• NDIKUWA MU: 1941

• CHARU CHO NDIKUWIYA: BENIN

• MBIRI YANGU: NDINGUTO MUTA KWENISO NDAŴASUSKANGA AKABONI AKU YEHOVA

UMOYU WANGU WAKALI:

Kwidu nkhu Cotonou, tawuni yikulu mucharu cha Benin. Ndikuwiya mu banja la Katolika kweni kutchalitchi ndakangaku kaŵikaŵi cha. Akatolika anandi ko ndajanga anguto muta, chifukwa pa nyengu iyi muta wazomerezekanga. Ndipu nani ndinguto anthukazi anayi.

Ŵanthu ŵati ayukiya boma mu vyaka va m’ma 1970 kuti asinthi vinthu, ndawonanga nge kuti vinthu vijengi umampha mucharu chidu. Mwaviyo, nani ndingwamba kuchitaku ndali ndipu ndaŵawovyanga ukongwa ŵanthu ŵenaŵa. Kweni ŵanthu wo akhumbanga kusintha vinthu mucharu aŵatinkhanga ukongwa Akaboni aku Yehova chifukwa yiwu akananga kuchitaku ndali. Ini nani ndenga mugulu la ŵanthu wo atombozganga Akaboni aku Yehova. Amishonale ŵa Akaboni ŵati adikiskika mucharu chidu mu 1976, ndawonanga nge kuti azamukandamu so lundi cha mucharu chidu.

MO BAYIBOLU LINGUSINTHIYA UMOYU WANGU:

Masuzgu nga ndali ngati ngamala mu 1990, ndinguzizwa kuwona kuti amishonale aza so. Ndingwamba kuŵanaŵana kuti ŵanthu yaŵa atenda ndi Chiuta. Pa nyengu yeniyi ndingusintha malu ngo ndagwiriyanga ntchitu. Yumoza mwa ŵanthu wo ndagwiranga nawu ntchitu wenga Kaboni waku Yehova, ndipu wanguswerapu cha kwamba kundikambiyaku vo wagomezganga. Iyu wangundilongo mavesi nga mu Bayibolu ngo ngakamba kuti Yehova ndi Chiuta wachanju kweniso waurunji. (Dotoronome 32:4; 1 Yohane 4:8) Mijalidu yeniyi yingundikondwesa ukongwa. Mwaviyo, ndinguzomera kusambira Bayibolu chifukwa ndakhumbanga kusambira vinandi vakukwaskana ndi Yehova.

Pechendajumphi nyengu, ndingwamba kuwungana ndi Akaboni aku Yehova. Ndinguzizwa ndi vo ndinguwona, yiwu alongonga chanju chayichu ndipu asankhananga cha. Chifukwa chakulutirizga kuwungana nawu, ndingwamba kuwamu kuti Akaboni aku Yehova mbakhristu auneneska nadi.—Yohane 13:35.

Ndinguwona kuti asani ndikhumba kuteŵete Yehova mbwe ndituwemu mu Katolika. Kweni kuchita venivi kwenga kupusu cha chifukwa ndawopanga kuti ŵanthu andinenengi. Kweni pati pajumpha nyengu, Yehova wangundiwovya, ndinguchita chiganga ndipu ndingutuwa mu Katolika.

Kweni penga so mphingu yinyaki yikulu yo ndakhumbikanga kumalana nayu. Ndichisambira Bayibolu, ndinguwona kuti Chiuta wazomereza cha kuto muta. (Genezesi 2:18-24; Mateyu 19:4-6) Iyu wawona kuti munthukazi wakwamba pe ndiyu muwolu waku. So ndinguchilembesa ku boma nthengwa yangu ndi muwolu wangu wakwamba ndipu ndingumalisa nthengwa ndi anthukazi anyaki atatu wo ndinguto. Kweni ndawonesesanga mbwenu kuti asaniya vakukhumbika pa umoyu. Pati pajumpha nyengu, anthukazi ŵaŵi pa anthukazi wo ŵenga awolu ŵangu nawu anguja Akaboni aku Yehova.

MO NDAYANDULIYA:

Chinanga kuti muwolu wangu weche mu Katolika, kweni watumbika vo ndikusankha pakuteŵete Yehova. Ndipu tosi tiwona kuti sonu nde munthulumi wamampha ukongwa.

