Faʻifaʻitaki ki Heʻenau Tuí

“Ko Au ʻEni, ko e Kaunanga ʻa e ʻEiki”!

NAʻE sio mataʻi ʻohovale hake ʻa Mele ʻi he hū mai ʻa e tokotaha ʻaʻahí ki hono falé. Naʻe ʻikai te ne ʻeke ʻa ʻene tamaí pe ko ʻene faʻeé. Ko ʻene ʻi aí ke sio kiate ia! Naʻe fakapapauʻi ʻe Mele; ʻoku ʻikai ko e tokotaha ia mei Nasaleti. ʻI ha kiʻi kolo siʻisiʻi hangē ko hono koló, ʻe ʻiloʻingofua ai ʻa e kau solá. ʻE ʻiloʻingofua ʻa e tokotahá ni ʻi ha feituʻu pē. Naʻá ne lea kia Mele ʻi ha founga ʻa ia naʻe mātuʻaki foʻou kiate ia, ʻi heʻene pehē: “Siʻotoʻofa, ʻa koe kuo ʻofeina: ʻoku ʻiate koe ʻa e ʻEiki.”—Luke 1:28.

ʻI he foungá ni ʻoku fakafeʻiloaki ai kitautolu ʻe he Tohi Tapú kia Mele, ko e ʻofefine ʻo Hēlai, ʻo e kolo ko Nasaletí ʻi Kāleli. ʻOku fakafeʻiloaki mai ia ʻi ha taimi mahuʻinga. Naʻá ne fakamaʻu ke mali mo e tufunga ko Siosefa—ʻoku ʻikai ko ha tangata koloaʻia ka ko ha tokotaha faitōnunga. Ko ia naʻe hā ngali ne ʻosi palani lelei ʻa ʻene moʻuí—ko ha moʻui faingofua ʻo e ngāue ko e uaifi ʻo poupou kia Siosefa, ʻi hono tauhi fakataha hake mo ia ha fāmili. Kae kehe, fakafokifā pē, naʻá ne fehangahangai mo e tokotaha ʻaʻahi ko ení ʻa ia naʻá ne ʻoange kiate ia ha ngāue mei hono ʻOtuá, ko ha fatongia ʻa ia ʻe liliu ai ʻa ʻene moʻuí.

Te ke ʻohovale nai ke ʻiloʻi ʻoku ʻikai tala mai ʻe he Tohi Tapú ha meʻa lahi ʻo fekauʻaki mo Mele. ʻOku siʻi ʻene lave ki hono puipuituʻá, tuku kehe ange ʻa hono ʻulungāangá pea halaʻatā ha lave ki hono fōtungá. Neongo ia, ko e meʻa ʻoku leaʻaki ʻe he Folofola ʻa e ʻOtuá fekauʻaki mo iá ʻoku mahino moʻoni.

Koeʻuhi ke hoko ʻo maheni mo Mele, ʻoku fiemaʻu ke tau sio fakalaka atu ʻi he ngaahi fakakaukau hala lahi ʻo fekauʻaki mo ia ʻa ia ʻoku pouaki ʻi he ngaahi lotu kehekehe. Ko ia tau tuku ki tafaʻaki ʻa e “ngaahi faitatau” taʻefaʻalaua ʻoku ʻomai ʻi he ngaahi tā valivalí mo e maka māpelé. Tau toe tuku foki ki tafaʻaki ʻa e teolosia mo e tokāteline fihi ʻoku ʻai ai ki he fefine lāuvalé ni ʻa e ngaahi hingoa fakalakanga māʻolunga hangē ko e “Faʻē ʻa e ʻOtuá” mo e “Kuini ʻo Hēvaní.” ʻI hono kehé tau tokangataha ki he meʻa ʻoku fakahaaʻi moʻoni ʻe he Tohi Tapú. ʻOkú ne ʻomai kia kitautolu ʻa e fakamaama mahuʻinga ki heʻene tuí mo e founga ʻe lava ke tau faʻifaʻitaki ai ki aí.

