Tuku ke Maluʻi Koe ʻe he “Folofola” ʻa Sihová

ʻI HE 490 K.M. ʻi he tau fakahisitōlia ʻo Malafoní, naʻe fehangahangai ai ʻa e kau ʻAtenisi mei he toko taha manó ki he toko ua manó mo ha fuʻu kau tau Pēsia tokolahi ʻaupito. Ko ha kī tefito ʻi he ngaahi founga faka-Kalisi fakakautaú ko e fālengí—ko ha patalione ʻo e kau sōtiá ʻoku nau laka ʻi he faʻunga vāofi ʻaupito. Ko ʻenau ngaahi pā fepikitakí naʻe hoko ia ko ha fuʻu holisi hokohoko, ko e holisi naʻe tuʻu ai ki ʻolunga ha ngaahi tao. Naʻe ʻoange ʻe he fālengí ki he kau ʻAtenisí ha ikuna ʻiloa ʻi he ngaahi kongakau tokolahi ange fau ʻa e kau Pēsiá.

Ko e kau Kalisitiane moʻoní ʻoku nau kau ʻi ha tau fakalaumālie. ʻOku nau fetakai mo e ngaahi fili mālohi—ko e kau pule taʻehāmai ʻo e fokotuʻutuʻu fulikivanu lolotongá, ʻa ia ʻoku fakamatalaʻi ʻi he Tohi Tapú ko e “kau bule oe fakabouli oe mamani, . . . kau laumalie kovi i he gaahi botu i oluga.” (Efeso 6:​12, PM; 1 Sione 5:19) ʻOku hokohoko atu ʻa e ikuna ʻa e kakai ʻa e ʻOtuá—kae ʻikai ʻi he mālohi pē ʻonautolú. ʻOku ʻalu ʻa e lāngilangí kotoa kia Sihova, ʻa ia ʻokú ne maluʻi mo fakahinohinoʻi kinautolú, ʻo hangē ko ia ʻoku fakahaaʻi ʻi he Sāme 18:30: “Ko e folofola ʻa e ʻEiki kuo ʻosiʻasivi ia; ko e fakaū ia ki he kakai ʻoku hufanga kiate ia.”

ʻIo, fakafou ʻi heʻene “folofola” kuo ʻosi siví, ʻa ia ʻoku ʻi he Tohi Tapu Toputapú, ʻoku maluʻi ai ʻe Sihova ʻa ʻene kau sevāniti mateakí mei he maumau fakalaumālié. (Sāme 19:​7-11; 119:93) ʻI he fekauʻaki mo e poto ʻoku fakahāhā ʻi he Folofola ʻa e ʻOtuá, naʻe tohi ʻe Solomone: “Oua naa liaki ia, bea te ne fakamoui koe: ke ke ofa kiate ia, bea te ne tauhi [pe maluʻi] koe.” (Palovepi 4:​6, PM; Koheleti 7:12) ʻOku anga-fēfē hono maluʻi kitautolu ʻe he poto fakaʻotuá mei he maumaú? Fakakaukau angé ki he fakatātā fekauʻaki mo ʻIsileli ʻo e kuonga muʻá.

