1, 2. (a) Ko e hā ʻa e fakakaukau kehekehe ʻoku maʻu ʻe he kakaí fekauʻaki mo e tauʻatāina ke filí? (e) Ko e hā ʻoku akoʻi mai ʻe he Tohi Tapú fekauʻaki mo ʻetau tauʻatāina ke filí, pea ko e hā ʻa e ngaahi fehuʻi te tau lāulea ki aí?

 ʻI HONO fai ha fili fakafoʻituitui, naʻe tala ange ʻe ha fefine ʻe taha ki hano kaumeʻa: “ʻOua te ke ʻai ke u fakakaukaú; tala mai pē ʻa e meʻa ke u faí. ʻOku faingofua ange ia.” Naʻe loto ʻa e fefiné ke tala ange ʻa e meʻa ke ne faí kae ʻikai ke ne ngāueʻaki ʻene tauʻatāina ke filí, ʻa e meʻaʻofa maʻongoʻonga mei hono Tokotaha-Fakatupú. Kae fēfē koe? ʻOkú ke saiʻia ke fai hoʻo ngaahi filí, pe ʻokú ke loto ke fai atu ia ʻe he niʻihi kehé maʻau? ʻOku anga-fēfē hoʻo vakai ki he tauʻatāina ke filí?

² ʻOku kehekehe ʻa e fakakaukau ʻa e kakaí fekauʻaki mo e tauʻatāina ke filí. ʻOku pehē ʻe he niʻihi ʻoku ʻikai ke ʻi ai ha meʻa ia ko e fili tauʻatāina koeʻuhí kuo ʻosi fai kotoa ʻe he ʻOtuá ia ʻa e fili ki heʻetau ngaahi ngāué. ʻOku pehē ʻe he niʻihi ʻoku toki malava pē ʻa e tauʻatāina ke filí kapau te tau maʻu ʻa e tauʻatāina kakató. Kae kehe, ʻoku akoʻi mai ʻe he Tohi Tapú naʻe fakatupu kitautolu fakataha mo e malava pea mo e tauʻatāina ke fai fakapotopoto ʻetau ngaahi fili fakafoʻituituí. (Lau ʻa e Siosiua 24:15.) ʻI he Tohi Tapú, ʻoku tau toe maʻu ai ʻa e tali ki he ngaahi fehuʻi ko ení: ʻOku fakangatangata pē ʻetau tauʻatāina ke filí? ʻOku totonu ke fēfē ʻetau ngāueʻaki ʻetau tauʻatāiná ke fai ha ngaahi fili? ʻOku anga-fēfē hono fakahaaʻi ʻe heʻetau ngaahi filí ʻa e lahi ʻetau  ʻofa moʻoni kia Sihová? ʻE lava fēfē ke tau fakahaaʻi ʻa e fakaʻapaʻapa ki he fili ʻa e niʻihi kehé?

3. ʻOku anga-fēfē hono ngāueʻaki ʻe Sihova ʻene tauʻatāina kakató?

³ ʻOku maʻu ʻe Sihova ʻa e tauʻatāina kakató, pea ʻe lava ke tau ako mei he founga ʻo ʻene ngāueʻaki ʻa e tauʻatāiná. Ko e fakatātaá, naʻe fili ʻe Sihova ʻa e puleʻanga ʻIsilelí ke hoko ko ʻene kakai, “ko ʻene koloa kanokato [pe makehe].” (Teu. 7:6-8) Naʻe ʻi ai ʻene ʻuhinga ki hono fai ʻa e fili ko iá. Naʻe loto ʻa Sihova ke fakahoko ʻene talaʻofa naʻá ne fai ki hono kaumeʻa ko ʻĒpalahamé. (Sēn. 22:15-18) Tānaki atu ki aí, ʻoku ʻofa mo taʻefilifilimānako maʻu pē ʻa Sihova ʻi he taimi ʻokú ne ngāueʻaki ai ʻene tauʻatāiná. ʻE lava ke tau sio ki he ʻofa ko iá ʻi he founga ʻo ʻene akonekina ʻa e kau ʻIsilelí ʻi heʻenau talangataʻa kiate iá. ʻI he taimi naʻa nau fakatomala moʻoni ai ʻi he meʻa naʻa nau faí, naʻe ʻofa mo meesi ʻa Sihova kia kinautolu. Naʻá ne pehē: “Te u faitoʻo ʻenau fakaholomui, te u ʻofa fie ʻofa kiate kinautolu.” (Hōs. 14:4) Naʻe fokotuʻu ʻe Sihova ha faʻifaʻitakiʻanga lelei maʻa kitautolu ʻi heʻene ngāueʻaki ʻene tauʻatāiná ke tokoniʻi ʻa e niʻihi kehé!