ʻAʻahi mei ha ʻĀngelo

Ko e tokotaha ʻaʻahi kia Melé, hangē nai ko ia ʻokú ke ʻiló, naʻe ʻikai ko ha tangata pē. Ko e ʻāngelo ia ko Kepalelí. ʻI heʻene ui ʻa Mele ko e tokotaha “ʻofeina” lahí, naʻe “moʻutāfuʻua” ʻa Mele ʻi heʻene ngaahi leá peá ne fifili fekauʻaki mo e fetapa makehe ko ení. (Luke 1:29) Naʻe ʻofeina lahí ʻe hai? Naʻe ʻikai ʻamanekina ʻe Mele ʻe ʻofeina lahi ia ʻe he kakaí. Ka naʻe lea ʻa e ʻāngeló fekauʻaki mo e ʻofeina ʻe he ʻOtua ko Sihová. Naʻe mahuʻinga e meʻa ko iá kiate ia. Kae kehe, naʻe ʻikai te ne fakakaukau hīkisia naʻe ʻofeina ia ʻe he ʻOtuá. Kapau ʻoku tau feinga mālohi ke ʻofeina kitautolu ʻe he ʻOtuá, ʻoua ʻaupito ʻe fakakaukau ʻafungi kuo tau ʻosi maʻu ia, te tau ako ha lēsoni mātuʻaki mahuʻinga ʻa ia naʻe mahinoʻi kakato ʻe he finemui ko Melé. ʻOku talitekeʻi ʻe he ʻOtuá ʻa e ʻafungí, ka ʻokú ne ʻofa pea poupou ki he faʻahinga māʻulalo mo anga-fakatōkilaló.—Semisi 4:6.

ʻE fiemaʻu ʻe Mele ʻa e anga-fakatōkilalo peheé, he naʻe fakahaaʻi ange ʻe he ʻāngeló kiate ia ha monū ʻoku ʻikai mei ala fakakaukau atu ki ai. Naʻá ne fakamatala te ne fanauʻi ha tama ʻa ia ʻe hoko ko e tokotaha mahuʻinga taha ia ʻi he faʻahinga kotoa ʻo e tangatá. Naʻe pehē ʻe Kepaleli: “ʻE foaki kiate ia ʻe he ʻEiki ko e ʻOtua ʻa e taloni ʻo ʻene kui ko Tevita: pea te ne tuʻi ki he hako ʻo Sekope ʻo lauikuonga; pea ko ʻene pule ʻe ʻikai ngata.” (Luke 1:32, 33) Naʻe ʻiloʻi papau ʻe Mele ʻa e talaʻofa naʻe fai ʻe he ʻOtuá kia Tēvita ʻi he taʻu laka hake he taha afé ki muʻa—ʻa ia ko e pehē ko e taha ʻo hono  ngaahi hakó te ne pule ʻo taʻengata. (2 Samiuela 7:12, 13) Ko ia ko ʻene tamasiʻí ʻe hoko ko e Mīsaia ʻa ia naʻe ʻamanaki ki ai ʻa e kakai ʻa e ʻOtuá ʻi he faai mai ʻa e ngaahi senitulí!

