Vuyimbeleri i nyiko ya risima leyi humaka eka Yehovha. Byi nga khumba miehleketo ya hina, byi cinca ndlela leyi hi titwaka hayona ni ku hi khutaza. Swi tano ni hi vuyimbeleri byin’wana bya hina. Ku vula ntiyiso vuyimbeleri lebyi, byi nga endla swo tala: byi nga hi tshineta ekusuhi na Yehovha.

 Ku sukela hi 2014, ku humesiwe vuyimbeleri byin’wana bya kwalomu ka 70 naswona byin’wana bya byona bya kumeka hi tindzimi ta kwalomu ka 500! Kumbexana wa tivutisa leswaku, ‘I vamani lava tirhaka hi ku humesa vuyimbeleri lebyi naswona byi humesiwa njhani?’

 Vuyimbeleri bya hina byi humesiwa hi ntlawa wa vamakwerhu va xinuna ni va xisati lava nga eka ndzawulo ya ku Rhekhoda Mimpfumawulo ni Tivhidiyo lava tirhaka ehansi ka nkongomiso wa Komiti yo Dyondzisa ya Huvo Leyi Fumaka. Ntlawa lowu wu vumbiwa hi vamakwerhu va xinuna ni va xisati lava ringanaka 13 lava pfunetaka eka ku tsala vuyimbeleri, ku byi vumba, ku byi hlela ni ku byi humelerisa. Ku engetela kwalaho, Komiti Yo Dyondzisa yi pfumelele vatirhi va nkarhinyana lava pfunetaka hi ntirho lowu emisaveni hinkwayo, lava katsaka vatsari, vachayi ni vayimbeleri. Vamakwerhu lava va xinuna ni vaxisati, va tirhisa vuswikoti bya vona hi ku titsongahata naswona a va tilaveli ndhuma.

 Xana vuyimbeleri bya hina byi endliwa njhani? Xo sungula, Komiti Yo Dyondzisa yi endla xiboho xo lava tsalwa leri risimu ri nga ta tekiwa eka rona ni ndlela leyi ri faneleke ri endla vayingiseri va tiwa hayona. Endzhaku ka sweswo, ntlawa wa ndzawulo ya vuyimbeleri wu avela va endli va risimu ni vatsari va marito ya risimu leswi va faneleke va swi endla. Va tirha va ri karhi va rhekhoda leswi va swi tsalaka. Komiti Yo Dyondzisa yi kambisisa risimu leri rhekhodiweke ivi yi nyika swiringanyeto mayelana ni laha ri nga antswisiwaka kona. Endzhaku ka sweswo, ndzawulo ya vuyimbeleri yi antswisa risimu rero ivi yi rhekhoda nakambe leri ku nga ta tirhisiwa rona. Vuyimbeleri lebyi byi rhekhodiwa etindhawini to hambanahambana, ku nga ha va emarhavini kumbe emakaya.

 Leswaku ku endliwa ni ku rhekhoda vuyimbeleri lebyi, vamakwerhu va tirhisa tiprogreme to hambanahambana ta le ka khompyuta. Tiprogreme teto ti tirhisiwa tanihi swichayachayana swa vuyimbeleri, swo mikisa, swo engetela mpfumawulo, swipikara ni swo kurisa marito. Xikurisa marito ha xin’we xi durha ku sukela kwalomu ka 100 ku ya eka ku tlula 1 000 wa tidolara ta le Amerika. Hi lembe ra 2020, hi tirhise tidolara ta kwalomu ka 116 000 eka swo rhekhoda vuyimbeleri.

 Hi wahi matshalatshala lama endliwaka leswaku ku hlayisiwa mali leyi nyikeriweke? Leswaku ku nga vi na ntlawa wo tala wa vayimbeleri eBethele, ku tirhisiwa vapfuneti vo tala lava tirhaka va ri emakaya. Ematshan’weni ya leswaku va ta hi nkarhi wun’we va ta rhekhoda eBethele, vamakwerhu volavo va rhekhoda ni ku humelerisa vuyimbeleri hi ku tirhisa tikhompyuta va ri emakaya.

