1, 2. ʻE lava ke tau maʻu mei fē ha hūfangaʻanga malu ʻi he ʻahó ni?

 FAKAʻUTA ATU kiate koe ʻokú ke luelue ʻi ha veʻehala ʻi ha ʻaho fakapōpōʻuli. ʻOku hoko ʻo toe fakapoʻuli ange ʻa e langí. ʻOku kamata ke tapa ʻa e ʻuhilá, pā ʻa e maná, pea tō mālohi hifo leva ʻa e ʻuhá. ʻOkú ke fakavavevave, ʻi he kumi vavale ki ha hūfangaʻanga. ʻI ai, ʻi he veʻehalá, ʻokú ke sio atu ai ki ha toitoiʻanga. ʻOku mālohi, mōmoa pea hā fakamānako mai ia. He fakamahuʻingaʻi moʻoni ē ʻe koe ʻa e feituʻu malu ko iá!

² ʻOku tau moʻui ʻi he ngaahi taimi fakapōpōʻuli. Ko e ngaahi tuʻunga ʻo e māmaní ʻoku ʻalu ia mei he kovi ki he kovi ange. Ka ʻoku ʻi ai ha toitoiʻanga malu, ko ha hūfangaʻanga ʻa ia ʻe lava ke ne tauhi kitautolu ke tau malu mei he maumau tuʻuloá. Ko e hā ia? Fakatokangaʻi ange ʻa e meʻa ʻoku akoʻi ʻe he Tohi Tapú: “Ko ʻeku lau e kia Sihova, Ko hoku hufanga ia mo hoku talitauʻanga: ko hoku ʻOtua falalaʻanga.”—Sāme 91:2.

3. ʻE lava fēfē ke tau ʻai ʻa Sihova ko hotau hūfangaʻangá?

³ Fakaʻuta atu ki he meʻa ko iá! Ko Sihova, ʻa e Tokotaha-Fakatupú mo e Hau ʻo e ʻunivēsí, ʻe lava ke ne hoko ko hotau hūfangaʻanga fakaemaluʻi. ʻE lava ke ne tauhi kitautolu ke tau malu, he ʻokú ne mālohi mamaʻo ange ʻi ha taha pē, pe  ko ha meʻa pē ʻa ia ʻe hoko mai nai kiate kitautolu. Neongo kapau ʻoku hoko ha maumau kiate kitautolu, ʻe lava ke toʻo ʻe Sihova ʻa e ngaahi nunuʻa koví kotoa. ʻE lava fēfē ke tau ʻai ʻa Sihova ko hotau hūfangaʻangá? ʻOku fiemaʻu ke tau falala kiate ia. ʻIkai ko ia pē, ko e Folofola ʻa e ʻOtuá ʻoku ekinaki mai ai kiate kitautolu: “Tauhi ai kimoutolu ʻi he ʻofa ʻa e ʻOtua.” (Siutasi 21) ʻIo, ʻoku fiemaʻu ke tau nofo maʻu ʻi he ʻofa ʻa e ʻOtuá, ʻo tauhi maʻu ha haʻi ʻofa mo ʻetau Tamai fakahēvaní. ʻE lava leva ai ke tau fakapapauʻi ko Ia ʻa hotau hūfangaʻangá. Ka ʻe lava fēfē ke tau faʻu ha haʻi pehē?

4, 5. Ko e hā ʻa e ngaahi founga ʻe niʻihi kuo fakahāhā ai ʻe Sihova ʻa ʻene ʻofa kiate kitautolú?

