Foaki ʻOkú Ne ʻOmai ʻa e Fiefiá

KO Genival, ʻa ia ʻoku nofo ʻi ha kolo masiva ʻi he fakatokelau hahake ʻo Pelēsilá, naʻá ne tauhi ʻa hono uaifí mo e fānaú ʻaki ʻa e kiʻi vahe siʻisiʻi naʻá ne maʻu ʻi he tuʻunga ko ha tokotaha leʻo ʻi ha falemahaki. Neongo ʻa ʻene faingataʻaʻiá, naʻe foaki loto-tōnunga ʻe Genival ʻa ʻene vahe hongofulú. “ʻI he taimi ʻe niʻihi naʻe fiekaia ʻa hoku fāmilí,” ko ʻene manatú ia lolotonga ʻene mili ʻa hono keté, “ka naʻá ku loto ke foaki ki he ʻOtuá ʻa ʻeku lelei tahá, ʻo tatau ai pē pe ko e hā ʻa e feilaulau naʻe fiemaʻú.”

Hili ʻa e mole ʻa ʻene ngāué, naʻe kei tauhi pē ʻe Genival ʻa ʻene vahe hongofulú. Naʻe fakaʻaiʻai ia ʻe heʻene faifekaú ke ne ʻahiʻahiʻi ʻa e ʻOtuá ʻaki ʻa e fai ha fuʻu tokoni lahi. Naʻe fakapapauʻi ange ʻe he faifekaú kuo pau ke huaʻi mai ʻe he ʻOtuá ha tāpuaki lahi. Ko ia naʻe fili ai ʻa Genival ke fakatau atu hono ʻapí pea foaki ʻa e paʻanga ko iá ki he siasí.

ʻOku ʻikai ko Genival pē ʻa e tokotaha ʻoku foaki loto-moʻoni peheé. Ko e kakai masiva ʻangoʻango tokolahi ʻoku nau foaki fakafatongia ʻa e vahe hongofulú koeʻuhi ʻoku akoʻi kinautolu ʻe honau ngaahi siasí ko e vahe hongofulú ko ha fiemaʻu faka-Tohitapu. ʻOku moʻoni ia?

Vahe Hongofulú mo e Laó

Ko e fekau ke vahe hongofulú ko e konga ia ʻo e Lao naʻe foaki ʻe Sihova ko e ʻOtuá ki he matakali ʻe 12 ʻo ʻIsileli ʻo e kuonga muʻá laka hake he taʻu ʻe 3,500 kuo maliu atú. Naʻe tuʻutuʻuni ʻi he Lao ko iá ke foaki ʻa e vahe hongofulu ʻo e fua ʻo e fonuá mo e ngaahi ʻakau fuá pea mo e vahe hongofulu ʻo e tupu ʻi he fanga monumanú ki he matakali Līvaí ʻi hono tokoniʻi ʻenau ngaahi ngāue ʻi he tāpanekalé.​—Livitiko 27:​30, 32; Nomipa 18:​21, 24.

Naʻe fakapapauʻi ʻe Sihova ki he kau ʻIsilelí ko e Laó ‘ʻe ʻikai faingataʻa fau ia kiate kinautolu.’ (Teutalonome 30:11) Kehe pē ke nau tauhi loto-tōnunga ʻa e ngaahi fekau ʻa Sihová, ʻo kau ai ʻa e vahe hongofulú, naʻá ne talaʻofa kia kinautolu ha utu-taʻu lahi. Pea ʻi he tuʻunga ko ha maluʻi ʻi ha nounoú, naʻe tuku mavahe maʻu pē, ha toe vahe hongofulu fakataʻu, ke ngāueʻaki anga-maheni ʻi he taimi naʻe fakataha ai ʻa e puleʻangá ki heʻene ngaahi kātoanga fakalotú. Ko ia ai, ko e ‘mulí, mo e tamaimaté, mo e uitoú’ te nau kai ke makona.—Teutalonome 14:​28, 29; 28:​1, 2, 11-14.

Naʻe ʻikai fakahaaʻi pau ʻe he Laó ia ha tautea ʻi he taʻelava ʻa e vahe hongofulú, ka ko e tokotaha ʻIsileli taki taha naʻe ʻi he malumalu ia ʻo ha fatongia mamafa totonu ke ne poupouʻi ʻa e lotu moʻoní ʻi he foungá ni. Ko hono moʻoní, naʻe tukuakiʻi ʻe Sihova ʻa e kau ʻIsileli naʻa nau liʻaki ʻa e vahe hongofulú ʻi he ʻaho ʻo Malakaí ki he ‘kaihaʻa meiate ia ʻi he ngaahi vahe hongofulú mo e ngaahi foakí.’ (Malakai 3:​8, New International Version) ʻE lava ke fakahanga ʻa e tukuakiʻi tatau ki he kau Kalisitiane ʻoku ʻikai te nau vahe hongofulú?

