Maʻu Tohi Fakamoʻoni Ako Hono 124 ʻi Kiliatí

Fakahoa ʻa e Kau Misinalé ki he Fanga Heʻe

ʻI HE ʻosi kotoa pē ʻa e māhina ʻe ono, ʻoku fakahoko ʻe he Akoʻanga Tohi Tapu Taua Leʻo ko Kiliatí ha polokalama maʻu tohi fakamoʻoni ako ʻa ia ʻoku fakaafeʻi ki ai ʻa e kotoa ʻo e fāmili Pēteli ʻo ʻAmeliká. ʻI Maʻasi 8, 2008, ko e kau ʻaʻahi mei he ngaahi fonua laka hake he 30 naʻe kau mai fakataha mo e fāmili Pētelí ki he maʻu tohi fakamoʻoni ako ʻo e kalasi hono 124 ʻo e Akoʻanga ko Kiliatí. Naʻe fiefia ʻa e toko 6,411 kotoa naʻe kau ki aí fakataha mo e kau akó ʻi honau ʻaho makehé.

Ko e tokotaha sea ʻo e polokalamá, ʻa Stephen Lett mei he Kulupu Pulé, naʻá ne kamataʻaki ha malanga ko hono kaveingá, “ʻAlu Atu mo e Fanga Heʻe Fakaefakatātā ʻa Sihová.” ʻOku fakahoa ʻe he Fakahā 9:1-4 ʻa e kau Kalisitiane pani tokosiʻi naʻa nau toe ake fakalaumālie mai ʻi he 1919 ki ha pupunga heʻe ʻoku fakafokifā ʻenau ngāue longomoʻuí. Naʻe fakamanatu ki he kau akó koeʻuhi ko e mēmipa kinautolu ʻo e “fanga sipi kehe,” kuo nau kau fakataha ai mo e pupunga heʻe fakaefakatātā ko ení.—Sione 10:16.

Ko Lon Schilling, ko ha mēmipa ʻo e Kōmiti Vaʻa ʻo ʻAmeliká naʻá ne hoko atu ʻaki ʻa e malanga “Ke Fefakakakatoʻaki.” Naʻe fakatuʻunga ia ʻi he faʻifaʻitakiʻanga mei he Tohi Tapú ʻo ʻAkuila mo Pīsila, ko ha ongo meʻa mali Kalisitiane ʻi he ʻuluaki senitulí. (Loma 16:3, 4) Ko e kalasi ʻi Kiliatí naʻe ʻi ai ʻa e hoa mali ʻe 28. Naʻe fakamanatu kiate kinautolu, ke nau hoko ko e kau misinale lavameʻá, ʻe fiemaʻu ke nau tauhi maʻu ke mālohi ʻa e haʻi ʻo ʻenau nofo malí. ʻOku ʻikai ʻaupito ke lave ʻa e Tohi Tapú kia ʻAkuila ʻo taʻekau ai ʻa hono uaifi ko Pīsilá. Ko ia ai, naʻe vakai ʻa e ʻapositolo ko Paulá pea mo e fakatahaʻangá kiate kinaua ʻokú na taha pē. Pehē pē, ko e ngaahi hoa misinale ʻi he ʻaho ní ʻoku totonu ke nau ngāue fakataha, lotu fakataha pea nau fekuki fakataha mo e ngaahi pole makehe ʻo ha vāhenga ngāue muli, ʻo nau fefakakakatoʻaki ai.—Sen. 2:18.

Ko e malanga hono hokó naʻe fai ia ʻe Guy Pierce ʻo e Kulupu Pulé ʻa ia ko hono kaveingá, “Tali ki he Failelei ʻa Sihová.” Naʻe fakamatala ʻa Tokoua Pierce ko e faileleí ʻoku ʻuhinga ia ki he meʻa lahi ange ʻi he fakaʻehiʻehi pē mei he faikoví. Ko ha tokotaha lelei ʻokú ne fai ʻa e ngaahi meʻa lelei ke ʻaonga ki he niʻihi kehé. ʻOku failelei ʻa Sihova ko e ʻOtuá ʻi he tuʻunga māʻolunga tahá. (Sak. 9:16, 17) Ko e failelei ʻa e ʻOtuá mo ʻene ʻofá ʻe malava ke hoko ia ʻi loto ʻiate kitautolu ko ha mālohi ʻokú ne ueʻi kitautolu ke tau failelei ki he niʻihi kehé. ʻI hono fakaongoongoleleiʻi ʻa e kau akó, naʻe fakaʻosiʻaki ʻe Tokoua Pierce ʻene pehē: “Kuo mou failelei. ʻOku mau falala ʻe hokohoko atu ʻa hoʻomou tali ki he failelei ʻa e ʻOtuá ʻaki ʻa e failelei ʻi ha vāhenga ngāue pē ʻi he kahaʻú ʻe ʻoatu ʻe Sihova ko e ʻOtuá.”

