Muvwiyengi Aliska Wo Yehova Wapereka
Muvwiyengi Aliska Wo Yehova Wapereka
“Vwiyani ŵalongozgi ŵinu, ndipu ŵatheriyeni: chifukwa yiwu ŵalindiya . . . mizimu yinu.”—ŴAH. 13:17.
KUMBI MUNGAMUKA WULI?
Kumbi ŵara a mumpingu aliska wuli mbereri zaku Chiuta?
Nchifukwa wuli mbereri zitenere kuvwiya aliska amanaamana?
Nchifukwa wuli kuleka kufikapu kwa aliska amanaamana kutenere cha kutichitiska kuti tikanengi ulongozgi wawu wa m’Malemba?
1, 2. Nchifukwa wuli mphakuvwika kuti Yehova watijiyeruzgiya ndi muliska?
YEHOVA watijiyeruzgiya ndi muliska. (Ezek. 34:11-14) Mphakwenere nadi kuti wajiyeruzgiyi viyo chifukwa vititiwovya kuvwisa mo iyu waliri. Muliska wachanju watesesa kuphwere mbereri zaki. Iyu waluta nazu ko kwe uteka wakubiriŵira umampha kweniso maji (Sumu 23:1, 2); watiziwonere musana ndi usiku (Luka 2:8); watizivikiliya kuti zileki kuliwa (1 Sam. 17:34, 35); wanyamuwa tiŵana (Yes. 40:11); wapenjerezga yo yawala ndi kovya yo yapwetekeka.—Ezek. 34:16.
2 Ateŵeti aku Yehova akali ayanjanga kulima kweniso kuŵeta viŵetu. Mwaviyo, avwisanga umampha fundu yakuti Yehova Chiuta ndi muliska wachanju. Yiwu aziŵanga kuti mbereri zakhumbikanga kuziphwere umampha kuti zije ndi umoyu. Ŵanthu nawu akhumbika kuŵaphwere kuti afiski kusopa umampha Chiuta. (Marko 6:34) Asani aliska aleka kuphwere ndi kulongozga umampha mskambu, ŵanthu asuzgika ukongwa. Vija vambula kusuzga kuti ŵanthu aliwi ndi kuwala nge mo zichitiya “mbereri zambula muliska.” (1 Ŵakar. 22:17) Kweni Yehova wapereka aliska wo aphwere ŵanthu ŵaki.
3. Kumbi tikambiskanengenji m’nkhani iyi?
3 Mazuŵa nganu napu, Yehova wayanana ndi muliska chifukwa weche kuphwere ŵanthu ŵaki. Tiyeni tiwoni vo wachita pakulongozga ndi kuphwere ŵanthu ŵaki mazuŵa nganu. Tiwonengi so vo titenere kuchita asani Yehova watitiphwere mwachanju.
MULISKA WAMAMPHA WATITIPASKA ALISKA AMANAAMANA
4. Kumbi Yesu we ndi udindu wuli pakuphwere mbereri zaku Yehova?
4 Yehova wasankha Yesu kuja Mutu wa mpingu wachikhristu. (Ŵaef. 1:22, 23) Nge ‘muliska wamampha,’ Yesu walongo mijalidu, khumbu ndipuso chanju cho Awiski ŵenachu. Yesu wangupereka ‘umoyu waki chifukwa cha mbereri.’ (Yoh. 10:11, 15) Ŵanthu ayanduwa nadi ndi sembi yaku Khristu! (Mat. 20:28) Ndichu chifukwa chaki Yehova wakhumba kuti “yosi wakuvwana mwaku iyu waleki kutayika, kweni waŵi ndi umoyu wamuyaya.”—Yoh. 3:16.
5, 6. (a) Kumbi Yesu wakusankha ayani kuti aphwere mbereri zaki, nanga mbereri zingachita wuli kuti ziyanduwi? (b) Kumbi chifukwa chikulu cho chititichitiska kuti tivwiyengi ŵara ndi nichi?
5 Kumbi mbereri zichita wuli asani zavwa mazu nga Muliska Wamampha, Yesu Khristu? Iyu wangukamba kuti: “Mbereri zangu zituvwa liwu langu, ini nditiziziŵa, ndipu zitindirondo.” (Yoh. 10:27) Kuvwiya mazu nga Muliska Wamampha kung’anamuwa kulondo ulongozgi waki pa chechosi. Venivi visazgapu kukolerana ndi aliska amanaamana wo iyu wakuŵasankha. Yesu wangulongo kuti akutumika kweniso akusambira ŵaki, azamulutirizga kugwira nchitu yo iyu wanguyiyambisa. Yiwu akhumbikanga ‘kusambiza’ kweniso ‘kuliska ŵanambereri’ aku Yesu. ( Mat. 28:20; Ŵerengani Yohane 21:15-17.) Uthenga wamampha wati wasapaliya kweniso akusambira ŵati aja anandi, Yesu wangunozga kuti Akhristu akukho aliskengi mipingu.—Ŵaef. 4:11, 12.