4, 5. (a) Ko hai naʻá ne ʻuluaki maʻu ʻa e meʻaʻofa ʻa e ʻOtuá ko e tauʻatāina ke filí, pea naʻe anga-fēfē ʻene ngāueʻaki iá? (e) Ko e hā ʻa e fehuʻi kuo pau ke tau ʻeke hifo kiate kitautolu taki taha?

⁴ Naʻe fili ʻa Sihova ke ne fakatupu ʻa e kau ʻāngeló mo e faʻahinga ʻo e tangatá mo ha tauʻatāina ke fili. Ko e ʻuluaki fakatupu ʻa Sihová ko Sīsū. Naʻe fakatupu ia ʻi he ʻīmisi ʻo e ʻOtuá pea mo ha tauʻatāina ke fili. (Kol. 1:15) Kuo anga-fēfē hono ngāueʻaki ʻe Sīsū ʻene tauʻatāiná? Ki muʻa ke ne haʻu ki he māmaní, naʻe fili ʻa Sīsū ke nofoʻaki mateaki ki he ʻOtuá pea ʻikai kau mo Sētane ʻi he angatuʻú. ʻI he haʻu ʻa Sīsū ki he māmaní, naʻá ne fai ʻa e fili ke talitekeʻi ʻa e ngaahi ʻahiʻahi ʻa Sētané. (Māt. 4:10) Pea ʻi he pō ki muʻa ʻi heʻene pekiá, naʻe fakapapauʻi ange ʻe Sīsū ki heʻene Tamaí naʻá ne loto ke fai Hono finangaló. Naʻá ne pehē: “Tamai, kapau ko ho lotó ia, toʻo ʻa e ipú ni meiate au. Ka neongo ia, tuku ke ʻoua naʻa fai ki hoku lotó ka ki hoʻoú pē.” (Luke 22:42) ʻOku malava moʻoni ke tau faʻifaʻitaki kia Sīsū pea ngāueʻaki ʻetau tauʻatāina ke filí ke fakalāngilangiʻi ʻa Sihova pea fai hono finangaló?

⁵ ʻIo, ʻe lava ke tau faʻifaʻitaki kia Sīsū koeʻuhí naʻe ngaohi foki mo kitautolu ʻi he ʻīmisi ʻo e ʻOtuá. (Sēn. 1:26) Kae kehe, ʻoku ʻikai ke tau maʻu ʻa e tauʻatāina kakato ʻoku maʻu ʻe Sihová. ʻOku fakamatalaʻi ʻe he Folofola ʻa e ʻOtuá kuo fokotuʻu ʻe Sihova ʻa e fakangatangata ki heʻetau tauʻatāiná pea ʻokú ne ʻamanekina ke tau tali ʻa e ngaahi fakangatangata ko iá. Ko e fakatātaá, ʻi he lotoʻi fāmilí, ʻoku totonu ke hoko ʻa e ngaahi uaifí ʻo anganofo ki honau ngaahi husepānití, pea ko e fānaú ke nau talangofua ki heʻenau ngaahi mātuʻá. (ʻEf. 5:22; 6:1) ʻOku anga-fēfē kaunga ʻa e ngaahi fakangatangata ko iá ki he anga ʻetau ngāueʻaki ʻetau tauʻatāina ke filí? Ko e tali ki he fehuʻi ko iá ʻe lava ke fakapapauʻi ai hotau kahaʻu taʻengatá.

6. ʻOmai ha fakatātā ʻoku fakahaaʻi ai ʻa e ʻuhinga ʻoku mahuʻinga ai ke ʻi ai ha fakangatangata ki heʻetau tauʻatāiná.