⁴ Ke nofo maʻu ʻi he ʻofa ʻa e ʻOtuá, ʻoku fiemaʻu ke tau mahinoʻi ʻa e anga hono fakahaaʻi ʻe Sihova ʻa ʻene ʻofa kiate kitautolú. Fakakaukau atu ki he niʻihi ʻo e ngaahi akonaki Fakatohitapu kuó ke akó ʻi he tokoni ʻa e tohi ko ení. ʻI he tuʻunga ko e Tokotaha-Fakatupú, kuo ʻomai ʻe Sihova kiate kitautolu ʻa e foʻi māmaní ko hotau ʻapi fakalata. Kuó ne fakafonu ia ʻaki ʻa e meʻakai lahi fau pea mo e vai, ngaahi koloa fakanatula, moʻui fakatoʻoaloto ʻa e fanga manú pea mo e mātanga fakaʻofoʻofa. ʻI hono tuʻunga ko e Faʻu-Tohi ʻo e Tohi Tapú, kuo fakahaaʻi mai ʻe he ʻOtuá ʻa hono huafá mo hono ngaahi ʻulungāangá kiate kitautolu. ʻIkai ngata aí, ko ʻene Folofolá ʻoku fakahaaʻi ai naʻá ne fekau mai ʻa hono ʻAlo ʻofaʻangá tonu ki he māmaní, ʻo fakaʻatā ai ʻa Sīsū ke ne faingataʻaʻia mo pekia maʻatautolu. (Sione 3:16) Pea ko e hā ʻa e ʻuhinga ʻo e meʻaʻofa ko iá kiate kitautolú? ʻOkú ne ʻomai kiate kitautolu ʻa e ʻamanaki ki ha kahaʻu fisifisimuʻa.

⁵ Ko ʻetau ʻamanaki ki he kahaʻú ʻoku toe fakatuʻunga ia ʻi he meʻa kehe kuo fai ʻe he ʻOtuá. Kuo fokotuʻu ʻe Sihova ha founga-pule fakahēvani, ko e Puleʻanga Faka-Mīsaiá. ʻE vavé ni ke ne fakangata ʻa e faingataʻá kotoa pea te ne ʻai ʻa e māmaní ke hoko ko ha palataisi. Fakakaukau ange pē! ʻE lava ke tau moʻui ʻi ai ʻi he melino mo e fiefia ʻo taʻengata. (Sāme 37:29) ʻI he taimi tatau pē, kuo ʻomai ʻe he ʻOtuá kiate kitautolu ʻa e tataki ki he founga ke moʻui ai ʻi he founga lelei taha ʻoku ala lavá he taimí ni pē. Kuó ne toe ʻomai kiate kitautolu ʻa e meʻaʻofa ko e lea ʻo lotú, ko ha laine ʻatā ʻo e fetuʻutaki mo iá. Ko e ngaahi founga siʻi pē eni kuo fakahaaʻi mai ai ʻe Sihova ʻa ʻene ʻofa ki he faʻahinga ʻo e tangatá  fakalūkufua pea kiate koe ʻi ho tuʻunga fakatāutahá.

6. ʻE anga-fēfē nai haʻo tali ki he ʻofa kuo fakahāhā ʻe Sihova kiate koé?

⁶ Ko e fehuʻi mātuʻaki mahuʻinga kiate koe ke ke fakakaukau ki aí ʻa eni: ʻE anga-fēfē haʻaku tali ʻa e ʻofa ʻa Sihová? ʻE pehē ʻe he tokolahi, “Sai, ʻoku fiemaʻu ke u totongi fakafoki ia ʻaki ʻa e ʻofa kia Sihova.” Ko e anga ia hoʻo ongoʻí? Naʻe pehē ʻe Sīsū ko e fekau ko ʻení ʻa e lahi taha ʻi he ngaahi fekaú: “Te ke ʻofa ki he ʻEiki [Sihova] ko ho ʻOtua, ʻo fai ʻaki ʻa e kotoa ʻo ho loto, mo e kotoa ʻo ho laumalie, mo e kotoa ʻo ho ʻatamai.” (Mātiu 22:37) ʻOkú ke maʻu moʻoni ʻa e ngaahi ʻuhinga lahi ke ʻofa ai kia Sihova ko e ʻOtuá. Ka ko e ongoʻi pē ʻokú ke maʻu ʻa e ʻofa ko iá ʻa e meʻa kotoa ʻoku kau ki he ʻofa kia Sihova ʻaki ʻa e kotoa ʻo ho lotó, laumālié mo e ʻatamaí?