Pakwamba ndawonanga nge kuti ndingasintha vinthu muchigaŵa changu kuziya mu ndali, kweni ili lenga boza. Sonu ndiwona kuti Ufumu waku Chiuta pe ndiwu wazamumalisa masuzgu ngosi ngo ŵanthu akumana nangu. (Mateyu 6:9, 10) Nditimuwonga ukongwa Yehova chifukwa chakundiwovya kusaniya likondwa chayilu.

• NDIKUWA MU: 1977

• CHARU CHO NDIKUWIYA: BRAZIL

• MBIRI YANGU: PENTECOSTAL PASTOR

UMOYU WANGU WAKALI:

Ndikukuliya mutawuni ya Itu, muchigaŵa cha São Paulo. Ko tajanga kwenga kutali ndi tawuni ndipu unkhungu yenga nkhani cha.

Ini ndenga wandewu ukongwa kweniso ndachitanga vinthu viheni vinandi. Ndingwamba so kugulisa munkhwala wakutimbanyizga wongu. Pati pajumpha nyengu, ndingusintha chifukwa ndinguwona kuti umoyu uwu undilongoziyengi waka mujeri pamwenga kumasanu. Pavuli paki, ndingusere Tchalitchi la Pentekositi, ndipu pati pajumpha nyengu ndinguja mliska.

Ndawonanga kuti ndingawovya ŵanthu chifukwa cha udindu wo ndenga nawu. Ndachitisanga so pulogilamu yinyaki pa kawayilesi kanyaki kamana, so ŵanthu anandi andiziŵanga. Kweni ndingwamba kuwona kuti tchalitchi lidu litiŵatoliyaku kanthu viŵi cha ŵanthu, kweniso lamutumbikanga viŵi cha Chiuta. Mumalu mwaki, laŵikanga mutu wosi pa ndalama. So ndingusankha kuti ndilayili waka.

MO BAYIBOLU LINGUSINTHIYA UMOYU WANGU:

Ndati ndayamba waka kusambira Bayibolu ndi Akaboni aku Yehova, nyengu yeniyo ndinguwona kuti apambana kutali ndi tchalitchi lidu. Penga vinthu viŵi vo vingundikondwesa ukongwa. Chakwamba, ndinguwona kuti Akaboni aku Yehova akamba waka pamulomu cha kuti tikhumbika kwanja Chiuta ndipuso anyidu, kweni ndivu achita. Chachiŵi, yiwu aseleriyaku cha ndali pamwenga kuchitaku nkhondu. (Yesaya 2:4) Chifukwa cha vinthu viŵi venivi, ndingusimikiza kuti ndasaniya chisopa chauneneska pamwenga kuti msewu ufinyi wo ulongozge ku umoyu wamuyaya.—Mateyu 7:13, 14.

Ndinguwona kuti asani ndikhumba kukondwesa Chiuta, ndikhumbika kusintha vinthu vikuluvikulu pa umoyu. Chakwamba, ndakhumbikanga kulongo banja langu kuti nditiliŵanaŵaniya. Ndakhumbikanga so kuja wakujiyuyuwa. Venga vipusu cha kusintha, kweni Yehova wangundiwovya. Muwolu wangu wanguzizwa ukongwa kuwona kuti ndasintha. Iyu ndiyu wangwamba kusambira Bayibolu, kweni wati wawona ivi ndipu wangwamba kuluta panthazi so ukongwa. Pati pajumpha nyengu yimanavi, tosi tingusankha kuti tije Akaboni aku Yehova. Tosi taŵaŵi tingubatizika zuŵa limoza.

MO NDAYANDULIYA:

Ini ndi muwolu wangu tafiska kuwovya ŵana ŵidu atatu kuti nawu amuziŵi umampha Yehova ndi kuja nayu pa ubwezi. Sonu tosi mubanja lidu tikondwa. Nditimuwonga ukongwa Yehova chifukwa chakundiguziya ku uneneska wo usanirika mu Mazu ngaki Bayibolu. Bayibolu lisintha nadi ŵanthu! Ndipu ini nde yumoza mwa ŵanthu ŵenaŵa.

• NDIKUWA MU: 1957

• CHARU CHO NDIKUWIYA: AUSTRALIA

• MBIRI YANGU: NDINGUKUMANA NDI MASUZGU NDICHIKUWA

UMOYU WANGU WAKALI:

Ndikukuliya ku Newcastle, ku New South Wales. Ini ndini wakwamba pa ŵana 7. Ada ŵenga ankhaza kweniso amwanga ukongwa moŵa ndipu ama nawu ŵenga a nkhaza uheni. Ama andipumanga, anditukanga ndipuso andinyozanga. Yiwu ayanjanga kundikambiya kuti nde wakubuda ndipu ndamukufya kumotu. Venivi vanditenthemesanga uheni.