Ko ha Kakai Naʻe Maluʻi ʻe he Poto Fakaʻotuá

Ko e Lao ʻa Sihová naʻá ne maluʻi mo tataki ʻa e kau ʻIsilelí ʻi he tafaʻaki kotoa ʻo e moʻuí. Ko e fakatātaá, ko e ngaahi lao ki he meʻakaí, haisiní, mo e kolonitiní naʻe fakahaofi ai kinautolu mei he ngaahi mahaki lahi, ʻa ia naʻá ne fakaʻauha ʻa e ngaahi puleʻanga kehé. Ko e hili ʻa hono toki ʻiloʻi ʻo e pekitīliá ʻi he senituli hono 19 naʻe toki kamata ke aʻu ai ʻa e saienisí ki he tuʻunga tatau mo e Lao ʻa e ʻOtuá. Ko e ngaahi lao ʻi he maʻu kelekelé, fakataú, fakaʻatā ʻa e moʻuá, mo e totongi tupú naʻe ʻomai ai ʻa e ngaahi ʻaonga fakasōsiale ki ʻIsileli ʻaki hono pouaki ha sōsaieti ʻoku tuʻumaʻu  mo ha ʻekonōmika lelei. (Teutalonome 7:​12, 15; 15:​4, 5) Naʻe aʻu ʻo tokoni ʻa e Lao ʻa Sihová ke fakatolonga ʻa e tuʻunga lelei ʻo e kelekele ʻo ʻIsilelí! (Ekisoto 23:​10, 11) Ko e ngaahi fekau fekauʻaki mo e lotu loí naʻe maluʻi fakalaumālie ai ʻa e kakaí, ʻo maluʻi ai kinautolu mei he fakafeʻātungia fakatēmenioó, feilaulauʻaki ʻo e fānaú, mo e ngaahi kovi kehe lahi, tuku kehe ʻa e tōʻonga ololalo ʻo e punou hifo ʻa e tangatá ʻi he ʻao ʻo e ngaahi ʻaitoli taʻemoʻuí.—Ekisoto 20:​3-5; Sāme 115:​4-8.

ʻOku hā mahino, ko e “folofola” ʻa Sihová naʻe fakamoʻoniʻi “oku ikai koe mea vaiga ia” ki ʻIsileli; ka, naʻe ʻuhinga iá ko e moʻui mo e ngaahi ʻaho fuoloa ki he faʻahinga kotoa naʻe tokanga ki aí. (Teutalonome 32:​47, PM) ʻOku hoko ʻa e meʻa tatau he ʻahó ni ʻi he faʻahinga ʻoku nau tauhi ʻa e ngaahi folofola fakapotopoto ʻa Sihová, neongo ko e kau Kalisitiané ʻoku ʻikai te nau kei ʻi he malumalu ʻo e fuakava Laó. (Kaletia 3:​24, 25; Hepelu 8:8) Ko hono moʻoní, ʻi he ʻikai ha tuʻutuʻuni ʻo e ngaahi laó, ʻoku maʻu ʻe he kau Kalisitiané ha tuʻunga lahi ʻo e ngaahi tefitoʻi moʻoni Fakatohitapú ke tataki mo maluʻi kinautolu.

Ko ha Kakai ʻOku Maluʻi ʻe he Ngaahi Tefitoʻi Moʻoni

Ko e ngaahi laó ʻoku ʻi ai nai hono kaunga fakangatangata pea ʻoku fakataimi nai pē ia. Kae kehe, ko e ngaahi tefitoʻi moʻoni Fakatohitapú, ʻi heʻene hoko ko e ngaahi moʻoni tefitó, ʻoku faʻa ʻi ai hono kaunga lahi mo tuʻuloa. Hangē ko ení, fakakaukau angé ki he tefitoʻi moʻoni ʻoku fakahaaʻi ʻi he Semisi 3:​17, ʻa ia ʻoku pehē ʻe hono konga: “Ko e poto ʻoku mei ʻolunga, ko hono anga tuʻu muʻa ko e maʻa, pea hoko ai mo ʻene melino.” ʻE lava fēfē ke hoko ʻa e moʻoni tefito ko iá ko ha maluʻi ki he kakai ʻa e ʻOtuá he ʻaho ní?