7. ʻOku ʻi ai ha meʻa lahi ange ʻi he ʻofa ki he ʻOtuá ʻo ʻikai ko hono hokosia pē ha ongoʻí? Fakamatalaʻi.

⁷ Hangē ko ia ʻoku fakamatalaʻi ʻi he Tohi Tapú, ko e ʻofa ki he ʻOtuá ʻoku lahi ange ia ʻi ha ongoʻi pē. Ko hono moʻoní, neongo ko e ongoʻi ʻo e ʻofa kia Sihová ʻoku fiemaʻu pau, ko e ongoʻi ko iá ko e kamataʻanga pē ia ʻo e ʻofa moʻoni kiate iá. Ko ha tengaʻi ʻāpele ʻoku fiemaʻu pau ia ki he fakatupu ʻo ha fuʻu ʻāpele ʻomi fua. Kae kehe, kapau naʻá ke fiemaʻu ha foʻi ʻāpele, te ke fiemālie kapau naʻe ʻoatu pē ʻe ha taha kiate koe ha tengaʻi ʻāpele? Mole ke mamaʻo! ʻI he tuʻunga meimei tatau, ko ha ongoʻi ʻo e ʻofa kia Sihova ko e ʻOtuá ko ha kamata pē ia. ʻOku akoʻi mai ʻe he Tohi Tapú: “Ko eni ia ʻa e ʻofa ki he ʻOtua, ʻa ʻetau tauhi ki heʻene ngaahi tuʻutuʻuni. Pea ʻoku ʻikai ke fakamafasia ʻene ngaahi tuʻutuʻuni.” (1 Sione 5:​3, 4a) Ke hoko ʻo moʻoni, ko e ʻofa ki he ʻOtuá kuo pau ke ne ʻomai ha fua lelei. Kuo pau ke fakahāhā ia ʻi he ngaahi ngāué.—Mātiu 7:​16-20.

8, 9. ʻE lava fēfē ke tau fakahāhā ʻetau ʻofa mo e houngaʻia ki he ʻOtuá?

⁸ ʻOku tau fakahaaʻi ʻetau ʻofa ki he ʻOtuá ʻi he taimi ʻoku tau tauhi ai ʻene ngaahi tuʻutuʻuní pea ngāueʻaki ʻene ngaahi tefitoʻi moʻoní. ʻOku ʻikai fuʻu faingataʻa ke fai pehē. ʻI he ʻikai hoko ʻo fakamafasiá, ko e ngaahi lao ʻa Sihová ʻoku faʻufaʻu ia  ke ne tokoniʻi kitautolu ke tau moʻuiʻaki ha moʻui lelei, fiefia mo fakafiemālie. (Aisea 48:​17, 18) ʻI he moʻui ʻo fehoanakimālie mo e tataki ʻa Sihová, ʻoku tau fakahaaʻi ai ki heʻetau Tamai fakahēvaní ʻoku tau houngaʻia moʻoni ʻi he meʻa kotoa kuó ne fai maʻatautolú. Ko e meʻa fakamamahí, ko e tokosiʻi ʻaupito ʻi he māmani he ʻaho ní ʻoku nau fakahāhā ʻa e houngaʻia peheé. ʻOku ʻikai te tau loto ke hoko ʻo taʻehoungaʻia, hangē ko e kakai ʻe niʻihi naʻa nau moʻui ʻi he taimi naʻe ʻi māmani ai ʻa Sīsuú. Naʻe fakamoʻui ʻe Sīsū ʻa e kau kilia ʻe toko hongofulu, ka ko e toko taha pē naʻe foki ʻo fakamālō kiate iá. (Luke 17:​12-17) Ko e moʻoni te tau loto ke hangē ko e tokotaha houngaʻiá, ʻo ʻikai ko e toko hiva taʻehoungaʻiá!

⁹ Ko e hā leva ʻa e tuʻutuʻuni ʻa Sihova ʻoku fiemaʻu ke tau tauhí? Kuo tau lāulea ki ha niʻihi ʻo kinautolu ʻi he tohí ni, ka tau fakamanatu angé ha niʻihi siʻi. Ko hono tauhi ʻa e ngaahi tuʻutuʻuni ʻa e ʻOtuá ʻe tokoniʻi ai kitautolu ke nofo maʻu ʻi he ʻofa ʻa e ʻOtuá.