Sai, fakakaukau angé. Ko e ngaahi lao fakapuleʻangá ʻoku ʻikai faʻa ʻaonga ia ʻi ha fonua ʻe taha. Ko e fakatātaá, ko e lao ʻokú ne fakafatongiaʻi ʻa e kau heka meʻalele ʻi Pilitāniá ke nau fakaʻuli ʻi he toʻohemá ʻoku ʻikai ngāueʻaki ia ki he kau fakaʻuli ʻi Falaniseé. ʻI he tuʻunga tatau, ko e lao naʻe fiemaʻu ai ʻa e vahe hongofulú ko e konga ia ʻo ha fuakava ʻataʻatā pē ʻi he vahaʻa ʻo e ʻOtuá mo e puleʻanga ʻIsilelí. (Ekisoto 19:​3-8; Sāme 147:​19, 20) Ko e kau ʻIsilelí pē naʻe haʻihaʻi ʻe he lao ko iá.

Tānaki atu ki ai, neongo ko e moʻoni ʻoku ʻikai ʻaupito ke liliu ʻa e ʻOtuá, ʻoku pehē ʻi he taimi ʻe niʻihi ʻa ʻene ngaahi fiemaʻú. (Malakai 3:6) ʻOku fakahaaʻi hangatonu ʻe he Tohitapú ko e pekia fakaefeilaulau ʻa Sīsū, ʻi he 33 T.S., naʻe “tamateʻi,” pe “fakakaʻanga” ai ʻa e Laó, pea fakataha mo ia ʻa e “tuʻutuʻuni fakalao ke toʻo ʻa e vahehongofulu.”—Kolose 2:​13, 14; Efeso 2:​13-15; Hepelu 7:​5, 18.

Foaki Faka-Kalisitiané

Kae kehe, ko e ngaahi tokoni ke poupouʻi ʻa e lotu moʻoní naʻe kei fiemaʻu pē ia. Naʻe fekauʻi ʻe Sīsū ʻa ʻene kau ākongá ‘ke nau hoko ko e kau fakamoʻoni, ʻo aʻu ki he ngataʻanga ʻo māmaní.’ (Ngāue 1:8) ʻI he tupulaki ʻa e tokolahi ʻo e kau tuí,  ko e tupulaki ai pē ia mo e fiemaʻu ki he kau faiako mo e kau ʻovasia Kalisitiané ke nau ʻaʻahi ʻo fakaivimālohiʻi ʻa e ngaahi fakatahaʻangá. Ko e kau uitoú, kau paeá, mo e faʻahinga masiva kehé naʻe pau ke tokangaʻi kinautolu ʻi ha ngaahi taimi. Naʻe anga-fēfē hono feau ʻe he kau Kalisitiane ʻi he ʻuluaki senitulí ʻa e fakamole naʻe kau ki aí?

ʻI he 55 T.S. nai, naʻe fai ai ha kole ki he kau Kalisitiane Senitaile ʻi ʻIulope mo ʻĒsia Mainá maʻá e fakatahaʻanga masiva ʻi Siuteá. ʻI heʻene ongo tohi ki he fakatahaʻanga ʻi Kolinitoó, ʻoku fakamatalaʻi ai ʻe he ʻapositolo ko Paulá ʻa e anga ʻo e fokotuʻutuʻu ko eni ki he ‘tanaki tokoni ki he kaiga maonioní.’ (1 Kolinito 16:​1, PM) Te ke ʻohovale nai ʻi he meʻa ʻoku fakahaaʻi ʻi he ngaahi lea ʻa Paula fekauʻaki mo e foaki faka-Kalisitiané.

Naʻe ʻikai ke fakalotoʻi ʻe he ʻapositolo ko Paulá ʻa e kaungātuí ke nau foaki. Ko hono moʻoní, ko e kau Kalisitiane Masitōnia ʻa ia naʻa nau “mamahi” pea “ʻangoʻango ʻenau masiva” naʻe pau ke nau ‘kole fakamātoato kiate ia ke ʻofa ʻo tuku ke nau kau ʻi he tokoniʻi ʻo e faʻahinga tapú.’—2 Kolinito 8:​1-4.