ʻIkai ko ia pē, naʻe tala ange ʻe he ʻāngeló ko ʻene tamasiʻí ʻe “ui ia koe Alo oe Fugani Maoluga.” ʻE lava fēfē ke fanauʻi ʻe ha fefine ko e taha ʻo e faʻahinga ʻo e tangatá ʻa e ʻAlo ʻo e ʻOtuá? Ko hono moʻoní, ʻe lava fēfē ke fanauʻi ʻe Mele ha tama? Naʻá ne fakamaʻu mo Siosefa ka naʻe teʻeki te ne mali mo ia. Naʻe leaʻaki hangatonu ʻe Mele ʻa e fehuʻi ko ení: “ʻE hoko fēfē ia? he ʻoku teʻeki te u ʻiloa ha tangata.” (Luke 1:34) Fakatokangaʻi ange naʻe lea ʻa Mele ʻo fekauʻaki mo hono tuʻunga veisiniá ʻo ʻikai haʻane mā. ʻI hono kehé, naʻá ne fakamahuʻingaʻi ʻa ʻene anga-maʻá. ʻI he ʻahó ni ʻoku vēkeveke ai ʻa e toʻutupu tokolahi ke tukuange ʻa honau tuʻunga veisiniá pea vave ke manukiʻi ʻa e faʻahinga ʻoku ʻikai te nau fai peheé. Kuo liliu moʻoni ʻa e māmaní. Kae kehe, ko Sihová kuo ʻikai te ne liliu. (Malakai 3:6) Hangē pē ko ia ʻi he ʻaho ʻo Melé, ʻokú ne fakamahuʻingaʻi ʻa e faʻahinga ʻoku nau pipiki ki heʻene ngaahi tuʻunga fakaeʻulungāangá.—Hepelu 13:4.

Neongo ko ha sevāniti faitōnunga ia ʻa e ʻOtuá, ko Melé ko ha tokotaha taʻehaohaoa. ʻE lava fēfē leva ke ne fanauʻi ha hako haohaoa, ko e ʻAlo ʻo e ʻOtuá? Naʻe fakamatala ʻa Kepaleli: “E hoko mai ae Laumalie Maonioni kiate koe, bea e fakamalu koe e he malohi oe Fugani Maoluga; bea koia foki e ui ai ae hako maonioni te ke faeleʻi koe Alo oe Otua.” (Luke 1:35, PM) ʻOku ʻuhinga ʻa e māʻoniʻoní ko e “maʻa,” “taʻemele,” “toputapu.” Ko e anga-mahení, ʻoku tuku atu ʻe he tangatá ʻa honau tuʻunga taʻemaʻa mo angahalaʻiá ki heʻenau fānaú. Kae kehe, ʻi he tuʻunga ko ení, ʻe fakahoko ai ʻe Sihova ha mana makehe. Te ne hiki ʻa e moʻui ʻa hono ʻAló mei hēvani ki he manava ʻo Melé pea ngāueʻaki leva ʻa hono ivi ngāué, pe laumālie māʻoniʻoní, ke ‘fakamalumalu’ ʻa Mele, ʻo maluʻi ai ʻa e tamá mei hano fakameleʻi ʻe he angahalá. Naʻe tui ʻa Mele ki he talaʻofa ʻa e ʻāngeló? Naʻe fēfē ʻene tali ki aí?

Tali ʻa Mele kia Kepalelí

Ko e kau tui veiveiuá, ʻo kau ai ʻa e niʻihi ʻo e kau teolosia ʻo e Puleʻanga-Haʻa-Kalisitiané, ʻoku faingataʻa ke nau tui ʻe lava ke fanauʻi ʻe ha tāupoʻou ha taha. ʻI he kotoa ʻo honau tuʻunga fakaakó, ʻoku ʻikai lava ke nau mahinoʻi ha foʻi moʻoni faingofua. Hangē ko hono fakalea ʻe Kepalelí, “ʻoku ʻikai ha foʻi folofola ʻa e ʻOtua ʻe taʻemalava.” (Luke 1:37) Naʻe tali ʻe Mele ko e moʻoni ʻa e ngaahi lea ʻa Kepalelí, he ko ha finemui ia naʻe lahi ʻene tuí. Kae kehe, ko e tui ko iá naʻe ʻikai ko e tui noaʻia pē. ʻI he hangē ko ha tokotaha fakaʻuhinga pē, naʻe fiemaʻu kia Mele ha fakamoʻoni ke makatuʻunga ai ʻene tuí. Naʻe mateuteu ʻa Kepaleli ke fakalahi ʻa e meʻa naʻá ne ʻosi tui ki aí. Naʻá ne talanoa ange kiate ia fekauʻaki mo hono kāinga taʻumotuʻa ko ʻIlisapesí, ne fuoloa ʻene ʻiloa ko ha fefine paʻa. Kuo ʻai ia ʻe he ʻOtuá ke ne malava fakaemana ʻo tuʻituʻia!