⁶ ʻE lava ke hoko ʻa e tauʻatāina fakangatangatá ko e tauʻatāina moʻoni? ʻIo, ʻe lava! Ko e hā hono ʻuhingá? Koeʻuhí ʻe lava ke maluʻi kitautolu ʻe he ngaahi fakangatangatá. Ko e fakatātaá, ʻoku tau fili nai ke fakaʻuli ki ha kolo mamaʻo. Kae sioloto atu ʻoku ʻikai ha lao ia ki he halá, pea ʻe lava ke fili ʻa e tokotaha kotoa ʻa e vave mo e tafaʻaki ʻo e halá ʻokú ne fie lele aí. Te ke ongoʻi malu ʻi he fononga ʻi he hala ko iá? ʻIkai ʻaupito. ʻOku fiemaʻu ʻa e fakangatangata kae maʻu ʻaonga ʻa e tokotaha kotoa mei he tauʻatāina moʻoní. Tau vakai angé ki he niʻihi ʻo e ngaahi faʻifaʻitakiʻanga Fakatohitapu ʻoku fakahaaʻi ai ʻa e lava ke ʻaonga kia kitautolu ʻa e ngaahi fakangatangata naʻe fokotuʻu ʻe Sihová.

7. (a) Ko e hā ʻa e faikehekehe ʻe taha ʻi he vahaʻa ʻo ʻĀtama mo e fanga manú? (e) Fakamatalaʻi ʻa e founga ʻe taha naʻe ngāueʻaki ai ʻe ʻĀtama ʻene tauʻatāina ke filí.

 ⁷ ʻI he taimi naʻe fakatupu ai ʻe Sihova ʻa e ʻuluaki tangatá, ʻa ʻĀtama, naʻá ne ʻoange kiate ia ʻa e meʻaʻofa tatau naʻá ne ʻoange ki he kau ʻāngeló, ko e meʻaʻofa ʻo e tauʻatāina ke filí. Ka naʻe ʻikai ke ʻoange ʻe he ʻOtuá ki he fanga manú ʻa e tauʻatāina ke filí. Naʻe anga-fēfē hono ngāueleleiʻaki ʻe ʻĀtama ʻene tauʻatāina ke filí? Naʻe fiefia ʻa ʻĀtama ʻi hono fakahingoa ʻa e fanga manú. Ko e ʻOtuá naʻá ne “ʻomi ki he tangata ke vakai pe ko e ha ha hingoa te ne ʻai ki ai.” Hili hono vakaiʻi fakalelei ʻe ʻĀtama ʻa e fanga manu taki taha, naʻá ne ʻoange ki ai ha hingoa lelei. Naʻe ʻikai ke liliu ʻe Sihova ha fili naʻe fai ʻe ʻĀtama. ʻI hono kehé, “ʻilonga ha hingoa ne ʻai ʻe he tangata ki he meʻa moʻui taki taha ko hono hingoa leva ia.”—Sēn. 2:19.

8. Naʻe anga-fēfē hono ngāuekoviʻaki ʻe ʻĀtama ʻene tauʻatāina ke filí, pea ko e hā hono nunuʻá?

⁸ Naʻe ʻoange ʻe Sihova kia ʻĀtama ʻa e fatongia ke ne ngaohi ʻa e māmaní ke hoko ko ha palataisi ʻaki ʻene tala ange kiate ia: “Mo fakatupu, mo fakatokolahi, mo fakafonu ʻa mamani, pea ikuna ia: Pea mo pule ki he ika ʻo e tahi, mo e manupuna ʻo e langi, pea mo e meʻa moʻui kotoa pe ʻoku totolo ʻi he fonua.” (Sēn. 1:28) Ka naʻe fili ʻa ʻĀtama ke ne kai ʻa e fuaʻiʻakau naʻe tapuí, pea ʻi heʻene fai peheé naʻá ne tukunoaʻi ai ʻa e fakangatangata naʻe fokotuʻu ʻe Sihová. Koeʻuhí naʻe ngāuekoviʻaki ʻe ʻĀtama ʻene tauʻatāina ke filí, kuo faingataʻaʻia ai ʻa e faʻahinga ʻo e tangatá ʻi he taʻu eni ʻe laui afe. (Loma 5:12) ʻOfa ke tau manatuʻi ʻa e nunuʻa mafatukituki ʻo e fili naʻe fai ʻe ʻĀtamá. ʻE ueʻi ai kitautolu ke ngāueleleiʻaki ʻetau tauʻatāiná pea tali ʻa e fakangatangata kuo ʻomai ʻe Sihová.