Ko e moʻoni, naʻe fakalototoʻaʻi ʻe Paula ʻa e kau Kolinitō naʻe tuʻumālie angé ke nau faʻifaʻitaki ki honau fanga tokoua nima-homo ʻi Masitōniá. Naʻa mo ia, ʻoku pehē ʻe ha tohi maʻuʻanga fakamatala ʻe taha, naʻá ne ‘fakafisi ke tuku atu ha ngaahi tuʻutuʻuni, kae lelei ange ke kole, fokotuʻu, fakalotolahiʻi, pe fakatangi. ʻE mole ʻa e ongoʻi ʻi he lotó mo e māfaná mei he foaki ʻa e kau Kolinitoó kapau naʻe ʻi ai ha fakamālohiʻi.’ Naʻe ʻiloʻi ʻe Paula “ʻoku ʻofa ʻa e ʻOtua ki ha taha ʻoku vekeveke foaki,” ʻo ʻikai ki ha taha ʻoku foaki “ʻi he mamahi, pe ko e puʻia.”—2 Kolinito 9:7.

Ko e tui mo e ʻilo lahí fakataha mo e ʻofa moʻoni ki he kaungā Kalisitiané naʻá ne ueʻi nai ʻa e kau Kolinitoó ke nau foaki ʻi he ongoʻi mei he lotó.​—2 Kolinito 8:​7, 8.

‘Meʻa Kuó Ne Tuʻutuʻuni ʻi Hono Lotó’

ʻI he ʻikai fakahaaʻi pau ha lahi pe ko ha pesetí, naʻe fokotuʻu pē ʻe Paula ʻo pehē “ʻi he ʻuluaki ʻaho ʻo e uike kotoa pē, ko e tokotaha taki taha . . . ʻoku totonu ke ne tuku mavahe ai ha lahi ʻo e paʻangá ʻo fakatatau ki heʻene paʻanga hū maí.” (Fakaʻītali ʻamautolu; 1 Kolinito 16:​2, NIV) ʻI he palani mo e vaheʻi ha lahi ʻo ha meʻa ʻi ha tuʻunga tuʻumaʻú, ʻe ʻikai ongoʻi ai ʻe he kau Kolinitoó ʻoku fakamālohiʻi kinautolu ke foaki ʻi he mamahi pe ʻi ha ueʻi fakafokifā fakaeongo ʻi he aʻu atu ʻa Paulá. Ki he Kalisitiane taki taha, ko e fili ki he lahi ʻo e meʻa ke foakí ko ha meʻa fakatāutaha ia, ko e meʻa ‘kuo ne tuʻutuʻuni ʻi hono lotó.’—2 Kolinito 9:​5, 7.

Koeʻuhi ke utu lahi, naʻe pau ki he kau Kolinitoó ke nau tūtuuʻi lahi. Naʻe ʻikai ʻaupito fai ha fokotuʻu ke foaki ʻo fakalaka ʻi he malavá. ‘Talaʻehai ko ʻeku fai ʻení ke mou mafasia ai,’ ko e fakapapauʻi ia ʻe Paula kia kinautolú. Ko e ngaahi tokoní naʻe ‘fakafuofua ʻaki ʻa e meʻa naʻe maʻu ʻe ha tokotaha, ʻo ʻikai ʻaki ʻa e meʻa naʻe ʻikai te ne maʻú.’ (2 Kolinito 8:​12, 13; 9:6) ʻI ha tohi ki mui, naʻe fakatokanga ai ʻa e ʻapositoló: “Ka ʻo ka ai ha taha ʻoku ʻikai tokanga ki hono . . . famili, ʻoku ne fakaʻikaiʻi ʻene lotu, ʻio, ʻoku ne koviange ʻi ha hiteni.” (1 Timote 5:8) Naʻe ʻikai fakaʻaiʻai ʻe Paula ʻa e foaki naʻá ne maumauʻi ai ʻa e tefitoʻi moʻoni ko ení.

ʻOku mahuʻinga ʻa hono tokangaʻi ʻe Paula ha ‘tokoni ki he faʻahinga tapu’ naʻa nau masivá. ʻOku ʻikai te tau lau ʻi he ngaahi Konga Tohitapú ʻo  fekauʻaki mo hano fokotuʻutuʻu ʻe Paula pe ko e kau ʻapositolo kehé ha ngaahi tātānaki pe maʻu ha ngaahi vahe hongofulu ke fakapaʻanga ʻaki ʻenau ngāue fakafaifekau ʻanautolú. (Ngāue 3:6) ʻI he houngaʻia maʻu pē ʻi hono maʻu ʻa e ngaahi meʻaʻofa naʻe ʻoange kiate ia ʻe he ngaahi fakatahaʻangá, naʻe fakaʻehiʻehi fakamātoato ʻa Paula mei hono hilifaki ha “fakamafasia” ki hono fanga tokouá.—1 Tesalonaika 2:9; Filipai 4:​15-18.

