15-нҗи хекая

Лутуң аялы ызына серетди

ЛУТ өз машгаласы хем-де Ыбрайым билен Кенган юрдунда яшаярды. Бир гезек Ыбрайым Лута йүзленип: «Бу ер бизиң малларымыз үчин азлык эдйәр. Хайыш эдйәрин, менден айрыл. Эгер сен бир тарапа гитсең, мен башга тарапа гидейин» дийди.

Лут юрда гөз айлады. Ол бир оңат ер гөрди. Ол ерде сув көпди, маллар үчин от барды. Бу ер Иордан җүлгесиди. Лут машгаласы билен әхли малларыны алып, шол ере уграды. Ахыры олар Содом шәхеринде ерлешдилер.

Содомың яшайҗылары гаты эрбетди. Бу Луты гынандырярды, себәби онуң өзи говы адамды. Бу Худайы-да гынандырярды. Ахыры Худай Содомың ве гоңшы шәхери Гоморраның яшайҗыларыны ёк этмекчи болды, себәби олар көп эрбет иш эдйәрдилер. Бу барада Лута дуйдурмак үчин ики перишдәни ёллады.

Перишделер Лута: «Аялыңы, ики гызыңы ал-да, бу ерден чалтрак гит!» дийдилер. Лут ве онуң машгаласы ховлукмаярды, шонуң үчин перишделер оларың элинден тутуп, шәхерден чыкармалы болдулар. Соңра бир перишде: «Җаныңызы гутармак үчин гачың, ызыңыза серетмәң. Хеләк болмаз ялы, даглара гачың!» дийди.

Лут ве онуң гызлары гулак асып, Содом шәхеринден чыкдылар. Олар бирҗигем сәгинмедилер ве ызларына-да серетмедилер. Эмма Лутуң аялы гулак асмады. Олар Содомдан бираз араны ачанда, Лутуң аялы сәгинип, ызына серетди. Шол пурсат ол дуз сүтүнине өврүлди. Оны суратда гөрйәңми?

Бу бизе говы сапак болуп билер. Худай гулак асян адамлары халас эдип, гулак асмаянлары болса, ёк эдер.

Барлык 13:5—13; 18:20—33; 19:1—29; Лука 17:28—32; 2 Петрус 2:6—8.