Ke hoko ʻo maʻá ʻoku ʻuhinga iá ko e hoko ʻo maʻa fakaeʻulungāanga. Ko ia ai, ko e faʻahinga ʻoku nau fakamahuʻingaʻi ʻa e tuʻunga maʻá ʻoku nau feinga ke fakaʻehiʻehi ʻo ʻikai mei he ʻulungāanga taʻetāú pē kae aʻu ki he ngaahi meʻa ʻoku taki atu ki aí, ʻo kau ai ʻa e fakaʻānaua fakaefehokotaki fakasinó mo e fakatātā fakalieliá. (Mātiu 5:28) ʻI he founga tatau, ko e kau faisō ʻoku nau tokanga ki he tefitoʻi moʻoni ʻi he Semisi 3:17 ʻoku nau fakaʻehiʻehi ai mei he ngaahi tōʻonga fekoekoeʻi ʻe iku atu nai ai ki ha mole ʻa e mapuleʻi-kitá. ʻI he tuʻunga ko e kau ʻofa ki he tefitoʻi moʻoní, ʻoku ʻikai ke tohoakiʻi mamaʻo kinautolu mei he tuʻunga maʻá, ʻi he fakakaukau nai ʻo pehē kehe pē ʻoku ʻikai te nau maumauʻi ʻa e laó, ʻoku maʻu ʻe honau ʻulungāangá ʻa e hōifua ʻa Sihová. ʻOku nau ʻiloʻi ʻoku ‘sio ʻa Sihova ki he lotó’ pea ʻokú ne fai ʻa e talí ʻo fakatatau ki ai. (1 Samiuela 16:7; 2 Kalonikali 16:9) Ko e faʻahinga poto peheé ʻoku nau maluʻi honau kakanó mei he ngaahi mahaki lahi ʻoku mafolalahia ʻi hono fetuku holo ʻe he fehokotaki fakasinó pea pehē ki hono tauhi ʻa honau tuʻunga lelei fakaʻatamaí mo fakaeongó.

Ko e poto fakaʻotuá ʻoku toe ‘fakamelino,’ ko e lau ia ʻa e Semisi 3:17. ʻOku tau ʻiloʻi ko Sētané ʻokú ne feinga ke fakamavaheʻi kitautolu meia Sihova ʻaki hono tūtuuʻi ha laumālie ʻo e fakamālohi ʻi hotau lotó, ʻi ha tuʻunga fakafou ʻi he ʻū tohi, ngaahi faiva, fasi mo e ngaahi vaʻinga fakakomipiuta ala fehuʻia—ʻa ia ko e niʻihi ai ʻoku nau fakaʻaiʻai ʻa e faʻahinga ʻoku nau ngāueʻakí ke nau faʻifaʻitaki ki he ngaahi tuʻunga anga-fakamanu mo e tāmate tavale ʻoku ʻikai ala fakaʻuta atu ki ai! (Sāme 11:5) Ko e lavameʻa ʻa Sētané ʻoku hā mahino ia ʻi he tupu ʻo hakeʻuta ʻa e faihia fakamālohí. ʻI he fekauʻaki mo e faihia peheé, ʻi he ngaahi taʻu kuohilí naʻe hiki ai ʻe he nusipepa ʻAositelēlia ko e Sydney Morning Herald ʻa e lea ʻa Robert Ressler, naʻá ne tomuʻa fakahaaʻi ai ʻa e foʻi lea ko e “tokotaha-tāmate hokohoko.” Naʻe pehē ʻe Ressler ko e kau tāmate naʻá ne fakaʻekeʻeke ʻi he 1970 tupú naʻe fakaʻaiʻai kinautolu ʻe he naunau fakalielia ʻa ia ʻoku “ʻikai kei ololalo ʻi he ngaahi tuʻunga ʻo e ʻaho ní.” Ko ia ai, naʻe fakahaaʻi ʻe Ressler “ha vakai ʻikai ha ʻamanaki ki he kahaʻú—ko ha senituli foʻou ʻa ia ʻe liuliunga ai ʻa e tokolahi ʻo e kau fakapō fakatokolahí.”

