Yesu wenga ndi abwezi ŵaki atatu wo ajanga ku Betaniya. Ŵanthu yaŵa ŵenga Lazaro ndi azichi ŵaki Mariya ndi Marta. Zuŵa linyaki, Yesu wenga kusirya linyaki la Yordane ndipu Mariya ndi Marta angumutumiziya uthenga kuti wakhumbikanga mwaliŵi. Yiwu anguti: ‘Lazaro watama ukongwa. Chondi zani luŵi!’ Yesu wanguluta nyengu yeniyo cha. Iyu wangulindiza kuti pajumphi mazuŵa ngaŵi ndipu pavuli paki, wangukambiya akusambira ŵaki kuti: ‘Tiyeni ku Betaniya. Lazaro wagona kweni ndiluta ndakumuyusa.’ Akutumika anguti: ‘Asani Lazaro wagona, vimuwovyengi kuti waje umampha.’ Yesu wanguŵakambiya mwakuvwika umampha kuti: ‘Lazaro wafwa.’

Pa nyengu yo Yesu wafikanga ku Betaniya ndipu pajumpha mazuŵa nganayi kutuliya po anguŵikiya Lazaro. Kunguza ŵanthu anandi kuzipembuzga Marta ndi Mariya. Marta wati wavwa kuti Yesu waza, wangutchimbiya kuchikumana nayu. Iyu wanguti: “Ambuya asani mwenga kunu mphanyi muzichi wangu wafwa cha.” Yesu wangumukambiya kuti: ‘Muzichi waku wajengi so ndi umoyu. Marta, ugomeza venivi?’ Iyu wanguti: ‘Ndigomeza kuti wazamuyuskika.’ Yesu wangumukambiya kuti: “Ini ndini chiyuka ndi umoyu.”

Pavuli paki Marta wanguluta kwaku Mariya ndi kuchimukambiya kuti: ‘Yesu waza.’ Mariya wati wavwa wangutchimbiriya ko kwenga Yesu ndipu ŵanthu anandi angumulondo. Iyu wangugwada pa malundi ngaku Yesu ndipu wanguleka cha kuliya. Iyu wanguti: ‘Ambuya asani mwenga kunu mphanyi muzichi widu wafwa cha!’ Yesu wanguziŵa kuti Mariya vingumuŵaŵa ukongwa ndipu nayu wangwamba so kuliya. Ŵanthu ŵati awona kuti Yesu waliya anguti: ‘Awonani, Yesu wamuyanjanga Lazaro.’ Kweni anyaki angufumba kuti: ‘Ntchifukwa wuli wengavi kumutaska mubwezi waki?’ Kumbi Yesu watingi wachitengenji?

Yesu wanguluta ko anguŵika Lazaro. Pakhomu la muwunda angujalapu chimwa. Iyu wangukamba kuti: ‘Tuzanipu chimwa cho.’ Marta wanguti: ‘Pajumpha mazuŵa nganayi! Sonu liŵavu laki litenere kuti linunkha.’ Yiwu angutuzgapu mbwenu chimwa ndipu Yesu wangupemphera kuti: ‘Ada, nditikuwongani chifukwa chakuti mwandivwa. Ndiziŵa kuti mutindivwa nyengu zosi kweni ndikamba mwakukweza kuti ŵanthu yaŵa aziŵi kuti mukundituma.’ Pavuli paki, wangudana mwakukweza kuti:  “Lazaro, tuliya kubwalu!” Panguchitika chinthu chinyaki chakuziziswa: Lazaro wangutuwa mumuwunda, kweni wenga weche ndi salu zo angumukulunga. Yesu wanguti: “Mufwatuweni, wayendengi.”

Ŵanthu anandi wo anguwona venivi, anguvwana mwaku Yesu. Kweni anyaki anguluta kuchikambiya Afarisi. Kutuliya nyengu yeniyo Afarisi akhumbanga kubaya Lazaro ndi Yesu. Yuda Mkeriote yo wenga yumoza mwa akutumika 12, wanguluta mwachisisi kwa Afarisi ndi kuŵafumba kuti: ‘Kumbi mundipasengi ndalama zilinga asani ndakuwovyani kuko Yesu?’ Yiwu angumukambiya kuti amupasengi ndalama 30 za siliva. Mwaviyo, Yuda wangwamba kupenja mpata kuti wapereki Yesu kwa Afarisi.