Ko Michael Burnett, ko ha tokotaha misinale ia ki muʻa ʻa ia naʻe toki vaheʻi ko ha faiako ʻi Kiliati, naʻá ne hoko atu ai ʻa e malanga ko hono kaveingá, “ʻAi Ia ko ha Meʻa Fakamanatu ʻi Homou Laʻé.” ʻI he hangē naʻe ʻai ʻe he kau ʻIsilelí ha “mea fakamanatu” ʻi honau laʻé, naʻe pau ke nau manatuʻi ʻa e fakahaofi fakaemana mei ʻIsipite naʻe fakahoko ʻe Sihova maʻanautolú. (Eki. 13:16, PM) Naʻe  ekinaki ki he kau akó ke nau manatuʻi ʻa e fakahinohino lahi naʻa nau maʻu ʻi he Akoʻanga ko Kiliatí ʻo hangē naʻa nau ʻai ia ko ha meʻa fakamanatu ʻi honau laʻé. Naʻe fakamamafaʻi ʻe Tokoua Burnett ʻa e fiemaʻu ke anga-fakatōkilalo mo anga-fakanānā pea ke ngāueʻaki ʻa e ngaahi tefitoʻi moʻoni Fakatohitapú ʻi hono fakaleleiʻi ha taʻefemahinoʻaki pē mo e kaungā misinalé mo e niʻihi kehé.—Mt. 5:23, 24.

Ko Mark Noumair, ko ha faiako Kiliati fuoloa naʻá ne fai ʻa e malanga “Ko e Hā ʻe Hivaʻaki Fekauʻaki mo Koé?” ʻI he kuonga muʻá, ko e anga fakafonua ia ke fakafiefiaʻi ʻa e ngaahi ikuna ʻi he taú ʻaki ha hiva. Ko e taha ʻo ha hiva pehē ʻokú ne fakaeʻa ʻa e mamaeʻi-kita ʻa e ngaahi matakali ʻo Lūpeni, Tani mo ʻĀselí kae vikiʻi ʻa e matakali ʻo Sepuloné ko ʻene maʻu ʻa e laumālie feilaulauʻi-kitá. (Fkm. 5:16-18) ʻI he hangē ko e ngaahi lea ʻo ha hiva, ko e ngaahi tōʻonga ʻa e Kalisitiane kotoa ʻoku faifai pē ʻo ʻiloʻi ia ʻe he niʻihi kehé. Ko e faivelenga ʻa ha taha ʻi he ngāue ʻa e ʻOtuá pea mo e mateaki ai pē ki he ngaahi  tuʻutuʻuni fakateokalatí ʻe maʻu ai ha tuʻunga ʻoku lelei kia Sihova pea hoko ko ha faʻifaʻitakiʻanga lelei ki he fanga tokouá. ʻI he fanongo ʻa e niʻihi kehe ʻi he fakatahaʻangá ki he hiva fakaefakatātā ʻoku hā ʻi heʻetau ngaahi tōʻongá, ʻoku ueʻi ai kinautolu ke nau faʻifaʻitaki ki he faʻifaʻitakiʻanga lelei ko iá.