10. Fakamatalaʻi ʻa e ʻuhinga ʻoku mahuʻinga ai ke hokohoko atu ʻa hono maʻu ʻa e ʻilo fekauʻaki mo Sihova ko e ʻOtuá.

¹⁰ Ko e ako fekauʻaki mo Sihová ko ha sitepu mātuʻaki mahuʻinga ia ʻi he ʻunuʻunu ke ofi ange kiate iá. Ko ha  founga ia ʻoku ʻikai ʻaupito totonu ke tuku. Kapau naʻá ke ʻi tuʻa ʻi ha pō momoko ʻaupito ʻo fakamāfana ʻi ha afi, te ke tuku ke holo ʻa e uló pea mate leva? ʻIkai. Te ke hokohoko tolo ʻaki ʻa e fefié ʻa e afí ke ulo lahi mo vela maʻu pē. ʻOku fakafalala ʻa hoʻo moʻuí ki he ulo ʻa e afí! Hangē ko hono tafunaki ʻe he fefié ha afí, ʻoku pehē pē “ʻa e ʻiloʻi ʻo e ʻOtua” ʻokú ne ʻai maʻu pē ʻetau ʻofa kia Sihová ke mālohi.—Palovepi 2:​1-5.

11. Ko e hā ʻa e ola ʻo e meʻa naʻe akoʻi ʻe Sīsuú ki hono kau muimuí?

¹¹ Naʻe fiemaʻu ʻe Sīsū ʻa hono kau muimuí ke nau ʻai ke moʻui mo ulo lahi maʻu pē ʻenau ʻofa kia Sihova mo ʻEne Folofola mahuʻinga ʻo e moʻoní. Hili ʻene toetuʻú, naʻe akoʻi ʻe Sīsū ʻa e toko ua ʻo ʻene kau ākongá ʻo fekauʻaki mo e niʻihi ʻo e ngaahi kikite ʻi he Ngaahi Konga Tohi Tapu Faka-Hepeluú ʻa ia naʻe fakahoko ʻiate iá. Ko e hā ʻa e olá? Naʻá na pehē ai ki mui: “Hono ʻikai ne vela hota loto lolotonga ʻene talanoa mai ʻi he hala, mo ʻene vete kiate kitaua ʻa e Tohi tapu”?—Luke 24:32.

12, 13. (a) ʻI he lotolotonga ʻo e tokolahi taha ʻo e faʻahinga ʻo e tangatá he ʻaho ní, ko e hā kuo hoko ki he ʻofa ki he ʻOtuá pea ki he Tohi Tapú? (e) ʻE lava fēfē ke tau taʻofi ʻetau ʻofá mei heʻene fakaʻaʻau ke momokó?

¹² ʻI hoʻo ʻuluaki ako ki he meʻa ʻoku akoʻi moʻoni ʻe he Tohi Tapú, naʻá ke ʻiloʻi naʻe kamata ke vela ʻa ho lotó ʻi he fiefia, faivelenga pea mo e ʻofa ki he ʻOtuá? ʻOku ʻikai ha veiveiua naʻe pehē. Kuo ongoʻi ʻe he tokolahi ʻa e founga tatau. Ko e pole he taimi ní ke ʻai ʻa e ʻofa lahi ko iá ke moʻui maʻu pē pea ke tokoniʻi ia ke tupu. ʻOku ʻikai te tau loto ke muimui ʻi he ākenga ʻo e māmani he ʻaho ní. Naʻe tomuʻa tala ʻe Sīsū: “ʻE fakaaʻau ʻo momoko ʻa e ʻofa ʻa e tokolahi.” (Mātiu 24:12) ʻE lava fēfē ke ke taʻofi ʻa hoʻo ʻofa kia Sihová pea ki he ngaahi moʻoni ʻo e Tohi Tapú mei heʻene fakaʻaʻau ke momokó?

