Naʻe fāʻeleʻi au ʻi Santo Domingo, Lepupilika Tominiká, ko e siʻisiʻi taha ʻi he fānau ʻe toko fā. Ko ʻeku ongo mātuʻá naʻá na poto peá na loto ke ʻohake ʻena fānaú ʻi ha ʻātakai fakasōsiale lelei. ʻI he taʻu ʻe fā ki muʻa ke fāʻeleʻi aú, naʻe fetaulaki ʻeku ongo mātuʻá mo ha kau misinale Māmonga. Koeʻuhi ko e teuteu lelei mo anga-lelei ʻa e kau tangatá, naʻe vave ʻa e loto ʻa ʻeku ongo mātuʻá ke hoko homau fāmilí ko e taha ʻi he ngaahi ʻuluaki fāmili ʻi he motú ke kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, pe Siasi Māmongá.

ʻI heʻeku tupu haké, naʻá ku fiefia ʻi he ngaahi feohi fakasōsiale ʻi he siasí pea fakaʻapaʻapaʻi ʻa e tokangataha ʻa e Māmongá ki he moʻui fakafāmilí mo e tuʻunga fakaeʻulungāngá. Naʻá ku fiefia ʻi he hoko ko ha Māmongá pea ʻai ia ko ʻeku taumuʻa ke hoko ko ha misinale.

ʻI he taimi naʻá ku taʻu 18 aí, naʻe hiki hoku fāmilí ki ʻAmelika mo e taumuʻa ke fakalahi ʻeku akó ʻi he ʻunivēsití. Hili ha taʻu nai ʻe taha, ko e tokoua ʻeku faʻeé mo hono malí ko e ongo Fakamoʻoni ʻa Sihova, naʻá na haʻu ʻo ʻaʻahi mai kiate kimautolu ki Fololita. Naʻá na fakaafeʻi kimautolu ki ha fakataha-lahi Fakatohitapu mo kinaua. Naʻe maongo kiate au ʻa e fekumi ʻa e tokotaha kotoa ki he ngaahi konga Tohi Tapú mo e hiki noutí. Ko ia naʻá ku kole ha peni mo ha pepa pea kamata ke fai ʻa e meʻa tatau.

Hili ʻa e fakataha-lahí naʻe pehē mai ʻe he tokoua ʻeku faʻeé mo hono malí koeʻuhi ʻokú ke saiʻia ke hoko ko ha misinale, te na tokoniʻi au ke ako ha meʻa fekauʻaki mo e Tohi Tapú. Naʻá ku fakakaukau ko e fokotuʻu lelei koeʻuhi ʻi he taimi ko iá naʻá ku ʻilo lahi ange ki he Tohi ʻa Molomoná ʻi he Tohi Tapú.

Lolotonga ʻemau ngaahi fetalanoaʻaki Fakatohitapu he telefoní, naʻá na fakalototoʻaʻi maʻu pē au ke fakahoa ʻeku tuí ki he ngaahi akonaki ʻa e Tohi Tapú. Naʻá na fiemaʻu ke u fakamoʻoniʻi ʻa e moʻoní ʻiate au pē.

Naʻe lahi ʻa e ngaahi meʻa fekauʻaki mo e tui ʻa e Māmongá naʻá ku tali, ka naʻe ʻikai ke u fakapapauʻi ʻa e anga ʻo e fehoanaki  ʻa e Tohi Tapú mo e ngaahi fakakaukau ko iá. Naʻe ʻomai ʻe he tokoua ʻeku faʻeé ʻa e ʻīsiu ʻo e makasini Awake! ʻo Nōvema 8, 1995 ko e pulusi ʻe he Kau Fakamoʻoni ʻa Sihová, naʻe ʻi ai ha ngaahi kupu fekauʻaki mo e tui ʻa e Māmongá. Naʻá ku ʻohovale ʻi he ʻikai ke u alāanga mo e ngaahi meʻa lahi ʻoku akoʻi ʻe he Māmongá. Naʻá ne ueʻi au ke u kumi ʻi he ngaahi Uepisaiti fakaʻofisiale ʻa e Māmongá ke fakapapauʻi ko e meʻa ʻoku hā ʻi he Awake! naʻe moʻoni. Naʻe moʻoni ia, pea ko e ngaahi moʻoni ko iá naʻe fakapapauʻi lahi ange ʻi he taimi naʻá ku ʻaʻahi ai ki he ngaahi misiume Māmonga ʻi Utah.

Naʻá ku tui maʻu pē ko e Tohi ʻa Molomoná mo e Tohi Tapú ʻokú na fefakamoʻoniʻaki. Ka ʻi he taimi naʻá ku kamata lau fakalelei ai ʻa e Tohi Tapú, naʻá ku fakatokangaʻi ʻa e fepakipaki ʻi he vahaʻa ʻo e ngaahi akonaki ʻa e Māmongá mo e fakamatala ʻi he Tohi Tapú. Ko e fakatātaá, ʻi he ʻIsikeli 18:4 ʻoku pehē ʻe he Tohi Tapú ʻoku mate ʻa e laumālié. Neongo ia, ʻoku pehē ʻe he Tohi ʻa Molomoná, ʻia ʻAlamā 42:9: “ʻE ʻikai ke teitei lava ʻo mate ʻa e laumālié.”

