SAMBIRU 8
Ntchifukwa Wuli Chiuta Wazomereza Vinthu Viheni Ndipuso Masuzgu?
1. Kumbi vinthu viheni vingwamba wuli?
Chiuta wazomereza kuti ŵanthu ajilamuliyi kwa nyengu yitali kuti walongo kuti angamaliska cha masuzgu ngo akumana nangu
Vinthu viheni vingwamba kuchitika pacharu chapasi Satana wati wakamba boza lakwamba. Pakwamba Satana wenga mungelu wamampha, kweni ‘mwaku iyu mwengavi uneneska.’ (Yohane 8:44) Iyu wakhumbisiskanga kuti ŵanthu asopengi iyu mumalu mwaku Chiuta. Satana wangumukambiya boza Heva ndipu wangumunyenga kuti wavwiyi iyu mumalu mwaku Chiuta. Adamu nayu wangutondeka kuvwiya Chiuta nge po wanguchitiya muwolu waki. Vo Adamu wanguchita vingwambisa masuzgu ndi nyifwa.—Ŵerengani Genezesi 3:1-6, 19.
Satana wati wakambiya Heva kuti wagarukiyi Chiuta, wanguchitiska kuti ŵanthu ayambi kugarukiya ulamuliru waku Chiuta pamwenga udindu waki nge Wapachanya Limu. Ŵanthu anandi akoliyana ndi Satana ndipu akana ulamuliru waku Chiuta. Mwaviyo, Satana ndiyu “walamuliya charu.”—Ŵerengani Yohane 14:30; 1 Yohane 5:19.
2. Kumbi vinthu vo Chiuta wangulenga venga viheni?
Ntchitu yosi yaku Chiuta njamampha. Ŵanthu kweniso angelu wo Chiuta wangulenga atingi amuvwiyengi kwambula suzgu yeyosi. (Dotoronome 32:4, 5) Chiuta wakutilenga ndi wanangwa wakusankha kuchita chamampha pamwenga chiheni. Wanangwa wenuwu utitipaska mwaŵi wakuti tilongo kuti titanja Chiuta.—Ŵerengani Yakobe 1:13-15; 1 Yohane 5:3.
3. Ntchifukwa wuli Chiuta wazomereza kuti masuzgu ngalutiriyi mpaka sonu?
Kwa nyengu yosi iyi, Yehova waŵaleka dankha viyo ŵanthu wo agarukiya ulamuliru waki. Chifukwa wuli? Wachita ivi kuti ŵanthu ajiwone ŵija kuti ulamuliru waki pe ndiwu ungamalisa masuzgu nga ŵanthu. (Wakutawula 7:29; 8:9) Pajumpha vyaka 6,000 sonu kutuliya po ŵanthu akwambiya kujilamuliya ŵija, ndipu vichita kuwoneke limu kuti ulamuliru wawu watondeka kumalisa nkhondu, kuswa marangu, vinthu vambula urunji ndipuso matenda.—Ŵerengani Yeremiya 10:23; Aroma 9:17.
Mwakupambana ndi ulamuliru wa ŵanthu, ulamuliru waku Chiuta utiŵawovya ukongwa ŵanthu wo atiwuzomereza. (Yesaya 48:17, 18) Pambula kuswera yapa, Yehova watuzgengepu maboma ngosi nga ŵanthu. Ŵanthu wo asankha kulamulika ndi Chiuta pe ndiwu azamuhara charu chapasi.—Yesaya 11:9.—Ŵerengani Daniyeli 2:44.
Woneriyani vidiyo yakuti Ntchifukwa Wuli Chiuta Wazomerezga Kuti Tisuzgikengi?
4. Kumbi kuzizipizga kwaku Chiuta kutitiwovya wuli?
Satana wakukamba kuti ŵanthu ateŵete Yehova chifukwa cha mbunu. Kumbi mungayanja kususka boza ili? Tikayika cha kuti mungayanja kuchita viyo! Kuzizipizga kwaku Chiuta kutitipaska mwaŵi wakulongo kuti titanja ulamuliru waki pamwenga wa ŵanthu. Vo tichita pa umoyu widu ndivu vilongo ulamuliru wo tasankha.—Ŵerengani Yobu 1:8-11; Nthanthi 27:11.
5. Kumbi tingachita wuli kuti Chiuta ndiyu watilamuliyengi?
Vo tisankha vingalongo asani tikhumba kuti Chiuta ndiyu watilamuliyengi
Tingalongo kuti tikhumba kuti Chiuta ndiyu watilamuliyengi asani tifufuza chisopa chauneneska ndikuchita vo Bayibolu likamba. (Yohane 4:23) Tingakana kuti Satana watilamuliyengi mwakuleka kuchitaku va ndali ndipuso nkhondu nge po Yesu wanguchitiya.—Ŵerengani Yohane 17:14.
Satana wagwiriskiya ntchitu nthazi zaki pakuchiska ŵanthu kuti achitengi ureŵi kweniso mijalidu yinyaki yiheni yo yiwoneka nge kuti njamampha. Abali ŵidu kweniso anyidu angatinyoza pamwenga kutisuska asani tileka kuchitaku vinthu venivi. (1 Peturo 4:3, 4) Yapa ndipu tikhumbika kusankha. Kumbi tisankhengi kwanjana ndi ŵanthu wo atanja Chiuta? Kumbi tivwiyengi marangu ngaki ngazeru ndipuso ngachanju? Asani tichitengi viyo, tilongongi kuti Satana wangupusika pakukamba kuti palivi yo wangagomezeka kwaku Chiuta asani wangakumana ndi masuzgu.—Ŵerengani 1 Akorinto 6:9, 10; 15:33.
Chiuta watiŵayanja ukongwa ŵanthu ndipu wenuwu mbukaboni wakuti watuzengepu masuzgu ndipuso vinthu vosi viheni. Wosi wo agomezga fundu yeniyi azamukondwa ndi umoyu wamuyaya pacharu chapasi.—Ŵerengani Yohane 3:16.