Ko e moʻoni, ʻi ha ngaahi māhina pē hili e ʻasi ʻa e ongoongo ko iá, naʻe tāmateʻi ai ʻe ha tangata toʻo meʻafana ʻa e fānau valevale ʻe toko 16 mo ʻenau faiakó ʻi ha akoʻanga ki he fānau teʻeki hū ki he lautohi siʻí ʻi Dunblane, Sikotilani, ki muʻa ke ne tāmateʻi pē ʻe ia iá. ʻI he māhina hono hokó naʻe hanga ai ʻe ha tangata toʻo meʻafana naʻe vale, ʻo tāmateʻi tavale ʻa e kakai ʻe toko 32 ʻi he kolo lōngonoa ʻi Tasimēnia ko Port Arthur, ʻi ʻAositelēlia. ʻI he ngaahi taʻu ki mui ní kuo luluʻi ai ʻa e ʻIunaite Seteté ʻe ha ngaahi tāmate tavale ʻi he ʻapiakó, ʻo fakatupunga ai ʻa e kau ʻAmeliká ke nau ʻeke, Ko e hā nai hono ʻuhingá? ʻI Sune 2001, naʻe ʻuluʻi ongoongo ʻaki ai ʻi he māmaní ʻa Siapani, ʻi he hū ʻa ha tangata fakamoveuveu ki ha ʻapiako ʻo hoka heleʻi ai ʻa e fānau ʻe toko 8 ʻi he kuleiti ʻuluakí mo e uá ʻo nau mate pea sipi ʻaki e helé ʻa e kakai ʻe toko 15 kehe.  Ke fakapapauʻí, ko e ngaahi ʻuhinga mei mui ʻi he ngaahi kovi peheé ʻoku fihi, ka ko e fakamālohi ʻi he mītiá ʻoku hā fakautuutu ko ha tupuʻanga tefito ia ʻoku tokoni ki he meʻa ko iá. “Kapau ʻoku lava ʻe ha tuʻuaki fakakomēsiale sekoni ʻe 60 ke ne ʻai ke lahi fakaʻulia ʻa e fakataú,” ko e tohi ia ʻa ha faʻu-kōlomu ʻAositelēlia ko Phillip Adams, “ʻoua ʻe tala mai kiate au ʻoku ʻikai ke hanga ʻe ha foʻi faiva houa ʻe ua, totongi laui miliona, ʻo liliu ʻa e ngaahi fakakaukaú.” ʻOku mahuʻingá, ʻi he ʻapi ʻo e tangata toʻo meʻafana ʻi Port Arthur, naʻe faʻao ai ʻe he kau polisí ʻa e ngaahi foʻi vitiō fakamālohi mo ʻata fakalielia ʻe 2,000.

Ko e faʻahinga ʻoku nau pipiki ki he ngaahi tefitoʻi moʻoni Fakatohitapú ʻoku nau maluʻi honau ʻatamaí mo e lotó mei he ngaahi founga kotoa pē ʻo e fakafiefiá, ʻa ia ʻoku ohi ai ha hehema ki he fakamālohí. Ko ia ai, “ko e laumalie ʻoku ʻo mamani” ʻoku ʻikai ke nau talitali lelei ia ki heʻenau fakakaukaú mo ʻenau ngaahi holí. ʻI hono kehé, ‘ʻoku akoʻi kinautolu ʻe he Laumalie [ʻo e ʻOtuá],’ pea ʻoku nau feinga ke fakatupulekina ha ʻofa ki hono fuá, ʻa ia ʻoku kau ai ʻa e melinó. (1 Kolinito 2:​12, 13; Kaletia 5:​22, 23) ʻOku nau fai eni fakafou ʻi he ako Tohi Tapu tuʻumaʻu, lotu mo e fakalaulauloto fakatupu langa hake. ʻOku nau toe fakaʻehiʻehi mei he feohi mo e faʻahinga tāutaha ʻoku nau hehema fakamālohí, ʻo fili ʻi hono kehé ke feohi mo e faʻahinga, ʻa ia ʻoku hangē pē ko kinautolú, ʻoku nau hoholi ki he māmani foʻou melino ʻa Sihová. (Sāme 1:​1-3; Palovepi 16:29) ʻIo, he maluʻi moʻoni ē ʻoku lava ke ʻomai ʻe he poto fakaʻotuá!