¹³ Hanganaki maʻu ʻa e ʻilo fekauʻaki mo Sihova ko e ʻOtuá mo Sīsū Kalaisí. (Sione 17:3) Fakalaulauloto, pe fakakaukau loloto, ki he meʻa ʻokú ke ako mei he Folofola ʻa e ʻOtuá, ʻo ʻeke hifo kiate koe: ‘Ko e hā ʻoku akoʻi mai ʻe he meʻá ni kiate au ʻo fekauʻaki mo Sihova ko e ʻOtuá? Ko e hā ʻa e ʻuhinga lahi ange ʻokú ne ʻomai kiate au ke ʻofa ai kiate ia ʻaki ʻa e kotoa ʻo hoku lotó, ʻatamaí mo e moʻuí?’ (1 Timote 4:15) Ko e fakalaulauloto peheé te ne ʻai hoʻo ʻofa kia Sihová ke vela lahi maʻu pē.

14. ʻOku lava fēfē ke tokoniʻi kitautolu ʻe he lotú ke ʻai ʻetau ʻofa kia Sihová ke moʻui maʻu peé?

¹⁴ Ko e toe founga ʻe taha ke ʻai ai hoʻo ʻofa kia Sihová ke vela lahi  maʻu peé ko e lotu tuʻumaʻu. (1 Tesalonaika 5:17) ʻI he Vahe 17 ʻo e tohí ni, naʻa tau ako ai ko e lotú ko ha meʻaʻofa mahuʻinga ia mei he ʻOtuá. Hangē tofu pē ko e longomoʻui ʻa e ngaahi vahaʻangatae fakaetangatá ʻi he fetuʻutaki tuʻumaʻu mo tauʻatāiná, ʻoku pehē pē ʻa e hokohoko māfana mo moʻui ʻa hotau vahaʻangatae mo Sihová ʻi he taimi ʻoku tau lotu maʻu ai pē kiate iá. ʻOku mātuʻaki mahuʻinga ke ʻoua ʻaupito te tau tuku ʻetau ngaahi lotú ke hoko ʻo fai fakafounga—ko e ngaahi lea ʻi he founga-tuʻumaʻu pē ʻa ia ʻoku tau toutou leaʻaki ʻo ʻikai ha ongoʻi moʻoni pe ko hano ʻuhinga. ʻOku fiemaʻu ke tau lea kia Sihova ʻo hangē ko e talanoa ʻa ha kiʻi tama ki ha tamai ʻofeiná. Ko e moʻoni, ʻoku tau loto ke lea fakataha mo e fakaʻapaʻapa, kae tauʻatāina, faitotonu, pea mei he lotó. (Sāme 62:8) ʻIo, ko e ako Tohi Tapu fakafoʻituituí mo e lotu fakamātoató ʻa e ongo tafaʻaki mahuʻinga ʻo ʻetau lotú, pea ʻokú na tokoniʻi kitautolu ke tau nofo maʻu ʻi he ʻofa ʻa e ʻOtuá.

15, 16. Ko e hā ʻe lava ai ke tau vakai totonu ki he ngāue malangaʻi ʻo e Puleʻangá ko ha monū pea ko ha koloá?

¹⁵ Ko e ako Tohi Tapu fakafoʻituituí mo e lea ʻo lotú ko e ongo ngāue ia ʻo e lotú ʻe lava ke tau fakahoko fakafoʻituitui. Kae kehe, tau vakai he taimí ni ki ha tafaʻaki ʻo e lotú ʻe lava ke tau fakahoko fakahāhā: ko e lea ki he niʻihi kehé fekauʻaki mo ʻetau ngaahi tuí. Kuó ke ʻosi vahevahe ʻa e ngaahi moʻoni ʻo e Tohi Tapú ki he niʻihi kehé? Kapau ko ia, kuó ke maʻu ha monū fisifisimuʻa. (Luke 1:74) ʻI he taimi ʻoku tau vahevahe atu ai ʻa e ngaahi moʻoni kuo tau ako fekauʻaki mo Sihova ko e ʻOtuá, ʻoku tau fakahoko ai ha konga mahuʻinga ʻaupito ʻoku ʻomai ki he kau Kalisitiane moʻoní kotoa—ʻa ia ko hono malangaʻi ʻa e ongoongo lelei ʻo e Puleʻanga ʻo e ʻOtuá.—Mātiu 24:14; 28:​19, 20.