Tānaki atu ki he ngaahi faikehekehe fakatokāteliné, naʻá ku hohaʻa fekauʻaki mo e ngaahi fakakaukau mamahiʻi-fonua naʻe akoʻi ʻe he Māmongá. Ko e fakatātaá, ʻoku akoʻi ki he kau Māmongá ko e ngoue ʻo ʻĪtení naʻe tuʻu ʻi Jackson County, Missouri, ʻAmelika. Pea ʻoku akoʻi ʻe he kau taki ʻo e siasí ko e taimi “ʻe pule ai ʻa e Puleʻanga ʻo e ʻOtuá, te ne puleʻi ʻa e māmaní ʻo fakafou mai ʻi he puleʻanga ʻo ʻAmeliká.”

Naʻá ku fifili ai, ʻe fēfē hoku fonua tupuʻangá—pe ngaahi fonua kehé—ʻi he meʻa ko eni ʻoku nau akoʻí. Naʻá ku ʻohake ʻa e kaveingá ni ʻi ha fetalanoaʻaki ʻi he efiafi ʻe taha ʻi haʻaku tali ʻa e telefoni mei ha kiʻi talavou Māmonga naʻe lolotonga akoʻi ke hoko ko ha misinale. Naʻá ku ʻeke hangatonu ange pe ʻe loto-lelei ke tau mo hono kaungā-Māmongá kapau ʻe tau hono fonuá mo honau fonuá. Naʻá ku ʻohovale heʻene tali ʻió! Naʻá ku vakili loloto ange ʻa e ngaahi akonaki ʻo ʻeku tuí pea toe fetalanoaʻaki mo e kau taki māʻolunga he Siasi Māmongá. Naʻa nau tala mai ko e ngaahi tali ki heʻeku ngaahi fehuʻí ʻoku kau ai ʻa e ngaahi misiteli ʻa ia ʻe toki tali ʻi ha ʻaho ʻi he ʻalu ʻa e māmá ke toe maama angé.

ʻI he loto-mamahi ʻi heʻenau fakamatalá, naʻá ku vakavakaiʻi lelei ange ai au mo e ʻuhinga ʻo ʻeku loto ke hoko ko ha misinale Māmongá. Naʻá ku ʻiloʻi naʻe tohoakiʻi au ʻe he foʻi fakakaukau ko e hoko ko ha misinalé ke tokoniʻi ʻa e kakaí. Ko e ʻuhinga ʻe taha ʻe hoko ʻo fakaʻapaʻapaʻi au ʻe he kakaí. Kae kehe ʻi he fekauʻaki mo e ʻOtuá, naʻe ʻikai ke loko lahi ʻeku ʻilo ki aí. Neongo naʻá ku toutou lau ʻa e Tohi Tapú ki muʻa tuʻo lahi, naʻe teʻeki ai pē ke u fakamahuʻingaʻi moʻoni ia. Naʻe halaʻatā ke u ʻilo ki he taumuʻa ʻa e ʻOtuá ki he māmaní pe ki he faʻahinga ʻo e tangatá.

Fakafou ʻi heʻeku ako ʻa e Tohi Tapú mo e Kau Fakamoʻoni ʻa Sihová, naʻá ku ʻilo ai ʻa e ngaahi meʻa lahi kehe, ko e huafa ʻo e ʻOtuá, ko e hā ʻoku hoko ʻi he maté mo e ngafa ʻo Sīsū ʻi hono fakahoko ʻo e taumuʻa ʻa e ʻOtuá. Naʻe iku ʻou hoko ʻo alāanga mo e tohi fakaofó ni pea naʻá ku fiefia ʻi hono vahevahe ʻa e moʻoni naʻá ku akó mo e niʻihi kehé. Naʻá ku ʻiloʻi ʻoku ʻi ai ʻa e ʻOtua, ka ʻi he taimí ni ʻoku lava ke u lea kiate ia ʻi he lotú ko hoku Kaumeʻa ofi tahá. Naʻá ku papitaiso ko e taha ʻo e Kau Fakamoʻoni ʻa Sihová ʻi Siulai 12, 2004, pea ʻosi ʻa e māhina ʻe ono mei ai naʻá ku kamata ngāue taimi kakato ʻi he ngāue fakafaifekau faka-Kalisitiané.

ʻI he taʻu ʻe nima, naʻá ku ngāue ʻi he ʻuluʻi ʻapitanga ʻo e Kau Fakamoʻoni ʻa Sihová ʻi Brooklyn, Niu ʻIoke. Naʻá ku fiefia kakato ʻi he lava ke tokoni ʻi hono ngaohi ʻo e ngaahi Tohi Tapú mo e ʻū tohi makatuʻunga ʻi he Tohi Tapú ʻo maʻu ʻaonga mei ai ʻa e laui miliona takatakai he māmaní pea ʻoku ou kei hokohoko atu ʻi he fiefia hono tokoniʻi ʻa e niʻihi kehé ke ako fekauʻaki mo e ʻOtuá.