Tuku ʻa e “Folofola” ʻa Sihová Ke Ne Maluʻi Ho Lotó

ʻI hono ʻahiʻahiʻi ʻi he toafá, naʻe fakahalaʻi ai ʻe Sīsū ʻa Sētane ʻaki ʻene lave totonu ki he Folofola ʻa e ʻOtuá. (Luke 4:​1-13) Kae kehe, naʻe ʻikai te ne feʻauhi mo e Tēvoló pe ko hai naʻe potó. ʻI heʻene ngāueʻaki ʻa e Tohi Tapú ko e maluʻí, naʻe lea ai ʻa Sīsū mei hono lotó, pea ko e ʻuhinga ia naʻe taʻelavameʻa ai ʻi he tuʻunga ʻo Sīsuú ʻa e founga ʻa e Tēvoló, ʻa ia naʻe ngāue mātuʻaki lelei ʻi ʻĪtení. ʻE toe taʻelavameʻa foki ʻia kitautolu ʻa e ngaahi fāliunga ʻa Sētané kapau ʻoku tau fakafonu hotau lotó ʻaki ʻa e ngaahi folofola ʻa Sihová. ʻOku ʻikai ha meʻa ʻe lava ke toe mahuʻinga ange, he “ʻoku founga mei [he lotó] ʻa e ngaahi meʻa ʻoku ʻasi ʻi he moʻui.”—Palovepi 4:23.

ʻIkai ko ia pē, kuo pau ke tau hokohoko atu ʻi hono maluʻi hotau lotó, ʻo ʻoua ʻaupito ʻe foʻi. Ko Sētane, ʻi heʻene taʻelavameʻa ʻi he toafá, naʻe ʻikai tuku ai ʻene ʻahiʻahiʻi ʻa Sīsuú. (Luke 4:13) Te ne toe kīvoi ʻi he feingaʻi kitautolú, ʻi hono ʻahiʻahiʻi ha ngaahi founga kehekehe ke maumauʻi ai ʻetau anga-tonú. (Fakahā 12:17) Ko ia ai, tau faʻifaʻitaki kia Sīsū ʻaki hono fakatupulekina ha ʻofa loloto ki he Folofola ʻa e ʻOtuá, ʻo lotu taʻetuku ʻi he taimi tatau ki he laumālie māʻoniʻoní pea mo e potó. (1 Tesalonaika 5:17; Hepelu 5:7) ʻI heʻene tafaʻakí, ʻoku palōmesi ʻa Sihova ki he faʻahinga kotoa ʻoku hūfanga kiate iá ʻe ʻikai te nau hoko ki ha maumau fakalaumālie.—Sāme 91:​1-10; Palovepi 1:33.