¹⁶ Naʻe vakai ʻa e ʻapositolo ko Paulá ki heʻene ngāue fakafaifekaú ko e meʻa mahuʻinga, ʻo ui ia ko ha koloa. (2 Kolinito 4:7) Ko e talanoa ki he kakaí fekauʻaki mo Sihova ko e ʻOtuá mo ʻene ngaahi taumuʻá ʻa e ngāue lelei taha ʻe lava ke ke faí. Ko e ngāue ia ki he Pule lelei tahá, pea ʻoku ʻomai ai ʻa e ngaahi ʻaonga lelei taha ʻoku ala lavá. ʻI he kau he ngāue ko ení, ʻokú ke tokoniʻi ai ʻa e kakai loto-totonú ke nau ʻunuʻunu ofi ki heʻetau Tamai fakahēvaní pea ke kamata fononga ai ʻi he hala ki he moʻui taʻengatá! Ko e hā ʻa e  ngāue ʻe lava ke toe fakafiemālie ange hení? ʻIkai ko ia pē, ko e faifakamoʻoni fekauʻaki mo Sihova mo ʻene Folofolá ʻoku fakalahi ai ʻa hoʻo tuí tonu pea fakamālohiʻi ai ʻa hoʻo ʻofa kiate iá. Pea ʻoku fakahoungaʻi lahi ʻe Sihova hoʻo ngaahi feingá. (Hepelu 6:10) Ko e hanganaki femoʻuekina ʻi he ngāue peheé ʻoku tokoniʻi ai koe ke ke nofo maʻu ʻi he ʻofa ʻa e ʻOtuá.—1 Kolinito 15:58.

17. Ko e hā ʻoku fakavavevave ai he ʻahó ni ʻa e ngāue fakafaifekau faka-Kalisitiané?

 ¹⁷ ʻOku mahuʻinga ke manatuʻi ko e ngāue malangaʻi ʻo e Puleʻangá ʻoku fakavavevave. ʻOku pehē ʻe he Tohi Tapú: “Malangaʻi ʻa e folofolá, ʻo fakahoko fakavavevave ia.” (2 Timote 4:​2, NW) Ko e hā ʻoku mātuʻaki fakavavevave ai hono fai eni ʻi he ʻaho ní? ʻOku tala mai ʻe he Folofola ʻa e ʻOtuá kiate kitautolu: “Oku ofi ae aho lahi o Jihova, io, oku ofi ia, bea oku fakatootoo mai aubito.” (Sefanaia 1:​14, PM) ʻIo, ʻoku hoko vave mai ʻa e taimi ʻe ʻomai ai ʻe Sihova ʻa e ngataʻanga ki he fokotuʻutuʻu kotoa ko eni ʻo e ngaahi meʻá. ʻOku fiemaʻu ke fai ha fakatokanga ki he kakaí! ʻOku fiemaʻu ke nau ʻiloʻi ko e taimi eni ke fili ai ʻa Sihova ke hoko ko honau Haú. Ko e ngataʻangá “ʻe ʻikai tuai.”—Hapakuke 2:3.

