ʻOKU OU fakapapauʻi te ke loto-tatau ʻoku māʻolunga ange, pe lahi mo mālohi ange ʻa e niʻihi kehé ʻia koe mo au. Ko hai te ke pehē ʻoku māʻolunga ange ʻia kitauá?— Ko Sihova ko e ʻOtuá. Fēfē ʻa hono ʻAló, ʻa e Faiako Lahí? ʻOkú ne māʻolunga ange ʻia kitaua?— Ko e moʻoni, ʻoku pehē.

Naʻe nofo ʻa Sīsū mo e ʻOtuá ʻi hēvani. Ko ha ʻAlo laumālie ia pe ko e ʻāngelo. Naʻe ngaohi ʻe he ʻOtuá ha kau ʻāngelo pe ngaahi foha laumālie kehe?— ʻIo, naʻá ne ngaohi ʻa e laui miliona lahi ʻo kinautolu. Ko e kau ʻāngelo ko ení ʻoku nau toe māʻolunga mo ivimālohi ange ʻia kitaua.—Sāme 104:4; Taniela 7:⁠10.

ʻOkú ke manatuʻi ʻa e hingoa ʻo e ʻāngelo naʻe lea kia Melé?— Ko Kepaleli. Naʻá ne tala kia Mele ko ʻene pēpeé ʻe hoko ko e ʻAlo ʻo e ʻOtuá. Naʻe tuku ʻe he ʻOtuá ʻa e moʻui ʻa hono ʻAlo laumālié ʻi loto ʻia Mele koeʻuhi ke lava ʻo fāʻeleʻi mai ʻa Sīsū ko ha pēpē ʻi he māmaní.—Luke 1:​26, 27.

ʻOkú ke tui ki he mana ko iá? ʻOkú ke tui naʻe nofo ʻa Sīsū mo e ʻOtuá ʻi hēvani?— Naʻe pehē ʻe Sīsū naʻá ne nofo ʻi hēvani. Naʻe anga-fēfē ʻa e ʻilo ʻa Sīsū ki he ngaahi meʻa ko iá? Sai, ʻi heʻene kei siʻí, kuo pau pē naʻe tala ʻe Mele kiate ia ʻa e meʻa naʻe leaʻaki ʻe Kepalelí. Pehē foki, ngalingali naʻe tala ʻe Siosefa kia Sīsū ko e ʻOtuá ʻa ʻene Tamai moʻoní.

ʻI he taimi naʻe papitaiso ai ʻa Sīsuú, naʻe aʻu ʻo folofola hifo ʻa e ʻOtuá mei hēvani, ʻo pehē: ‘Ko hoku ʻAló eni.’ (Mātiu 3:​17, PM) Pea ʻi he pō  ki muʻa pea pekiá, naʻe lotu ʻa Sīsū: “ʻAlā Tamai, ke ke fakalangilangiʻi au ʻe koe, he fakataha mo e ʻAfiona, ʻaki ʻa e langilangi naʻa ku maʻu ʻi he teʻeki ke tuʻu ʻa mamani ʻi heʻeku feangai mo ko e.” (Sione 17:⁠5) ʻIo, naʻe kole ʻe Sīsū ke fakafoki hake ia ke toe moʻui ʻi hēvani mo e ʻOtuá. ʻE malava fēfē ke ne moʻui ai?— Kapau pē ʻe toe ʻai ia ʻe Sihova ko e ʻOtuá ko ha tokotaha laumālie taʻehāmai pe ko ha ʻāngelo.

Sai, ʻoku ou fie ʻeke atu kia koe ha fehuʻi mahuʻinga. ʻOku lelei ʻa e kau ʻāngelo kotoa pē? Ko e hā hoʻo fakakaukaú?— Sai, naʻa nau lelei kotoa ʻi ha taimi ʻe taha. Naʻe hoko ení koeʻuhi naʻe fakatupu kinautolu ʻe Sihova pea ko e meʻa kotoa pē ʻokú ne ngaohí ʻoku lelei. Ka neongo ia, ko e tokotaha ʻi he kau ʻāngeló naʻe hoko ia ʻo kovi. Naʻe anga-fēfē ʻa e hoko ʻa e meʻa ko iá?

Ke maʻu ʻa e talí, kuo pau ke ta foki ki he taimi naʻe ngaohi ai ʻe he ʻOtuá ʻa e ʻuluaki tangatá mo e fefiné, ʻa ʻĀtama mo ʻIvi. ʻOku pehē ʻe he kakai ʻe niʻihi ko e talanoa ʻo fekauʻaki mo kinauá ko e foʻi faʻu pē. Ka naʻe ʻilo ʻe he Faiako Lahí ia naʻe moʻoni.