ʻOku Maluʻi ʻe he Folofola ʻa e ʻOtuá ʻa e Fakatahaʻangá

Heʻikai lava ke taʻofi ʻe Sētane ʻa e “fuʻu kakai lahi” naʻe tomuʻa talá mei heʻenau hao ʻi he mamahi lahí. (Fakahā 7:​9, 14) Ka neongo ia, ʻokú ne kei feinga mālohi pē ke fakameleʻi ʻa e kau Kalisitiané koeʻuhi ke mole ai ʻi ha tuʻunga mei he faʻahinga ʻe niʻihi ʻa e hōifua ʻa Sihová. Naʻe ngāue ʻa e founga ko iá ʻi ʻIsileli ʻo e kuonga muʻá pea taki atu ai ki he mate ʻa e toko 24,000 ʻi he ki muʻa pē ke nau hū ki he Fonua ʻo e Talaʻofá. (Nomipa 25:​1-9) Ko e moʻoni, ko e kau Kalisitiane faihala ʻoku nau fakahaaʻi ʻa e fakatomala moʻoní ʻoku nau maʻu ʻa e tokoni ʻofa koeʻuhi ke toe fakafoʻou fakalaumālie ai. Ka ko e kau faiangahala taʻefakatomalá ʻo hangē ko Similai ʻo e kuonga muʻá, ʻoku nau hoko ʻo fakatuʻutāmaki ki he lelei fakaeʻulungāanga mo fakalaumālie ʻa e niʻihi kehé. (Nomipa 25:14) ʻI he hangē ko e kau sōtia ʻi ha fālengi ʻa ia kuo nau lī ʻenau ngaahi paá, ʻoku nau fakaeʻa atu ai ʻo ʻikai ko kinautolu pē ki he maumaú kae toe pehē foki ki honau ngaahi kaungāmeʻá.

Ko ia ai, ko e fekau ʻa e Tohi Tapú: “Ka ai ha toko taha ʻi he kau lotu ʻoku feʻauaki, pe manumanu, pe lotu ki he aitoli, pe kapekape, pe faʻa konā, pe fai fakamalohi, ke ʻoua te mou feʻiloaki mo ha toko taha pehe, ʻio, pea ʻoua naʻa keinanga mo ia. . . . ke mou kapusi ʻa e tangata fai kovi meiate kimoutolu.” (1 Kolinito 5:​11, 13) ʻIkai ʻokú ke loto-tatau ko e “folofola” fakapotopoto ko ení ʻoku tokoni ia ke maluʻi ʻa e tuʻunga maʻa fakaeʻulungāanga mo fakalaumālie ʻo e fakatahaʻanga Kalisitiané?

ʻI he kehekehe lahí, ko e ngaahi siasi lahi ʻo e Puleʻanga-Haʻa-Kalisitiané pea pehē ki he kau tafoki mei he moʻoní ʻoku nau vakai kuo ʻosi ʻa e kuonga ia ʻo e ngaahi konga ko ē ʻo e Tohi Tapú ʻa ia ʻoku fepaki mo e ngaahi fakakaukau tauʻatāina fakaeonopooni ki he tuʻunga fakaeʻulungāangá.  Ko ia ai, ʻoku nau fakatonuhiaʻi ʻa e ngaahi founga kotoa pē ʻo e angahala mamafá, naʻa mo e ʻi he lotolotonga ʻo e haʻa faifekaú. (2 Timote 4:​3, 4) Kae kehe, fakatokangaʻi ange, ko e Palovepi 30:​5, ʻa ia ʻoku toe lave ai ki he “folofola” ʻa Sihová ʻoku hangē ha fakauú, ʻoku hoko atu ai ʻa e fekau ʻi he Pa 30 veesi 6: “ʻOua te ke fakalahi ki heʻene ngaahi lea [ʻa e ʻOtuá]; naʻa ne fakamaauʻi koe, pea ke ha ko e loi.” ʻIo, ko e faʻahinga ʻoku nau liliu hala ʻa e Tohi Tapú ko e kau loi fakalaumālie moʻoni kinautolu—ko e ngaahi loi fakahalaiaʻi tahá ia! (Mātiu 15:​6-9) Ko ia, tuku ke tau houngaʻia moʻoni leva ke hoko ko e konga ʻo ha kautaha ʻa ia ʻoku ʻapasia loloto ki he Folofola ʻa e ʻOtuá.