ʻI he konga ʻo ʻenau ako ʻi Kiliatí, naʻe fakamoleki ʻe he kalasi hono 124 ʻa e houa fakakātoa ʻe 3,000 ʻi he ngāue fakamalangá. ʻI he kaveinga “Muimui ʻi he Taki ʻa e Laumālie Māʻoniʻoní,” naʻe fakahā ai ʻe he kau akó kia Sam Roberson ʻo e Potungāue Ako Fakateokalatí ʻa e ngaahi meʻa naʻe hoko ʻi he ngāue fakamalangá, ʻo toe fakatātaaʻi ʻa e hokosia ʻe niʻihi. Naʻe hoko atu ʻi he ngaahi hokosia fakalototoʻa ko ení ʻa e ngaahi fakaʻekeʻeke ʻo e kau ako kuo nau ʻosi mei Kiliati, ʻa ia ʻoku nau lolotonga ngāue ʻi he ngaahi fonua kehekehe, ʻo sea ai ʻa Patrick LaFranca ʻo e Kōmiti Vaʻa ʻo ʻAmeliká. Naʻe houngaʻia ʻa e kau akó ʻi he faleʻi ʻaonga naʻa nau maʻu mei he fanga tokoua ko ení.

Ko Anthony Morris ʻo e Kulupu Pulé naʻá ne fai ʻa e malanga fakaʻosi, “Manatuʻi ko e Ngaahi Meʻa ʻOku Fai ki Ai ʻa e Sió ʻOku Fakataimi.” ʻOku naʻinaʻi mai ʻa e Tohi Tapú ke tau tokanga ki he ngaahi tāpuaki meia Sihova ʻi he kahaʻú kae ʻikai ko ha mamahi fakataimi pē ʻoku tau lolotonga hokosia nai. (2 Kol.2Ko 4:16-18) Ko e masiva ʻangoʻangó, fakamaau taʻetotonú, fakafeʻātungiá, puké mo e maté ko e ngaahi meʻa moʻoni ia ʻoku tau sio kotoa ki ai he ʻahó ni. ʻE fehangahangai tonu nai ʻa e kau misinalé mo e niʻihi ʻo e ngaahi tuʻunga fakamamahi ko ení. Ka ko hono manatuʻi ʻoku fakataimi pē ʻa e ngaahi meʻa ko ení ʻe tokoni ia kia kitautolu ke tau hanganaki mafamafatatau fakalaumālie mo maʻu ʻa e ʻamanaki lelei.

Naʻe fakaʻosiʻaki ʻa e polokalamá, ʻi he nofo kotoa ʻa e kau maʻu tohi fakamoʻoni akó ʻi he siteisí ʻo fanongo ki he ngaahi lea fakaʻosi ʻa Tokoua Lett. Naʻá ne fakalototoʻaʻi kinautolu ke ʻoua te nau foʻi, peá ne pehē: “ʻOku ʻikai ha motuhiaʻanga ʻo ʻetau anga-tonú ʻo kapau ʻe ʻi hotau tafaʻakí ʻa Sihova.” Naʻá ne fakaʻaiʻai ʻa e kau misinale foʻoú ke nau hangē ha fanga heʻé, ke tutui atu ʻi he ngāue ʻa Sihová pea hanganaki faivelenga, mateaki mo talangofua ai pē ʻo taʻengata.

[uha ʻi he peesi 30]

ʻŪ FIKA ʻO E KALASÍ

Lahi ʻo e fonua naʻe fakafofongaʻí: 7

Lahi ʻo e fonua naʻe vaheʻi ki aí: 16

Tokolahi fakakātoa ʻo e kau akó: 56

ʻAvalisi ʻo e taʻumotuʻá: 33.8

ʻAvalisi ʻo e taʻu he moʻoní: 18.2

ʻAvalisi ʻo e taʻu he ngāue fakafaifekau taimi-kakató: 13.8

[Fakatātā ʻi he peesi 31]

Kalasi Maʻu Tohi Fakamoʻoni Ako Hono 124 ʻa e Akoʻanga Tohi Tapu Taua Leʻo ko Kiliatí

ʻI he lisi ʻi laló, ko e ngaahi ʻotú ʻoku fakafika ia mei muʻa ki mui, ko e ngaahi hingoá ʻoku fakahokohoko ia mei he toʻohemá ki he toʻomataʻú ʻi he ʻotu taki taha.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Fakatātā ʻi he peesi 32]

ʻOku tuʻu ʻa e Akoʻanga Kiliatí ʻi he Senitā Fakaeako Taua Leʻo