18. Ko e hā ʻoku totonu ai ke tau lotu fakahāhā kia Sihova ʻi he feohi mo e kau Kalisitiane moʻoní?

¹⁸ ʻOku fiemaʻu mai ʻe Sihova ke tau lotu fakahāhā kiate ia ʻi he feohi mo e kau Kalisitiane moʻoní. Ko e ʻuhinga ia ʻoku pehē ai ʻe heʻene Folofolá: “Ke tau fetokangaʻaki, ke fefakaʻaiʻaiʻaki ʻa kitautolu ki he feʻofaʻaki mo e ngaue lelei: ʻo ʻoua naʻa tau liʻaki ʻetau ngaahi fakataha, ʻo hange ko e anga ʻo e niʻihi; ka mou feenginakiʻaki, pea ʻasili he ʻoku mou sio ki he fakaofiofi mai ʻa e ʻaho.” (Hepelu 10:​24, 25) ʻI he taimi ʻoku tau fakatahataha ai mo e ngaahi kaungātuí ʻi he ngaahi fakataha faka-Kalisitiané, ʻoku tau maʻu ai ha faingamālie fisifisimuʻa ke fakahīkihiki mo lotu ki hotau ʻOtua ʻofeiná. ʻOku tau toe felangahakeʻaki ai mo fefakalototoʻaʻaki.

19. ʻE lava fēfē ke tau ngāue ke fakaivimālohiʻi ʻa e ngaahi haʻi ʻo e ʻofá ʻi he fakatahaʻanga Kalisitiané?

¹⁹ ʻI heʻetau feohi mo e kau lotu kehe ʻa Sihová, ʻoku tau fakaivimālohiʻi ai ʻa e ngaahi haʻi ʻo e ʻofa mo e kaumeʻa ʻi he fakatahaʻangá. ʻOku mahuʻinga ke tau fefakasioʻaki ki he lelei ʻiate kitautolú, ʻo hangē ko e fakasio mai ʻa Sihova ki heʻetau leleí. ʻOua ʻe ʻamanekina ʻa e haohaoá mei ho kaungātuí. Manatuʻi ko e tokotaha kotoa ʻoku ʻi he ngaahi tuʻunga kehekehe ʻo e tupu fakalaumālié pea ko e tokotaha taki taha ʻo kitautolú ʻokú ne fai ʻa e ngaahi fehālaaki. (Kolose 3:13) Feinga ke langa hake ʻa e ngaahi kaumeʻa vāofi mo e faʻahinga ʻoku nau ʻofa lahi kia Sihová, pea te ke ʻilo ai ʻokú ke tupu fakalaumālie. ʻIo, ko e lotu kia Sihova  fakataha mo ho fanga tokoua mo e fanga tuofāfine fakalaumālié ʻe tokoniʻi ai koe ke ke nofo maʻu ʻi he ʻofa ʻa e ʻOtuá. ʻOku anga-fēfē hono fakapaleʻi ʻe Sihova ʻa e faʻahinga ʻoku nau lotu faitōnunga kiate ia pea nofo maʻu ʻi heʻene ʻofá?

20, 21. Ko e hā ʻa e “moʻui moʻoni,” pea ko e hā ko ha ʻamanaki fisifisimuʻa ai iá?

²⁰ ʻOku fakapaleʻi ʻe Sihova ʻa ʻene kau sevāniti faitōnungá ʻaki ʻa e moʻuí, ka ko e faʻahinga moʻui fēfē? Sai, ʻokú ke moʻui moʻoni he taimí ni? Ko e tokolahi taha ʻo kitautolú te tau pehē ko e talí ʻoku hā mahino. He ko ē, ʻoku tau mānava, ʻoku tau kai pea ʻoku tau inu. ʻOku pau moʻoni pē ʻoku tau moʻui. Pea ʻi hotau ngaahi mōmeniti fakafiefia angé, ʻe aʻu nai ʻo tau pehē, “Sai ko e moʻui moʻoní eni!” Kae kehe, ʻoku fakahaaʻi ʻe he Tohi Tapú ʻi ha ʻuhinga mahuʻinga, ʻoku ʻikai ha tangata he ʻahó ni ʻoku moʻui moʻoni.