Foaki Loto-Fiefoaki he ʻAho Ní

ʻOku hā mahino, lolotonga ʻa e ʻuluaki senitulí, naʻe tōʻongaʻaki ai ʻe he kau muimui ʻo Kalaisí ʻa e foaki loto-fiefoakí, ʻo ʻikai ko e vahe hongofulú. Kae kehe, te ke fifili nai pe ʻoku kei hoko eni ko ha founga ola lelei ke fakapaʻanga ʻaki ʻa hono malangaʻi ʻo e ongoongo leleí pea ke tokangaʻi ʻaki ʻa e kau Kalisitiane ʻoku nau masivá.

Fakakaukau ki he meʻá ni. ʻI he 1879 ko e kau ʻētita ʻo e makasini ko ení naʻa nau fakahaaʻi mahino ʻe “ʻikai ʻaupito te nau kole pe kōlenga ki he tangatá ki ha tokoni.” Kuo taʻofi ʻe he fili ko ení ʻa e ngaahi ngāue ʻa e Kau Fakamoʻoni ʻa Sihová ke fakamafola ʻa e moʻoni faka-Tohitapú?

ʻI he lolotongá ni, ʻoku tufaki ai ʻe he Kau Fakamoʻoní ʻa e ngaahi Tohitapu, ngaahi tohi faka-Kalisitiane, mo e ʻū tohi kehe ʻi he fonua ʻe 235. Ko e Taua Leʻo, ko ha makasini fakaeako Tohitapu, naʻe ʻuluaki tufaki fakamāhina ʻi he tatau ʻe 6,000 ʻa ia naʻe pulusi ʻi he lea ʻe taha. Talu mei ai kuo hoko ia ko ha makasini ʻo tuʻo ua he māhina fakataha mo hono pulusi ʻo e tatau laka hake he 24,000,000 ʻo ala maʻu ʻi he lea ʻe 146. Ke fokotuʻutuʻu ʻenau ngāue fakaeako Tohitapu ʻi he kolopé, kuo langa ai pe maʻu ʻe he Kau Fakamoʻoní ʻa e ngaahi senitā fakahoko ngāue ʻi he fonua ʻe 110. Tānaki atu ki ai, kuo nau langa ʻa e ngaahi feituʻu faiʻanga fakataha fakalotofonua ʻe laui afe pea pehē ki he ngaahi holo ʻasemipilī lalahi ke fakanofoʻanga ai ʻa e faʻahinga ʻoku nau mahuʻingaʻia ʻi hono maʻu ʻa e fakahinohino faka-Tohitapu lahi angé.

Lolotonga ko ha meʻa muʻomuʻa ʻa hono tokangaʻi ʻa e ngaahi fiemaʻu fakalaumālie ʻa e kakaí, ʻoku ʻikai ke liʻaki ʻe he Kau Fakamoʻoni ʻa Sihová ʻa e ngaahi fiemaʻu fakamatelie ʻa e kaungātuí. ʻI he faingataʻaʻia ʻa honau fanga tokouá ʻi he ngaahi nunuʻa ʻo e taú, ngaahi mofuiké, laʻalaʻaá,  mo e ngaahi afaá, ʻoku nau fakavave ke tokonaki ki ai ʻa e ngaahi tokoni fakafaitoʻo, meʻakai, vala mo e ngaahi fiemaʻu kehé. ʻOku fakapaʻanga eni ʻe he ngaahi tokoni ʻoku fai ʻe he kau Kalisitiane tāutaha pea mo e ngaahi fakatahaʻangá.

ʻI heʻene hoko ʻo ola leleí, ko e tokoni ʻo makatuʻunga ʻi he loto-fiefoakí ʻoku toʻo ai ʻa e kavenga mei he uma ʻo e faʻahinga ʻoku masivá, hangē ko Genival, naʻe lave ki ai ki muʻá. Ko e meʻa mālié, ki muʻa ke lava ʻo ne fakatau atu ʻa hono ʻapí, naʻe ʻaʻahi atu ai kia Genival ʻa Maria, ko ha faifekau taimi-kakato ʻa e Kau Fakamoʻoni ʻa Sihová. “Naʻe hanga ʻe he fetalanoaʻaki ko iá ʻo fakahaofi ʻa hoku fāmilí mei ha faingataʻa lahi naʻe ʻikai fiemaʻu,” ko e manatu ia ʻa Genival.