6 Wakutumika Paulo wangukambiya ŵara mumpingu wa Efeso kuti mzimu wakupaturika ndiwu waŵaŵika kuja aliska ndi chilatu chakuti ‘akaliski eklesiya laku Chiuta.’ (Mac. 20:28) Ndimu viliri so ndi ŵara achikhristu a mazuŵa nganu. Nawu aŵikika ndi mzimu wakupaturika chifukwa chakuti alondo Mazu ngo Chiuta wakukamba mwakugwiriskiya nchitu mzimu wakupaturika. Mwaviyo, asani tivwiya ŵara achikhristu, tilongo kuti titumbika Aliska ŵara ŵaŵi, Yehova ndi Yesu. (Luka 10:16) Chenichi ndichu chifukwa chikulu cho chititichitiska kuti tivwiyengi ŵara. Kweni pe vifukwa vinyaki so.
7. Kumbi ŵara atikuwovyani wuli kuti mulutirizgi kuja pa ubwezi wakukho ndi Yehova?
7 Ŵara atesesa kugwiriskiya nchitu Malemba ndi fundu za m’Malemba pakupereka ulongozgi kweniso kuchiska Akhristu anyawu. Chilatu chawu nkhukhumba kujalikiska marangu ngo abali atenere kulondo cha. (2 Ŵakor. 1:24) Kweni apereka ulongozgi wa m’Malemba kwa Akhristu anyawu kuti uŵawovyi kusankha umampha vinthu kweniso kuti mumpingu muje chimangu. (1 Ŵakor. 14:33, 40) Ŵara, “ŵalindiya” umoyu wa ŵanthu m’nthowa yakuti akhumbisiska kovya weyosi mumpingu kuti walutirizgi kuja pa ubwezi wakukho ndi Yehova. Ndichu chifukwa chaki aswera cha kovya mubali pamwenga muchizi yo we pafupi pamwenga yo “wakoreka [kali] mu ubudi.” (Ŵag. 6:1, 2; Yuda 22) Kumbi venivi ndi vifukwa vamampha cha ‘vakuvwiya ŵarongozgi ŵidu’?—Ŵerengani Ŵahebere 13:17.
8. Kumbi ŵara avikiliya wuli mskambu waku Chiuta?
8 Wakutumika Paulo, yo wenga so muliska, wangulembe abali a ku Kolose kuti: “Thoŵani vinu munthu wangamuskoŵani mu zeru ndi fuzi yaŵakaŵaka, uli ndi mdawuku wa ŵanthu, uli ndi vamtendeku va mizimu ya charu, ndipu uli nkhwakuyana ndi Khristu cha.” (Ŵakol. 2:8) Fundu iyi, yititiwovya kuziŵa chifukwa chinyaki so cho titenere kuvwiya ulongozgi wa m’Malemba wo ŵara angatipaska. Yiwu avikiliya mbereri mwakuziwovya kuti zitcheŵengi ndi ŵanthu wo angakhumba kunanga chivwanu chawu. Wakutumika Petro wangukambiya Akhristu anyaki kuti atcheŵi ndi “ŵamchimi ŵatesi” kweniso “ŵasambizi ŵatesi” wo akhumbanga ‘kunyengere mizimu yakuyaghayika’ kuti yichiti ubudi. (2 Pet. 2:1, 14) Ŵara a mazuŵa nganu nawu, atenere kutcheŵeska Akhristu anyawu. Ŵara mbakhristu akukhwima mwauzimu wo akukumanapu ndi vinandi pa umoyu. Kweniso ŵechendasankhiki, angulongo kuti avwisa Malemba kweniso kuti mbakwenere kusambiza vinthu vamampha. (1 Tim. 3:2; Tito 1:9) Yiwu apereka ulongozgi wakovya ku mbereri chifukwa chakuti mbakukhwima, aŵanaŵana umampha kweniso agwiriskiya nchitu Malemba.
MULISKA WAMAMPHA WARYISKA NDI KUVIKILIYA MBERERI
9. Kumbi mpingu wachikhristu ulongozgeka ndi kuryiskika wuli mazuŵa nganu?
9 Yehova wagwiriskiya nchitu gulu laki pakusambiza ateŵeti ŵaki wosi pacharu chapasi. Tilonde ulongozgi unandi wa m’Malemba kutuliya m’mabuku ngidu. Nyengu zinyaki, gulu lenili ligwiriskiya nchitu makalata pamwenga akuwonere madera pakupereka ulongozgi ku ŵara. Ivi vitovya kuti mbereri zilondiyengi ulongozgi wambula kusuzga kuvwisa.
