Kwambiya pa 30 September mpaka pa 3 November 2024, Akaboni aku Yehova akutuliya mu vyaru vinkhondi, anguluta pa chilwa cha Melita kuchichitaku upharazgi wapade. Yiwu pamoza ndi abali ndi azichi 870 a kwenuku angupharazga uthenga wamampha mu Chingelezi, Chiitaliya, Chimatese, ndi mu Chitagalogi. Pa nyengu ya upharazgi wapade wenuwu, ŵanthu 174 angupempha kusambira Bayibolu.

Achipharazga kunyumba ndi nyumba, akaboni ŵaŵi angukumana ndi munthukazi munyaki. Ŵati akambiskana nayu mwakudumuwa mo vinthu viliri mucharu mazuŵa nganu, azichi ŵidu angumuwonesa vidiyo yakuti Ntchifukwa Wuli Tikhumbika Kusambira Bayibolu? pavuli paki angumulongo mo tisambiriya Bayibolu ndi ŵanthu. Munthukazi uyu wanguzomera kwamba kusambira Bayibolu ndipu wangupempha kuti amuwovyi kupanga dawunilodi apu ya JW Library pa foni yaki. Pa ulendu wakwamba wenuwu, angusambira nayu sambiru 01 mu buku la Kondwani ndi Umoyu Kwamuyaya! ndipuso angumuwonesa vidiyo yakuti Vakukondwesa Kuti Mwayambapu Kusambira Bayibolu. Munthukazi uyu walutirizga kusambira Bayibolu ndipu wakondwa ukongwa.

Zuŵa linyaki ndi mlenji, munthu munyaki wanguza po penga kashelufu kidu ka mabuku. Iyu wangukamba kuti walutanga ku ntchitu kweni wanguzizwa wati wawona kashelufu kidu. Akaboni ŵati amukonkhoske kuti apempha ŵanthu kuti asambirengi nawu Bayibolu, munthu uyu wangufumba kuti: “Kumbi sambiru la Bayibolu lichitika wuli?” Ŵati akambiskana nayu fumbu lo le papeji lakukumaliya kwa kabuku ka Kondwani ndi Umoyu Kwamuyaya!, munthu yo wangupempha kuti amupasi kabuku kenaka kuti wakakaŵerengi pa nyengu yo waŵengi ndi mpata. Pasonu panu, munthu uyu wasambira Bayibolu ndi Akaboni aku Yehova kujumpha kamoza pa sabata ndipu wakondwa ukongwa.

Mu nyengu ya akutumika, ŵanthu a ku Melita ‘angumulongo lisungu likulu ukongwa’ Paulo pa nyengu yo sitima yinguŵasweke pa chilwa chenichi. (Machitidu 28:2) Mwakuyanana waka, mipingu 10 yo ye pachilwa cha Melita kweniso Gozo anguŵalonde umampha ukongwa abali ndi azichi pa nyengu ya ntchitu yapade yeniyi. Mubali munyaki yo wangutuliya ku England wangukamba kuti: “Pakumaliya pa upharazgi wapade uwu, tingwamba kwanjana ukongwa ndi abali ndi azichi a kwenuku ndipu tichiweku venga nge kuti tilekana ndi mpingu wakumuzi kwidu.”

Titimuwonga ukongwa Yehova chifukwa chakutumbika phamphu la abali ndi azichi ŵidu kuti apharazgiyi ŵanthu uthenga wamampha wa Ufumu kwekosi ko angasanirika.—Machitidu 1:8.