Naʻe ʻiloʻi ai ʻe Genival ko e ngāue ʻa e ʻEikí ʻoku ʻikai fakatuʻunga ia ʻi he ngaahi vahe hongofulú. Ko hono moʻoní, ko e vahe hongofulú ʻoku ʻikai kei hoko ia ko ha fiemaʻu Fakatohitapu. Naʻá ne ʻiloʻi ai ʻoku tāpuakiʻi ʻa e kau Kalisitiané ʻi heʻenau foaki nima-homó ka ʻoku ʻikai fakafatongiaʻi kinautolu ke nau foaki ʻo laka ia ʻi he meʻa ʻoku nau maʻú.

Ko hono fai ʻa e foaki loto-fiefoakí kuó ne ʻomai kia Genival ʻa e fiefia moʻoni. ʻOkú ne fakahaaʻi ia ʻo peheni: “Te u foaki pe ʻikai foaki nai ha peseti ʻe 10, ka ʻoku ou fiefia ʻi heʻeku tokoní, pea ʻoku ou fakapapauʻi ʻoku fiefia foki ai mo Sihova.”

[Puha/Fakatātā ʻi he peesi 6]

Naʻe Akoʻi ʻe he Muʻaki Ngaahi Tamai Fakasiasí ʻa e Vahe Hongofulú?

“Ko e kau koloaʻia ʻi hotau lotolotongá ʻoku nau tokoniʻi ʻa e masivá . . . Ko kinautolu ʻoku nau tuʻumālie, mo loto-leleí, ʻoku nau foaki ʻa e meʻa ʻoku fakakaukau ʻa e tokotaha taki taha ʻoku feʻungamālié.”​—The First Apology, Sasitini Maʻata, 150 T.S. nai.

“Naʻe fakatapui moʻoni ʻe he kau Siú ʻa e ngaahi vahe hongofulu ʻo ʻenau koloá kiate Ia, ka ko e faʻahinga kuo nau maʻu ʻa e tauʻatāiná ʻoku nau vaheʻi ʻa e kotoa ʻo ʻenau koloá ki he ngaahi taumuʻa ʻa e ʻEikí, . . . hangē ko e ngāue ʻa e uitou masiva ko ia naʻá ne lī kotoa ʻene moʻuí ki he tukuʻanga meʻaʻofa ʻa e ʻOtuá.”​—Against Heresies, ʻIleniasi, 180 T.S. nai.

“Neongo ʻoku ʻi ai ʻetau puha tukuʻanga meʻaʻofa, ʻoku ʻikai faʻuʻaki ia ha paʻanga ke fakatau mai ʻaki ʻa e fakamoʻuí, ʻo hangē ia ha lotu ʻoku ʻi ai hano totongí. ʻI he ʻaho ʻe taha he māhina, kapau te ne saiʻia ai, ʻoku tuku ai ki he puha tukuʻanga meʻaʻofá ʻe he tokotaha taki taha ha kiʻi tokoni; ʻo kapau pē ʻokú ne fiefia ai, pea kapau pē ʻokú ne malava: he ʻoku ʻikai ha fakapuʻia; ʻoku fai loto-fiefoaki kotoa pē.”​—Apology, Tetuliane, 197 T.S. nai.

“ʻI he lahi ʻa e Siasí pea malanga hake ʻa e ngaahi kautaha kehekehé, naʻe hoko ai ʻo fiemaʻu ke faʻu ha ngaahi lao ʻa ia ʻe fakapapauʻi ai ʻa hono tokoniʻi totonu mo tuʻumaʻu ʻo e haʻa faifekaú. Ko e totongi ʻo e ngaahi vahe hongofulú naʻe ohi mai ia mei he Lao Motuʻá . . . Ko e fuofua lao pau ʻi he kaveingá ʻoku hā naʻe ʻi he tohi ia ʻa e kau pīsope naʻa nau fakatahataha ʻi Tours ʻi he 567 pea mo e [ʻū lao] ʻi he Kosilio ʻi Macon ʻi he 585.”​—The Catholic Encyclopedia.

[Maʻuʻanga ʻo e Tā]

Koini, toʻohema ʻi ʻolungá: Pictorial Archive (Near Eastern History) Est.

[Fakatātā ʻi he peesi 4, 5]

Ko e foaki loto-fiefoakí ʻoku ʻomai ai ʻa e fiefia

[Fakatātā ʻi he peesi 7]

Ko e ngaahi tokoni loto-fiefoakí ʻoku fakapaʻanga ʻaki ʻa e ngāue fakamalangá, tokoni fakavavevavé mo e langa ʻo e ngaahi feituʻu faiʻanga fakatahá