Kanandi ndatondekanga kuluta kusukulu chifukwa cha vilonda vo ndaŵanga navu chifukwa chakukhwapika ndi ama. Ndati ndakwanisa vyaka 11, aboma angundituzaku kwa apapi ŵangu ndipu angundiŵika dankha kumalu nganyaki nga boma. Pavuli paki, angunditumiza kunyumba ya masisiteri. Kweni ndinguthaŵaku ndati ndakwanisa vyaka 14. Ndakhumbanga cha kuwere so kunyumba, mwaviyo ndingwamba kuja mumisewu kuchigaŵa chinyaki cho chiziŵika kuti Kings Cross ku Sydney.

Ndichija mumisewu, ndingwamba kugwiriskiya ntchitu munkhwala wakutimbanyizga wongu, kumwa moŵa, kuwonere vakulawula kweniso ndingwamba kuchita uhuli. Kweni vo vinguchitika zuŵa linyaki vingundisongono uheni. Ndajanga munyumba ya munthu munyaki yo wenga mweneku wa bala. Zuŵa linyaki kunguza ŵanthu ŵaŵi kuzikumana nayu. Iyu wangundikambiya kuti ndisere kuchipinda, kweni ndavwanga mbwenu vo akambiskananga. Mweneku wabala wakhumbanga kundigulisa ku ŵanthu yaŵa. Yiwu akhumbanga kunditumiza ku Japan mwakubisa kuti nkhagwirengi ntchitu mubala. Ndinguchita mantha ukongwa ndipu ndinguduka kutuwa pakhondi lo lenga pachanya ndi kuthaŵa.

Ndingukumana ndi munthu munyaki yo wanguza kuzivakacha ku Sydney. Ndingumukonkhoske vo vakhumbanga kundichitikiya chifukwa ndaŵanaŵananga kuti panyaki wandipaskengi ndalama. Kweni mumalu mwaki, iyu wangundidaniya kumalu ko wangufikiya kuti nkhasambi kweniso nkharyi chakurya. Mwakukoliyana ndi mo vinthu vingwende, ndinguchiweku cha ndipu pati pajumpha chaka chimoza tingutorana.

MO BAYIBOLU LINGUSINTHIYA UMOYU WANGU:

Ndati ndayamba kusambira Bayibolu ndi Akaboni aku Yehova, ndingwamba kuja ndi maŵanaŵanu ngakupambanapambana. Ndingukwiya ukongwa ndati ndasambira kuti Satana ndiyu wachitiska vinthu viheni chifukwa kutuwa ndeche mwana ndasambizikanga kuti Chiuta ndiyu wachitiska masuzgu. Kweniso mtima wangu unguja pasi ndati ndasambira kuti Chiuta walanga ŵanthu kumotu wa helu cha. Chisambizu ichi chingwamba kundichitiska mantha kutuliya pa unamana wangu.

Ndingukondwa ukongwa kuwona kuti Akaboni aku Yehova atende fundu za mu Bayibolu pa chechosi. Yiwu achita vinthu mwakukoliyana ndi vo agomezga. Ini ndenga munthu wakusuzga ukongwa kweniso wamtafu, kweni Akaboni aku Yehova achitanga nani vinthu mwachanju kweniso andipaskanga ulemu ndipu atoliyangaku kanthu cha vo ndakambanga ndi kuchita.

Kweni kwa nyengu yitali ndingusuzgika ukongwa ndi maŵanaŵanu ngangu ngakujiwona kuti nde munthu wambula kwenere. Ndajimbanga mulandu ndipu venivi vingulutiriya kwa nyengu yitali chinanga mphavuli pakuti ndabatizika kali kuja Kaboni waku Yehova. Ndaziŵanga kuti nditimuyanja ukongwa Yehova, kweni chifukwa cha vo ndinguchitapu, ndakayikanga kuti iyu wangandiyanja nadi.

Kweni vinthu vingusintha pati pajumpha vyaka 15 kutuliya po ndingubatizikiya. Zuŵa linyaki mubali wachikamba nkhani ku Nyumba ya Ufumu ya Akaboni aku Yehova, wanguzumbuwa lemba la Yakobe 1:23, 24. Lemba ili likamba kuti Mazu ngaku Chiuta ndi gilasi lo lingatiwovya kuti tijiwonengi nge mo Yehova watitiwone. Sonu ndingwamba kujifumba kuti kumbi mo ini nditijiwone ndimu so Yehova watindiwone pamwenga vipambana? Kweni ndingwamba so kukayikiya fundu yeniyi. Ndawonanga mbwenu kuti Yehova wangandiyanja mbwenu cha.