Maluʻi ʻe ha “Ngangatu”

Koeʻuhi ko e kakai ʻa e ʻOtuá ʻoku nau pipiki ki he Tohi Tapú pea vahevahe atu ʻa ʻene pōpoaki fakafiemālié ki he niʻihi kehé, ʻoku nau tuku atu ai ha “ngangatu” hangē ko ha ʻinisēnisi ʻo e moʻuí ʻa ia ʻoku ʻoatu ai ʻa e fiefia kia Sihova. Ka ki he faʻahinga taʻemāʻoniʻoní, ko e faʻahinga ʻoku ʻanautolu ʻa e pōpoaki ko iá ʻoku nau tuku atu ai, fakatatau ki he liliu ʻa J. B. Phillips, “ʻa e nanamu fakamate ʻo e mala.” ʻIo, ko e ongoʻanga fakaefakatātā ʻa e fulikivanú ki he nāmuʻí kuo mātuʻaki mioʻi ia ʻe he fokotuʻutuʻu ʻo e ngaahi meʻa ʻa Sētané ʻo nau ongoʻi taʻefiemālie ai pe aʻu ʻo fakafili ʻi he ʻi ai ʻa e faʻahinga ʻoku nau tuku atu ʻa e ‘ngangatu ʻo Kalaisí.’ ʻI he tafaʻaki ʻe tahá, ko e faʻahinga ko ē ʻoku nau fakamafola faivelenga atu ʻa e ongoongo leleí ʻoku nau hoko ai ko ha ‘ngangatu kinautolu ʻo Kalaisi ʻiate kinautolu ʻoku fakatau ki he moʻuí.’ (2 Kolinito 2:​14-16) Ko e faʻahinga loto-totonu peheé ʻoku nau faʻa fakaliliʻa ʻi he mālualoi mo e ngaahi loi fakalotu ʻa ia ʻoku fakamatalaʻiʻaki ʻa e lotu loí. Ko ia ai, ʻi he taimi ʻoku tau fakaava ai ʻa e Folofola ʻa e ʻOtuá pea vahevahe kia kinautolu ʻa e pōpoaki ʻo e Puleʻangá, ʻoku nau ongoʻi tohoakiʻi ai kia Kalaisi pea nau loto ke ako lahi ange.—Sione 6:44.

Ko ia, ʻoua ʻe ongoʻi loto-siʻi ʻi he taimi ʻoku ʻikai tali lelei ai ʻa e niʻihi ki he pōpoaki ʻo e Puleʻangá. ʻI hono kehé, vakai ki he ‘ngangatu ʻo Kalaisí’ ʻi he tuʻunga ko ha founga ʻo e maluʻi fakalaumālié ʻokú ne talitekeʻi ʻa e faʻahinga tāutaha tokolahi ko ia ʻoku lava ke nau hoko ʻo fakatupu maumaú mei he tofiʻa fakalaumālie ʻa ia ʻoku nofoʻi ʻe he kakai ʻa e ʻOtuá, lolotonga iá ʻoku fakamānako ia ki he faʻahinga ʻoku nau maʻu ʻa e loto leleí.—Aisea 35:​8, 9.

Koeʻuhi ko e kau sōtia Kalisi ʻi Malafoní naʻa nau laka vāofi ʻaupito pea pikiʻaki honau mālohí kotoa ki honau ngaahi paá, naʻa nau ikuna neongo ʻa e ngaahi tuʻunga taulōfuʻu kehekehe. ʻI he tuʻunga tatau, ko e Kau Fakamoʻoni mateaki ʻa Sihová ʻoku fakapapauʻi kia kinautolu ʻa e ikuna fakaʻaufuli ʻi heʻenau faitau fakalaumālié, he ko ia ʻa honau “ʻinasi [tukufakaholó].” (Aisea 54:17) Ko ia ai, tuku ke tau hokohoko atu taki taha ke fakaū ʻia Sihova ʻaki hono tauhi maʻu ha “takiloa atu ʻa e folofola ʻo e moʻui.”—Filipai 2:16.

[Fakatātā ʻi he peesi 31]

‘Ko e poto ʻoku mei ʻolungá, ko hono angá ko e maʻa, pea hoko ai mo ʻene fakamelino’