ʻI he taimi naʻe ngaohi ai ʻe he ʻOtuá ʻa ʻĀtama mo ʻIví, naʻá ne tuku kinaua ʻi ha ngoue fakaʻofoʻofa ʻi ha feituʻu naʻe ui ko ʻĪteni. Ko ha paʻake ia, ko ha palataisi. Naʻe mei malava ke na maʻu ha fānau tokolahi, ko ha fāmili tokolahi, pea moʻui ʻi he Palataisí ʻo taʻengata. Ka naʻe ʻi ai ʻa e lēsoni mahuʻinga naʻe fiemaʻu ke na ako. Ko e lēsoni ia naʻá ta ʻosi talanoa ʻo kau ki ai. Ta sio angé pe ʻokú ta manatuʻi ia.

 Naʻe tala ʻe Sihova kia ʻĀtama mo ʻIvi ʻe malava ke na kai ʻa e fuaʻiʻakau kotoa pē naʻá na fiemaʻu mei he ʻuluʻakau ʻi he ngoué. Ka naʻe ʻi ai ʻa e fuʻu ʻakau ʻe taha naʻe pau ke ʻoua te na kai mei ai. Naʻe tala ʻe he ʻOtuá kia kinaua ʻa e meʻa ʻe hokó kapau te na kai mei ai. Naʻá ne pehē: ‘Kuo pau te mo mate.’ (Senesi 2:17) Ko ia, ko e hā ʻa e lēsoni naʻe fiemaʻu ke ako ʻe ʻĀtama mo ʻIví?—

Ko e lēsoni ia ʻo e talangofuá. ʻIo, ʻoku fakatuʻunga ʻa e moʻuí ʻi he talangofua kia Sihova ko e ʻOtuá! Naʻe ʻikai feʻunga kia ʻĀtama mo ʻIvi ke na pehē pē te na talangofua kiate ia. Naʻe pau ke na fakahaaʻi te na fai pehē fakafou ʻi he ngaahi meʻa naʻá na faí. Kapau naʻá na talangofua ki he ʻOtuá, te na fakahaaʻi ai naʻá na ʻofa kiate ia pea fiemaʻu ia ke ne hoko ko hona Pule. Naʻe mei malava leva ai ke na moʻui taʻengata ʻi he Palataisí. Ka ʻo kapau naʻá na kai mei he fuʻu ʻakau ko iá, ko e hā ʻe fakahaaʻi aí?—

ʻE fakahaaʻi ai naʻe ʻikai te na houngaʻia moʻoni ʻi he meʻa naʻe foaki ange ʻe he ʻOtuá maʻanauá. Naʻá ke mei talangofua kia Sihova kapau naʻá ke ʻi ai?— ʻI he ʻuluaki taimí, naʻe fai pehē ʻa ʻĀtama mo ʻIvi. Ka neongo ia, naʻe kākaaʻi ʻa ʻIvi ʻe ha tokotaha naʻe māʻolunga ange ia ʻia kinaua. Naʻá ne ʻai ia ke ne talangataʻa kia Sihova. Ko hai ʻa e tokotaha ko iá?—

 ʻOku pehē ʻe he Tohitapú naʻe lea ha ngata kia ʻIvi. Ka, ʻokú ke ʻilo ʻe koe ia ʻoku ʻikai lava ha ngata ke lea. Ko ia naʻe anga-fēfē ʻa ʻene malava ke leá?— Naʻe hanga ʻe ha ʻāngelo ʻo ʻai ke hangē ko e ngatá naʻe leá. Ka ko e ʻāngeló moʻoni ia naʻe leá. Naʻe ʻosi kamata ke fakakaukau ʻa e ʻāngeló ia ki ha ngaahi meʻa kovi. Naʻá ne fiemaʻu ʻa ʻĀtama mo ʻIvi ke na lotu ange kiate ia. Naʻá ne fiemaʻu kinaua ke na fai ki he ngaahi meʻa naʻá ne talá. Naʻe loto ia ke ne maʻu ʻa e tuʻunga ʻo e ʻOtuá.

Ko ia, naʻe ʻai ʻe he ʻāngelo kovi ko iá ha ngaahi fakakaukau hala ki he ʻatamai ʻo ʻIví. Fakafou ʻi he ngatá, naʻá ne pehē kiate ia: ‘Naʻe ʻikai tala atu ʻe he ʻOtuá kia kimoua ʻa e moʻoní. ʻE ʻikai te mo mate kapau te mo kai mei he fuʻu ʻakau ko iá. Te mo hoko ʻo poto hangē ko e ʻOtuá.’ Naʻá ke mei tui ki he meʻa naʻe leaʻaki ʻe he leʻo ko iá?—

Naʻe kamata ke fiemaʻu ʻe ʻIvi ha meʻa naʻe ʻikai ke foaki ʻe he ʻOtuá kiate ia. Naʻá ne kai ha fua mei he fuʻu ʻakau naʻe tapuí. Naʻá ne ʻoange leva ha konga kia ʻĀtama. Naʻe ʻikai ke tui ʻa ʻĀtama ki he meʻa naʻe leaʻaki ʻe he ngatá. Ka, ko ʻene holi ke kau mo ʻIví naʻe mālohi ange ia ʻi heʻene ʻofa ki he ʻOtuá. Ko ia, naʻá ne kai foki mo ia mei he fuʻu ʻakaú.—Senesi 3:​1-6; 1 Timote 2:⁠14.

