Dyondzo 116

Ndlela Leyi Hi Nga Hanyaka Hilaha Ku Nga Heriki Ha Yona

XANA wa swi vona leswaku xinhwanyatana lexi ni vanghana va xona va hlaya yini? Ina, va hlaya yona buku leyi u yi hlayaka sweswi—Buku Yanga Ya Timhaka Ta Bibele. Naswona va hlaya xitori lexi u xi hlayaka sweswi—“Ndlela Leyi Hi Nga Hanyaka Hilaha Ku Nga Heriki Ha Yona.”

Xana wa swi tiva leswaku va dyondza yini? Xo sungula, leswaku hi fanele ku tiva Yehovha ni N’wana wakwe Yesu loko hi lava ku hanya hilaha ku nga heriki. Bibele yi ri: ‘Leyi i ndlela leyi yisaka evuton’wini lebyi nga heriki. Ku dyondza hi Xikwembu xi ri xin’we xa ntiyiso, ni N’wana wa xona loyi xi n’wi rhumeke emisaveni, Yesu Kreste.’

Xana hi nga dyondza njhani hi Yehovha Xikwembu ni N’wana wa yena Yesu? Ndlela yin’wana i ku hlaya Buku Yanga Ya Timhaka Ta Bibele ku sukela eku sunguleni ku ya fika emakumu. Yi hi byela swo tala hi Yehovha na Yesu, a swi tano ke? Naswona yi hi byela swo tala hi swilo leswi va swi endleke ni leswi va nga ta swi endla. Kambe a hi fanelanga hi hlaya buku leyi ntsena, hi fanele hi endla ni swin’wana.

Xana wa yi vona buku leyin’wana leyi nga laha hansi? I Bibele. Kombela un’wana a ku hlayela tindzimana ta Bibele leti timhaka leti nga ebukwini leyi ti tekiweke eka tona. Bibele yi hi nyika vuxokoxoko hinkwabyo lebyi hi byi lavaka leswaku hinkwerhu hi ta kota ku tirhela Yehovha hi ndlela leyi faneleke kutani hi kuma vutomi lebyi nga heriki. Kutani hi fanele ku titoloveta ku hlaya Bibele nkarhi ni nkarhi.

Kambe ku dyondza ntsena hi Yehovha Xikwembu na Yesu Kreste a swi enelanga. Hi nga va ni vutivi byo tala hi vona swin’we ni tidyondzo ta vona, kambe hi nga byi kumi vutomi lebyi nga heriki. Xana wa swi tiva leswaku i yini xin’wana lexi lavekaka?

Hi fanele hi hanya hi ku pfumelelana ni leswi hi swi dyondzaka. Xana wa ha n’wi tsundzuka Yudasi Iskariyota? A a ri un’wana wa lava 12 lava Yesu a va hlawuleke leswaku va va vaapostola vakwe. Yudasi a a ri ni vutivi byo tala hi Yehovha na Yesu. Kambe ku humelele yini ha yena? Hi ku famba ka nkarhi u ve ni vutianakanyi, naswona u xenge Yesu eka valala va yena hi swiphemu swa silivhere swa 30. Hikwalaho, Yudasi a nge byi kumi vutomi lebyi nga heriki.

Xana wa ha n’wi tsundzuka Gehazi, wanuna loyi hi dyondzeke ha yena eka Xitori 69? A a lava ku kuma swiambalo ni mali leyi nga riki ya yena. Kutani u hembile leswaku a ta kuma swilo leswi. Kambe Yehovha u n’wi xupurile. Na hina u ta hi xupula loko hi nga yi yingisi milawu ya yena.

Kambe ku ni vanhu vo tala lavanene lava tirheleke Yehovha hi ku tshembeka nkarhi hinkwawo. Hi lava ku fana na vona, a swi tano ke? Samuwele lontsongo i xikombiso lexinene lexi hi faneleke hi xi tekelela. Tsundzuka, hilaha hi swi voneke hakona eka Xitori 55, a a ri ni malembe ya mune kumbe ya ntlhanu ntsena loko a sungula ku tirhela Yehovha etabernakeleni. Kutani, ku nga khathariseki leswaku u ni malembe mangani, u nga swi kota ku tirhela Yehovha.

Ina, munhu loyi hinkwerhu hi lavaka ku n’wi tekelela i Yesu Kreste. Hambiloko a ha ri mufana, hilaha swi kombisiweke hakona eka Xitori 87, a a ri etempeleni a vulavula ni van’wana malunghana ni Tata wakwe wa le tilweni. Onge na hina hi nga tekelela xikombiso xa yena. A hi byeleni vanhu vo tala hilaha hi nga kotaka hakona hi Yehovha Xikwembu xa hina lexinene ni N’wana wa xona, Yesu Kreste. Loko hi endla tano, hi ta swi kota ku hanya hilaha ku nga heriki eparadeyisini leyintshwa ya Xikwembu emisaveni.

Yohane 17:3; Pisalema 145:1-21.