10. Kumbi ŵara atenere kuchitanji ndi mbereri zo zalanda?
10 Ŵara ŵe ndi udindu wakuvikiliya ndi kuphwere mbereri, ukongwa zo zalopwa ndipuso zo zachita ubudi ukulu. (Ŵerengani Yakobe 5:14, 15.) Akhumba anyaki mwa ŵanthu yaŵa akulanda ndipu akuleke limu kuchita vo Mkhristu watenere kuchita. Asani mu mpingu mwe ŵanthu aviyo yaŵa, kumbi mura wangayesesa cha kuti wawovyi mbereri yakusoŵa ndi kuyiŵeyere kuti yiwere mumpingu? Ndivu wangachita nadi! Yesu wangukonkhoska kuti: “Ndi khumbu la Ada ŵakuchanya cha, kuti katayiki kamoza ka ŵamana yaŵa.”—Mat. 18:12-14.
KUMBI VO ALISKA AMANAAMANA ANANGISKA TIVIWONENGI WULI?
11. Nchinthu wuli chingachitiska kuti ŵanthu anyaki atondekengi kuvwiya ulongozgi wa ŵara?
11 Yehova ndi Yesu Mbaliska akufikapu. Kweni aliska amanaamana wo atiŵaŵika kuti alongozgengi mipingu mbambula kufikapu. Ivi vingachitiska kuti anyaki atondekengi kuvwiya ulongozgi wawu. Ŵanthu aviyo angakamba kuti: ‘Nawu mbakubuda nge isi. Sonu nchifukwa wuli titenere kuŵavwiya?’ Mbuneneska nadi kuti ŵara mbambula kufikapu, kweni tikhumbika cha kuleka kuŵavwiya chifukwa cha vo anangiska ndi kutondeka kuchita.
12, 13. (a) Kumbi ŵanthu wo Yehova wagwiriskiyanga nchitu kali, anguchita maubudi wuli? (b) Nchifukwa wuli maubudi nga ŵanthu wo ŵenga ndi maudindu ngakulembeka m’Bayibolo?
12 Malemba ngabisa cha maubudi nga ŵanthu wo Yehova wagwiriskiyanga nchitu pakulongozga ŵanthu ŵaki akali. Mwakuyeruzgiyapu, Davidi wenga fumu yakusankhika ndi Yehova kweniso mulongozgi wa Yisraele. Kweni wanguthera wati wayeseka mwakuti wanguchita ureŵi kweniso wangubaya munthu. (2 Sam. 12:7-9) Kumbukani so vo wakutumika Petro wanguchita. Chinanga kuti wangupaskika udindu ukulu mumpingu wachikhristu, iyu wanguchita maubudi ngakulungakulu. (Mat. 16:18, 19; Yoh. 13:38; 18:27; Ŵag. 2:11-14) Pa ŵanthu wosi wo akujapu pacharu chapasi, ndi Yesu pe yija yo wakuleka kubudapu.
13 Nchifukwa wuli Yehova wangutuma akulemba Bayibolo kuti alembi maubudi nga ŵanthu wo waŵagwiriskiyanga nchitu? Chifukwa chimoza nchakuti, Chiuta wanguchita ivi kuti watilongo kuti wakhoza kugwiriskiya nchitu ŵanthu ambula kufikapu kuti alongozgi ŵanthu ŵaki. Ndipu ndivu waja wachichita nyengu yosi iyi. Mwaviyo, vo ŵanthu wo atitilongozga abudiska, vingatichitiskanga kuti tijaliyengi kudinginyika ndi kuleka kuvwiya ulongozgi wawu cha. Yehova wakhumba kuti tiŵatumbikengi kweniso kuŵavwiya.—Ŵerengani Chituwa 16:2, 8.
14, 15. Kumbi vo Yehova wachitanga pakupereka ulongozgi ku ŵanthu ŵaki vititisambizanji?