Sai ko e hā ʻe fai ʻe Melé? Kuo vaheʻi mai kiate ia ʻa e ngāue pea maʻu mo e fakamoʻoni ʻe fai ʻe he ʻOtuá ʻa e meʻa kotoa naʻe leaʻaki ʻe Kepalelí. ʻOku ʻikai totonu ke tau fakakaukau ko e monū ko ení naʻe ʻikai hoko mai ai ha ilifia mo ha ngaahi tuʻunga faingataʻa. Ko e meʻa ʻe taha, naʻe pau ke ne fakakaukau ki heʻene fakamaʻu mo Siosefá. ʻE lava fēfē ke ne kei fie mali mo ia ʻi haʻane ʻilo ʻo fekauʻaki mo ʻene feitamá? Ko e toe taha, ko e ngāue kuo ʻoangé ʻiate ia pē naʻe hā ngali ko ha fatongia  fakatupu lōmekina ia. Naʻe pau ke ne fua ʻa e moʻui ʻa e tokotaha mahuʻinga taha ʻi he kotoa ʻo e ngaahi meʻa fakatupu ʻa e ʻOtuá—ko hono ʻAlo ʻofeiná tonu! ʻE pau ke ne tokangaʻi ia ʻi he taimi ʻo ʻene kei valevale ʻo taʻelava ke fai ha meʻá pea maluʻi ia ʻi ha māmani fulikivanu. Ko e moʻoni, ko ha fatongia mafatukituki ia!

ʻOku fakahaaʻi ʻe he Tohi Tapú naʻa mo e kau tangata mālohi mo faitōnungá kuo nau toumoua he taimi ʻe niʻihi ke tali ʻa e ngaahi ngāue faingataʻa mei he ʻOtuá. Naʻe fakahaaʻi ʻe Mōsese ʻoku ʻikai ke ne pōtoʻi lea feʻunga ke ngāue ko ha tangata-lea ʻa e ʻOtuá. (Ekisoto 4:10) Naʻe fakafepaki ʻa Selemaia ʻo pehē ko iá “ko e tamasiʻi pe,” ʻokú ne fuʻu kei siʻi ke fai ʻa e ngāue naʻe vaheʻi ange ʻe he ʻOtuá kiate iá. (Selemaia 1:6) Pea naʻe hola ʻa Siona mei hono vāhenga-ngāué! (Siona 1:3) Fēfē ʻa Mele?

Ko ʻene ngaahi leá ʻoku ongona ia ʻi he ngaahi kuongá ʻi heʻene fakatōkilalo mo talangofuá. Naʻá ne pehē kia Kepaleli: “Ko au ʻeni, ko e kaunanga [pe pōpula] ʻa e ʻEiki: ke hoko mai kiate au ʻo hangē ko hoʻo meʻa.” (Luke 1:38) Ko ha taʻahine pōpula naʻe māʻulalo taha ʻi he kau sevānití; ko ʻene moʻuí naʻe tuku kotoa ia ki he nima ʻo hono pulé. Ko e anga ia ʻo e ongoʻi ʻa Mele fekauʻaki mo hono Pulé, ʻa Sihova. Naʻá ne ʻiloʻi naʻá ne malu ʻi hono toʻukupú, ʻokú ne mateaki ki he faʻahinga ʻoku nau mateaki kiate iá, pea te ne tāpuakiʻi ia ʻi heʻene fai ʻene lelei tahá ʻi he ngāue faingataʻa ko ení.—Sāme 18:25.

