza swi tiva leswaku a va nge ndzi tsakeli siku rero kumbe vhiki rero loko ndzi va byela leswaku va hanya hi milawu ya Bibele ya mahanyelo.” U tlhele a ku: “Mutswari lowun’wana a nga ha va nyika tinyiko leswaku va n’wi rhandza swinene ku tlula mutswari lowun’wanyana. Kutani mutswari lowun’wanyana na yena a nga ringeka ku xava rirhandzu ra vona hi tinyiko kambe ku vulavurisana na vona swi nga pfuna swinene ku tlula ku va xavela tinyiko.”

A hi minkarhi hinkwayo swi olovaka ku hanya hi milawu ya Bibele ya mahanyelo kambe vuyelo bya kona bya tsakisa swinene. Sarah, mutswari loyi a nga yexe wa le Afrika Dzonga, u ri: “Ndzi tsakile leswi ndzi kuriseke vana va mina hi milawu ya Yehovha. I ntiyiso leswaku a hi langutana ni swiphiqo kambe minkarhi hinkwayo u hi pfunile.”