Pati pajumpha mazuŵa ngamanavi, ndinguŵerenga lemba lo lingusintha umoyu wangu. Lemba laki ndi Yesaya 1:18 po Yehova wakamba kuti: “Sonu zani, tiyeni tikambiskani kuti tinyoloski vinthu. Chinanga maubudi nginu ngangaŵa ngayera, ngajengi ngatuŵa ukongwa.” Ndingujivwa nge kuti Yehova watindikambiya kuti: “Sonu zanga Vicky, tiyi tikambiskani kuti tinyoloski vinthu. Nditikuziŵa, nditingaziŵa maubudi ngaku, nditiwuziŵa mtima waku ndipu nditikuyanja.”

Usiku wenuwu, tulu ndingutiwona cha. Ndakayikanga mbwenu kuti Yehova wangandiyanja. Kweni pavuli paki, ndingwamba kuŵanaŵaniya sembi yaku Yesu. Venivi vingundiwovya kuwona kuti Yehova wazikiranga nani, ndipu wandilongonga mu nthowa zinandi kuti watindiyanja. Kweni vo ini ndachitanga kwa vyaka vosi ivi venga nge kuti nditimukambiya kuti: “Ini pe mungandiyanja cha. Sembi ya Mwana winu njimana ukongwa ndipu yingafiska cha kubenekere maubudi ngangu.” Yapa ndinguja nge kuti ndidelera sembi ya mwana waku Yehova. Kweni pa zuŵa ili, chifukwa chakuŵanaŵaniya ukongwa sembi yaku Yesu, ndingwamba kuwona kuti Yehova watindiyanja nadi.

MO NDAYANDULIYA:

Sonu ndiwona kuti nde wakutowa ndipuso ndija umoyu waphindu. Mu banja lidu sonu tikondwa ndipu vo ndakumanapu navu pa umoyu wangu vitindiwovya kuziŵa mo ndingawovye so ŵanthu anyaki. Zuŵa lelosi nditijivwa kuti ndindere kufupi ukongwa ndi Yehova.

• NDIKUWA MU: 1974

• CHARU CHO NDIKUWIYA: RUSSIA

• MBIRI YANGU: NDAYANJANGA UKONGWA SUMU ZAVIWAWA

UMOYU WANGU WAKALI:

Ndikuwiya ku Votkinsk, ndipu kwenuku ndiku kunguwiya so munthu munyaki wakutchuka yo wapekanga sumu zina laki Pyotr Ilich Tchaikovsky. Banja lidu lenga likavu ukongwa. Ada ŵangu ŵenga ndi mijalidu yinandi yamampha kweni moŵa amwanga ukongwa. So kanandi asani ŵamwa, tosi munyumba tachitanga mantha.

Nde pa sukulu ndenga mubulu ukongwa ndipuso ndingwamba kujiwona kuti nde wakumaliyapu. Ndingwamba kuchita vinthu pakundija. Kusukulu ndakhumbangaku cha. Asani andifumba fumbu ndatondekanga kukonkhoska chinanga ndi vinthu vipusu viyo vo asani nde ndija nyengu zinyaki ndafiskanga kukonkhoska. Nde ku sekondale, chaka chinyaki palipoti kadi langu angulembapu kuti: “Waziŵa mazu ngamanavi, kweniso ndi mujila kukonkhoska vinthu.” Venivi vingundipweteka ukongwa kweniso vingundimaliya limu nthazi. Sonu ndingwamba kujifumba kuti ntchifukwa wuli nde ndi umoyu?

Ndati ndafika vyaka va pakati pa 13 ndi 19, ndingwamba kumwa moŵa. Pakwamba, ndavwanga umampha asani ndamwa moŵa. Kweni asani ndamwa unandi, njuŵi yangu yandisuzganga. Ndingwamba kuwona kuti umoyu wangu ulivi phindu. Ndasuzgikanga ukongwa maŵanaŵanu ndipu nyengu zinyaki ndatuwanga cha munyumba kwa mazuŵa nganandi. Pa nyengu iyi ndawonanga kuti nkhanthu ndijibayi waka.

