LOKO ndzi fika ro sungula etikweni ra Sierra Leone, swi ndzi tekele mavhiki mambirhi ntsena leswaku ndzi ri tolovela. Yi ndzi hlamarisile ndlela leyi vanhu va kona va rhwalaka swilo swo tika ha yona etinhlokweni ta vona handle ko kombisa leswaku va tikiwa. Vanhu a va tshama va khomekile. Vana a va tlanga ni ku cina eswitarateni, va phokotela mavoko ni ku tlula-tlula va fambisana ni leswi a va swi yimbelela. Sierra Leone i tiko leri vanhu va kona va tshamaka va ri karhi va tiphina hi vuyimbeleri ni ku tlhela va cina. Nakambe va rhandza ku ambala swiambalo swa mihlovo-hlovo.

Lexi ndzi tiphinaka ngopfu ha xona laha i ku chumayela. Vanhu va le Sierra Leone va swi kota ku kombisa vanhu vambe malwandla. Va yi xixima Bibele naswona va ri yingisa rungula ra yona. Minkarhi yin’wana a va ndzi rhamba leswaku ndzi ya emakaya ya vona. Loko ndzi famba, van’wana va ndzi helekete ku ya fika emakumu ka xitarata. Vumunhu bya vona lebyinene byi ndzi pfunile leswaku ndzi tiyisela swiyimo swo tika, swo fana ni ku kayivela ka mati ni ku pfumaleka ka gezi.

Leswi ndzi nga tekiwangiki, minkarhi yin’wana vanhu va pfa va ndzi vutisa loko ndzi ri ni xivundza. Kahle-kahle ndzi ni swo tala swo swi endla lerova a ndzi na nkarhi wo va ni xivundza. Ndzi hanya vutomi lebyi nga ni xikongomelo.