9. Ko e hā ʻa e fili naʻe ʻoange ʻe Sihova ki heʻene kakai ʻIsilelí, pea ko e hā naʻa nau palōmesi ke faí?

⁹ Kuo maʻu tukufakaholo ʻe he kotoa ʻo e faʻahinga ʻo e tangatá ʻa e taʻehaohaoá mo e maté meia ʻĀtama mo ʻIvi. Neongo ia, ʻoku tau kei maʻu ʻa e totonu ke ngāueʻaki ʻa e meʻaʻofa ʻo e tauʻatāina ke filí. ʻE lava ke tau sio ki ai ʻi he anga ʻo e fakafeangai ʻa e ʻOtuá ki he puleʻanga ʻIsilelí. Naʻe ʻoange kia kinautolu ʻe Sihova ʻa e fili pe te nau hoko ko ʻene koloa makehe pe ʻikai. (ʻEki. 19:3-6) Naʻe fili ʻa e puleʻangá ke hoko ko e kakai ʻa e ʻOtuá pea tali ʻa e fakangatangata naʻe fokotuʻu ʻe he ʻOtuá. Naʻa nau pehē: “Ko e meʻa kotoa kuo folofolaʻaki mai ʻe Sihova te mau fai.” (ʻEki. 19:8) Ko e meʻa fakamamahí, naʻe fili ki mui ai ʻa e kakaí ke maumauʻi ʻenau palōmesi kia Sihová. ʻE lava ke tau ako ha lēsoni mahuʻinga mei he faʻifaʻitakiʻanga ko iá. ʻOfa ke tau koloaʻaki maʻu pē ʻetau meʻaʻofa ʻo e tauʻatāina ke filí pea hokohoko atu ke pipiki ofi kia Sihova mo talangofua ki heʻene ngaahi laó.—1 Kol. 10:11.

10. Ko e hā ʻa e ngaahi faʻifaʻitakiʻanga ʻi he Hepelū vahe 11 ʻoku fakamoʻoniʻi ai ʻe lava ke ngāueʻaki ʻe he faʻahinga ʻo e tangata taʻehaohaoá ʻenau tauʻatāina ke filí ke fakalāngilangiʻi ʻa e ʻOtuá? (Sio ki he ʻuluaki fakatātā ʻi he kupú ni.)

¹⁰ ʻI he Hepelū vahe 11, ʻoku tau maʻu ai ʻa e hingoa ʻo e kau tangata mo e kau fefine faitōnunga ʻe toko 16 naʻa nau fili ke fakaʻapaʻapa ki he fakangatangata naʻe fokotuʻu ʻe Sihová. Ko hono olá, naʻa nau maʻu ʻa e ngaahi tāpuaki lahi mo ha ʻamanaki fakaofo ki he kahaʻú. Ko e fakatātaá, ko Noa naʻá ne tui mālohi pea fili ke talangofua ki he ngaahi fakahinohino ʻa e ʻOtuá ke langa ha ʻaʻake ke fakahaofi hono fāmilí tonu mo e toʻutangata ʻi he kahaʻú. (Hep. 11:7) Naʻe talangofua loto-lelei ʻa ʻĒpalahame mo Sela ki he ʻOtuá peá na ʻalu ki he fonua naʻá Ne talaʻofa te ne ʻoange kia kinauá. Neongo naʻá na maʻu ʻa e ‘faingamālie ke na foki’ ki he kolo ko ʻUá, naʻá na tokangataha ki he ngaahi talaʻofa ʻa e ʻOtuá ki he kahaʻú. ʻOku pehē ʻe he Tohi Tapú naʻá na “kakapa atu ki ha feituʻu lelei ange.” (Hep. 11:8, 13, 15, 16) Naʻe talitekeʻi ʻe Mōsese ʻa e ngaahi koloa ʻo ʻIsipité pea fili “ke ngaohikovia ia fakataha mo e kakai ʻa e ʻOtuá kae ʻikai ko e maʻu ʻa e fiefia fakataimi ʻi he angahalá.” (Hep. 11:24-26) ʻOfa ke tau faʻifaʻitaki ki he tui ʻa e kau tangata mo e kau fefine ko iá pea houngaʻia ʻi heʻetau  meʻaʻofa ʻo e tauʻatāina ke filí, ʻo ngāueʻaki ia ke fai ʻa e finangalo ʻo e ʻOtuá.