Ndati ndakwanisa vyaka 20, ndingwamba kwanja sumu zaviwawa. Sumu izi zandichitiskanga kuti ndivwengeku umampha kweni kwa kanyengu kamanavi. Asani ndivwisiya sumu izi ndasaniyanga nthazi ndipu ndingwamba kupenjapenja ŵanthu anyaki wo ayanjanga so sumu zenizi. Ndingusunga sisi, ndingutolo makutu kweniso ndingwamba kuvwala nge ŵanthu wo ambanga sumu zenizi. Pati pajumpha nyengu ndingwamba kuchita vinthu mwakutayiliya kweniso ndenga mukali ukongwa ndipu kanandi ndayambananga ndi abali ŵangu.

Ndawonanga nge kuti kuvwisiya sumu zaviwawa kundiwovyengi kuti ndikondwengi kweni ndivu vachitikanga cha. Mumalu mwaki, sumu izi zandisinthanga ukongwa! Kweniso ndinguguŵa ukongwa ndati ndaziŵa vinthu viheni vo ŵanthu wo ambanga sumu zenizi achitanga.

Sonu pa nyengu iyi maŵanaŵanu ngakuti ndijibayi ngangwamba kukuwa ukongwa. Kweni asani ndakumbuka chitima cho ama aŵengi nachu, mbwenu ndajiwezanga. Ama andiyanjanga ukongwa ndipuso angundichitiya vinthu vinandi. Yapa vinthu vingufika pakusuzga ukongwa. Ndakhumbanga cha kuja ndi umoyu, kweni ndatondekanga kujibaya.

Ndingwamba kuŵerenga mabuku nganyaki nga Chirashiya kuti ndiluwengeku masuzgu. Mumabuku yanga ndingusaniyamu nkhani ya munthu munyaki yo wangutaska ŵanthu yo wateŵetiyanga mutchalitchi. Nyengu yeniyo nani ndingwamba kuŵanaŵana kuti ndiyambi kuteŵete Chiuta kweniso kuwovya ŵanthu. Ndingupemphera mwakuŵeyere kwaku Chiuta, ndipu yaka kenga kwamba kuchita venivi. Ndingupempha Chiuta kuti wandiwovyi kusintha umoyu wangu. Ndichipemphera, ndingujivwa nge kuti ndafwatulika. Kweni vo vinguchitika ndati ndamala waka kupemphera ndivu venga vakuziziswa ukongwa. Pati pajumpha waka maora ngaŵi, Kaboni waku Yehova wangugong’oska pachisasa ndipu wangundipempha kuti wayambi kusambira nani Bayibolu. Yapa ndinguwona kuti Chiuta wamuka pempheru langu. Kutuwa zuŵa lenili vinthu vingusintha pa umoyu wangu ndipu ndingwamba kuja umoyu walikondwa.

MO BAYIBOLU LINGUSINTHIYA UMOYU WANGU:

Ndingutaya chechosi chakukwaskana ndi sumu zaviwawa cho ndenga nachu chinanga kuti kuchita venivi kwenga kupusu cha. Kweni sumu izi zingukaniliya mbwenu mumutu kwa nyengu yitali. Asani ndijumpha waka pamalu ngo patumba sumu zenizi, ndakumbukanga umoyu wangu wakali. Kweni ndakhumbanga cha kuti venivi vitimbanyizgi vinthu vamampha vo vingwamba kume misisi mumaŵanaŵanu ndi mumtima mwangu. So kanandi ndakhwechanga malu ngaviyo. Kweniso asani ndayamba waka kukumbuka vakuvuli, ndapempheranga nyengu yeniyo. Kuchita venivi kungundiwovya kuti ndisaniyi “chimangu chaku Chiuta cho chiluska kuziŵa vinthu kosi.”—Afilipi 4:7.

Ndichisambira Bayibolu ndinguwona kuti Mkhristu weyosi we ndi udindu wakukambiyaku ŵanthu vo wagomezga. (Mateyu 28:19, 20) Kutuliya pasi pa mtima ndawonanga kuti ndingafiska cha. Kweni vinthu vasonu vo ndasambiranga vandichitiskanga kuti ndikondwengi ukongwa kweniso ndisaniyi chimangu mumtima. Ndipu ndawonanga kuti ŵanthu anyaki nawu akhumbika kusambira uneneska. Chinanga kuti ndenga ndi mantha, kweni ndingwambapu kukambiyaku ŵanthu vo ndasambiranga. Ndinguzizwa ukongwa kuti kukambiyaku ŵanthu uthenga wa mu Bayibolu kungundiwovya kuti ndileki kujikayikiya. Kweniso kwachitiskanga kuti ndivigomezgengi ukongwa vo ndasambiranga.