 Vamakwerhu va swi rhandza ku yingisela vuyimbeleri lebyi (original songs). Tara loyi a tshamaka eJarimani, u ri: “Vuyimbeleri lebyi, byi ndzi pfuna leswaku ndzi wisisa miehleketo ya mina loko ndzi karhatekile. Loko ndzi byi yingisela hi ririmi ra manana, swi fana niloko Yehovha a ndzi angarha.” Makwerhu loyi a vuriwaka Dmitry wa le Kazakhstan, u ri: “Ndzi rhandza ku yingisela vuyimbeleri lebyi hikuva a ndzi karhateki hileswaku byi ta ndzi kucetela ku endla swilo swo biha ku fana ni leswi endliwaka hi vuyimbeleri byin’wana bya misava leyi. Xa nkoka swinene, byi ndzi pfuna ku tiyisa vuxaka bya mina na Yehovha.”

 Delia wa le Afrika Dzonga u hlamusela ndlela leyi a titwaka hayona hi vuyimbeleri lebyi, u ri: “Se byi hundzuke nchumu lowu ndzi pfunaka ku tiyisa vuxaka bya mina na Yehovha. Loko ndzi titwa ndzi tshikilelekile kumbe ndzi ri ni mitlhontlho, ku tshama ku ri ni risimu leri ndzi pfunaka ku langutana ni xiyimo lexi. Hakanyingi, ndlela leyi ndzi titwaka hayona ya cinca loko ndzi twa ntsena mpfumawulo wa vuyimbeleri lebyi!”

 Vanhu vo tala va byi rhandza vuyimbeleri lebyi. Lerato loyi na yena a nga wa le Afrika Dzonga, u ri: “Risimu leri nge, ‘Kwala Nyongeni’ ni leri nge ‘Tivone U Ri eParadeyisini,’ ti ndzi endla ndzi wu vona hi mahlo ya miehleketo nkarhi lowu ndzi nga ta hoyozela manana loyi a feke loyi a ndzi n’wi rhandza swinene. Mikarhi hinkwayo loko ndzi ti yingisela, ndzi n’wi vona a ri karhi a ndzi hlanganisa hi ku tsutsuma a lava ku ndzi angarha.”

 Risimu rin’wana ra hina ri pfune ntombhi leyi tshamaka eSri Lanka. Yi ri: “Mudyondzisi wa mina wa sayense u ndzi hlamule hi marito yo tlhava emahlweni ka vadyondzikulorhi hileswi ndzi nga Mbhoni ya Yehovha. Ndzi sungule ku chava swinene naswona a ndzi nga tivi leswaku ndzi ta ku yini. Loko ndzi fika ekaya, manana u ndzi khutaze ku yingisela risimu leri nge, ‘Ku Dyondza Swa Tiyisa.’ Risimu rero ri ndzi pfune ku vona xilaveko xo endla ndzavisiso ni ku lunghiselela nhlamulo ya mina. Hi siku leri landzeleke, ndzi vulavule ni mudyondzisi wa mina. U ndzi yingiserile ivi a ndzi byela leswaku sweswi se u swi twisisa ku antswa leswi Timbhoni ta Yehovha ti pfumelaka eka swona. Ndza wu khensa swinene nhlangano wa Yehovha hileswi wu hi humeselaka vuyimbeleri byo tano lebyi khutazaka swinene.”

 Xana hi yi kuma kwihi mali yo humesa vuyimbeleri lebyi? I minyikelo ya n’wina leyi mi yi nyikelaka eka ntirho wa misava hinkwayo, leyi yin’wana ya yona yi nyikeriwaka hi tindlela leti kumekaka eka donate.jw.org. Ha yi khensa swinene minyikelo ya n’wina ya rirhandzu.