11. (a) Ko e hā ʻa e taha ʻo e ngaahi tāpuaki lahi taha ʻo e tauʻatāina ke filí? (e) Ko e hā ʻokú ne ueʻi koe ke ke ngāueleleiʻaki hoʻo tauʻatāina ke filí?

¹¹ ʻOku hā ngali faingofua ange nai ke fai ʻe ha taha ha fili maʻa kitautolu, ka heʻikai ʻaupito malava ke tau hokosia ʻa e taha ʻo e ngaahi tāpuaki lahi taha ʻo e tauʻatāina ke filí. Ko e hā ia? ʻOku fakamatalaʻi ia ʻi he Tohi Tapú ʻi he Teutalōnome 30:19, 20. (Lau.) ʻI he veesi 19, ʻoku tau lau ai naʻe ʻoange ʻe he ʻOtuá ki he kau ʻIsilelí ke nau fai ha fili. ʻI he veesi 20, ʻoku tau ako ai naʻe ʻoange ʻe Sihova kia kinautolu ha faingamālie ke fakahaaʻi ai ʻa e lahi ʻo ʻenau ʻofa ʻiate iá. ʻE lava mo kitautolu foki ke tau fili ke lotu kia Sihova. Pea ʻoku tau toe maʻu ha faingamālie makehe ke ngāueʻaki ʻa e meʻaʻofa ʻo e tauʻatāina ke filí ke fakalāngilangiʻi ʻa Sihova pea fakahaaʻi ai ʻa e lahi ʻo ʻetau ʻofa ʻiate iá!

12. Ko e hā kuo pau ke ʻoua ʻaupito te tau ngāueʻaki ki ai ʻetau meʻaʻofa ʻo e tauʻatāina ke filí?

¹² Sioloto atu kuó ke ʻoange ha meʻaʻofa mahuʻinga ki hao kaumeʻa. ʻE fēfē hoʻo ongoʻí kapau naʻá ne lī hoʻo meʻaʻofá ki he vevé, pe toe kovi angé, naʻá ne ngāueʻaki ʻa e meʻaʻofa ko iá ke fakalotomamahiʻi ʻaki ha taha? Te ke ongoʻi loto-mamahi. Kuo ʻomai ʻe Sihova kia kitautolu ʻa e meʻaʻofa ʻo e tauʻatāina ke filí. Ko ia ʻoku pau pē te ne ongoʻi loto-mamahi ʻi he taimi ʻokú ne sio ai ʻoku ngāuekoviʻaki ʻe he kakaí ʻenau tauʻatāiná pea fai ʻa e ngaahi fili kovi pe fakalotomamahiʻi ʻaki ʻa e niʻihi kehé. ʻOku pehē ʻe he Tohi Tapú ʻi he “ngaahi ʻaho fakaʻosí,” ko e tangatá te nau “taʻehoungaʻia.” (2 Tīm. 3:1, 2) Ko ia ʻe lava fēfē ke tau fakahāhā ʻetau houngaʻia ki he meʻaʻofa mahuʻinga ko eni meia Sihová? Pea ʻe lava fēfē ke tau fakaʻehiʻehi mei hono ngāuekoviʻaki iá?