ʻI he taimi ʻe niʻihi ʻoku kole mai ai ʻa e ʻOtuá ke tau fai ʻa e meʻa ʻe hā ngali faingataʻa nai, naʻa mo taʻealalava ʻi heʻetau vakaí. Kae kehe, ʻi heʻene Folofolá ʻokú ne ʻomai ai kia kitautolu ʻa e ngaahi ʻuhinga feʻunga ke falala ai kiate ia, ke tuku kitautolu ki hono toʻukupú ʻo hangē ko ia ne fai ʻe Melé. (Palovepi 3:5, 6) Te tau fai pehē? Kapau ko ia, te ne fakapaleʻi kitautolu, ʻo ʻomai ʻa e ngaahi ʻuhinga ke langa hake ai ʻa e tui ʻoku toe mālohi ange kiate ia.

ʻAʻahi kia ʻIlisapesi

Ko e ngaahi lea ʻa Kepaleli fekauʻaki mo ʻIlisapesí naʻe mahuʻinga lahi ia kia Mele. ʻI he kakai fefine kotoa ʻi he māmaní, ko hai ʻe lava ke ne mahinoʻi lelei ange ʻa hono tuʻungá? Naʻe fakavave ʻa Mele ki he fonua moʻungaʻia ʻo Siutá, ko ha fononga ʻi he ʻaho nai ʻe tolu pe fā. ʻI heʻene hū ki he fale ʻo ʻIlisapesi mo Sākalaia ko e taulaʻeikí, naʻe ʻoange ai ʻe Sihova kia Mele ha toe fakamoʻoni mālohi ke fakafefekaʻi ʻaki ʻene tuí. Naʻe fanongo ʻa ʻIlisapesi ki he fetapa ʻa Melé pea naʻá ne ongoʻi he taimi pē ko iá ʻa e hopohopo fiefia ʻa e kiʻi valevale ʻi hono manavá. Naʻá ne fonu ʻi he laumālie māʻoniʻoní peá ne lea fekauʻaki mo Mele ko e “faʻē ʻa hoku ʻEiki!” Naʻe fakahaaʻi ʻe he ʻOtuá kia ʻIlisapesi ko e tama ʻa Melé ʻe hoko ko hono ʻEiki, ko e Mīsaiá. ʻIkai ko ia pē, naʻe ueʻi ia ke ne fakaongoongoleleiʻi ʻa Mele ʻi heʻene talangofua faitōnungá, ʻo pehē: “Monuʻiaā ka ko ia naʻe tuitala!” (Luke 1:39-45) ʻIo, ko e meʻa kotoa pē kuo talaʻofa ʻe Sihova kia Melé ʻe hoko moʻoni!

ʻI he tafaʻaki ʻe tahá, naʻe lea ai ʻa Mele. Ko ʻene ngaahi leá ʻoku fakatolonga lelei ia ʻi he Luke 1:46-55. Ko e lea lōloa taha ia ʻa Mele ʻi he lēkooti ʻo e Tohi Tapú, pea ʻoku fakaeʻa ai ʻa e meʻa lahi ʻo fekauʻaki mo ia. ʻOku fakahaaʻi ʻa ʻene fakamālō mo e houngaʻiá, ʻi heʻene fakahīkihikiʻi ʻa Sihova heʻene tāpuakiʻi ia ʻaki ʻa e monū ʻo e hoko ko e faʻē ʻa e Mīsaiá. ʻOku fakahaaʻi ai ʻa e lahi ʻa ʻene tuí, ʻi heʻene lea fekauʻaki mo Sihova ʻokú ne tuku hifo ʻa e ʻafungí mo e mālohí pea tokoniʻi ʻa e lāuvale mo e masiva ʻoku kumi ke tauhi kiate iá. ʻOku toe fakaeʻa ai ʻa e lahi ʻo ʻene ʻiló. ʻI he fakafuofua ʻe taha, naʻá ne lave ʻo laka hake he tuʻo 20 ki he Ngaahi Konga Tohi Tapu Faka-Hepeluú!

