HI 1997, loko masocha yo xandzuka ni ya hulumendhe ma lwa eFreetown, ndzi tinyiketele ku rhwala mapapila ku suka eFreetown ndzi ma yisa erhavini leri a ri ri ra xinkarhana eConakry, le Guinea.

Ndzi khandziye bazi ni ntlawa wun’wana wa vavanuna exitichini xa mabazi. Hi twe mpfumawulo wa swibamu lowu a wu twalela ekule laha hi sunguleke ku chava. Loko hi ri karhi hi famba eswitarateni swa le dorobeni, hi twe ku balesela ka swibamu ematlhelo ka hina. Muchayeri wa hina u tlhelele endzhaku kutani a teka ndlela yin’wana. Endzhakunyana ka sweswo, hi yimisiwe hi ntlawa wa masocha yo xandzuka lowu hlomeke hi swibamu lowu hi leriseke leswaku hi chika ebazini. Endzhaku ko hi tlhava hi swivutiso wu hi tshike hi hundza. Endzhakunyana, hi tlhele hi yimisiwa hi ntlawa wun’wana wa masocha. Leswi un’wana wa vakhandziyi a a tiva mukongomisi wa wona, wu hi tshike hi hundza. Loko hi fike emakumu ka doroba, hi hlangane ni ntlawa wa vunharhu wa masocha yo xandzuka lowu hi tlhaveke hi swivutiso kutani wu hi lerisa leswaku hi famba. Loko hi ri karhi hi kongoma en’walungwini, hi hundze  switarata swo tala leswi pfariweke ku fikela nindzhenga wa siku rero loko bazi ra hina leri a ri ri na ritshuri ri fika eConakry.

Eka maendzo lawa ndzi veke na wona endzhakunyana a ndzi rhwala mabokisi ya minkandziyiso, switirhisiwa swa le hofisini, tirhekhodo ta le rhavini ni swilo swo phalala. A ndzi tala ku famba hi movha kumbe hi xibazana. Nakambe leswaku ndzi kota ku tsemakanyisa mindzhwalo ya mina emakhwatini ni le milambyeni, a ndzi hirha swilo swo rhwala mindzhwalo ni swikwekwetsu leswaku swi ndzi hundzisela yona.

Loko ndza ha yisa switirhisiwa ku suka eFreetown ku ya eConakry, xibazana lexi a ndzi ri eka xona xi yimisiwe endzilakaneni hi masocha yo xandzuka. Rin’wana ra wona ri seche mindzhwalo ya mina kutani ri sungula ku ndzi tlhava hi swivutiso hikwalaho ka leswi a ri ndzi ehleketelela. Loko ndza ha ri kwalaho ndzi vone un’wana wa lava a ndzi nghena na vona xikolo exikarhi ka masocha yo xandzuka. Masocha a ya n’wi vitana Roughneck naswona a languteka a ri ni tihanyi ngopfu eka ntlawa wolowo wa masocha. Ndzi byele socha leri a ri ri eku ndzi tlhaveni hi swivutiso leswaku ndzi tele ku ta vona Roughneck, hiloko ndzi namba ndzi n’wi vitana. Roughneck u hatle a ndzi tiva hiloko a ta eka mina hi ku tsutsuma. Hi vukarhanile ni ku tlhela hi hlekelela. Hiloko endzhaku ka sweswo a sungula ku bohanisa xikandza.

U vutise a ku: “Xana u na swiphiqo?”

Ndzi hlamule ndzi ku: “Ndzi ringeta ku nghena eGuinea.”

Hi ku hatlisa u lerise masocha leswaku ma pfumelela xibazana xa hina leswaku xi hundza endhawini leyi va sechaka kona handle ko sechiwa.

Ku sukela esikwini rero ku ya emahlweni, nkarhi wun’wana ni wun’wana loko ndzi fika laha ku sechiwaka kona, Roughneck a lerisa masocha leswaku ma ndzi tshika ndzi hundza. Ndzi nyike masocha tikopi ta timagazini leti ma ti tlangeleke swinene. Hi ku hatlisa ma sungule ku ndzi vitana Muwatchtower.