13. Ko e hā ʻa e founga ʻe taha ʻe lava ke tau fakaʻehiʻehi ai mei hono ngāuekoviʻaki ʻetau tauʻatāina faka-Kalisitiané?

¹³ Ko kitautolu kotoa ʻoku tau maʻu ʻa e tauʻatāina ke fili hotau ngaahi kaumeʻá, valá mo e teuteú mo e fakafiefiá. Kae kehe, ʻe lava ke tau ngāueʻaki ʻetau tauʻatāiná ko ha kalofanga ia ke fai ʻa e ngaahi fili ʻoku ʻikai ke hōifua ki ai ʻa e ʻOtuá pe muimui ʻi he tōʻonga ʻo e kakai ʻi he māmaní. (Lau ʻa e 1 Pita 2:16.) ʻI he ʻikai ke ngāueʻaki ʻetau tauʻatāiná ko ha faingamālie ia ke fai ʻa e meʻa ʻoku halá, ʻoku totonu ke tau ngāueʻaki ia ko ha faingamālie ke “fai ʻa e ngaahi meʻa kotoa pē maʻá e lāngilangi ʻo e ʻOtuá.”—1 Kol. 10:31; Kal. 5:13.

14. Ko e hā ʻoku fiemaʻu ai ke tau falala kia Sihova ʻi he taimi ʻoku tau ngāueʻaki ai ʻetau tauʻatāina ke filí?

 ¹⁴ Naʻe pehē ʻe Sihova: “Ko au Sihova ko ho ʻOtua, ʻoku ou ako koe ke fai meʻa ʻaonga, ʻoku ou tataki koe ʻi he hala ʻoku totonu ke ke fou ai.” (ʻAi. 48:17) ʻOku fiemaʻu ke tau falala kia Sihova pea tali ʻa e fakangatangata kuó ne fokotuʻú kae lava ke tau fai ha ngaahi fili lelei. ʻOku tau fakahaaʻi anga-fakatōkilalo ai “ʻoku ʻikai ʻi he tangata hono hala: ʻOku ʻikai ʻi he tangata ʻoku haʻele ke fakaʻuli ʻene ʻalu.” (Sel. 10:23) Naʻe fili ʻe ʻĀtama mo e kau ʻIsileli taʻefaitōnungá ke nau talitekeʻi ʻa e fakangatangata naʻe fokotuʻu ʻe Sihová pea ʻi hono kehé, naʻa nau falala pē kia kinautolu. ʻOfa ke tau ako mei heʻenau faʻifaʻitakiʻanga koví. ʻI he ʻikai ke tau falala pē kiate kitautolú, tau “falala kia Jihova aki [hotau] loto kotoa.”—Pal. 3:5, PM.

15. Ko e hā ʻoku tau ako mei he tefitoʻi moʻoni ʻoku maʻu ʻi he Kalētia 6:5?

¹⁵ Kuo pau ke tau toe fakaʻapaʻapaʻi ʻa e tauʻatāina ʻoku maʻu ʻe he niʻihi kehé ʻi heʻenau fili ʻoku fai ʻi heʻenau moʻuí. Ko e hā hono ʻuhingá? Koeʻuhí ʻoku tau maʻu kotoa ʻa e meʻaʻofa ʻo e tauʻatāina ke filí, ʻoku ʻikai ke tatau maʻu pē ʻa e fili ʻa ha Kalisitiane ʻe toko ua. ʻOku kau heni ʻa e ngaahi fili fekauʻaki mo ʻetau tōʻongá mo e lotú. Manatuʻi ʻa e tefitoʻi moʻoni ʻoku maʻu ʻi he Kalētia 6:5. (Lau.) ʻI heʻetau ʻiloʻi ko ia ʻoku fua ʻe he Kalisitiane taki taha ʻene fili pē ʻaʻana, te tau fakaʻapaʻapaʻi ai ʻa e tauʻatāina ʻoku maʻu ʻe he niʻihi kehé ke ngāueʻaki ʻenau tauʻatāina ke filí.

16, 17. (a) Naʻe anga-fēfē ʻa e hoko ʻa e tauʻatāina ke filí ko ha ʻīsiu ʻi Kolinitō? (e) Naʻe anga-fēfē hono tokoniʻi ʻe Paula ʻa e kau Kalisitiane ko iá, pea ko e hā ʻa e lēsoni ʻoku akoʻi mai heni kia kitautolú?