ʻOku hā mahino naʻe fakakaukau lahi ʻa Mele fekauʻaki mo e Folofola ʻa e ʻOtuá. Neongo ia, naʻá ne anga-fakatōkilalo ai pē, ʻo ne saiʻia ange ke tuku ke lea ʻa e Tohi Tapú kae ʻikai te ne lea ʻiate ia pē. Ko e tama naʻe tupu ʻi he taimi ko iá ʻi hono manavá ʻe ʻi ai ʻa e ʻaho te ne fakahaaʻi ai ʻa e laumālie tatau, ʻi heʻene pehē: “Ko ʻeku tokāteline ʻoku ʻikai aʻaku, ka ʻoku aʻana naʻa ne fekau mai au.” (Sione 7:16) ʻOku lelei ke tau ʻeke hifo kia kitautolu: ‘ʻOku ou fakahāhā ʻa e fakaʻapaʻapa mo e ʻapasia tatau ki he Folofola ʻa e ʻOtuá? Pe ʻoku ou saiʻia ke pouaki ʻeku fakakaukau mo e akonaki pē ʻaʻaku?’ ʻOku mahino ʻa e tali ʻa Melé.

Naʻe nofo ai pē ʻa Mele mo ʻIlisapesi ʻi he māhina ʻe tolu, ʻo ʻikai ha veiveiua naʻá ne maʻu mo hoko ko ha fakalototoʻa lahi. (Luke 1:56) ʻOku fakamanatu mai ʻe he ongo fefiné fakatouʻosi kia kitautolu ʻa e mahuʻinga ʻo e kaungāmeʻá. Kapau ʻoku tau kumi ʻa e ngaahi kaumeʻa ʻoku nau ʻofa moʻoni ki hotau ʻOtuá, ʻa Sihova, ʻoku papau ai ke tau tupu fakalaumālie pea tau ʻunuʻunu ofi ange ai kiate ia. (Palovepi 13:20) Kae kehe, naʻe faifai pē ʻo  aʻu ki he taimi ke foki ai ʻa Mele ki ʻapi. Ko e hā ʻe leaʻaki ʻe Siosefa ʻi haʻane ʻiloʻi ʻa e tuʻunga ʻokú ne ʻi aí?

Mele mo Siosefa

ʻOku ngalingali naʻe ʻikai tatali ʻa Mele kae ʻoua kuo ʻiloʻi ʻe he tokotaha kotoa ʻokú ne feitama. Naʻe pau ke ne lea ʻo tala kia Siosefa. Ki muʻa aí, ʻoku pau pē naʻá ne fifili pe ʻe fēfē ʻa e tali ʻa e tangata lelei mo manavahē-ʻOtua ko ení ki he meʻa kuo pau ke ne tala angé. Kae kehe, naʻá ne fakaofiofi kiate ia ʻo fakahā ʻa e meʻa kotoa pē kuo hoko kiate iá. Hangē ko ia te ke fakaʻuta atu ki aí, naʻe hohaʻa lahi ʻa Siosefa. Naʻá ne loto ke tui ki he taʻahine ʻofeiná ni, ka ko e meʻa ko ia naʻá ne tala angé kuo teʻeki ai ʻaupito ke hoko ha meʻa pehē ki muʻa. ʻOku ʻikai fakahā ʻe he Tohi Tapú ʻa e ngaahi fakakaukau naʻe ʻi hono ʻatamaí pe ko e anga ʻo ʻene fakaʻuhingá. Ka ʻoku pehē ai naʻá ne fili ke veteʻi ia, he ko e ongo meʻa fakamaʻú ʻi he taimi ko iá naʻe vakai ki ai kuó na ʻosi mali. Kae kehe, naʻe ʻikai te ne loto ke fakahā ia ki he kakaí ke fakamaaʻi pe tauteaʻi, ko ia naʻá ne fili ai ke veteʻi fakafufū ia. (Mātiu 1:18, 19) Kuo pau pē naʻe mamahi ʻa Mele he sio ki he mamahi lahi ʻa e tangata anga-leleí ni ʻi he tuʻunga ko eni ne teʻeki ai ʻaupito hoko ki muʻá. Neongo ia, naʻe ʻikai te ne loto-ʻingoʻingo ai.

