Kuo tuʻo fiha hoʻo leaʻaki ia pe ki he niʻihi kehé ʻi he taimi ʻokú ke fakaava hake ai ha kupu foʻou ʻi he Taua Leʻo? ʻOku fakamoleki ʻa e taimi mo e ngāue lahi ke teuteu ʻa e ngaahi fakatātā mo e ngaahi laʻi tā fakaʻofoʻofa peheé, pea ʻoku ʻi ai hono ʻuhinga ʻenau ʻi he ngaahi makasiní. Ko ʻenau ʻi aí ke ueʻi hotau lotó pea ke tokoniʻi kitautolu ke fakakaukau ki he lēsoní. ʻE lava ke ne tokoniʻi kitautolu tautefito ʻi he taimi ʻoku tau teuteu ai mo tali ʻi he Ako Taua Leʻo.

Ko e fakatātaá, ʻi he taimi taki taha ʻokú ke teuteu ai ha kupu, fakakaukau fekauʻaki mo e ʻuluaki fakatātā ʻi he kupú, ʻa ē ʻi he veʻe kaveingá. Ko e hā ʻoku fakahaaʻi aí? Ko e hā naʻe fili ai iá? Ko e hā ʻene kaunga ki he kaveinga ʻo e kupú pe ko e konga Tohi Tapu ʻo e kaveingá? Fakakaukau leva ki he founga hono tokoniʻi koe ʻe he ngaahi fakatātā kehe ʻi he kupú ke mahinoʻi ʻa e kaveinga ʻoku fai ki ai ʻa e lāuleá pea mo e founga ʻene tokoniʻi koe ʻi hoʻo moʻuí tonu.

Ko e tokotaha faiako Ako Taua Leʻo ʻoku totonu ke ne ʻoange ha taimi ki he fanga tokouá mo e fanga tuofāfiné ke nau lave ki he fakatātā taki taha. ʻE lava ke nau fakamatala ki he anga ʻo e kaunga ʻa e fakatātaá ki he lēsoní pea mo ʻenau ongoʻi fekauʻaki mo iá. ʻI he taimi ʻe niʻihi, ko e fakamatala ʻoku ofi ki he fakatātaá ʻoku kau ai ha fika ʻo e palakalafí. ʻOku tokoni eni ki he tokotaha faiakó ke ʻiloʻi ai ʻa e taimi ke lāulea ki he fakatātaá. ʻI he taimi ʻoku ʻikai ai ha fika ʻo e palakalafí ʻi he fakatātaá, ʻe lava ʻe he tokotaha faiakó ke fili ʻa e taimi ʻoku totonu ai ke lāulea ki he fakatātaá. ʻI he foungá ni, ʻe maʻu ʻaonga ʻa e tokotaha kotoa mei he ngaahi fakatātaá ʻa ia te ne tokoniʻi kitautolu ke fakakaukauloto ai ki he ngaahi lēsoni mei he Folofola ʻa e ʻOtuá.

Naʻe pehē ʻe he tokoua ʻe taha ko e ngaahi fakatātā ʻi ha kupu ʻoku hangē ia ko e kilimi ʻi ha keke. ʻOku nau ʻai ai ha kupu fakaʻofoʻofa kuo hiki ke toe lelei ange.