¹⁶ Tau fakakaukau ki ha faʻifaʻitakiʻanga Fakatohitapu ʻoku fakahaaʻi ai ʻa e ʻuhinga ʻoku fiemaʻu ai ke tau fakaʻapaʻapaʻi ʻa e tauʻatāina ke fili hotau fanga tokouá. Naʻe fekīhiaki ʻa e kau Kalisitiane ʻi he fakatahaʻanga Kolinitoó fekauʻaki mo hono kai ʻo e kakanoʻi manu naʻe feilaulauʻaki nai ki he ngaahi ʻaitolí ka naʻe fakatau atu ia ki mui ai ʻi ha māketi kakanoʻi manú. Naʻe fakaʻatā ʻa e konisēnisi ʻo e kau Kalisitiane ʻe niʻihi ke nau kai ʻa e kakanoʻi manu ko iá koeʻuhí naʻa nau ʻiloʻi naʻe ʻikai haʻane fekauʻaki mo ha ʻaitoli. Kae kehe, ko e faʻahinga naʻa nau lotu ki muʻa ki he ngaahi ʻaitoli ko iá naʻa nau ongoʻi ko hono kai ʻa e kakanoʻi manú ʻe hangē ia ko hono fai ha tōʻonga lotu ki ai. (1 Kol. 8:4, 7) Ko ha palopalema mafatukituki eni naʻe mei malava ke ne fakamavahevaheʻi ʻa e fakatahaʻangá. Naʻe anga-fēfē hono tokoniʻi ʻe Paula ʻa e kau Kalisitiané ke nau fakaleleiʻi ʻa e ʻīsiu mahuʻinga ko ení?

¹⁷ ʻUluakí, naʻe fakamanatu ʻe Paula ki he ongo kulupú fakatouʻosi ʻo pehē naʻe ʻikai ko e meʻakaí ʻe fakaivimālohiʻi ai ʻenau kaumeʻa mo e ʻOtuá. (1 Kol. 8:8) Hokó, naʻe fakatokanga ʻa Paula kiate kinautolu ke ʻoua te nau fakaʻatā ʻenau “totonu ki hono fai ha filí” ke fakalotomamahiʻi ai ʻa e konisēnisi ʻo e faʻahinga ʻoku vaivaí. (1 Kol. 8:9) Ki mui ai, naʻá ne tala ange ki he faʻahinga ʻoku ongongofua honau konisēnisí ke ʻoua te nau fakamāuʻi ʻa e faʻahinga ʻoku nau fili ke kai ʻa e kakanoʻi manu ko iá. (1 Kol. 10:25, 29, 30) Ko ia ʻi he ngaahi tuʻunga mahuʻinga felāveʻi mo e lotú, ʻoku fiemaʻu ki he Kalisitiane taki taha ke ne fai ʻene fili pē ʻaʻana. ʻIkai ʻoku totonu ke tau toe fakaʻapaʻapaʻi ʻa e tauʻatāina hotau fanga tokouá ke fai ʻa e ngaahi fili fakafoʻituitui naʻa mo e fanga kiʻi meʻa īkí?—1 Kol. 10:32, 33.

18. ʻE anga-fēfē hoʻo fakahaaʻi ʻokú ke koloaʻaki ʻa e meʻaʻofa ʻo e tauʻatāina ke filí?

¹⁸ Kuo ʻomai ʻe Sihova ʻa e tauʻatāina ke filí, ʻa ia ʻoku ʻomai ai ʻa e tauʻatāina moʻoní. (2 Kol. 3:17) ʻOku tau koloaʻaki ʻa e meʻaʻofa ko ení koeʻuhí ʻoku fakaʻatā ai kitautolu ke tau fai ʻa e ngaahi fili ʻoku fakahaaʻi ai ʻa e lahi ʻo ʻetau ʻofa kia Sihová. Ko ia, ʻofa ke tau hokohoko atu hono fai ʻa e ngaahi fili ʻoku fakalāngilangiʻi ai ia, pea ʻofa ke tau fakaʻapaʻapaʻi ʻa e totonu ʻa e niʻihi kehé ʻi heʻenau fili ʻa e founga te nau ngāueʻaki ai ʻa e meʻaʻofa mahuʻinga ko ení.