Naʻe ʻikai tuku ʻe Sihova ke hoko atu ʻa Siosefa ʻi he meʻa ne hā ngali kiate ia ko e ʻalunga lelei tahá. ʻI ha misi, naʻe tala ange ai ʻe he ʻāngelo ʻa e ʻOtuá kiate ia ko e feitama ʻa Melé ko e tuʻunga fakaemana moʻoni ia. Kuo pau pē naʻe hoko eni ko ha fakafiemālie! Naʻe fai ʻe Siosefa he taimi ko ení ʻa e meʻa naʻe fai ʻe Mele ʻi he kamatá—naʻá ne ngāue ʻo fehoanaki mo e tataki ʻa Sihová. Naʻá ne ʻave ʻa Mele ʻo ne hoko ko hono uaifi, pea naʻá ne teuteu ke fua ʻa e fatongia makehe ko hono tokangaʻi ʻa e ʻAlo ʻo Sihová.—Mātiu 1:20-24.

Ko e kakai malí—mo e faʻahinga ʻoku fakakaukau malí—ʻoku lelei ke nau ako mei he ongo meʻa mali ko eni ʻi he taʻu ʻe 2,000 kuohilí. ʻI he sio ʻa Siosefa ki hono uaifi kei siʻí ʻokú ne fakahoko ʻa e ngaahi fatongia mo e tauhi ʻi he tuʻunga fakafaʻeé, ʻoku pau pē naʻá ne fiefia ʻi hono tataki ia ʻe he ʻāngelo ʻa Sihová. Kuo pau pē naʻe sio ʻa Siosefa ki he mahuʻinga ʻo e falala kia Sihova ʻi hono fai ʻa e ngaahi fili lalahí. (Sāme 37:5; Palovepi 18:13) ʻOku ʻikai ha veiveiua naʻá ne tokanga mo anga-lelei ai pē ʻi hono fai ʻa e ngaahi fili ʻi he tuʻunga ko e ʻulu ʻi he fāmilí.

ʻI he tafaʻaki ʻe tahá, ko e hā ʻoku lava ke tau fakakaukau atu ki ai ʻi he loto-lelei ʻa Mele ke mali mo Siosefá? Neongo ʻi he ʻuluaki taimí naʻe faingataʻa nai kia Siosefa ke ne mahinoʻi ʻa ʻene fakamatalá, naʻe tatali ʻa Mele kiate ia ko e tangata ʻe hoko ko e ʻulu ʻi he fāmilí. Ko ha lēsoni lelei moʻoni ia kiate ia, pea pehē ki he kakai fefine Kalisitiane he ʻaho ní. Fakaʻosí, ko e ngaahi meʻa ko eni naʻe hokó ʻoku ngalingali naʻe akoʻi fakatouʻosi ai ʻa e meʻa lahi kia Siosefa mo Mele ʻo fekauʻaki mo e mahuʻinga ʻo e fetuʻutaki faitotonu mo hangatonú.

Ko e ongo meʻa kei siʻi ko iá naʻá na kamata moʻoni ʻena nofo malí ʻi he makatuʻunga lelei tahá. Naʻá na fakatou ʻofa ki he ʻOtua ko Sihová ʻo māʻolunga ia ʻi ha toe meʻa pea holi ke fakahōifuaʻi ia ʻi hona tuʻunga ko e ongo mātuʻa fua fatongia mo tokanga. Ko e moʻoni, naʻe tatali mai ʻa e ngaahi tāpuaki lahi kia kinaua—mo e ngaahi pole lahi ange foki. Naʻe tuʻu mei muʻa ʻia kinaua ʻa e ʻamanaki ki hono tauhi ʻo Sīsū, ʻa ia te ne tupu hake ʻo hoko ko e moʻungaʻi tangata lahi taha kuo faifai ange pea ʻilo ki ai ʻa e māmaní.

[Fakatātā ʻi he peesi 17]

Ko e ʻofa ki he ʻOtuá ʻa e makatuʻunga lelei taha ki he nofo malí