²¹ ʻOku ekinaki mai ʻa e Folofola ʻa e ʻOtuá kiate kitautolu ke “puke ki he moʻui moʻoni.” (1 Timote 6:19) ʻOku fakahaaʻi ʻi he ngaahi lea ko iá ko e “moʻui moʻoni” ko ha meʻa ia ʻoku tau ʻamanaki ke maʻu ʻi he kahaʻú. ʻIo, ʻi he taimi ʻo ʻetau haohaoá, te tau moʻui ai ʻi he ʻuhinga kakato taha ʻo e foʻi leá, he te tau moʻui ʻo hangē ko ia naʻe muʻaki fakataumuʻa ʻe he ʻOtuá ke tau moʻui aí. ʻI he taimi te tau nofo ai ʻi ha māmani palataisi ʻi he moʻui lelei haohaoa, melino, mo e fiefiá, te tau toki maʻu ai ʻa e “moʻui moʻoni”—ko e moʻui taʻengatá. (1 Timote 6:12) ʻIkai ko ha ʻamanaki fisifisimuʻa ia?

22. ʻE lava fēfē ke ke “puke ki he moʻui moʻoni”?

²² ʻE lava fēfē ke tau “puke ki he moʻui moʻoni”? ʻI he potutohi tatau, naʻe ekinaki ai ʻa Paula ki he kau Kalisitiané ke nau “ngāue ʻaonga” pea “ke nau koloaʻia ʻi he ngāue lelei.” (1 Timote 6:18) ʻOku hā mahino leva, ʻoku fakatuʻunga ʻa e meʻa lahi ʻi he founga ʻo ʻetau ngāueʻaki ʻa e ngaahi moʻoni kuo tau ako mei he Tohi Tapú. Ka naʻe ʻuhinga ʻa Paulá ʻoku tau maʻu ʻi he ngāué ʻa e “moʻui moʻoni” ʻaki hono fakahoko ʻa e ngaahi ngāue leleí? ʻIkai, he ko e ngaahi ʻamanaki fisifisimuʻa peheé ʻoku fakatuʻunga moʻoni ia ʻi heʻetau maʻu ʻa e “ʻofa maʻataʻatā” mei he ʻOtuá. (Loma 5:​15, NW) Kae kehe, ʻoku fiefia ʻa Sihova ʻi hono fakapaleʻi ʻa e  faʻahinga ʻoku nau tauhi faitōnunga kiate iá. ʻOkú ne loto ke vakai mai ʻokú ke moʻui ʻi he “moʻui moʻoni.” Ko ha moʻui fiefia, melino mo taʻengata pehē ʻoku toka mei muʻa ki he faʻahinga ʻoku nau nofo maʻu ʻi he ʻofa ʻa e ʻOtuá.

23. Ko e hā ʻoku fiemaʻu pau ai ke nofo maʻu ʻi he ʻofa ʻa e ʻOtuá?

²³ Ko kitautolu taki taha ʻoku lelei ke tau ʻeke hifo kiate kitautolu, ‘ʻOku ou lotu ki he ʻOtuá ʻi he founga kuó ne fokotuʻu ʻi he Tohi Tapú?’ Kapau ʻoku tau fakapapauʻi ʻi he ʻaho ki he ʻaho, ko e talí ko e ʻio, tā ʻoku tau ʻi he hala totonú leva. ʻE lava ke tau tuipau ko Sihova ʻa hotau hūfangaʻangá. Te ne tauhi ke malu ʻa ʻene kakai faitōnungá ʻi he ngaahi ʻaho fakaʻosi faingataʻa ʻo e fokotuʻutuʻu motuʻa ko eni ʻo e ngaahi meʻá. ʻE toe fakahaofi kitautolu ʻe Sihova ki he fokotuʻutuʻu foʻou lāngilangiʻia ʻo e ngaahi meʻá ʻoku ofi he taimi ní. He fiefia ē ko kitautolu ke hokosia ʻa e taimi ko iá! Pea he fiefia ē ko kitautolu ʻi heʻetau fai ʻa e ngaahi fili totonú lolotonga ʻa e ngaahi ʻaho fakaʻosi ko ení! Kapau ʻokú ke fai ʻa e ngaahi fili ko iá he taimí ni, te ke maʻu ai ʻa e “moʻui moʻoni,” ʻa e moʻui ʻi he tuʻunga naʻe ʻuhinga ki ai ʻa Sihova ko e ʻOtuá, ʻi he kotoa ʻo ʻitānití!