14 Kuvwiya wo atitilongozga mazuŵa nganu nkhwakukhumbika ukongwa. Ŵanaŵaniyani vo Yehova wachitanga pakupereka ulongozgi kwa ŵanthu ŵaki mu nyengu za masuzgu. Ayisraele ŵati atuwa mu Egipiti, Chiuta waŵakambiyanga vakukhumbika kuchita kuporote mwaku Mosese ndi Aroni. Ayisraele akhumbikanga kuvwiya ulongozgi wakuti aryi chakurya chapade kweniso amiji ndopa za mbereri pamathabwa ngam’mphepeti mwa khomu kweniso pathabwa la pachanya pa khomu kuti Yehova waŵapozomoski ku muliri wa nambala 10. Kuti alonde ulongozgi uwu, Ayisraele anguvwa mazu kutuliya kuchanya cha. Yiwu akhumbikanga kuvwiya ŵara a mu Yisraele wo angulonde ulongozgi kutuliya kwaku Mosese. (Chit. 12:1-7, 21-23, 29) Pa nyengu yeniyi, Mosese ndi ŵara a mu Yisraele amiyanga Yehova pakupereka ulongozgi kwa ŵanthu ŵaki. Mazuŵa nganu, ŵara achikhristu achita nchitu yakuyanana ŵaka.
15 Mukhoza kuŵanaŵaniya vakuchitika vinandi va m’Bayibolo vo vilongo mo Yehova waperekiyanga ulongozgi wakutaska kuziya mu ŵanthu pamwenga angelu wo amumiyanga. Mu vakuchitika vosi ivi, Chiuta wanguwona kuti kwenga kwamampha kugwiriskiya nchitu ŵanthu pamwenga angelu. Iyu watumanga nthumi zaki kuti zikambi vo ŵanthu angachita kuti ataskiki pa nyengu ya masuzgu. Kumbi muŵanaŵana kuti Yehova wangazichita so viyo cha pa Aramagedoni? Chinanga kuti ve viyo, ŵara wo amiya Yehova kweniso gulu laki mazuŵa nganu, atenere cha kugwiriskiya nchitu udindu wawu mwambula kwenere.
“MSKAMBU UMOZA, MULISKA YUMOZA”
16. Kumbi titenere kuvwiya “mazu” nanga?
16 Ŵanthu aku Yehova ndi “mskambu umoza” ndipu alongozgeka ndi “muliska yumoza.” (Yoh. 10:16) Yesu wangulongo kuti waŵengi ndi akusambira ŵaki “mazuŵa ngosi mpaka ku umari wa mgonezi wo.” (Mat. 28:20) Iyu ndi Fumu yakuchanya ndipu ndiyu watendeska vakuchitika vosi vo vazamuchitiska kuti charu chaku Satana chiyeruzgiki. Kuti tilutirizgi kuja mwakukoliyana ndipuso akuvikilirika mu mskambu waku Chiuta, titenere kuvwiya ‘mazu [ngo ngavwika] kuvuli kwidu’ ngakutilongozga nthowa yo tingayendamu. Mzimu waku Chiuta utitikambiya “mazu” yanga kuporote m’Bayibolo ndipu Yehova ndi Yesu atitikambiya so mwakugwiriskiya nchitu aliska amanaamana.—Ŵerengani Yesaya 30:21; Chivumbuzi 3:22.
17, 18. (a) Kumbi mburwani nuwu wo mskambu ungakumana nawu, nanga te ndi chigomezgu wuli? (b) Kumbi tazamukambiskananji m’nkhani yakulondopu?
17 Bayibolo likamba kuti Satana, “uli ndi nkharamu yakukoroma, wayingayinga ndi kupenja mweniyo wakamphi.” (1 Pet. 5:8) Iyu walingana ndi chinyama chikali chamudondu cho che ndi nja ndipu watemere mskambu kuti wabwaki munthu weyosi yo walopwa pamwenga yo walanda. Ndichu chifukwa chaki titenere kumeremete mskambu kweniso ‘muliska yo ndi mlereze wa mauzima ngidu.’ (1 Pet. 2:25) Lemba la Chivumbuzi 7:17, likonkhoska za ŵanthu wo azamutaskika pa chisuzgu chikulu kuti: “Mwana-mbereri yo [Yesu] . . . waŵaliskengi, ndipu waŵalongozgiyengi ku visimi va maji nga umoyu: ndipu Chiuta iyu waleskengeku sozi losi ku masu ngawu.” Ili ndi layizgu lamampha ukongwa!
18 Takambiskana nchitu yakukhumbika ukongwa ya ŵara achikhristu wo mbaliska amanaamana. Sonu tingachita umampha kufumba kuti, Kumbi aliska ŵenaŵa angachita wuli kuti aphweriyengi mbereri zaku Yesu m’nthowa yakwenere? Tazamukambiskana kwamuka m’nkhani yakulondopu.
[Mafumbu]
[Chithuzi papeji 22]
[Chithuzi papeji 24]
Nge mo muliska wavikiliya mskambu waki, ŵara nawu avikiliya mbereri zo akupaskika (Wonani ndimi 8)
[Chithuzi papeji 26]
Ŵara atesesa kuvikiliya mabanja nga mpapi yumoza kuti ngalekengi kwanjana ndi ŵanthu aheni (Wonani ndimi 17, 18)