Ko e hā ʻa e ikuʻangá?— Naʻe hoko ʻa ʻĀtama mo ʻIvi ʻo taʻehaohaoa, tupu ʻo motuʻa peá na mate. Pea koeʻuhí naʻá na taʻehaohaoa,  naʻe taʻehaohaoa foki mo e kotoa ʻo ʻena fānaú pea faai atu pē ʻo nau motuʻa pea mate. Naʻe ʻikai ke loi ʻa e ʻOtuá! Ko e moʻuí ʻoku fakatuʻunga moʻoni ʻi he talangofua kiate iá. (Loma 5:12) ʻOku tala mai ʻe he Tohitapú kia kitaua ko e ʻāngelo naʻe loi kia ʻIví ʻoku ui ko Sētane ko e Tēvoló, pea ko e kau ʻāngelo kehe naʻe hoko ʻo koví ʻoku ui kinautolu ko e kau tēmeniō.—Semisi 2:19; Fakahā 12:⁠9.

Sai, ʻoku lava ke ke mahinoʻi ʻa e ʻuhinga naʻe hoko ai ʻo kovi ʻa e ʻāngelo lelei naʻe ngaohi ʻe he ʻOtuá?— Naʻe peheé koeʻuhi naʻe kamata ke ne fakakaukau ki ha ngaahi meʻa kovi. Naʻá ne fiemaʻu ke Fika ʻUluaki. Naʻá ne ʻilo naʻe tala ʻe he ʻOtuá kia ʻĀtama mo ʻIvi ke na maʻu fānau, pea naʻá ne fiemaʻu kotoa kinautolu ke nau lotu ange kiate ia. ʻOku fiemaʻu ʻe he Tēvoló ke ʻai ʻa e tokotaha kotoa pē ke talangataʻa kia Sihova. Ko ia, ʻokú ne feinga ke faʻo ʻa e ngaahi fakakaukau kovi ki hota ʻatamaí.—Semisi 1:​13-15.

ʻOku pehē ʻe he Tēvoló ʻoku ʻikai ha taha ʻe ʻofa moʻoni ʻia Sihova. ʻOkú ne pehē, ko koe mo aú ʻoku ʻikai te ta ʻofa ki he ʻOtuá pea ʻoku ʻikai te ta fiemaʻu moʻoni ke fai ʻa e meʻa ʻoku leaʻaki ʻe he ʻOtuá. ʻOkú ne pehē ʻokú ta talangofua pē kia Sihova ʻi he taimi ʻoku hoko ai ʻa e ngaahi meʻá kotoa ʻi he founga ʻokú ta loto ai ki aí. ʻOku moʻoni ʻa e Tēvoló? ʻOkú ta pehē?

Naʻe pehē ʻe he Faiako Lahí ko e Tēvoló ko ha tokotaha loi! Naʻe fakamoʻoniʻi ʻe Sīsū naʻá ne ʻofa moʻoni ʻia Sihova ʻaki ʻa e talangofua kiate Ia. Pea naʻe ʻikai ke talangofua pē ʻa Sīsū ki he ʻOtuá ʻi he taimi naʻe faingofua aí. Naʻá ne fai pehē maʻu pē, naʻa mo e taimi naʻe ʻai ai ʻe he kakai kehé ke faingataʻa kiate iá. Naʻá ne faimateaki kia Sihova ʻo aʻu ai pē ki heʻene maté. Ko e ʻuhinga ia naʻe fakafoki mai ai ia ʻe he ʻOtuá ki he moʻuí ke ne moʻui taʻengatá.

Ko ia ko hai te ke pehē ko hota fili lahi tahá?— ʻIo, ko Sētane ko e Tēvoló. ʻOku lava ke ke sio kiate ia?— Ko e moʻoni ʻoku ʻikai! Ka ʻokú ta ʻilo ʻokú ne ʻi ai pea ʻokú ne māʻolunga ange mo mālohi ange ʻia kitaua. Neongo ia, ko hai ʻoku māʻolunga ange ʻi he Tēvoló?— Ko Sihova ko e ʻOtuá. Ko ia, ʻokú ta ʻilo ʻoku malava ʻe he ʻOtuá ke ne maluʻi kitaua.